Luqaasa 6

Yesuusa Maala bagga oycintteeza

(Mat. 12:1-8; Mar. 2:23-28)

1Pettii maala gallas Yesuusa gade ganccer aadhiza. Yesuusa tamaaritay bangga tizhzha duuthii fa kusher mirkkii miiza.#Nam7i. 23:25 2Zin Ferisaawitay ganccepp pettay pettay, «Maala gallas oothodayis nu higgayid beezoowa baz abis oothee?» yeegeeza.

3Yesuusa unttiko mahii, «Dawute nayintteez wode paar yezitayira wolla oothizana yi nabbabekkasa?#1 Sam. 21:1-6 4Xooss keetha gelii Ayihuditay qeesitay aaddas beeziza daabbo meeza; paar yezitaysikka inggeeza» yeegeeza.#Lewii. 24:9 5Ma Yesuusa, «As Na7ay maalas Goda» yeegeeza.

Yesuusa kushe sila atha patheeza

(Mat. 12:9-14; Mar. 3:1-6)

6Hara maala gallasi Yesuusa Ayihuditay Woosa keethi gelii taamarissiza. Ye aqayid ushachchi kushe sileez pettii asii yeza. 7Higge asitamaaritayinnee Ferisaawe asay eza mootodayis sankke kozhii maala gallas pathiko be7ada gi naagiza. 8Zin Yesuusa u qofa erii kushay sileez athayko, «dendii asay gancce eqqoba» yeegeeza, athaykka denddii eqqeeza.

9Yesuusa, «An ta yinttan pettibaz oyiciza; maala gallas oothodayis beezizay lo77o bazonee iitabazo? Shemppo ashonnee dhabiso?» yeegeeza.

10Ma Yesuusa e lanqqayir yez asa ubba yuuyii bi7ii athayiko, «Ne kusha piddi udoba» yeegeeza, athaykka E geezan garkk udin kushay paxeeza. 11Zin higge asitamaaritaynnee Ferisaawe asay iita yiladheeza. Yesuusal afa ab udo gi wolla tobbeeza.

Yesuusa taphpho nam7i hawaarita dooreeza

(Mat. 10:1-4; Mar. 3:13-19)

12Ye wode gallasitaypp pettii gallas Yesuusa woossodayis derell afa kezeeza. Qamma muda Xoossa woossittar aqeeza. 13Wonttitha fa taamarita xeegii u ganccepp taphpho nam7ita doorii, unttan, «Hawaarita» gi xeegeeza. 14Unttikka, Phixiroos gi xeegiz Simoona, e isha Indiraase, Yayqqooba, Waannisa, Filphoosa, Barttolomoosa, 15Maatoosa, Toomaasa, Ilfoosa na7a Yayqqooba, fa biittayis micinttiz Simoona, 16Yayqqooba na7a Yihudarannee Yesuusa aathii inggeez Asiqorontto Yihuda.

Yesuusa tamaarssonnee patho

(Mat. 4:23-25)

17Yesuusa hawaaritayir wolla derellapp wodhdhii denba aqo eqqeeza. E tamaaritaypp gaamitay ye aqayid yeza. Yihuda biitta ubbapp Yerusalaameppe, Xiroosappennee Sidoona abba gaxapp gaame asay e taamarssiza baz si7odaysinnee fa hargepp faxodayisi ye7eeza. 18Tuna ayyanar metinttiza asitaykka yi7ii paxeeza. 19Pathiza Wolqqa ezipp kezii asii ubba pathiza gishos asay eza bochchodayis koyiza.

Anjjonnee meto

(Mat. 5:1-12)

20Fa tamaaritayiko bi7ii yhaygarkke yeegeeza:

«Yinttano, manqqitayyo, yi anjjintteezita;

Xooss kaatetithay yinttisii.

21Yi yhatti nayinttizitay anjjintteezita,

yi mizhoda.

Yi yhatti yeekkizitay anjjintteezita

yi miiccoda.

22Asay yinttan ta gisho, As Na7ay gishos

ixxiza wode

yinttan piliza wode

yinttan u toochchiza wodennee,

iita sunthi u yinttis inggiza wode

yi anjjintteezita.#1 Phix. 4:14

23«Yeezako, yi gatay salo damma maaqqeez gishos ye wode ufayisar guppoytta. Abis giiko, binii u aditay nabitayil afa yhay garkk udeeza.#2 Zeena. 36:16; Haw. O. 7:52

24«Zin durttayyo yinttan ayye;

yi yhatti lo77o yessi ekkeezita.

25Yhatti mizheezitayyo yinttan ayye;

yi nayinttoda.

Yhatti miiccizitayyo abo yinttanoshsho

yi kayadhodannee yeekkoda.

26Asii ubbay yi lo77otitha aadda odiz wode yinttan ayye.

U aditay binii worddo nabitayil afa yhay garkk ootheeza.

Morkkita siiqo bagga

(Mat. 5:38-48; 7:12)

27«Zin tana si7iz yinttis ta odiza; yi morkkita siiqoytta; yinttan ixxizitayis lo77o baz oothoytta. 28Yinttan baaddizita anjjoytta, yinttan naaqqizitayis woossoytta. 29Pettii bagga shanggala baqqizitayis yhankko baggaka beezoba. Ne Koota ekkoda gizayis ne shaamizhakka gujjii inigoba. 30Nena woossiza ubbayis inigoba; neeppi ekkeez oonakka maho gi oyccipp. 31Asay yinttis oothod garkk yi koyiz baz ubba yinttikka asis oothoytta.#Mat. 7:17

32«Yi yinttan qadhdhiza asa aadda qadhdhiko, aba galata yinttis yenee? Hara attozin, nagaranchchitayikka fana siiqizita siiqiza. 33Yinttis lo77o baz oothizitayis aadda lo77o baz oothiko yinttis aba galata yenee? Nagaranchchittaykka yhay garkk oothiza. 34Tali7e mahod asis aadda yi tali7iko ab duma galatinttinee? Nagaranchchittaykka guye mahod asii bi7ii tali7iza.» 35«Zin yi morkkita siiqoytta; unttis lo77o baz oothoytta. Guye ekkodayis qoppekkazar tali7oytta. Yeyid yi ekkod gatay damma maaqqoda. Yi Ubbaypp Aadho Xooss na7ita maaqqoda. E fana galatoozitayssinnee iititayiskka keeha. 36Yi aday maariza maaqqeezay garkke yinttikka maarizita maaqqoytta.

Hara asal afa pirddippate

37«Asal afa pirddippate; yinttal afa pirddinttamii. Yi borinttaamay garkk oonakka borippate. Atto goytta; Xoossay yinttis atto goda. 38Inggoytta; yinttis inginttoda. Yi makkeez bazar yinttis maaqqii makinttoda, ubbarakka lo77o makkiz bazar baqqii, suuddii kunthii, laalinttodar yinttis makinttii inginttoda» yeegeeza.

39Maakka Yesuusa yeegii unttis aaziso odeeza; «To7ay to7a kaalithodayis danda7inee? Kaalithiko nam7itaykka woli ekkii gaga qitossannee?#Mat. 15:14 40Tamaaray asitamaaraypp aadhooya. Zin lo7ithii tamaareez athay fa asitamaaray garkk haniza.#Mat. 10:24-25; Wan. 13:16; 15:20 41Ne ishay aafayid yeza buuxa abis ne bi7inee? Ne aafayid yeza tuuss aazizana abis bo7oosaa? 42Ne aafayid yeza tuuss aazizana be7ekkazar ne ishayiko, ‹Ta ishayyo ne aafayid yez buuxa kesso› godayis wayizii danda7ee? Neno cubbayyo, tiinattii ne aafayid yez tuuss aazizana kessoba. Yeypp guye, ne ishay aafayid yez buuxa kessodayis ne geeshsii be7ada.

Mithinnee aafe

43«Lo77o mithii iita aafe aafooya; yey garkkekka iita mithii lo77o aafe aafooya. 44Aafe aafiz mith ubbay fa aafer erinttiza. Angguthapp Balase aafe maxinttoya ma gom7orepp woyne aafay maxinttoya.#Mat. 12:33 45Lo77o as fa wozina gancce kumeez lo77o bazapp lo77o baz kessiza. Iita asii fa wozinayid kumeez iita bazapp iita baz kessiza. Asii fa wozina kumii fucceezaypp fa doonar odiza.#12:34

Keethe keexxiz nam7i asita

(Mat. 7:24-27)

46«Ta gizana oothowazar, abis tana, ‹Godayyo, Godayyo, gee?› 47Taako yi7izayinnee ta qaala si7ii poliza ubbitay oona aazizako ta yinttan beessada. 48E keeth keexxodayis wodhisii, olla bookkii, oommo yez zaallayil afa keethi esseez eca atha aaziza. Di7o di77ii ye keetha urqqeeza, zin miinthii keexxeez gishos eni7odayis danda7ekkaya. 49Zin ta qaala si7ii oothoozay fa keetha shafel afa keexxeez atha aaziza. Di7o di77ii ye keetha urqqeez wode ellis woddeeza. Ye keethay woddithikka wolqqama maaqqeeza» yeegeeza.

Currently Selected:

Luqaasa 6: MeloNTL

Highlight

Copy