Mak 12

Maun vehuran u ajini niah rat kit li ruwuruwan bilan aji subu

1Jisas modoptop mini ni limaun vehuran, bep nuhu, “Te aji subu tedok niah teruwu kawa lekonan niah rat leli wan i waen. Mweleli koron, bi mweleli ut ah rat wuwu sun wan kawa nong iginan. Mweleli val ah tedi mereangsolsol, tei valin aji ah tekit lin u ajinan lasanni. Aji subu nong malngi lekonan nong lengan ajinan umanni bi ramdi negit lin bi rat kele ajini niah rat um lelen. Aji subu nong mamlu dini vininan bi ban lihalan. 2Entorah taron tepma nagoah wan kawa nong rat temses bi aji subu nong masro datngin atnan non karih ban ben ajini niah rat kitli lekonan. Bep mini nuhu, nemavan nelepte nokon wan lekonan, niah rat kitlin. 3Ajini rah ratti neum lekonan aji subu nong ramabuhu atnan karih nong bi ram riji bi ramso bamula mul. Ba rat bamuskakte apma nga mini. 4Ajinan leko nong moso mwetani atnan non karih go, ba ram riji nokon bujun bi ramso bamula mul van busan kawu lengleng. 5Aji subu moso mwetani atnan non karih go ba ram mahi nge tapmak goah teso bawora. Tei halkawu lengleng niah rat leli ni tapmak. Rat riji datngin ba datngin ba ratih bamte ni. 6Tei limalen ba aji bwaleh tei teriak niah aji subu nong tesro. Tei mamjin nujun niah tekaji bamte. Aji subu nong masro nujun nong, bep nuhu, ‘Namaililngi luhmwi nuhu ran bihni meresnan nujuk nanong.’ 7Entorah tesro ba ajinan umanni nong niah rat kit li leko ramdi nebep nuhu, ‘Nujun aji subu naimapma nong niah manei lekonan ahe, entorah teman man mat. Tamahi metan goah man gamui lekonanda ahe.’ 8Ramali nujun aji subu nong bi ramahi, bi rabohni mamjin dini ut leko.

9“Aji subu nong man leli apma limalen? Manepma, neih bamte goah rat kit li lekonan bi maskani lekonan nong mini aji watnende. 10Kabulki le ululan at mate niah bep nuhu,

‘Bwetwejin val niah ajinan goah ram leli val rat varik

Ba tegambukak bi bibi bwetwejin val ah tei tetkol bi tekabis.

11Tei apma nanong ba tehuvin li noma Subu God.

Bi kamat kita ba tei tekabis tokol.’ ”

12Jiusni ramlel dopmi nuhu rama wuhu Jisas, gonani rat teililngi goah non maun vehuran ba tei tevep u ni. Ba rat temtani tarutni nge, bi rat bam buhu nga, ram ling gabarani bi raban li hala.

Tewoswos nagoah kaman gele takis mini Sisa?

13Ratesro datngin ajinan goah ratwuhu Temwat bi datngin goah rat tahkuru Herod mapma ben Jisas nuhu rama uhleli vehuran ini niah rabat wuhu lin. 14Rat tepma ben bi ram uhleli ini nuhu, “Sesesrakan, kamaililngi goah kobi aji mwetaknga. Kot bamtakte aji nga, bi kot ba vihni tenga nuhu aji bi aji kawu io tebaite ni kawu nga. Bi kom sesra tarutni i apma ah mwetaknga niah God modoni. Kam uhleli i kik, tewoswos le nondo Temwat u goah tama kele takis mini Sisa, aji kawunan vini ah Rom io tebu?” 15Ba tehu ba Jisas tekit luhmwi ngoah no vihnian tei karu. Bep mini ni nuhu, “U apma ba kamlel dopmi nuhu kama wuhu nana? Karulepte mane mapma mini nana ba nama kita.” 16Ramali mane bwaleh mapma ben bi muhleli i ni nuhu, “Ani lemtan itan i matpo nokon mane ahe bi han itan?” Rabalu ini rabep nuhu, “Lemtan Sisa bi han Sisa.” 17Jisas bep mini ni nuhu, “Apma ah non Sisa ba karugele mini Sisa bi apma ah non God ba karugele mini God.” Ni seranae rat tetkoh tokol i non vehuran ah tevep mini ni.

Gavak u aji, tigoah mandumre bamul dini mete

18Sadiusini ram mapma ben Jisas. Tei ajini nananong niah ratvep nuhu tarutni ran ba dumre bamul nga dini mete. 19Rabep mini nuhu, “Sesesrakan, Moses teskani temwat mini gema niah tevep nuhu, ‘Tigoah aji man mat bi danjun man mas, bi nujuru man bulong ba kisan maneli bweren. Gonani nujuru mandok, bi bibi nujun kisan ah temat.’ 20Tei vabwaleh ba ajini ratok tei ni tel a viru, bi tei kisa nge ah go. Tokok mwelak, tehu ba mat bi nujun tei tebulong. 21Karuan mwelak i bweren, tehu ba mat, bi junun tei tebulong. Kajilan mweleli nge tapmak vawonan ah karu. 22Goah ni kavet ram leli nge tapmak. Goah ni telaviru rat lak sera i aji havin nong ba rat mat sera bi nuju tei tebulong. Tei limalen ba aji havin nong mat. 23Entorah meteni randumre bamul dini mete vale masan le renan sasaran, ba manei danjun itan reini gonani tei ni telaviru ngate ah rat lak ini?”

24Jisas bep mini ni buhu, “Gimi ba kamaslal tokol le nomi vihnian. Kamaililngi nuhu u apma nagoah kamaslal? Kamaslal gonani kat baililngi ululan atmate nga, bi rowok tegol non God. 25Gonani entorah meteni ran dumre bamul dini mete vale masan ba ran gamgeni enjil at le bini. Dalmani bi havinni ba ran bamlak nga. 26U halan mas bamulan dini mete vale masan, ba katbado wulkite apma nga ah Moses teulu? Mase vehuran u kaba ah tempa leran biri bujuka? Teulan iginan nagoah God tevep mini Moses nuhu, ‘Nana nambi God non Abraham, bi God non Aesak, bi nambi God non Jekob.’ 27Meramnan vehuran nong ba mwesesra nuhu bibi ni God nan masan, ani tebaite God nan mete nga. Gimi ba kamaslal tokol.”

Dalek telingling ah kawu

28Ajinan goah tewuhu Temwat tedi bee bi terongo toptowan nong. Tedi nerongo goah Jisas tewalu luhmwi vehuran non Sadiusini niah rat uhleli ini. Mapma ben Jisas bi muhleli vehuran ini. Bep nuhu, “Dalek telingling apma ah kawu bi mamjikte?” 29Jisas bep mini nuhu, “Gonahe niah kawu bi mamjikte, naah niah bep nuhu, ‘Gimi ah tarut at Isrel karu rorongtak. Subu God nante niah bibi nondo God bi nondo Subu. 30Kon mwegololo i nom Subu God le jinem, bi le nom masan, bi le nom vihnian, bi le rowom seranae.’ 31Karuan ah kawu bi mamjikte tapmak ba naah bep nuhu, ‘Konetpe davim ni tapmak goah kom mwatpe kik ma.’ Dalek telingling go temubulong niah kawu tapmak goi karu nong.” 32Aji nong bep mini Jisas nuhu, “Tekabis tokol, Sesesrakan. Mwetaknga tapmak goah kobep nuhu Subu God ba bi ni God bi god go temubulong ba ni nante. 33Bi aji manetpe God nante le jinen bi le non masan bi le rowon sera, bi manetpe davinni tapmak goah matpe ni ma. Tewoswos ngate nagoah aji bat ioh li dalek telingling i karu nong vali goah bateli leut tegagal bi maskani i non sekakan mini God.” 34Jisas tekita goah tei mataisa tokol le non toptowan bi bep mini nuhu, “Kik, ba kom mapma sasari utkokonte non God.” Tei limalen go nong, ba aji tebamdi nga neuhlelite vehuran ini.

Kraes ba tebaite woran Deved nga nante, ba tei ni Subu non Deved

35Entorah Jisas tesesesrak le valin God bi muhleli vehuran i ni, bep nuhu, “Halan gavak nagoah, goah ramabuhu Temwat rabep nuhu Kraes ba bibi woran Deved? 36Gonani Tabite Kokon teskak mini Deved u goah nema vep nuhu,

‘Subu God tevep mini nok Subu nuhu,

“Kosadok li maun ngak ah mwiji,

Bovani goah nan leli maun nom kuranni randi van wokom.”’

37Deved bi tehu i non Subu. Halan gavak woran Deved nge man gamui Subu non Deved?” Rongnan nokon tarutmumu tekabis tokol i Jisas entorah rat rongo.

Jisas tevikat ben goah rat wuhu Temwat

38Entorah Jisas tesesra ni bi bep mini ni nuhu, “Kanrarei ajinan goah ramabuhu Temwat. Niah ram doni bamte goah ramahural dobo le bwelakte temrarap. Ramga leli nge nuhu tarutni rama vihni meresna li hal. 39Ram doni bamte goah ramali utnekte tekabis le valin tangroan bi ramdoni goah ramali utnen aji subu le kanleutan. 40Ba ajini nanong ba rabi ajinan lasan, ram las i leut non goah rabi bwe. Bi rabi ajinan tangroan temrarap. Ramga leli nge nuhu rama gerini uru. Ajini nanong ba norillan manei kawu tokol.”

Bwe niah teskani non mane

41Jisas tesadok dobo sasari ut ah rat wohni mane iginan le valin God. Tesadok negita goah tarutni rat tepma newohni no mane. Tei aji meresan halkwu niah rat wohni mane kawu. 42Tesadok ngama ba bwe bwaleh mapma bi bohni biribiri mane karu biribiri mane nong ba bat keni sen bwaleh. 43Jisas mahu non tarutni vautbwaleh bi bep mini ni nuhu, “Mwetaknga letlet nabep mini gimi, bwe rahe ba tewohni mane kawu ngate le tangin mane ahe vali go sera ah rat wohni. 44Gonani datngin ajini ba entorah rabohni no mane ba ramali go nge ah mwidi masen, dini no bwera mane ah mwidi. Ba u bwe rahe ba tedoskak sera gonae ah tei non. Teskak sera goah tei mamjin non niah tedok lin.”

Currently Selected:

Mak 12: APMA

Highlight

Copy