Luqaasa 1
1
1Bonchcho Toofiloosa, nu gancce polintteez baza gaamitay, paasi danda7intteezay garkk xaafeeza. 2Ye taarika u xaafeezay tiinapp aykkii aafe markkitayinnee qaala odii maaddizitay nuus odeeza. 3Taakka ta baggar tiinapp akaakii be7eezaypp guye ye taarikay hana lo7ithii nees Toofiloosas xaafay taas lo77o maaqqii bentteeza. 4Yeykka, ne tamaareez bazay tuma maaqqeeza erisodayissii. Xammaqiza Waannisa yelintto 5Yihuda kaat Herodoosa wode Abiya baggapp maaqqeez Zakkireesa giz Ayihude qeesay yeza. E machchatakka Aaroona sheeshippe. I sunthaykka Elssabeexo.#1 Zeena. 24:10 6Nam7aykka Goday wogannee azaza ubba naagii borso bayith Xooss tiina xillotithar yeziza. 7Elssabeexa dhoonth maaqqeez gisho unttis na7a baaya. Nam7aykka cimeeza.
8Pettii gallas Zakkireesa fa tarar Xooss tiina qeesetitha oothiza. 9Qeesetith wogar Xooss kara gelii ixaannee cuyishshodayis eza ixa helleeza. 10E Ixaannee cuyshshodar asay bale eqqii woossiza.
11Goday kiitanchchay yarshsho yarshshiza aqaypp ushachch baggar eqqii bentteeza. 12Zakkireesa kiitanchchana bi7ii dagammii iita yashittii pokkeeza. 13Zin kiitanchchay eziko, «Zakkireesa yashitippe; ne woosay sintteeza. Ne machchat Elssabeexa dhiirathi na7a yeloda, e sunthakka ne Waannisa goda. 14E nees ufayssi maaqqoda; gaamitay e yelinttayid ufayttoda. 15Goday tiina E ubbaypp bayira maaqqoda; woyne ushshii maaqqin hara mathisiz ushshii uzhaamii. Fa indat ulo yezar Geeshsha Ayyanar kumoda.#Tay. 6:3 16Isreele asitayipp gaamita u Goda Xoossayiko mahoda. 17Aditay wozina na7itayiko mahoda, kiitinttoozita xillitay ecetithayiko mahodaygarkk, Godayis beeziza asa giigisodayis Eelaasa ayyarannee wolqqar Goday tiinar yhammada» yeegeeza.#Mil. 4:5-6
18Zakkireesa kiitanchchayiko, «Ta yeya abar erodee? Taarannee ta machchatir cimeeza» yeegeeza.
19Kiitanchchay mahii, «Ta Xooss tiina eqqiza Gabreele. Yha mishiraachcha nees ododayis Xoossapp kiitintteeza.#Daan. 8:16; 9:21 20Yikkee, woday helin polinttiza ta qaala ne ammanaam ixxeez gisho yhayi polinttod hellodayis ne muume maaqqoda, odinttodayiskka danda7aamii» yeegeeza.
21Ye wode Zakkireesa Xooss kara gelii gam7eez gisho abi haneezako gi asay bale naagttar gam7eeza. 22E bale kezii unttar nashshodayis danda7ekkaya. Kusher mallii beezoppe attin odinttodayis danda7oozana bi7ii abukka be7eezaygarkk qoppeeza.
23Zakkireesa yarshsho woda wurssii fa kara maaqqeeza. 24Yeyppe guye, e machchat Elssabeexa wodexxeeza. Ichchin agina muume keethapp kezekkazar gam7eeza. 25Iza, «Goday fa maarotithayir ta borintta asay ganccepp qaarodayis koyii yhaya ootheeza» yeegeeza.
Yesuusa yelinttay tiinatii odintteeza
26Elssabeexa wodexin usuppuntho aginar, Xoossii kiitanichcha Gabreelena Galila biitta yez Naazirete katama kiiteeza. 27Ezii wuddiritiko Dawute sheeshapp maaqqeez Yooseefa giz athayis ushintteez Mayiramiko kiittintteeza.#Mat. 1:18 28Kiitanchchay iziko yhanigii, «Aadho keehatithar kumeezannee, saro nees maaqqo, Xooss neer yeza» yeeggeeza.
29Mayrama e odayid iita dagammii, «Yhayi waafa sarotho» gi qoppeeza. 30Kiitanchchay mahii, «Mayirame, yashittippe; ne Xooss tiina Saaba dengeeza. 31Yikkee ne woddexxoda dhiirath na7a yeloda, e sunthakka Yesuusa gi sunthoda.#Mat. 1:21 32E gita maaqqoda, Ubbaypp Aadho Xooss na7a ginttinttii xeeginttoda. Xoossay E aday Dawute zufaana ees inggoda.#2 Sam. 7:12-13, 16; Isa. 9:7 33E Yayqqooba sheeshal afa medhinas kawutoda; e kaatetithayis zawa baaya» yeegeeza.
34Mayirama kiitanchchayiko, «Ta dhiirath erooya Yeyi wayizii hanodayis danda7ee?» yeegeeza.
35Kiitanchchay mahii, «Geeshsha Ayyana neell afa wodhdhoda, Ubbap Aadho Xooss wolqqay neell afa kuyatoda. Yey gisho, yelinttiza na7ay geeshsh, Xooss Na7akka ginttinttoda. 36Yikkee, ne dabbat Elssabeexa fa cimatith laythar dhiirathi na7a woddexxeeza. Iza dhoonth ginttintteezano, zin yhatte usuppuntha agina aykkeeza. 37Xoossa gamizbaz baaya»#Medhe. 18:14 yeegeeza.
38Mayirama, «Yeezako, taas Goday ayllatis, ne qaalay garkk hano» yeegeeza. Yeyppe guye, kiitanchchay iippe shaakintteeza. 39Mayirama ye saaminttate dendii Yihuda biitta yez pettii gezze katama yhanigeeza. 40Zakkireesa kara gelii Elssabeexo sarotheeza. 41Elssabeexa Mayiramii sarotha si7eezannii garkk I ulo yez na7ay ufayisar doonggeeza. Elssabeexa Geeshsha Ayyanar kumii, 42fa qaala dhoqqi udii, «Neenii maachchitay gancceppe anjjintteezano, ne wodexeez na7aykka anjjintteezaya. 43Hano zin, ta Goday indatee, ne taako ye7odayis ta oonoo? 44Yeezako ne sarotha ta si7in ta ulo yez na7ay ufayisar doonggeeza. 45Goday polod gi inggeez qaala ammaneezana, iza anjjitteezano» yeegeeza.
Mayramii Galata mazmuure
46Mayirama yhayigarkk yeegeeza:
«Ta shemppata Goda bonchcheeza,#1 Sam. 2:1-10
47ta Ayyanay ta dhale Xoossal ufayttiza.
48E fa ayllatii kawushshatitha be7eeza.
Yhayinope aykkii yeletithi ubbay tana anjjitteezano goda.#1 Sam. 1:11
49Wolqqama maaqqeez E, taas dammabaz ootheeza.
E sunthaykka Geeshsha.
50Eza bonchchizitayil afa,
e maarotithay medhinapp medhina hellodayis yeziza.
51Fa miinth qesayir fa wolqqa beezeeza,
fa wozinar utirttizita laaleeza.
52Wolqqanthiza kaatita u zufaanaypp wodhiseeza;
fana toochcheezita dhoqqi udeeza.#Iyo. 5:11; 12:19
53Nayintteezita lo77o bazar mishsheeza,
durita kallo kushe dakkeeza.
54Fa maarotitha qoppii,
Fa aylla Isreele maaddeeza.
55Yeykka nu aditayis odeez qaala,
Afraamesinnee e sheeshayis geezana medhinas polodayisii»#Medhe. 17:7
yeegeeza.
56Mayirama Elssabeexi lanqqe hayidzii agina gam7ii fa kara maaqqeeza.
Xammaqiza Waannisa yelintto
57Elssabeexis yelo qammay hellin dhiirath na7a yeleeza. 58I shooritaynnee I dabbitay Goday gaame maarotith ootheezana si7ii, izir wolla ufaytteeza. 59Hosppuntha gallas duude na7ana dookalodayis ye7eeza. Na7ana aday sunthayir Zakkireesa gi xeegodayi koyeeza.#Lewii. 12:3 60Zin indat, «yey hannena Waannisa giinttinttodayis beeziza» yeegeeza. 61Unttikka, «Ne dabbitaypp yha sunthayir xeegintteezay oonkka baaya» yeegeeza. 62E aday oona gi sunth gaddodazako erodayis kozhii eza mallar oycceeza. 63E xaafiza baz oyccii ekkii, «E sunthay Waannisa» gi xaafeeza. Ubbay E xaafezana bi7ii malabaz geeza.
64Izir Zakkireesa iranthay bilintteeza, Xooss galatittar odintto aykkeeza. 65Shooritay ubbitay yashshar kumeeza. Yha haneezibazay Dhoqqi geez Yihuda gade ubbayid odintteeza. 66Yeya si7eez ubbay, «Yha na7ay ab hanodeshsha» gi woli gancce odintteeza. Goday kushay ezar yeza.
Zakkireesa tinbbite
67Waannisa aday Zakkireesa Geeshsha Ayyanar kumii yhay garkk yeegii tinbbite odeeza.
68«Isreele Goday Xoossay galatintto,
yi7ii fa asa wozeeza.
69Fa ayllay Dawute kara
atotithi kace dentheeza.
70Yeykka binii wode geeshsh nabitay doonayid odintteezay garkk,
71Ezii nuna nu morkkitayppennee
nuur eqinttiza ubbitay kusheppe ashshoda.
72Yeya E ootheezay nu aditayis fa maarotithi beezodaysinnee,
fa geesh caaqa naagodayis.
73Nu ada Afraames caaqqeez
caaqa qoppodaysinnee,
74nu morkkitay kushepp kessii,
yashsha bayith eza oothoday garkkesii.
75Nu layth ubbayid geeshshetitharannee xillotithar
fa tiina nuna essodayisii.
76Ma ta na7ayyo, ne Ubbapp Aadho Xooss nabe ginttinttoda.#Mil. 3:1
Godayis oge loythodayis ne e tiina yhammada.
77Unttii atotith eretith demmadana, u nagaray atto ginttinttin,
ne Goday woyayis ododa.
78Nu Xoossay fa keeha maarotithayir
wontta xalqqe nuus salopp kessoda.
79Yeykka dhuma ganccennee,
yhayiqo kuya oommo yezitayis poo7isodayis,
nu tokakka saro ogeko mahoda»
yeegeeza.#Isa. 9:2
80Na7ayikka dicceeza, Ayyanarakka miinggeeza, Isreele asayis benttod gatho liizho demba yezeeza.
Currently Selected:
Luqaasa 1: MeloNTL
Highlight
Share
Copy
Want to have your highlights saved across all your devices? Sign up or sign in
The Word for the World Ethiopia
