Maatoosa 13

Budutsi budize atstse aazize

(Mar. 4:1-9; Luqa. 8:4-8)

1Ye wode Yesuusa karappa kezii abba gaxa bettida. 2Gaama asuntsi E kale shiiqin asuntsana abba gaxa ashshii ashshii gongge gelii bettida asuntsin ubba abba gaxa eqqida. 3Asuntsis gaama baz aazizera yaga7i ohida:#Luqa. 5:1

«Fettii budutsi budize budutsi budodes kezida. 4E budize wode fettii fettii budutsita oge gaxalla wodhdhida; unttana landduntsi yi7i maxii muyda. 5Fettii fettii budutsita oomora lalla yeze sa7a wodhdhida. Gaama sa7a baayze gisho ellisii dolida. 6Yezin awa kezin shullida; xapho baayze gisho melida. 7Fettii fettii budutsita anggats gidda wodhdhida; anggatsita diccii yinna doltto cuullida. 8Melluntsi mahi aradda sa7alla wodhdhida; dolii aafe aafida. Fetay xeeti, fetay izipuntam, fetay mahi hyasttam aafida. 9Si7ize hyaye yeze si7o» yagayda.

10Yesuusa tamaaruntsi eego shiiqii, «Akkos ne worzhitis aazizera ohe?» yaga7i oocida.

11E mahi, Yinttis salo ka7itumo gaatsi qofa era ingginttida, Yezin unttis ingginttikaaya. 12Yeze ubbuntsis gujunttoda, ees gaammada, yezin baayzeppa melle atto yezin ees yezayin ekkinttoda. 13Yinnii gisho, taanii un, bi7itera denggaame fana, si7ittera si7aame fana woy qoppaame fana unttis aazizera ohine.#Maato. 25:29; Mar. 4:25; Luqa. 8:18; 19:26

14Isayaasa fa maxaafite ohidanna unttalla afa folinttida. E ohitera,

«Yin sisi si7ine, yezin qoppoos;

yin be7ine, yezin bo7oos.

15Akkos gayko, hyantsi asunts wozintta muumida;

fa hyayto doozhizida,

fa aafto goozida. Yinnippa denddii

Fa aaftira bo7oos,

fa hyaytiran si7oos,

fa wozintten tiiroos,

taago maaqqades dandda7oos,

taanin unttana fatstsoos yagayda.

16«Yezin yin aafta be7ize gishon yin hyayta si7ize gisho anjjinttiduntsana. 17Ta yinttis turo ohine; gaama nabuntsin xillo asuntsi yin be7izanno be7ades yin si7izanno si7odes amudhdhida, yezin unttis hyanikaaya.#Luqa. 10:23-24

18«Yikke, hyay budutsito budize atstse aazizto si7ote. 19Oge gaxa wodhdhide budutsiti aazizta hyanno; salo ka7itumo qaala si7i tiiroosse atstse wozinttippa Xalahe yi7i E wozintte yeze budutsito maxii hyaasane. 20Lalla oomo yeze sa7alla budinttide qaala si7i ellisii ufaytti ekkizuntsana. 21Yezin xapho dakkodes dandda7oosse gisho gam7oos. Qaala gisho madha woy baytsi ye7ize wode ellisii dhubinttane. 22Anggats gidda budinttide qaala si7ine, yezin hyanna alame yessi yirgappan durtumo qofappa qaaltto cuullide gisho aafe aafanxii attida. 23Yezin aradda sa7a buduninttide budutse qofara qaaltto si7ize asi. E aafe aafane; fetay xeet, fetay izipuntam fetay mahi hyasttam aafane» yagayda.

Zarddo aazize

24Yesuusa unttis melle aazize ohida, «Xoozze ka7itumo fa gadite lo77o budutsi budide atstsa aazane. 25Yezin asi ubba genttin E morkkize yi7i zargiti gidda zarddo budi qitida. 26Zargita diccii aafodera zarddizen ye wode benttida.

27«Gaditii aday aruntsii adego hyanggi, ‹Laatstso, ne gadite ne lo77o budutsi budika? Yeezin, zarddo anappa yi7ido? yagayda.

28«E unttago, ‹Yinno morkke oochchida› yagayda.

«Aruntsii laatstsego, ‹Nu hyanggi zarddito shoddode gaar koyane?› yagayda.

29«Yezin E, ‹Atto bochchippe; yin zarddito shoddane gawudera zargita shoddinttoda. 30Bochchippete; maxize wode yellodes wolla dicco. Ye wode maxizuntsi zarddito tiinii shoddii tamar eetsodes mirqera mirqera gaddote. Yezin zargito shiishii ta fachite geltsote› gawuda» yagayda.

Eeratsi minxiti aazize

(Mar. 4:30-32; Luqa. 13:18-19)

31Mahi melle aazize yaga7i ohida; «Salo ka7itumo fettii asi fa gadite budide eeratsi minxa aafe aazane. 32Yinna aafita melle minxa aafe ubbappa eeratsi, yezin doltta diccii melle minxa ubbappa aadhii dammane. I zhanggitilla landduntsi keexii bettode wontsis damma minxa maaqqane» yagayda.

Irshsho aazize

(Luqa. 13:20-21)

33Mahin, Yesuusa melle aazize ohida; «Salo ka7itumo fettii maachita hyaydzdzii gabate dhiilla ekkii munuqide, munuqita denddode fana ize gujjide irshsho aazane» yagayda.

34Yesuusa worzhitis yinna aazizto ubba ohida. Aazize baayzin fettii bazin ohikaaya. 35Nabize fa maxaafite,

«Taanii ta doona, aazizera bugane;

salon sa7an medhinttidannippa,

aachinttidanno ohine»

yaga7i ohidanna hyanne folinttida.#Maz. 78:2

Zarddo aaziziti bilitsito

36Yesuusa worzhito moyzii keetstsa gelida. E tamaaruntsi eego shiiqii, «Gade yeze zarddo bilitsito nuus oho» yagayda.

37E mahi, «Lo77o budutsito budide As Na7a. 38Gadita hyanna alamito. Lo77o budutsita salo ka7itumo na7untsana. Zarddize Xalahe na7untsana. 39Zarddiza budide morkke Xalahe. Maxize wodita, wode wurssutsite. Maxizuntsi kiitanchchuntsana.

40«Zarddo maxii tama eetsizanni gaar wode wurssutsite yinnii gaar maaqqada. 41As Na7ay fa kiitanchchuntsana kiittoda. Un nagaras mikinaate maaqqiduntsana iita oochchize ubba maxii E ka7itumttippa kessoda. 42Yeefon achchi garccingge aadhii eexize tama oloda. 43Ye wode geeshuntsi fa aday ka7itumtte awa gaar foo7oda. Si7ize hyaye yeze si7o!

44«Salo ka7itumo gade mooginttide miishe fana. Fettii asi yinna miishito denggi mahi moogida. Gaama ufaytti hyanggi faas yeze baz ubba bayzi yinna oocha gadito wonggida.

45«Yinnii gaara, mahi salo ka7itumo inqo gaaze al77o shuchchi koyze zali7ancho aazane. 46Gaama al77o inqiza denggi hyanggi faas yeze baz ubba bayzi eza woonggida.

Molo aykkize gite aazize

47«Mahi Salo ka7itumo abba olinttide dumma dumma molo aykkize gite aazane. 48Molo aykkize asuntsi molo gitite kumin abbappa gaxa kessida. Ize bettii lo77ito qurii qurii daachcho olida, yezin iitto alla olida. 49Wode wurssutsite yinnii fana hyanoda. Kiitanchchuntsi yi7i nagaranchuntsana xilunsappa shaakkii, 50yeefo achchi garccinggen aadhii eexize tama oloda.

51«Hyanna ubbanna yinttis gelida?» yaga7i unttana oocida.

Un mahi, «Yee» yagayda.

52Yesuusa, «Yikke, salo ka7itumo kaallizen higge tamaare ubba, fa minjjide qoloppa killen gal77a kessize asi aazane» yagayda.

Yesuusa Naazirete ixinttida

(Mar. 6:1-6; Luqa. 4:16-30)

53Yesuusa yinna aazizito ohi hyaasidannippa suuba yeygappa denddii qitida. 54Fa yelinttide sa7a hyanggi Ayhude woosa keetstsa worzhito tamaarssida. Un gaama qoppii, «Hyay atstse hyanna cinccatitsiton wolqqa kumide kille bazito anappa ekkido? 55Hyay anaaxize na7a baane? E inttii suntsita Mayramo baane? E ishuntsi Yayqooba, Yoosefa, Simoonan Yihuda baane? 56E mishuntsi nuura yezuntsana baane? Yeezin, hyay atstse hyanno ubbanno anappa ekkido?» yagayda. 57Yinnii gisho, E gaaze bazito ekkanxi ixxida.

# Waha. 4:43 Yezin Yesuusa, «Nabe fa yelinttide sa7an fa kara asunts kale bonchinttoos» yagayda. 58Un ammananxide gisho gaama kille baz yinna besite oochchikaaya.

Currently Selected:

Maatoosa 13: OydaNTL

Highlight

Copy