Ntandiko 5
5
Baasukulu baa Adamu
1Eni niiyo nsoboolola ya baasukulu baa Adamu. Obu Luhanga aahangi̱ye muntu, akamuhanga mu kusasaana kuwe eenini. 2Aahanga musaasa na mukali̱ kandi aabaha mu̱gi̱sa. Obu aabahangi̱ye aabaghilamu “muntu.”
3Obu Adamu aahi̱ki̱i̱ye myaka 130, aabyala mwana amu̱su̱si̱ye kandi mu kususa kuwe kwonini, aamuluka li̱i̱na liye Seeji̱. 4Haanu̱ma ya ku̱byala Seeji̱, Adamu aatodha aamala myaka 800 munsi kandi aabyala batabani̱ na bahala be banji. 5Adamu aamala munsi myaka 930, du̱mbi̱ aaku̱wa.
6Obu Seeji̱ aahi̱ki̱i̱ye myaka 105, aabyala Enosi̱. 7Haanu̱ma ya ku̱byala Enosi̱, Seeji̱ aatodha aamala munsi myaka 807 kandi aabyala batabani̱ na bahala be banji. 8Seeji̱ aamala munsi myaka 912, du̱mbi̱ aaku̱wa.
9Obu Enosi̱ aahi̱ki̱i̱ye myaka 90, aabyala Kenaani̱. 10Haanu̱ma ya ku̱byala Kenaani̱, Enosi̱ aatodha aamala myaka 815 kandi aabyala batabani̱ na bahala be banji. 11Enosi̱ aamala munsi myaka 905, du̱mbi̱ aaku̱wa.
12Obu Kenaani̱ aahi̱ki̱i̱ye myaka 70, aabyala Mahalaleeli̱. 13Haanu̱ma ya ku̱byala Mahalaleeli̱, Kenaani̱ aatodha aamala munsi myaka 840 kandi aabyala batabani̱ na bahala be banji. 14Kenaani̱ aamala myaka 910 munsi, du̱mbi̱ aaku̱wa.
15Obu Mahalaleeli̱ aahi̱ki̱i̱ye myaka 65, aabyala Yaledi̱. 16Aamali̱ye ku̱byala Yaledi̱, Mahalaleeli̱ aatodha aamala myaka 830 kandi aabyala batabani̱ na bahala be banji. 17Mahalaleeli̱ aamala munsi myaka 895, du̱mbi̱ aaku̱wa.
18Obu Yaledi̱ aahi̱ki̱i̱ye myaka 162, aabyala Enoka. 19Haanu̱ma ya ku̱byala Enoka, Yaledi̱ aatodha aamala myaka 800 munsi kandi aabyala batabani̱ na bahala be banji. 20Yaledi̱ aamala munsi myaka 962, du̱mbi̱ aaku̱wa.
21Obu Enoka aahi̱ki̱i̱ye myaka 65, aabyala Metu̱seela. 22Obu aamali̱ye ku̱byala Metu̱seela, Enoka aaheeleli̱ya Luhanga kumala myaka 300 kandi aabyala batabani̱ na bahala be banji. 23Enoka aamala munsi myaka 365. 24Enoka aaheeleli̱ya Luhanga, nahabweki taatodhi̱ye aboneka, nanga Luhanga akamutwala.
25Obu Metu̱seela aahi̱ki̱i̱ye myaka 187, aabyala Lameeki̱. 26Haanu̱ma ya ku̱byala Lameeki̱, Metu̱seela aatodha aamala munsi myaka 782 kandi aabyala batabani̱ na bahala be banji. 27Metu̱seela aamala munsi myaka 969, du̱mbi̱ aaku̱wa.
28Obu Lameeki̱ aahi̱ki̱i̱ye myaka 182, aabyala mwana wabusaasa, 29aamuluka li̱i̱na Nuha, du̱mbi̱ aamughila ati, “Aku̱tu̱hu̱u̱mu̱li̱ya mu kukola kandi mu kusaaliluwa kwa kukola na mikono yaatu ekikuleetelejebuwa etaka eli Mukama aaki̱i̱ni̱ye.” 30Haanu̱ma ya ku̱byala Nuha, Lameeki̱ aamala munsi myaka 595 kandi aabyala batabani̱ na bahala be banji. 31Lameeki̱ aamala munsi myaka 777, du̱mbi̱ aaku̱wa.
32Obu Nuha aahi̱ki̱i̱ye myaka 500, aabyala Seemu, Haamu, na Yafeesi̱.
Currently Selected:
Ntandiko 5: Lubwisi
Highlight
Share
Copy
Want to have your highlights saved across all your devices? Sign up or sign in
Talinga-Bwisi: New Testament and 15 Old Testament books in Lubwisi
© Wycliffe Bible Translators, Inc., 2025
