Luqaasa 2

Yesuus Kiristtoosa yelintto

(Mat. 1:18-25)

1Ye wode Oroome biitta yez as ubbitay taybinttod garkkennee sunthay xaafinttod garkk kaat Awugisxoosa azazeeza. 2Yeykka Qerenoosa Soore biitta aqisiza wode haneez tiina woya tayiba. 3Yey gishos, pettii pettii asii fa sunthi xaafisodayis fa yelintteez biitta yhanigeeza.

4Yooseefakka Dawute karappennee kochchapp maaqqeez gishos Galila Naazirete katamapp denddii Dawute katama ginttiz Beeteleme yhanigeeza. 5E oyccii gaddeez wolqqa iita, Mayramir wolla xaafinttodayis Yhanigeeza. 6Unttikka ezayid yezin iis yelo wode helleeza. 7Fa bayra na7a yeleeza. Qanxxora xaaxii imathii aqiz aqo aqo dhabeez gishos mehe galla muziz goonna gancce woyitheeza.

Mehe henggizitannee kiitanchchita

8Ye gadayid qamma wude heenggitar qaa7el aqiz mehe heenggizitay yeza. 9Goda kiitanchchay yi7ii unttis bentteeza. Goday bonchcho poo7ay u lanqqayir poo7eeza; unttikka wolqqama yashsha yashitteeza. 10Kiitanchchay unttiko, «Yashittippatte! Yikkee as ubbayis maaqqeez gita ufayssa mishiraachcho ta ekkii ye7eeza. 11Yeykka, Dawute katama ashshizay yinttis yhayino yelintteeza. E Goda Kiristtoosa. 12Yeyisikka mallay yhaya. Xiqqa na7ay qanxor xaaxintt goonna gancce woyi7eezana yi demmada» yeegeeza.

13Qoppekkazin gaame salo kiitanchchitay kiitanchchayir wolla benttii, Xoossa galattittar,

14«Bonchcho Xoossis dhoqqe salo,

saro biittal afa Xooss qadhdhiza asayis maaqqo» yeegeeza.

15Kiitanchchitay unttapp shaakinttii salo kezeezaypp guye mehe heenggizitay, «Ane Goday nuus qoncciseezi bazannee haneez baza be7adayis Beeteleme wolla yhammada» yeegeeza.

16Unttikka ellisii yhanigeeza. Mayiramo, Yooseefa, yeyppe xiqqa na7ay goonna gancce woyi7eeza denggeeza. 17Bi7ii maaqqii na7ay bagga unttis odintteezana ye aqayid yez asayis geeshshii odeeza. 18Yeya si7eez ubbay mehe heenggizitay odeez oda malabaz geeza. 19Mayirama haneezibaza ubba fa wozinar qoppitar yeza. 20Mehe heenggizitay unttis odintteezay garkk hanin be7eeza. Yey gisho, u fa si7eezibazisinnee be7eezi baz ubbayis Xoossa bonchchitarannee galatittar maaqqeeza.

Yesuusana Xooss kara kanggeeza

21Hosppuntha gallas, dookalintodayis qamma hellin, eza wodexxodaypp tiina kiitanchchay gaddeez sunthayir Yesuusa gintteeza.#Lewii. 12:3; Luq. 1:3 22Muse higgay garkk unttii shaagishe wode polintteezaypp guye Yoosefarannee Mayiramir na7a fa Godayis immadayis Yerusalaame yhanigeeza.#Lewii. 12:6-8 23Yeykka, Goday higgayid, «Dhiirath maaqqeez bayra na7a ubbay Godayis shaakintteeza maaqqo» yeeginttii xaafintteezay polodayisii.#Kes. 13:2, 12 24Ma Goday higgayid, nam77ii hero woy holle geezay garkk yarshshodayis kanggeeza. 25Ye wode geeshshinnee ammanor miinth maaqqeez Simoona ginttinttiz athay Yerusalaame yeza. E Isreelitay atotithi naagttar yeza. Geeshsha Ayyaanaykka ezal afa yeza. 26Ma Xoossii dooreez Kiristtoosa be7ekkazar yhayqqaamana Geeshsha Ayyanay ees beezin erii yeza. 27Eza ye gallas Ayyana kaalithin Xooss kara yhanigeeza. Na7a indatirannee adayir woga polodayis na7a Yesuusa ekkii geleez wode 28Simoona mokkii ekkii na7ana idinggii, Xoossa galatitar.

29«Godayyo ne taas geleez qaalay garkk,

yhatte ne aylla saro moyzoba.

30Ta aafay as ubbay tiina ne giigiseez,

31ne atotitha be7eeza.

32Yeykka Ayihude baa as ubbayis,

Xooss tumatith beeziza poo7o,

ne asay Isra7eelitayiskka bonchcho»

yeegeeza.#Isa. 42:6; 49:6; 52:10

33Yoosefarannee Mayramira e bagga odintteezana malabaz geeza. 34Simoona unttan anjjeeza. Indat Mayiramiko, «Isreele yez gaamitayis u pokkithayisinnee denddayis Xoossapp doorintteeza. Ma ixxizitayis malla maaqqada 35Ne shemppayirakka azanno mashsha aadhoda» Yikkee gaame asay wozina geemmeez qofay benttoday garkk yeya geeza. 36Ma Aseere kochchapp maaqqeez Faanu7ela na7ata Haanna ginttinttiz nabata yeza. Iza iita cimeeza; iza fa azinayir laappun laythi betteeza. 37I azinay yhayqqin hosppun tamannee oyddii laythi maaqqoda gatho qammannee gallas pacce bayith woosarannee xoomar Xooss Keetha oothiza. 38Iza ye saatayid yhanigii Xoossa galateeza; Yerusalaame wozintta naagiza ubbayis na7ay bagga markkatteeza. 39Yoosefarannee Mayiramira Goday higgayid azazintteez woga ubbita poleezaypp guye Galila biitta yez fa katama Naazirete maaqqeeza.#Mat. 2:23 40Na7ay diccittarannee ayyanar minggittar yhanigeeza. Ecetithar kumeeza; Xooss aadho keehetithay ezal afa yeza.

Yesuusa Xooss keetha yhanigeeza

41Yoosefarannee Mayramir Faaziqa Baale bonchchodayis laythar laythar Yerusalaame yhanigiza.#Kes. 12:1-27; Nam7i. 16:1-8 42Yesuusas taphpho nam77ii laythi maaqqiz wode kasepp oothizay garkk baala bonchchodayis yhanigeeza. 43Baala bonchcheezaypp guye kara maaqqodar na7ay Yesuusa Yerusalaame atteeza. Zin Yoosefarannee Mayramir E Yerusalaame atteezana erekkaya. 44E kara maaqqiz asayir wolla yeza aazin unttii pettii gallasa oge yhanigeeza. E baazana ereezaypp guye fa dabbitayanee fa laggitay lanqqe koyeeza. 45E ezayid dhabin koyttar guye Yerusalaame hellodayis yhanigeeza.

46Haaydzi gallasapp guye Xooss Keetha asitamaaritay gancce bettii u odizana si7ittarannee unttan oycittar yezin dengeeza. 47Eza si7iz ubbitay e akaakannee e mahiz malssa malabaz geeza.

48Kara asay eza dengeez wode yhay malabaz geeza. E indatakka, «Ta na7ayyo, abis nuna yhay garkk ootheenee? Ne adayirannee taar nena koyttar daabureeza» yeegeeza.

49Yesuusa unttiko, «Tana abis koyee? Ta, ta aday keetha yezodayis beezizana yi eroosa» yeegeeza. 50Zin E unttiko geezana unttii akaakekkaya.

51Yeyppe guye, unttar wolla Naazirete katama yhanigeeza. Unttis kiitinttittar yezeeza. E indat ye ubbita fa wozina gaddii naageeza. 52Yesuusa, ecetithar, eqamar, deetteer Xooss tiinannee as tiina dicceeza.#1 Sam. 2:26; Aazi. 3:4

Currently Selected:

Luqaasa 2: MeloNTL

Highlight

Copy