Luqas 23

Yesus Pilatoosni Sina Ta'i

(Mat. 27:1-2, 11-14; Mar. 15:1-5; Yoha. 18:28-38)

1Esta fe asuni meya zuuttesere kabi Yesusnin ephere Pilatosniki taamete. 2Ekka yit barin malatesete: «Han asus daraniisin eshfeen, keesarnik girbo giribtonoynamato kalfeen dey: ‹Ta Kiristoos taatowa› yifeen danni.» 3Pilatos: «Ne Ayhudni taatonoso?» yire mamsi. Yesus dey: «Ne yitaasimatowa» yire wolgi. 4Estan Pilatos maagni gaanynyaniknawa daraasikna ekka yi: «Ta han asusatan isa mangsune aane danutwa.»

5Sinuntano baasso: «Han asus Galiilan kabira hanta kar'ananneen, Yuudaki daa zuuttambaase asiissi daraasin manguk kabgit feerwa» yiset chinire malatesete.

Yesus Herodisni Sina Ta'i

6Pilatos Galiilan yiste baron odenaase: «Han bar Galiilaki asunoso?» yit mamsi. 7Yesus Herodisni ha'suussin yeer sinbaason Pilatos araat Herodisniki wosi. Es kabaasik Herodis Yerusalem yeere feer. 8Herodis Yesusnin biyanak showo wona sholet feer sinna boor'a biinaase akamanon gire. Yesus zagit feefena biistera artonoy wuzason wosten biyanak sholet feer. 9Es bari boor'a Yesusnin showo mamsu mamsi. Sinuntano Yesus isanne aane wolguwe. 10Maagni gaanynye meenawa Museni tumaasi assinynyana chinire malatet feeseter. 11Herodis meya taar'obaasneen ane Yesusni kashshire kanynye keeshu maama maysire wolgire Pilatosniki gafki. 12Herodisnawa Pilatosna zeemme faassere feyiis es wono ganere zomo sinete.

Yesusniista Kituni Mangsu Kate

(Mat. 27:15-26; Mar. 15:6-15; Yoha. 18:39-40; 19:1-16)

13Estan Pilatos maagni gaanynyanin, daraasin ha'sife baassotnawa daraasinna isarik zuutire teege. 14Ekka dey yi: « ‹Han asu daraasin mangu ugnak zoonsiwa› yira taaki teshsheti. Ta nitto sinak tu'nira nitto maketi malataassin isa mangsu basaastan aane danut. 15Esiisimato Herodis dey isa mangsu aane dane sinna boor'a innoki wolgire gafki. Ese han asusin kituta katuni mangsu aane zaguwe. 16Es bari boor'a baak ichcha kotanawa.»

17[Pilatos heebo heeboosi wonak isa taatonin baassok kotar.]

18Estan dara zuuttere isarik: «Han asusin tishkaat Barbaannin innok kotwa» yit chaagete. 19Barbaan katamaassi fe daraasin manguk kabgubaasiknawa kaa worubaasikna taatere fe asu.

20Pilatos Yesusnin kotanak sholefaat hepsa daraasin mamsi. 21Sinuntano daraas: «Suutwa! Suutwa!» yit chaagete.

22Pilatos keezsa wolgire: «Han asu wostena mangsu aambanso? Ta barin kituta katuni mangsu aane danut sinna boor'a ichcha kotanawa?» yi.

23Sinuntano baasso kaambesiison teggire: «Suutwa» yisete. Baasso chaagaas dey aatami. 24Es bari boor'a Pilatos sholseteeson zagsonek baassok aatire imi. 25Daraasi manguk kabgirenawa kaa worirena taatere fe Barbaannin kotanak mamussete. Es asusin dey baassok kotaat Yesusnin sholseteeson zagsonek aatire imi.

Yesus Suutte

(Mat. 27:32-44; Mar. 15:21-32; Yoha. 19:17-27)

26Yesusnin ephphe hamefeen Kerenaki asu Simon yiste ugunni wof balagarin katama yeefeen danere mesqeliison wossire basa orfoose hamanak zagsete. 27Showo dara dey Yesusni orfoose hamedifer. Es baassossin nibbesiison ki'et, waasset fa mashkasu faaser. 28Sinuntano Yesus baassoki yerqere ekka yi: «Nitto Yerusalemki mashkasuse, nitto teetasiknawa naanggotnitiisikna waasutitano taak waasutiita. 29Ese: ‹Zagiyaas, koonunoy magaasewa tanunoy tamaase suusto› ustona wona yoona. 30Es kabaasik asuni meya aamaason: ‹Innoosta gandowe› Kumaason dey: ‹Innotin aachuwe› uuk kabosone 31Ese han baron kewa i'oosta ekka zagtenanneen ichmaasta awu zagsonkoso?» 32Esiisimato mangu wosto woste hep asunin dey Yesusneen ane woruk ephphe hamete. 33Keraniyo yiste dimaasta kar'eteese Yesusnin esta suutete. Dey mangu wosto woste asusakitonin isaasin hoi'taasta, hepsaasin aldaasta suutete. 34Esseen orfo Yesus: «Abataaso, zagsefe baron aane arsoto sinna boor'a feeshun uwa» yi. Meya taar'oni meya dey maybaasta ixa ha'sere haa'esete. 35Es kabaasik daraas yerefa biidifer. Daraasin ha'sife baasso: «Oomiisin fu'e, Ha'o barin korina Kiristoos sinfaanane teetbaason fu'en biyaniwa» yit kanyesete.

36Meya taar'osakito dey esiisimato kanyesete. Barki tai'sere suqaro wayinini usha imet: 37Esiisimato dey: «Ne Ayhudni taato sinfaatane teetneeson fu'owa» yiset feeseter. 38Suuttena mesqeliisi teetta: «Haniis Ayhudni taatowa» yifa ticha tichire yeetisete.

Hep Boor' Asu Yesusneen Ane Suutte

(Mat. 27:38-44; Mar. 15:27-32)

39Mangu wosto wostere suutte baassossin isaas Yesusnin: «Ne Kiristoostenoso? Ese teetneesonnawa innotinna fu'owa» yit me'i.

40Sinuntano hepsaas wolgire ekka yit ke'i: «Neyista kituni mangsu katera feen Ha'ooson aane digefenoso? 41Inno zagini mangsuusik sholsu ke'o ephpha taadifenir. Sinuntano han asus isa mangsu aane mangsuwewa» yi. 42Tusire Yesusnin: «Daamiiso! Taato sinna yaafata kabaasik taan safarowa» yi. 43Yesus wolgire: «Neek futo makefawungwa, hash hawung taneen ane genneti footawa» yi.

Yesus Kiti

(Mat. 27:45-56; Mar. 15:33-41; Yoha. 19:28-30)

44Es kabaasik wonaasi issun sa'atin kabira izgin kar'ananneen daas zuuttera talme. 45Awaas talme; betemeqdesiisi yinu heppik karate. 46Yesus akama tega kaamak chaagge: «Abataaso! Kaanaason ne kushuussi adarak imingwa» yi. Es kabaasik geregere kaabaas kesi. 47Tii meya taar'oni gaanynyaas sina chowaason biinaase: «Han asus futok ookowa» yit Ha'ooson galatte.

48Es baron biyak esta zuuttere fe asus sina chowaason zuutire biyeteese nibbesiison ki'et wolsete. 49Yesusnin tai'sonon arsefe baassonawa Galiilan kabsere basa orfoose hama mashkasuse zuuttere woksok yersefaat sinfa wuzason biyet feeseter.

Yesus Moogsi Giri

(Mat. 27:57-61; Mar. 15:42-47; Yoha. 19:38-42)

50Ayhudni shongo zuuttesefe baassossin isa Yosef yiste ma'a ooko asu feer. 51Es asus Yesusniista zagte kituni mangsuni kar'ni chowaassi aane giruwe. Bar dey Armatiyas yistefa Yuudani katamaassi Ha'oosi taatoni yoonon abdik oodet feer. 52Pilatosniki hamme Yesusni dugnooson imanak shiiphe. 53Estan dugnooson kessire maama kimme shu'ak katera hoore oonu kabbartonoyna moogsi kabbare. 54Es baron zaginaas beysani wonni hooroni wonaasik.

55Galiilan kabsera Yesusni orfoose ya mashkasusikito Yosefneen hamera moogaason biye. Dugnobaas dey aakka kabbartenamato biyete. 56Estan keebesi wolsere dugnooson woshshuk kimaminewa shittone hoossisete. Tumaasimato beysani wonaasik beysa ephete.

Currently Selected:

Luqas 23: YemsaNTL

Highlight

Copy