Luqaasa 24

Yesuusa yhayiqopp denddeeza

(Mat. 28:1-10; Mar. 16:1-8; Wan. 20:1-10)

1Saaminttapp Tiina gallas, wogga wode guura yeciyeco, maachchitay fa giigiseez shitto ekkii duufayiko yhanigeeza. 2U ize hellodar duufay doona yez shuchchay gol77al7ii hali7eezana denggeeza. 3U duufa helii geleeza, zin Goda Yesuusa aha denggeekaya. 4U ezayid eqqii abii haneenee gi qoppodar akaakekkazin booth pociz afila ma7eez nam77ii asitay u kale eqqeeza. 5Maachchitay yashittii fa omma sa7a ziqqi udii yezin, asitay unttiko, «Pathana yhayiqitay gancce abis koyee? 6-7E yhaydda baaya; yhayiqopp denddeeza, ‹asii Na7ay nagara oothizttay kushe aadhii inginttoda; unttikka eza sottoda.#Mat. 16:21; 17:22-23; 20:18-19; Mar. 8:31; 9:31; 10:33-34; Luq. 9:22; 18:31-33 E hayidzantho gallas yhayiqopp dendoda› yeegii, E yinttar Galila biitta yezitar yinttis odeez qaala qoppoytta» yeegeeza.

8Maachchitay ye wode e qaala qoppeeza.

9Maachchitay duufayipp maaqqii haneezibaza ubbita taphpho pettitayisinnee yhankkitayisikka odeeza. 10Yeya hawaaritayis odeezay Magdeela Mayramo, Yohaanna, Yayqqooba indat Mayiramirannee unttar yez hara maachitta. 11Zin unttiss maachchitay odeezay elmmo aazin ammanekkaya. 12Zin Phixiroosa denddii woxxii duufo yhanigeeza. Ye aqa hellii zuggii be7adar moogo afila aadda be7eeza. Haneez bazayiss malabazigittar fa kara maaqqeeza.

Emmahuuse ogel afa

(Mar. 16:12-13)

13Ye gallas kaalliza tamaaritaypp nam7itay Yerusalamepp taphpho nam77ii kilo mitire haakkiza Emahuuse heera yhanigiza. 14U wolla haneezibaza ubbita odinttiza. 15U ye hanay bagga qoppittarannee odinttittar yhanigodar Yesuusa fa ubbas shiiqii unttar yhanigiza. 16Hano zin, unttii eza eraamigarkk u aafay aykintteeza.

17E, «Yi wolla ogel afa odinttizay abba?» yeegeeza.

U azzanii si77e gi eqqeeza. 18Unttapp pettay Qeliyoopha ginttinttizay, «Yha qammitay gancce Yerusalaame haneezibaza eroozay, ne biittas imathonee?» yeegeeza.

19E mahii, «E haneezay abba?» yeegii oycceeza.

Unttii, «Xooss tiinannee as tiina oosorannee odar miinthii nabe maaqqeez Naazirete Yesuusa bagga. 20Eza qeese halaqitaynnee nuna aqisizitay yhayiqo pirddes aathii inggii, sotteeza. 21Nuunii Isreele asa wozode gi ufayttii naageezin yhay hanin yhayino hayidzantho qamma. 22Ma nu ganccepp pettii pettii maachchitay nuna doona ayitheeza. Unttii yhayino wontta guura duufo yhanigeeza. 23E ahay dhabin maaqqii yi7ii, ‹E pathi yeza› yeegizana kiitanchchitay qonccisin be7eeza yeegii odeeza. 24Nu gancceppekka pettay pettay duufa yhanigii maachchitay odeezay hanin be7eeza, Zin eza u be7ekkaya» yeegeeza.

25E unttiko, «Yinttano, akaakowa asitayyo, yi wozinay nabitay odeez baz ubbita ammanodayis gam7izitayyo, 26Kiristtoosa yha meta ekkodayissinne fa bonchchayir gelodayis beezoosa?» yeegeeza. 27Museppennee nabitay ubbaypp dendii Geeshsha Maxaafayid ebazi xaafintteezana ubba unttiss paatteeza.

28Unttii yhanigiza gutayiko ukkodar Yesuusa aadhii haakko aqo yhanigiza aazin, 29Unttii, «Sa7ay qammeez gishos nuur aqoba» yeegii miinthii woosseeza. Yey gishos, unttar aqodayis geleeza.

30Unttar wolla munttal afa bettii, boora, denthii anjjii unttiss baxxii inggeeza. 31Ye wode unttii eroday garkk u aafay dooyintteeza. Unttikka ereeza. Zin E u kalayipp dhabeeza. 32Unttii, «Nu ogel afa yeezin E nuus Geeshsha Maxaafa billittarannee nuur nashshodar nu wozinay xuuginttekasa?» yeegeeza. 33Ye wode dendii guye Yerusalaame ye7eeza. Taphpho pettitayira yhankkitay pettipp shiiqii yeezin denggeeza. 34Unttii, «Goday tuma denddeeza; Simoonas bentteeza» yeegeeza.

35Ye nam77ii tamaarttay Emmahuuse ogel afa yezin haneezanannee boora meez wode wayizii eza ereezako unttiss odeeza.

Yesuusa fa tamaaritayis bentteeza

(Mat. 28:16-20; Mar. 16:14-18; Wan. 20:19-23; Haw. O. 1:6-8)

36Nam77ii tamaaritay ye odayil afa yezin, Yesuusa u gancce eqqii, «Saro yinttis maaqqo» yeegeeza.

37Maaqqozin, unttii dagammii, meeshe be7eeza aazin yashitteeza.

38E unttiko, «Abis dagameenee? Abis sidhe yi wozinayid geleenee? 39Ta kushannee ta toka bo7oytta; ta tana. Maakka aykkii bo7oytta; taal yi bi7izay garkk, meeshes ashonnee meqqethii baaya» yeegeeza. 40Yeegii, fa tokannee fa kusha unttan beezeeza. 41U ufayssapp dendeezayid ammanekkazar malabaz guussal yezin, Yesuusa unttiko, «Yhaydda yinttis miizibaz yenee?» yeegeeza. 42U xiqqa michintteez molo ezis inggeeza. 43E ekkii u tiinayid meeza.

44E, «Ta yinttar gam7eez wode ubbayid Muse higge maxaafitayid, nabitay maxaafitayidannee Mazmuure maxaafitayid, ta gisho xaafintteezibaz ubbitay polinttodayis beeziza yeegii ta yinttis odeez qaalay yhaya» yeegeeza.

45Ye wode Geeshsha Maxaafita akaakod garkk kaha unttis dooyeeza. 46Yey garkkekka, «Kiristtoosa waaye ekkoda, hayidzantho qamma yhayiqopp dendoda yeegii xaafintteeza. 47Yerusalaameppe denddii as ubbayis nagaraypp maarotithaynne atotithi e sunthayir markkattoda. 48Yi yeyis markkita. 49Yeezako, taakka ta aday inggeez ufayssa yinttis dakkoda. Yi salopp wolqqa ma77od gatho Yerusalaame katama gam7oytta» yeegeeza.#Haw. O. 1:4

Yesuusa denddii salo qiteeza

(Mar. 16:19-20; Haw. O. 1:9-11)

50Yeyppe guye, Bitaana katama unttan ekkii qiteeza. Fa kusha denthii anjjeeza.#Haw. O. 1:9-11 51Unttan anjjittar unttapp shaakinttii udee salo ekintteeza. 52U zuggii goynnii gaame ufayssar Yerusalaame maaqqeeza. 53Xoossa ubba wode galatittar Xooss keetha gam7eeza.

Currently Selected:

Luqaasa 24: MeloNTL

Highlight

Copy