Jaan 11

Jesua ‑bei Lasaalɔ jäa' ‑bɛ 'ɔ tɛrɛa' 'kä

Lukë 10.38-42; Jaan 5.21,26-29; 6.40

1‑Wusublanyɔɔ 'doo bä kä bätälä 'ü 'daraa' Betanii, 'ɔɔ 'ü 'dara Lasaa#11.1 Lasaa: Grɛɛkëwii 'lɩ nɩ, 'iibä «Eleasaarë» 'ia ‑gbaa bä «Nyɔsʋa jö amɩ ‑gba.». 'A bätäläa 'mlɩa 'yörü Marii nyra 'ɔa ‑wladia Marëtë bä#11.1 Jaan 12.1-8; Lukë 10.38-42.. 2'A Mariilɔ, 'ɔɔ ‑gblɔɔkä 'Pläkänyɔɔa bei ‑gälɩ ‑daŋlʋɩnɩ kä, 'ɔnya nʋ 'ɔa 'ŋuei 'ɔnya wɔpɔ 'iin; 'ɔa ‑wlajʋ bä Lasaa 'ɔɔ ‑wusu 'blaa. 3'Ɔa ‑wlayörü nya blɔ nyüü Jesu dɛrɩ, 'ünya ‑gbala 'ɔɔn: «'Pläkänyɔɔ, nyɔɔlɔ ‑waa' 'saa 'ɔnyɩ ‑ya ‑a ‑ya.» 4Jesu 'nua' 'iin 'wli, 'ɔ ‑nëma: «‑Wusulu 'blaaa' 'ɔɔn nɩ, 'ɔ ‑nëmä jä ‑a jä. ‑Maa Nyɔsʋaa 'nyrɩ 'mä 'bʋa 'ia ‑wusu bäsaa, 'ümä Nyɔsʋaa 'Jʋ 'bʋala.»

5‑Bɛ Jesu ‑wa Marëtë, 'ɔa ‑wladia Marii nyra Lasaa. 6'Taɩn 'lɩ 'ü ‑gbalaa' Jesu Lasaa ‑wusua ‑gä nɩ, 'ɔ ‑si ‑tɛ 'lɩ 'ɔ bä ɩa' jrüü 'sɔɔ. 7'I ‑sia' nɩ, 'ɔnya ‑gbala 'ɔa 'wʋnyɛrɛnyüü: «A 'blöö Judee dɛrɩ!» 8'Iibäa' 'üün nɩ: «Rabii, juifëlë 'daaa' ‑plɩɩ 'ümä ‑mɩ 'bla ‑taa jrüülüa 'mlɩ nɩ, ‑nya ‑trɔ; 'ii ‑daa ‑mä 'sɔɔ dɛrɩ 'blöö?» 9'Iibäa' Jesu nɩ: «‑Srɩ 'nyɩ ‑gliiibei ‑pʋ ‑bɛ 'sɔɔa kä? Nyɔɔ ma 'nyɛ ‑srɩwla nɩ, 'ɔnyɩ ‑gbɔɔlɔ dɛɛ 'klɩ ‑a, 'be 'ɔ 'jää 'pläa 'mlɩa ‑srɩ 'wʋ. 10‑Maa nyɔɔ ma 'nyɛ ‑gbiara nɩ, 'ɔ ‑gbɔgblɔ dii 'klɩ, 'be 'ɔnyɩ ‑srɩ 'klɩ ‑a bä.»

11'Ɔ bɩaa' 'lɩsasakʋ nɩ, 'ɔnya ‑gbala 'üün: «'Mʋmɔ ana ‑bei Lasaa 'mʋmɔ, ‑maa 'nyaa 'ɔɔn 'kätɛrɛa.» 12'Iibäa' 'ɔa 'wʋnyɛrɛnyüü nɩ: «'Pläkänyɔɔ, ima 'daa 'mʋmɔ 'ɔ 'mʋmɔ 'ɔnya 'pʋa.» 13'Mʋmʋlʋ kä ‑gä Jesu 'paa' nɩ, jäjäkʋ 'ɔ 'daa, ‑maa 'üa plɛɛ 'tasɩrɩa 'mʋmɔ. 14Jesu nya ‑gbala 'üün: «Lasaa 'a jä! 15'Nyɩa' ‑plɩɩ bä ‑bɛ 'ɔ jäa' nɩ, 'i kä 'mɩ 'tʋ 'ana ‑gʋ 'amä 'mɩ plɛtoro. 'Ba ji amä 'lɩ mi.» 16'Ɔ nʋa' ‑plɩɩ 'saa 'ɔ 'paa' wii nɩ, Tomaalɔ 'ü 'daraa' Didimë#11.16 Didimë: Grɛɛkëwii 'lɩ nɩ, 'ia ‑gba bä «'pou». nɩ, 'ɔnya ‑gbala Jesua 'wʋnyɛrɛnyüü ‑mülü: «A mi, a nyra 'ɔɔn 'mä 'wʋjärä!»

Jesu bä 'kubresɔsɔkʋ nyra 'klä

17Lasaa ‑trääräa' 'ia jrüü mlɔɔ ‑bɛ Jesu 'tɔ Betanii#11.17 Juifëa 'kpɩkpɩanyüü nɩnɩa, nyɔɔ ma jä nɩ, 'ɔa ‑susu kʋä 'ɔɔn ‑gba jrüü tää. 'Ia jrüü tää ma jrälɩ ‑bɛ 'ɔma 'nyɩ 'wʋ ‑a sɔ nɩ, 'ɔ ‑ka ‑nëmä 'wʋ ‑a sɔ.. 18Sɔ Betanii ‑a mi Jerusalɛɛmë 'inyɩ 'lɩdɛrɩ ‑a tʋŋlɔ, 'i 'mrɛɛ 'i jrä kilomɛtrë tää#11.18 kilomɛtrë tää: Grɛɛkëwii nö: «sëtadëa ‑pʋ ‑bɛ ‑gböö». Sëtadë 'dee bä 'mɛtrëa ‑glʋɩ ‑uunmlɔɔ ‑bɛ ‑gböö (185).. 19Juifë 'kɔkɔmlɛ ji Marëtë nyra Marii 'trɛɛ 'üa ‑wlajʋlɔ jäa' 'ɔa ‑gʋ. 20Marëtë 'nua' Jesua jijiwii 'wli nɩ, 'ɔnya 'jrara 'ɔɔn 'klɩ. 'Ia 'taɩn 'lɩ Marii bä nyüköli. 21'Iibäa' Marëtë nɩ: «'Pläkänyɔɔ, ‑ama bä ɩ ‑tɛ 'na ‑wlajʋ ‑nëmä ɩ jä ‑a jä. 22‑Maa 'n jre 'iin dɛɛ ‑nëmäa' Nyɔsʋa 'lɩ 'betre, 'köklesa 'ɔnya ‑mɩ 'ɛɛn ‑nyɩa.» 23Jesu nya ‑gbala 'ɔɔn: «‑Na ‑wlajʋ nya 'kubre sɔa.» 24'Iibäa' Marëtë nɩ: «'N jre 'iin 'sɩrɩ 'ɔmäa' ‑srɩɩ 'kubre sɔ 'pläa bɩarafa 'wʋ.»

25Jesu nya ‑gbala 'ɔɔn: «'Mɔɔ bä 'kubreasɔsɔkʋ, 'nyaa bä 'klä. Nyɔɔlɔ toroa' 'mɩ plɛ nɩ, 'ɔnya 'lɩbäa ‑bakää 'ɔ jä. 26‑Bɛ nyɔɔ ka bäa' 'lɩ, ‑bɛ 'ɔ toroa' 'mɩ plɛ nɩ, jäjä ‑nëmä 'ɔɔn dɛrɩ ‑a kala 'plɔʋ. ‑Daara ‑plɩɩ 'iin wii?» 27'Iibäa' Marëtë nɩ: «‑Yɛɛ! 'Pläkänyɔɔ, 'n jre 'iin ‑mɔ bä 'Kriisë, Nyɔsʋaa 'Jʋlɔ nëmäa' 'pläa 'mlɩ ji.»

28Marëtë nʋa' ‑plɩɩ 'saa 'ɔ 'saalɩ nɩ, 'ɔnya mi, 'ɔnya we 'ɔa ‑wladia Marii. 'Ünya bereklɩ, 'ɔnya ‑gbala 'ɔɔn: «'Kpɩkpɩanyɔɔ 'a ji, 'ɔ 'bete ‑na ‑gʋ.» 29Marii 'nua' 'iin 'wli, 'ɔnya sɔwʋ 'köklesa 'ɔnya mi 'lɩ. 30'Ia 'taɩn 'lɩ Jesu ‑kaaŋlʋ bätä ‑a 'jra, ‑tɛ 'lɩ 'ɔɔ ‑bɛ Marëtë traraa', 'ii 'ɔ ‑ka bä. 31Juifëlë jia' 'dügböli, ü ‑bɛ Marii bä ɩa' nyüköli nɩ, 'ü 'jäa' 'ɔɔn ‑bɛ 'ɔ sɔa' 'wʋ ‑bɛ 'ɔ 'ciea' nɩ, 'ünya ‑mɛ 'ɔɔn ‑gälɩ. 'Üa plɛklɩ 'ü nɩnɩa: «'Kuyu 'lɩ 'ɔ mö 'wlorokalɩ.» 32Marii 'tɔa' ‑plɩɩlɩ Jesu bäa', 'ɔ 'jäa' 'ɔɔn dotro, 'ɔ blö 'ɔɔn bei 'wʋ 'ɔ ‑nëma: «'Pläkänyɔɔ, ‑ama bä ɩ ‑plɩɩ 'na ‑wlajʋ ‑nëmä ɩ jä ‑a jä.» 33Jesu 'jäa' 'ɔɔn ‑bɛ 'ɔ 'wuöa', 'ɔ ‑bɛ juifëlë 'ɔ nyra 'üün jröröa' 'lɩ nɩ, 'i 'jrara 'ɔɔn nyatɛrɩ 'wli, 'inya pa 'ɔɔn ‑gba ‑gböösa. 34'Ɔnya 'bete: «‑A 'plɛɛ 'a 'pie 'ɔɔn le?» 'Ü ‑nëma: «'Pläkänyɔɔ, ji ‑mä 'lɩ 'jä.» 35Jesu nya 'wu. 36'Ɔ 'wua' nɩ, 'iibäa' juifë: «'Ɔ ma ‑wa 'ɔɔn!»

37'Üa ‑tɔrʋpɩɔa nyüü 'doorodoo ‑nëma: «'Ɔɔ ‑jiea' 'nɔnɔnyɔɔa 'nyü nɩ#11.37 Jaan 9.1-12., 'ɔnyɩ 'lɩ ‑a bɩa ɔ ka ɩ jäjä 'klɩ nyɔɔlɔ ‑pɩ jä?» 38Nyatɛrɩ 'jraraa' 'sɔɔwʋ Jesu 'wli nɩ, 'ɔnya mi 'kuyu 'lɩ. 'Täkäa 'mlɩ 'ü 'kɔtɔ 'ii 'ü 'pie Lasaa, 'ünya nʋ 'täkä kpakö, 'ünya kpa 'ään 'klɩ. 39Jesu ‑nëma: «'Ba 'balɩ 'täkälä 'klɩ!» 'Iibäa' ɔ jäa' 'ɔa ‑wladia Marëtë nɩ: «'Pläkänyɔɔ, 'ɔ 'a klöö, 'ɔ ‑trääräa' 'ɔa jrüü mlɔɔ 'saarɩ.» 40Jesu ‑nëma nɩ: «'Nyɩ ‑mɩ ‑a ‑gbala ‑maa ‑ama toro 'mɩ plɛ ‑nya Nyɔsʋa 'wliklɩbʋabʋakʋ 'jäa?»

41'Ünya 'balɩ 'täkälä 'klɩ. Jesu 'jraraa' cɛ 'nyükä 'ɔ ‑nëma: «Tʋ 'n 'trɛɛ ‑mɩ 'sɩrɩ nʋa' ‑bɛ ‑saaa' 'mɩ ‑gälɩ. 42'Mɔɔlɔ nɩ, 'n jre 'iin 'sɩrɩ ‑saaa' 'mɩ ‑gälɩ 'plɔʋplɔʋ, ‑maa nyüülü traraa' 'mɩ 'klɩ 'üa ‑gʋ 'n 'paa wii 'ümä 'saa jre ‑mɔ blɔ 'mɩ.» 43'Ɔ nʋa' ‑plɩɩ 'saa 'ɔ 'paa' wii nɩ, 'ɔnya 'kpölɩkä: «Lasaa 'cie!» 44Jäjänyɔɔlɔ nya 'cie. 'Ɔa 'dari, 'ɔa bei nyra 'ɔa 'klɩ ‑fifra dɔʋ 'ɔnya 'cie. Jesu nya ‑gbala 'üün: «'Ba ‑jeje 'ɔɔn, 'kä 'a 'cɛrɛ 'ɔɔn ‑wälɩ 'ɔmä mi.»

Juifë 'nönröwli 'ümä Jesu 'bla

Lukë 16.31; Jaan 15.24-25; 'Lɩbrɛrɛpɔɔkʋ 71.10

45Juifëlë jia' Marii 'trɛɛ, ‑bɛ ü 'jäa' wiili Jesu nʋa' nɩ, 'üa ‑tɔrʋpɩɔa 'kɔkɔmlɛ toro 'ɔɔn plɛ. 46‑Maa 'üa ‑tɔrʋpɩɔa ‑mölöö mi bɩa Farisinyüü ‑gbala wiili Jesu nʋa'. 47'Ia ‑gʋ, ‑gbɔsapɛrɩnyüü kpakü nyra Farisinyüü nya 'papla juifëa tropinanyüü ‑gba, 'iibä: «‑Asɩ anya ‑plɩɩ nʋ le? 'A ‑saragbia tie 'kɔkɔmlɛ nyɔɔlɔ nö. 48Ama sɔ 'ɔɔn ‑gba ‑a 'doo nɩ, 'üa 'fɩɔ nya 'ɔɔn plɛtoroa, 'kä Rɔmënyüü nya ana bätä#11.48 ana bätä: Grɛɛkë nö «Ana ‑pɩɔ». nyra ana ‑glügbö bʋblɔkalɩ ji.» 49'Üa ‑tɔrʋpɩɔa nyɔɔ 'doo bä kä 'lɩ 'ɔɔ 'ü 'dara Kaiifë. 'Ia ‑sʋlʋa 'mlɩ nɩ, 'ɔ bä kä ‑gbɔsapɛrɩnyɔɔ kpakö. 'Ɔnya ‑gbala 'üün: «'Anyɩ dɛɛ ‑a jre! 50'Anyɩ bobo bobo ‑a 'sɩrɩ 'i 'na 'ana#11.50 'ana: Grɛɛkë ‑kätɩpɔɔkɩ ‑mɩdooa 'mlɩ 'ii ‑jɩjra: «'sɩrɩ 'i 'na ana ‑gʋ». ‑gʋ nyɔɔ 'doo 'mä jä nyüü 'mä 'lɩmlɩwʋ, 'kä ana 'pläa 'fɩɔ 'mä jä?» 51Wiili 'ɔ 'paaa' nɩ, ‑mää 'ɔa 'mʋgbɛa plɛklɩa wii ‑a, ‑maa 'ɔ bäa' ‑gbɔsapɛrɩnyɔɔ kpakö 'ia ‑sʋlʋa 'mlɩ nɩ#11.51 ‑Kätɩ kuöa 'mlɩ nɩ, ‑gbɔsapɛrɩnyɔɔ ma 'klaa dii kälɩ 'i ‑beere ‑nɩgbɩ, 'ii 'ɔ 'betre wiili Nyɔsʋa 'bataa' 'ɔ nʋa' 'lɩ (Ɛgësɔɔdë 28.30; 1 Samiɛɛlë 14.36-44). Kuö dëdräa 'mlɩ nɩ, 'i ‑kanyɩ nrörö nrörö ‑a. ‑Maa juifë jre 'iin 'sɩrɩ Nyɔsʋa ‑sröröa' ‑gbɔsapɛrɩnyɔɔ kälɩ ‑bɛ 'ɔ 'paaa' wii., 'ɔɔ Nyɔsʋa ‑srörö kälɩ 'ɔnya ‑gbala 'üün 'sɩrɩ Jesu 'mäa' jä ‑bɛ 'pläa 'fɩɔ 'mäa' 'lɩmlɩwʋ. 52'Inyɩ juifëa 'pläa 'dooa ‑gʋ ‑a bä, ‑maa Nyɔsʋaa 'jülü ‑gbagbaa' 'kä nɩ, 'ɔmä 'üa 'fɩɔ ‑gbapapla 'ümä 'doo bä.

53'A ‑plɩɩ 'ü 'bala 'ünya 'daa 'ümä Jesu 'bla. 54'Ia ‑gʋ 'ɔ ‑kanyɩ 'wlalɩkä 'ɔnyɩ kʋ juifëa ‑tɔrʋpɩɔ ‑a. ‑Aaga 'lɩa bätä ‑mälä bäa' 'lɩ ‑gba 'ü 'daraa' Efraimë, 'ii 'ɔɔ ‑bɛ 'ɔa 'wʋnyɛrɛnyüü kʋ.

55Juifëa 'Paakëa 'taɩn 'cicrea' ‑wälɩ nɩ, 'ia ‑gʋ nyüü 'kɔkɔmlɛ tɩɛ ‑srɩ dɛrɩ 'ü mö Jerusalɛɛmë 'ümä 'üa nyüfë ‑gbafuto 'fɩɔwʋ ‑bɛ 'Paakë 'mä 'lɩjrä, 56‑bɛ 'ü 'bata Jesu. 'Üa 'kpɔa ‑tɔrʋpɩɔ 'ü 'betre 'lɩ Nyɔsʋaanyüköli: «‑Asɩ 'a 'jää 'iin 'wʋ le? 'Ɔ ‑nëmä ‑glɩsɩglɩsɩ 'lɩ ‑a ji, ‑ale?» 57‑Bɛ ‑gbɔsapɛrɩnyüü kpakü nyra Farisinyüü nya 'a ɩ nyüü ‑gbala, nyɔɔ ma 'jä 'ɔɔn 'ɔ ‑gbala 'üün, 'ümä 'ɔɔn 'kpla.

Currently Selected:

Jaan 11: Bakwé

Highlight

Copy