مَرقُس 16

زِنیا بیئِن عیسی

1وخدی روژ شَمَه مقدّس تموم بی، مریم مَجدَلیَّه ئو مریم، دا یعقوب ئو سالومَه، ادویَه‌لی گه اَرِه کفنِ‌دفن مِردیَل اِ کارونَ ماوِرد خِرییو، تاگَه بِچِن ئو جنازَه عیسی آمادَه کَن. 2اَسَه اِ اوّلین روژ هفتَه، وِرِصو، وخدی هویَر داتی، ویرِ لَحَک کَتِنِ رئی. 3اونَل وَه یَکتِریونَ موئِت: «کی بَردِهَه اِوَر لَحَک اَرِنمو پِلَ مِ؟» 4وخدی سِیلو کِرد، دییو اَ بَردَ گه فِرَه کَلِنگ بی، اِوَر لَحَک پِل هُاردیَسی. 5اَسَه چِن اِنوم لَحَک، پیا جِهالونی دی گه نیشتوئیِ لا راسا ئو چوخا اِسبی‌ای اِوَر بیتی. وخدی اوُ دی زِلَ‌تِراقا بین. 6پیا جِهالَ وِتیَ بینو: «زِلَتو نَچو. هُمَه هاینونِ فِتِراخ عیسیِ ناصری گه کیشیون اَر صلیب. او زِنیا بیَ ئو اَر ایرَه نیَ. سِیل کَن اَر جای گه جنازه‌ئو نائی. 7اِسگَه، بِچِن ئو بوشِنَ پطرس ئو شاگردَل عیسی، گه او وِر اژ هُمَه مَچو اَرِه هیال جلیل؛ اَر اورَه موئینینونی، هَراَ جورَ گه وِرِکار وِتیَ بینتو.» 8اَسَه ژِنَل هاتِنَ دِریر، ئو اژ لَحَک حِیواین، اَرِیَگه کَتوئینِ رِکَه ئو سرون اَری شویائی. اونَل وَه هُیچ‌کس چیئونی نوئت، اَرِیَگه زِلِئونَ مَچیا.

9وخدی عیسی صوشفق اِ اوّلین روژِ هفتَه زِنیا بی، اول ظاهر بی اَر مریم مَجدَلیَّه گه اَژینی هفت مِلاکَت کِردوئیتیَ دِریر. 10مریم‌یش چی ئو خَوَر داءَ شاگردَل عیسی گه عازیَتی بین ئو مَگیریان. 11مِنتائای اونَل وخدی شنَفتو گه عیسی زِنیا بیَ ئو مریم او دیَسی، باوارو نَهَرد.

12دُما اَوَه، عیسی ووژ وَه جوری‌تِر ظاهر کِردی اَر دو نفر اَژینو گه مَچیان اَرِه نوم آبادی. 13اَ دوءَ گِلوناهُاردِ دُما ئو ایی خَوَرونَ داءَ کسَلی‌تِر، مِنتائای قصَه اون‌یشو باوار نَهَرد.

14اَسَه وخدی اَ یازَه نفرَ داشدو خوراکونَ مَهُارد، عیسی ظاهر بی اَرینو، ئو خِض کِردی اَر اونَل وَه خاطر سنگدلی ئو بی‌ایمونیو، اَرِیَگه قصَه کسَلی گه عیسی‌ئو دُما زِنیابیئِنی دوئی، باوارو نَهَرد. 15اَسَه وِتیَ بینو: «بِچِن اَرِه سِرُسَر دنیا ئو ایی خَوَر خَوش انجیلَ اِلوم کَن اَر کُل مردِم دنیا. 16هر کی ایمو باری ئو خُسِل تیَمید بِگِری، نجادَ مَگِری. مِنتائای هر کی ایمو ناری، مَکومَ ماو. 17ئو ایی نشونه‌لَ ها گَرد ایمودارَل: وَه نُم مِه مِلاکَتَل مَهَنَ دِریر ئو وَه زوئونَل جدیدی قصَه مَهَن 18وَه دَسَلو مارِلَ مَگِرِن، ئو اَر ژیَر بیرِن، ضِرَدیَ بینو نِمَرَسی، ئو دَسَ مَنِن اَر قِ مریضَل ئو اونَل شِفا مَگِرِن.»

19اَسَه عیسیِ خداون دُما یَگه ایی قصه‌لَ وِتیَ بینو، ویر آسمو بَریا، ئو نیشت اَر دس راس خدا. 20اونَل چِنَ دِریر، ئو اَر کُل جا موعظَه‌ئونَ مَهَرد، ئو خداون وَه‌گَردو کارَ مَهَردی ئو پِغوم اونَل وَه نشونَه‌ل ئو مُجِزَه‌لی گه وَه‌گَردو بی، ثابتَ مَهَردی.

Currently Selected:

مَرقُس 16: LBT

Highlight

Copy