Waannisa 1

De7o qaala

1Qaala Tiinapp yeza. Qaalaykka Xoossar yeza; ye Qaalay Xoosse. 2Tiina Qaalay Xoossar yeza. 3Xoossay ubba baz Qaala baggar medhdheeza. Medhintteez bazapp pettii bazkka e baggar medhinttekkabaz baaya. 4Ezar de7o yeza; ye de7ay asis poo7o. 5Poo7ay dhuma poo7iza; dhumay poo7ana gamekkaya.

6Xoossii kiitteez, pettii Waannisa giz asii yeza. 7Asii ubbay E baggar poo7a ammanod garkk E poo7os markka maaqqii ye7eeza. 8E poo7o bagga markattodayis ye7eezaypp attin fa ubbas poo7o baaya. 9As ubbas poo7isiza tuma poo7ay alame yi7iza.

10Ezkka alamel yeza. Alamaykka medhdhintteezay e baggara, zin alamaykka eza erekkaya. 11E faasitayiko ye7eeza, zin eesitay eza ekkekkaya. 12Zin E fana ekkeezitaysinnee E suntha ammaneezitayis Xooss na7ita maaqqad garkk mawute inggeeza. 13Unttikka Xoossapp yelintteezaypp attin as yelinttiza wogay garkk dhiirath shenepp woy ashoppennee suuth shener yelinttekkaya.

14Qaalay as maaqqeeza; aadho keehetitharannee tumatithar kumii nu gancce yezeeza. E adayis pettii na7a maaqqii ekkeez E bonchcha nu be7eeza.

15Waannisa E bagga markkatteeza. Fa qaala dhoqqi uddii, «Taanii, ‹Taapp guyer yi7izay taapp tiin yeza gishos taapp aadhiza› gi markkatteezay yhaya» yeegeeza.

16Nuunii ubbitay E aadho keehetith kunithetithaypp anjjol afa anjjo ekkeeza. 17Xoossay higge Muse baggar inggeeza, zin aadho keehetithinnee tumatithii Yesuusa Kiristtoosa baggar ye7eeza. 18Xoossa aafer be7eez as oonkka baaya; fa Aday lanqqe yez pettii Na7ay aadda E fa ubbas Xooss maaqqeezay eza qoncce odeeza.

Xamaaqiza Waannisa markketithi

(Mat. 3:1-12; Mar. 1:1-8; Luq. 3:1-8)

19Yerusalaame yez Ayihuditay halaqitay, Qeesitaynnee Lewitay, «Neenii oonoo?» gi, Waannisa oyicod garkk eziko kiittin, Waannisa unttisi markkatteez markkatithay yhaya.

20Waannisa, «Taanii Kiristtoosa baaya» yeegii, milxi udii markkatteezapp attin kaddibe7ekkaya.

21Unttikka, «Yeezin, ne oonoo? Ne Eelaasanee?» yeegii oyiceeza.

Waannisa mahii, «Tana baaya» yeegeeza.

Ma unttii, «Ne ye7od ginttintteez nabay nenanee?» yeegii oyiceeza.

Waannisa, «Wa77a» gi maheeza.

22Yeezin, «Ne oonoo? Nuunii nuna kiitteezitayis odod garkk ne nena oona gee?» yeegeeza.

23Waannisa mahii, «Nabe Isayaasa geezay garkk,

«‹Godayis oge luulisoytta!›

gi liizho demba uukkiza athay qaalay tana»

yeegeeza.

24Ma Ferisaawe asitay kiitteez asay 25Waannisako, «Ne Kiristtoosa woy Eelaasa woy nabe baa ixiko, yeezin abis xammaqee?» gi oyiceeza.

26Waannisa mahii, «Taanii haathar xammaqiza, zin yi eroowa asii yi gancce eqqeeza. 27E taapp guyer yi7iza. Taanii hara attozin e caamma wodoro billodayis beezooya» yeegeeza.

28Yeyi ubbay Yordanoose borkkapp seko pino, Bitaana katama, Waannisa xammaqiza aqayid haneeza.

Xooss dure

29Waannisa wonttitha gallas Yesuusa eeko ye7odar bi7ii, «Alame nagara baranchchiza Xooss Duray yhaya! 30Taanii, ‹Taapp guyer pettii asii ye7oda. E taapp tiin yeza gishos taapp aadhiza gi odeezay yhaya. 31E oonazako taanii erooya. Zin Isreele asayis eza qoncce kessodayis haathar xammaqttar ye7eeza» yeegeeza.

32Waannisa yhay garkk yeegii markkatteeza: «Geeshsha Ayyanay salopp holle garkk wodhdhodarannee ezal shemppodar ta be7eeza. 33Yeyi hanodaypp tiina ta eza erooya. Zin haathar xammaqodayis tana kiitteez Xoossay, ‹Geesha Ayyanay wodhdhii ezar yezin neenii be7adayinnee Geeshsha Ayyanar xammaqoday eza› yeegii taas odeeza. 34Ta yeyi hanodar bi7ii, E Xooss Na7a maaqqeezana markkattiza» yeegeeza.

Yesuusa kaalleez tiina taamarita

35Ma wonttitha gallas Waannisa fa tamaaritaypp nam7itayir wolla eqqeeza. 36Yesuusa aadhodar Waannisa bi7ii, «Xooss duray yhayshshe!» yeegeeza.

37Nam7i Waannisa tamaaritay Waannisa gizana si7ii Yesuusana kaalleeza. 38Yesuusa fana kaallizita guye shirinttii bi7ii, «Yi ab koyinee?» yeegii oyiceeza.

Unttii maaqqii, «Asitamaarayyo, ne aba yessade?» yeegeeza.

39Yesuusa unttiko, «Yhana yi7ii bo7oytta» yeegeeza. Unttii yhanigii E yeza aqa be7eeza. Ye gallas sa7ay taphphii saate heera maaqqiz gishos e lanqqe peezheeza.

40Waannisa geezana si7ii, Yesuusana kaalleez nam77ii tamaaritaypp pettay, Simoon Phixiroosa isha Indiraase. 41Indiraase tiina fa isha Simoonar wolihellii, «Nuunii Kiristtoosa denggeeza» yeegeeza. 42Indiraase Simoona Yesuusako ke7eeza.

Yesuusa Simoona bi7ii, «Neenii Yoona na7a Simoona; ne sunthay Kefa a gi xeeginttoda» yeegeeza.

Yesuusa Filphoosarannee Natina7eelara xeegeeza

43Wonttitha gallas Yesuusa Galila biitta yhammadayis murtteeza. E Filphoosara denggii, «Tana kaalloba!» yeegeeza. 44Filphoosa, Indirasennee Phixiroosa yezeez Beetesayda gizi katamapp ye7eez asii.

45Filphoosa Natina7eelara hellii, «Muse higge maxaafay gancce, ma nabitaykka ebaz xaafeez Yooseefa na7a Naazirete Yesuusa nu dengeeza» yeegeeza.

46Naatina7eela mahii, «Naazirete katamapp lo77o baz kezodayis danda7inee?» yeegeeza.

Filphoosa, «Yi7ii bo7oba» yeegeeza.

47Yesuusa Naatina7eela faako yi7izana bi7ii, «Gene baa tuma Isreele as yhaya!» yeegeeza.

48Naatina7eela Yesuusako, «Neenii tana aba eree?» yeegeeza.

Yesuusa mahii, «Filphoosa nena xeegodaypp tiina, neenii balase mithii oommo yeezin taanii nena be7eeza» yeegeeza.

49Naatina7eela mahii, «Asitamaarayyo, neenii Xooss Na7a! Neenii Isreele kaate!» yeegeeza.

50Yesuusa eeko, «Ta nena balase mithii oommo be7eeza geez gishos ne ammaninee? Neenii yhaypp aathibaz be7ada!» yeegeeza. 51Ma Yesuusa, «Taanii yinttis turo odiza; salo dooyinttin, Xooss kiitanchchitay As Na7a afa kezodarannee wodhdhodar yi be7ada» yeegeeza.

Currently Selected:

Waannisa 1: MeloNTL

Highlight

Copy