Jaan 9

Nyɔɔlɔ 'nɔɔa' ‑bɛ 'ü ‑gua' ɔ Jesu 'pʋɔa'

Jaan 8.12; Marëkë 8.22-25

1Jesu ‑sööö ɩ 'ɔnya 'jä nyɔɔ 'doo 'ü ‑gua' 'ɔɔn 'ɔ 'nɔɔ. 2'Ɔa 'wʋnyɛrɛnyüü nya 'bete 'ɔɔn: «Rabii#9.2 Rabii: Ebrööwii 'lɩ 'iibä: «'Kpɩkpɩanyɔɔ». Juifëa ‑dɔa 'mlɩ ‑ama 'trɛɛ 'kpɩkpɩanyɔɔ nɩ, ‑kä ‑mä 'daa «Rabbi» 'lɩträäräkʋa ‑gʋ., dɛplɛɛ kä ‑gʋ 'ü ‑gu nyɔɔlɔ kʋa' ‑pɩ ‑bɛ 'ɔɔ 'nɔɔ le? ‑Mɔplɛɛ nʋ ‑balʋ le? 'Ɔɔ ‑ale nyüülü ‑gua' 'ɔɔn#9.2 Ɛgësɔɔdë 20.5.?» 3'Iibäa' Jesu nɩ: «‑Mää kä 'ɔɔ 'aiɛ nyüülü ‑gua' 'ɔɔn 'ü nʋ ‑balʋ ‑a, ‑maa Nyɔsʋa 'mä 'ɔa 'kläa 'mlɩ 'jrʋpa ‑fɛɛɛrɛ, 'ümä 'ään 'jä. 4'Sɩrɩ ‑srɩ ‑ka bäa' 'lɩ, 'n kä 'mä nyɔɔlɔ blɔa' 'mɩ 'ɔa 'jrʋpa ‑fɛ. ‑Gbia jö, äma nyaa' ka, nyɔɔ ‑kanyɩ ‑fɛ 'jrʋpa ‑a. 5'N ‑ka bäa' 'pläa 'mlɩ nɩ, 'mɔɔ bä 'pläa ‑srɩ.» 6'Ɔ bɩa wii 'papakʋ nɩ, 'ɔnya 'pa ‑tʋtʋ 'wʋ ‑tatʋ. 'Ɔnya 'tara 'ia paplu 'nɔnɔnyɔɔlɔa 'nyü ‑gälɩ, 7'ɔnya ‑gbala 'ɔɔn: «Mi ‑a ‑futro 'nɩsrolä 'ü 'daraa' Siloee#9.7 Siloee: 'A 'nɩlɩ bäa' Jerusalɛɛmë i 'pʋɔa' nyüü. ‑Tetua ‑glɩsɩglɩsɩ ma jrälɩ nɩ, 'ii 'ü 'pree ‑bɛ 'ü nö dii 'kɔkɔmlɛ. 'I 'paa 'üün Nyɔsʋaa 'papanɩa ‑gä plɛ., 'äa 'mlɩ». Siloeea ‑gbaa bä: «Bɔblɔnyɔɔ». Nyɔɔlɔ nya mi 'ɔnya ‑futro 'lɩ; 'ɔ mia' dɛrɩ 'blöö 'ɔ 'jääkä.

8'Ɔa ‑mölöö nyra nyüülü jre käa' 'ɔɔn, 'sɩrɩ 'ɔ ma ‑sɛɛa' mölii nɩ, 'iibä: «‑Mää ‑mɔlɔ ma kʋa' ‑pɩ ɔ ma ‑sɛɛa' mölii ‑mää 'ɔɔn ‑a?» 9‑Mölöö nö: «'Ɔɔ bäsaa» ‑bɛ ‑mülü nö: «'Büa! Jajra 'ü jajra!» 'Ɔa 'mʋgbɛ nö: «'Mɔɔ bäsaa.» 10'Ünya 'bete 'ɔɔn: «‑Asɩ nʋ ‑bɛ ‑jääkä le?» 11'Ɔ ‑nëma: «Nyɔɔlɔ 'ü 'daraa' Jesu, 'ɔɔ 'tara 'na 'nyü 'klɩ paplu, 'ɔ ‑nëma: ‹Mi ‑a ‑futro 'nɩsrolä 'ü 'daraa' Siloee, 'äa 'mlɩ.› 'Nyaa mi 'nyaa ‑futro 'lɩ, 'na 'nyü nya ‑jieroklɩ.» 12'Ünya 'bete 'ɔɔn: «‑A 'plɛɛ nyɔɔlɔ bä le?» 'Ɔ ‑nëma: «‑Plɩɩ 'lɩ 'ɔ bäa' 'nyɩ 'lɩ ‑a jre.»

'Nɔnɔnyɔɔlɔ Farisinyüü 'betea'

Jaan 10.37-38; Esaii 6.9-10; Lukë 6.22-23

13'Ünya fa nyɔɔlɔ ma 'nɔɔa' Farisinyüüa ‑nyɛɛ. 14‑Srɩlɩ kä 'mlɩ Jesu nʋa' paplu ‑bɛ 'ɔ ‑jiea' nyɔɔlɔa 'nyü nɩ, ‑fʋflʋpasrɩ#9.14 Juifë ‑dɔ nɩnɩa nyɔɔ 'nyɩ ‑fɛ 'jrʋpa ‑fʋflʋpasrɩ 'lɩ. 'Ia ‑gʋ nyɔɔa 'pʋpʋɔkʋ nyra ‑tʋtʋa susokʋ bä bɩa 'jrʋpa; 'i ‑siie. bäsaa. 15'Ɔ 'tɔa' Farisinyüü nya 'bete 'ɔɔn 'sɩrɩ 'ɔ nʋa' 'käjädɛɛ. 'Ɔnya ‑gbala 'üün: «'Na 'nyü 'klɩ 'ɔ 'tara paplu, 'n ‑futoa' 'nyaa 'jäkä.» 16Nyɔɔlɔ nʋa' 'saa 'ɔ ‑gbalaa' 'üün nɩ, 'iibäa' Farisinyüü 'doorodoo nɩ: «‑Mää Nyɔsʋa 'nyɩ nyɔɔlɔ kʋa' ‑pɩ blɔ; 'ɔnyɩ ‑träärälɩ ‑fʋflʋpasrɩ ‑a.» ‑Mölöö nö: «‑Balʋnyɔɔ 'plɛɛ 'mä 'samaa ‑saragbia tielɛ nʋ le?» 'Ünya 'bölötɩa. 17'Ünya 'bete 'nɔnɔnyɔɔlɔ: «‑Mɔ kä 'nyü 'ɔ ‑jiea' nɩ, ‑asɩ ‑gbaaa' 'ɔa ‑gʋ le?» 'Iibäa' 'ɔɔn: «Nyɔsʋaamlɩpalanyɔɔ 'ɔ bä.» 18'Sɩrɩ nyɔɔlɔ 'mä kä 'nɔɔ ‑bɛ 'ɔmä 'sɔɔwʋ 'käjä nɩ, juifë 'nyɩ 'iin wii ‑a 'dara. 'Ünya mi 'ünya ja nyüülü ‑gua' 'ɔɔn. 19'Ünya 'bete 'üün: «'Ana 'jʋlɔ 'a 'daaa' ɔ 'nɔɔa' nyɔkɔwlaa 'wʋ, 'ɔɔ kʋ ‑pɩ? ‑Bɛ ‑asɩ 'i nʋ ‑bɛ 'ɔɔ 'jääkä le?» 20'Iibäa' 'ɔa tʋɩɩ nɩ: «Wiili a jrea': ana 'jʋ bäsaa, a ‑gua' 'ɔɔn 'ɔ 'nɔɔ, 21‑maa 'sɩrɩ 'ɔmä ‑plɩɩ 'käjä, 'aiɛ nyɔɔlɔ ‑jiea' 'ɔa 'nyü nɩ, anyɩ 'iin jre ‑a jre. 'Ba 'bete 'ɔa 'mʋgbɛ, ‑mää nyʋklɔ 'ɔnyɩ bä; 'ɔnya 'lɩsaa.» 22Juifëa ŋalɛa ‑gʋ nyɔɔlɔa tʋɩɩ nʋ 'saa 'ü 'pawii. 'Be 'ü plaa' 'sraa nɩ, 'ü nɩnɩa nyɔɔlɔ 'mäa' 'daa Jesu bä 'Kriisë nɩ, 'ünya 'ɔɔn 'üa 'sraaplanyuku 'wʋ prɛa#9.22 'Üma prɛrɛ nyɔɔ 'üa 'wlitraranyuköli nɩ, nyüü ma 'jä 'ɔɔn jäjänyɔɔ 'ü 'dara 'ɔɔn. 'Ü ‑kanyɩ 'dara 'ɔɔn nyɔɔ ‑a.. 23'A 'ia ‑gʋ 'ɔa tʋɩɩ 'daa: «'Ba 'bete 'ɔa 'mʋgbɛ, 'ɔ ‑kanyɩ nyʋklɔ ‑a bä.»

24Farisinyüü nya 'patä 'ünya we nyɔɔlɔ, 'iibä: «Nyɔsʋaa 'nyrɩklɩa ‑gʋ 'salɩ 'cɩcasa. A jre 'iin 'sɩrɩ nyɔɔlɔ bäa' ‑balʋnyɔɔ.» 25Nyɔɔlɔ ‑nëma: «Ɔma bä ‑balʋnyɔɔ 'nyɩ 'iin jre ‑a jre; waklöö 'döö 'n jre: 'maa 'nyɩ 'jäkä ‑a, ‑maa 'köklesaplɩɩ 'n 'jääkä.» 26'Iibäa' 'üün nɩ: «Dɛplɛɛ 'ɔ nʋ ‑mɩ ‑gba le? ‑Asɩ 'ɔ nʋ ‑na 'nyü ‑jie dɛɛ le?» 27'Iibäa' nyɔɔlɔ nɩ: «'Nyaa ɩ 'amɩ 'iin ‑gbala, 'anyɩ 'mɩ 'nyakli ‑a po; 'iɛ 'a ‑ka 'betre 'mɩ 'iin 'lɩ le? ‑Ale 'a 'bata 'amä bɩa 'ɔa 'wʋnyɛrɛnyüü bä?» 28'Ünya ‑jejre 'ɔɔn ‑bɛ 'ü nö: «‑Mɔ bä 'ɔa 'wʋnyɛrɛnyɔɔ, ‑maa amɔlɔ nɩ, Moisëa 'wʋnyɛrɛnyüü a bä. 29Wiili a jrea' Moisë Nyɔsʋa 'pala wii ‑gba, ‑maa ‑mɔlɔ kʋa' ‑pɩ, anyɩ 'ɔa sɔfa ‑a jre.» 30'Iibäa' nyɔɔlɔ nɩ: «'A wiili kalaa' 'mɩ plɛklɩ, 'anyɩ 'ɔa sɔfa ‑a jre, ‑bɛ 'ɔɔ ‑jie 'na 'nyü. 31Ana 'fɩɔ jre 'iin 'sɩrɩ Nyɔsʋa 'nyɩ 'saa ‑balʋnyɔɔ ‑gälɩ; ‑maa nyɔɔ ma 'bʋala 'ɔɔn, ‑bɛ ɔma nʋ wiili 'ɔɔ Nyɔsʋa 'bataa' nɩ, 'a 'ia nyɔɔlɔ 'ɔ 'saa ‑gälɩ. 32A ‑kaapɩɔ 'nu ‑maa nyɔɔ ‑jie nyɔɔ 'nɔɔa' 'ɔa nyɔkɔwlaa 'wʋ, 'ɔa 'nyü 'klɩ. 33Nyɔɔlɔ kʋa' ‑pɩ ma 'nyɩ Nyɔsʋaa ‑nyɛɛ ‑a sɔ ɩ nɩ, 'ɔ ‑nëmä dɛɛ ‑a nʋ.» 34'Iibäa' 'üün nɩ: «‑Na 'fɩɔ ‑glooro ‑balʋ 'lɩ, ‑bɛ ‑nö ‑mä amɩ 'kpɩa?» 'Ünya prɛ 'ɔɔn.

35Jesu 'nua' 'sɩrɩ Farisinyüü prɛa' nyɔɔlɔ nɩ, 'ü traraa' 'ɔnya 'bete 'ɔɔn: «Toro Nyɔsʋaa 'Jʋ#9.35 Nyɔsʋaa 'Jʋ: Grɛɛkë kätɩpɔɔkɩ ‑mɩdooa 'mlɩ 'i ‑jɩjra: Nyɔɔa 'Jʋ. plɛ?» 36Nyɔɔlɔ ‑nëma: «'Pläkänyɔɔ o, nyɔɔ 'plɛɛ 'ɔ bä, ‑bɛ 'mä 'ɔɔn plɛtoro le?» 37'Iibäa' Jesu nɩ: «‑Nya 'ɔɔn 'jä, nyɔɔlɔ dɛtrɛa' ‑mɩ ‑gba 'ɔ bäsaa.» 38Nyɔɔlɔ ‑nëma: «'Pläkänyɔɔ, 'n toro ‑mɩ plɛ.» 'Ɔnya 'pa Jesua 'klɔɔtrʋ kotifli. 39Jesu ‑nëma: «‑Gäa ‑gʋ 'n ji ‑taa 'plälä kʋa' ‑pɩ 'äa 'mlɩ, 'kä ‑mülü 'nyɩ 'jäa' 'kä 'mä 'käjä, ‑bɛ ‑mülü 'jääa' 'kä 'mä 'nɔɔ.» 40Farisinyüü 'doorodoolü nyra 'ɔɔn bä ɩa' ‑plɩɩ 'nua' 'iin 'wli 'ünya 'bete 'ɔɔn: «A 'nɔɔ bɩaa?» 41'Iibäa' Jesu nɩ: «'Ama 'nɔɔ ɩ nɩ, ‑balʋ ‑nëmä ɩ 'amɩ 'lɩ ‑a bä, ‑maa 'a nɩnɩa: ‹A 'jääkä›, 'a 'ia ‑gʋ 'ana ‑balʋ kʋ 'amɩ ‑gälɩ.»

Currently Selected:

Jaan 9: Bakwé

Highlight

Copy