Luqasa 6

Yesuusa Sambbata baz oocinttida

(Maato. 12:1-8; Mar. 2:23-28)

1Fettii Sambbata wode Yesuusa zarga gade giddara aadhane. Yesuusa tamaaruntsi tizha zarga duutsii fa kushite shiccii dha7ane.#Mahe 23:25 2Yezin Farisaawuntsi giddappa fete fete, «Sambbata wode higges beezoosse baz akkos oochche?» yagayda.

3Yesuusa unttago mahi, «Dawute naydhdhide wode faara yezuntsara wolla oochchidanno nabbabika?#1 Sam. 21:1-6 4Xoozze keetstsa gelii Ayhude kahinuntsi xalaalasin Xoozis beezze daabbuto mu7ida; faara yezuntsisin inggida» yagayda.#Leewe 24:9 5Mahi Yesuusa, «As Na7ay Sambbata Laatstsi» yagayda.

6Melle Sambbata qamma Yesuusa Ayhude woosa keetstsa gelii tamaarssida. Yinna besite mizaqi kushe gunddide fettii asi yene.

7Higge asttamaaruntsin Farisaawuntsin eza mootodes oge koyi Sambbata wode fatstsiko be7ada ga7i kafane. 8Yezin Yesuusa un qoftto erii kushe gunddide atstsego, «Denddii asunts gidda eqqo» yagayda. Atstsayin denddii eqqida.

9Yesuusa, «Ane ta yinttana fettibaz oocane; Sambbata qamma higgite oochchodes beezizanna lo77o bazone iita bazo? Shemppo ashshene woy dhabsse?» yagayda.

10Mahi Yesuusa E kale wutii yeze asuntsana ubba wututsi bi7i atstsego, «Ne kushito fiddii yiizo» yagayda. Atstsayin E gayidanni gaara yeyzin kushize faxida. 11Yezin higge asttamaaruntsin Farisaawuntsin gaama zhilidhdhida. Yesuusalla afa akko oochcho ga7i fa gidda zorinttida.

Yesuusa taphpho lam77i hawaaruntsana doorida

(Maato. 10:1-4; Mar. 3:13-19)

12Ye wode yinna qammitippa fete gidda Yesuusa woossodes derella afa kezida. Qamma kumutsi Xooz woossittera aqida. 13Wonttistto fa tamaaruntsana xeegii un giddappa taphpho lam77untsana doorii, unttana, «Hawaaruntsana» ga7i suntsida. 14Unttin, Phexiroosa ga7i suntside Simoona, E ishe Inddirase, Yayqooba, Wahannisa, Filphoosa, Bartolomiyoosa, 15Maatoosa, Toomaasa, Ilfiyoosa na7a Yayqooba, fa gaditis qana7ize Simoona, 16Yayqooba na7a Yihudan Yesuusa aatsii inggide Asqorootu Yihuda.

Yesuusa tamaarssidannon fatstsidanno

17Yesuusa Hawaaruntsara wolla derizeppa wodhdhii ganas bessa eqqida. E tamaaruntsappa gaamuntsi yinna besite yene Yihuda sa7a ubbappa Yerusalaameppa, Xiroosappan Sidoona abba gaxappa yi7ide gaama asuntsi yene. 18Un yi7idanna E tamaarssizebaz si7odesin fa hyarggitippa faxodes. Tuna ayyaanara waayinttize asuntsin faxida. 19Wolqqa eeppa kezii asuntsana ubba fatstsize gisho asuntsi eza bochchodes koyane.

Ufayssin azzanon

20Fa tamaaruntsago bi7i hyannigaara yagayda:

«Hyantseso, dahuntso, yin anjjinttiduntsana;

Xoozze ka7itumo yinttis.

21Yin hyatte naydhdhizuntsi anjjinttiduntsana,

yin mishshada.

Yin hyatte yeekkizuntsi anjjinttiduntsana

yin miicoda.

22Asi yinttana ta gisho

ixxize wode

yinttana shaakkize wode

yinttana un toochize wode,

iita suntsi un yinttis inggize wode

yin anjjinttiduntsana.#Aazi. 4:14

23«Yikke, yin anjjita salo damma maaqqide gisho ye wode ufayssara dollote. Akkos gayko, zaga un aduntsi nabuntsalla afa yinnii gaar oochchida»#2 Zeena 36:16; Hawa. 7:52

24«Yezin dure asuntso yinttana bade;

yin hyatte lo77o yestto ekkida.

25Hyatte mizhiduntso yinttana bade;

yin naydhdhoda.

Hyatte miicizuntso yinttana bade

yin kaydhdhoda yeekkoda.

26Asi ubbuntsi yin lo77otitsito xalaala ohize wode yinttana bade.

Un aduntsi zaga worddo nabuntsalla afa yinnii gaar oochchida.

Yin morkkuntsana kadhote

(Maato. 5:38-48; 7:12)

27«Yezin tana si7ize yinttis ta ohine; yin morkkuntsana kadhote; yinttana ixxizuntsis lo77o baz oochchote. 28Yinttana baaddizuntsana anjjote, yinttana qohizuntsis woossote. 29Fettii zala dhookiza baqqiko hyankko zalza beezo. Ne kootiza ekkoda gaazes ne shaamizayan gujjii inggo. 30Nena woossize ubbuntsis inggo; neeppa ekkiza ooden maho ga7i oocippe. 31Asuntsi yinttis oochchode gaar yin koyzanni fana yinttin asuntsis oochchote.#Maato. 7:17

32«Yin yinttana kadhize asuntsana xalaala kadhiko, akko galata yinttis yeze? Melle atto yezin, nagaranchchuntsin fana kadhizuntsana kadhane. 33Yinttis lo77o baz oochchizuntsis xalaala lo77o baz oochchiko yinttis akko galata yeze? Nagaranchchuntsin yinnii gaara oochchane. 34Tal77e mahode asuntsis xalaala yin tal77iko akko dumma galata yeze? Nagaranchchuntsin suub mahode as bi7i tal7ane.»

35«Yezin yin morkkuntsana kadhote; unttis lo77o baz oochchote. Suuba ekkodes qoppikaayzara tal77ote. Yinne yin ekkode anjjita damma maaqqada. Yin Ubbappa kattara yeze Xoozze na7untsana maaqqada. E fana galatosuntsisin iituntsisin dalgga. 36Yin salo aday maariza maaqqidanni gaara yinttin maarizuntsana maaqqote.

Melluntsalla afa firddippete

37«Asalla firddippete; yinttalla afa firddinttoos. Yin borinttaame fana oonan borippete. Atto ga7ote; Xoozii yinttis atto ga7oda. 38Inggote; yinttis ingginttoda. Yin makkidanne yinttis mahi makkinttoda, lo77o makkize bazite baqqii, kumutsi, lanttode wontsis yinttis makinttii ingginttoda» yagayda.

39Manin Yesuusa yaga7i unttis aazize ohida; «Qooqize qooqe kaalitsodes dandda7ane? Kaalitsiko lam77untsi wol ekkii gaga qitosaane?#Maato. 15:14 40Tamaare asttamaareppa aadhoos. Yiikon loytsii tamaaride atstse fa asttamaarize fana yi7ane.#Maato. 10:24-25; Waha. 13:16; 15:20

41«Ne ishe aafte yeze buuriza akkos be7e? Ne aafte yeze tuusi fana yeza akkos bo7osa? 42Ne aafte yeze tuusi fana yeza bi7ikaayzara ne ishego, ‹Ta ishayo ne aafte yeze buuriza kesso› ga7odes wayzi dandda7e? Hyay cubbuzayo, tiinidhii ne aafte yeze tuusi fana yeza kesso. Yinnippa suuba, ne ishe aafte yeze buuriza kessodes geeshi be7ada.

Minxan E aafizan

43«Lo77o minxa iita aafe aafoos; yinnii gaara iita minxa lo77o aafe aafoos. 44Aafe aafize minxa ubbanna fa aafte erinttane. Anggatsappa belese minxa aafe maxinttoos mahi hyalimoppa woyne aafe maxinttoos.#Maato. 12:33 45Lo77o asi fa wozintte kumide lo77o baztippa lo77o baz kessane. Iita asi fa wozintte kumide iita bazitippa iita baz kessane. Asi fa wozintte kumii tirfide bazappa fa doonara ohine.#12:34

Keetstsi keexize lam77i asuntsana

(Maato. 7:24-27)

46«Ta gaazanno yin oochchoos, yezara yeezin akkos tana, ‹Laatstso, Laatstso, ga7ete?› 47Taago ye7izen ta qaaltto si7i folize ubbuntsi oona aazizako ta yinttana beessada. 48E keetstsi keexxodes ziqqii yiizii, olla bookkide, oomora yeze lallalla afa keetstsi esside cincca atstsa aazane. Hyaro goggii ye keetstsa urqqida, yezin mintsii keexide gisho en7isades dandda7ikaaya. 49Yezin ta qaaltto si7i oochchoose fa keetstsito shafella afa baasikaayzara keexxide atstsa aazane. Hyaro goggii ye keetstsa urqqide wode ellisii gol7ida. Ye keetstsize damma gol7e gol7ida» yagayda.

Currently Selected:

Luqasa 6: OydaNTL

Highlight

Copy