Mak 11

Tarutni rat haphawi Jisas entorah tevan Jerusalem

1Entorah rat tepma sasari ut Jerusalem, rat tepma masi sasari vini ah Betpas bi Betane. Ramapma li rep niah tei rewen Oliv. Jisas masro datngin non tarut nuru karu, 2bep mini nuru nuhu, “Karu dok nevan bawo li vini ihe. Tigoah kanru ban ba kanru gita malu dongke, rat lik bata. Malukte ngama bi aji tebado sadok tenga lin. Karuduk suru kaen bi kamrutku mapma dokah. 3Tigoah aji man uhleli i gimru nuhu, ‘Kamrutku u apma?’ Ba kanru bep mini nuhu, ‘Nomaru Subu modoni, ba kaman garuduk bamula mapma entorah manok dini.’ ” 4Entorah ratru ban bis li vini nong ba ramru wutdihi malu dongke niah rat lik bata wanketap li hal. Entorah ratruduk suru kaen, 5ba datngin ajini ah rat kita nuru rabep mini nuru nuhu, “Ae, itan tevep nuhu kamarutku dongke nong?” 6Ramru balu natapmak goah Jisas tevep mini nuru. Ajini nong rat ling gabarani nuru bi ramru ban. 7Ramrutku dongke nong mapma ben Jisas, bi rabohni bwela lin bi Jisas mwesak bi mwesadok lin. 8Tarutmumu ram lilki bwela li hal, ba datngin raban bi ram dasi run mel bi ram lilki mapma li hal. 9Tarutni rat tepma altak bi go raban bawo dumu. Ram ngaa rabep nuhu, “Seberan mini God. God man bagabis i aji ah mapma le han Subu God. 10God man bagabis i temwat non temanda niah Deved niah mapma. Tam haphawi God.”

11Jisas tewupngak Jerusalem, bi ban le valin God, tekitakita sera ut mapma le koron valin God, bi tei utebwarek masi, bi ban Betane mini non tarutni niah ni tesangwul vepnan karu.

Jisas teraji bujuka ah wan tei tebulong

12Tei matjubungnan, entorah rat mulma dini ut Betane, ba ma mwegaji Jisas. 13Tehu mwigit ba mwigita bujuka niah tei han ah fig. Bujuka nong ba wusun tei temamalkesbon. Ban van bujun nuhu nema wutdihite wan, tebu mapma ba wan tei tebulong ba tei rukte bulong nge, gonani tbaite taron nga nuhu batipte. 14Jisas bep mini bujuka nong nuhu, “Aji manbam gante wan nga tenangih.” Non tarutni rat rongo gonge ah tevep vehuran nong.

Jisas tevan le valin God

15Entorah rat wupngak Jerusalem bi Jisas ban le koron valin God, bi bawo mogoro goah ratti newos i no leut, bi goah rat gelgel. Mwedai buwukani bwelakain ut ah rat telih no mane lin, bi bwelakain goah rat wos i bila bwihilni. 16Teba doni tenga nuhu aji batakte leut mapma le koron valin God. 17Mwesesra ni bep nuhu, “Buk sangbak bep goah God tevep nuhu, ‘Valik ba manuhan i valin tangroan u tarutni sera.’ Ba kamgam leli nuhu nemai utnen netpo surakan non ajinan lasan ni.”

18Aji salean le valin God bi goah rat wuhu Temwat rat rongo vehuran nong bi rabawo nedongvi hal u goah rabat tehi Jisas. Ba ratemtani nge gonani tarutmumu rat samsamrak tokol i non sesesrakan. 19Tei utebwarek bi Jisas mini non tarutni ramalngi ut iginan.

Tei rowon vihni mwetakngaan niah teleli ba fig tetgu

20Tei jubung bwaleh matjubungnan, ba ram hural mapma. Entorah rat hural mapma li hal ba ram gita bujufig niah Jisas teraji. Tetgu bawo mere bi mwisip bis le libwin. 21Pita bihni lenga apma ah tekap bi bep mini Jisas nuhu, “Sesesrakan, kokita bujuka i kotraji ahe ba tetgu nong.” 22Jisas balu ini bep nuhu, “Mwetaknga letlet nabep mini gimi, tigoah nomi vihni mwetakngaan mandok nokon God, 23ba koneililngi go kon bep mini rep ahe, nuhu, ‘Kodumre bi komsip newut gabarak le teh.’ Tigo nuhu nomi vihni gakaruakan man bulong ba kon bihni mwetaknga nan nuhu apma ah kon bep man gab, ba apma nanong man gab radanae mini kik. 24Bi nau gonong nagoah nabep mini gimi nuhu, tigoah kan dangro bi neuhleli apma, ba kon vihni mwetaknga, bi koneli apma nanong, bi leut sera man neskak mini kik. 25Tigoah kondi boswos nuhu koma dangro, bi kon vihni gabarak sera leut ah rat kapma niah kot leli mini aji watwatnende ni. Metan goah Temam niah modok mere lebini man bihni gabarani nom kapmwaan. 26Tigoah kon ba vihni gabarani kapmwaan nga non goah ram leli kapmwaan vanokom ba Temam niah modok mere lebini ba man ba vihni gabarani nom kapmwaan nga.”

Rat uhleli nuhu rowok tegol apma ah Jisas teleli umanni lin

27Ram mulma Jerusalem. Entorah Jisas tehural ban le valin God ba salean le valin God bi goah rat wuhu Temwat bi lemtan tarutni ram mapma ben. 28Ram uhleli ini nuhu, “Woswosan apma niah koma buhu niah komleli umanni rahe lin? Itan ah teskani woswosnan mini kik nuhu koma leli?” 29Jisas balu ini mini ni bep nuhu, “Nama uhleli vehuran bwaleh i gimi, ba tigoah kaneskani walunan mini nana bi nanbep mini gimi na woswosan apma ah namleli leutni rahe lin. 30Karu bep mini nana, lelehan ah Jon telehvi tarutni ini ba tepma ibeh, tepma ben God io ben aji?” 31Rabawo nesalesige mapma mase rabep nuhu, “Tan bep nuhu mwegap, gonani tigoah tan bep nuhu, ‘Tepma ben God,’ ba man bep nuhu, ‘Ba mwegai u apma nagoah katba vihni mwetaknganan Jon nga?’ 32Bi tanba vep nga nuhu, ‘Ajini rat vep mini nuhu nema leli.’ ” Gonani rat temtani tarutni gonani nisera rat vihni mwetaknga nan nuhu Jon ba tei ni ajinan dalen God. 33Rabalu ini rabep nuhu, “Kamat baililngi nga.” Jisas bep mini ni nuhu, “Goi nana bi nanba vep utnga ah namali woswosan ahe iginan.”

Currently Selected:

Mak 11: APMA

Highlight

Copy