مَرقُس 15

مِحاکمَه اِ بِرُوَر پیلاتُسِ والی

1هَر یَگه بیَ صو، هِرازِه، رِئیسَل کاهنَل وَه‌گَرد شیخَل ئو مَلِمَل تورات ئو کُل کسَلی گه جُزم شورا یهود بین نیشتِن اَر شور ئو عیسی‌ئو دس بُوئنیا بِردو داونَ گیر پیلاتُسِ والی. 2پیلاتُس اژ عیسی پِرسیتی: «یانی تو پاتِشا یهودیَلین؟» عیسی جوواو داتی: «تو هُنَتَ وِت!» 3رِئیسَل کاهنَل اتهامَل فِرِه‌ی داون اَری. 4پیلاتُس اِدوارَه اَژی پِرسی: «یانی هُیچ جوواوی نِرین؟ سِیل کَ چَنی اتهامَ میَن اَرینِت!» 5مِنتائای عیسی اِدوارَه هُیچ جوواوی ناتی، هُنَ گه پیلاتُس بِلُجوئی هاتی.

6پیلاتُس رِسیم داشدی گه اِنوم عِد، یِه زندونی وَه خواس مردِم آزاد کِ. 7اِنوم یاخیَلی گه وَه خاطر آم کُشتِن اِنوم مِرافه‌ی، کَتوئینِ زندو، پیای بی گه نُم باراباس بیتی. 8مردِم هاتِن اَرِه تک پیلاتُس ئو هِستون اَژی گه رِسیم هر سالی باریَ جا. 9پیلاتُس اَژینو پِرسیتی: «یانی مِتو پاتِشا یهودیَل اَرِنتو آزاد کَم؟» 10پیلاتُس یَه وِتی اَرِیَگه فیَموئی رِئیسَل کاهنَل عیسی‌ئو اژ حَسوئی داونَسَ گیر او. 11مِنتائای رِئیسَل کاهنَل جیَمیَتو آنتریک کِرد تاگَه اژ پیلاتُس بِئو اِجال عیسی، باراباس اَرِنو آزاد کِ. 12اَسَه پیلاتُس یِگِلی‌تِر اژ اُوُ پِرسیتی: «اَنی وَه‌گَرد پیای گه هُمَه موشینونیَ بی پاتِشا یهودیَل، چَه بِهَم؟» 13اونَل یِگِلی‌تِر قارونو: «بِکیشتی اَر صلیب!» 14پیلاتُس اَژینو پِرسیتی: «اَرِه‌چَه؟ چه گَنی‌ای کِردیَسی؟» مِنتائای اونَل ویشتِرَ مَقارونو: «بِکیشتی اَر صلیب!» 15اَسَه پیلاتُس گه مِهِستی وَه دل مردِم کار بِهِه، باراباس اَرِنو آزاد کِردی ئو عیسی شلاخ داتی، ئو سپارتی تاگَه بِکیشِنی اَر صلیب.

سَروازَل عیسی‌ئو تیزمَتَلَ مَهَن

16اَسَه سَروازَل، عیسی‌ئو بِرد اَرِه نوم قِلا کاخ والی، ئو گردان سروازَل‌یشو کُل جیَم کِرد اَر دور یَک. 17اَسَه چوخا کاوُنی کِردِ وَر ئو تاجی اژ دِرِکو دُریس کِرد ئو نائونِ سر. 18اَسَه بِنیائو نا اَر خَوَردار هوسیائین اَر نوای، موئِتو: «درود اَر پاتِشا یهودیَل!» 19ئو وَه چو ماون اَر نوم سر ئو تِفونَ ماوشد اِنوم رُی، ئو اَرنوای زُنیونَ ما ئو مَچَمیانا. 20دُما یَگه عیسی‌ئو تیزمَتَل کِرد، چوخا کاوِهِه‌ئو اِوَر کَن، ئو جِنِکَل ووژی کِردونِ وَر. اَسَه بِردونَ دِریر تاگَه بِکیشِنی اَر صلیب.

عیسی مَکیشِن اَر صلیب

21اونَل پیای شَمعون نُم اژ مردِم قیرَوان گه باوَه اسکندر ئو روفُس بی ئو اژ سر کشتِ‌کارَ ماهات ئو اژ اورَه ردَ میا مجبورو کِرد تاگَه صلیب عیسی بِگِریِ کول. 22اَسَه عیسی‌ئو بِرد اَرِه جای گه نُم جُلجُتا بی، گه میَنا کَپولِک مِ. 23اَسَه شِراوی گه میمِنایی قاطی بیتی داونَ بی، مِنتائای عیسی قبول نَهَردی. 24اَسَه اوُ کیشی اَر صلیب ئو جِنِکَلی اِنوم ووژو بیَرونا کِرد، اَرِیَگه بیَرو دیاری بو تیروپِشکو آوشد.

25سات نُه صو بی گه عیسی‌ئو کیشی اَر صلیب. 26اَر رُی تصقیرنُامَه‌ اوُ نُیسو: «پاتِشا یهودیَل.» 27دو نفر مِلَه‌بگیریش وَه‌گَرد او کیشیون اَر صلیب، یَکی اِ لا راس ئو یَکی‌تِریش اِ لا چپا. 28[هُنَ اَ چیئَه گه اِنوم نُسَخ مقدّس بی وَه اَنجوم رَسی گه موشی: «او اژ تصقیرکارَل وَه حساو هات.»] 29کسَلی گه اژ اورَه ردَ موئیان سرونَ مَلَکو، ئو هُنَ گه دُشمینونَ ما موئِتو: «اِاِ ... تو گه مِهِستِت معبداِر بِرِمِنین ئو سه روژَ اِدوارَه باوژینی، 30ووژِت نجاد دَ ئو اژ صلیب بوریَ هُار!» 31رِئیسَل کاهنَل ئو مَلِمَل تورات‌یش اِنوم ووژو تیزمَتَلونَ مَهَرد ئو موئِتو: «کسَلی‌تِر نجاد داتی مِنتائای نِمَتونی ووژ نجاد دِ! 32اِسگَه بیلا مسیحی گه باس بای، اَ پاتِشا اسرائیل، اژ صلیب باءَ هُار تاگَه بوئینیم ئو ایمو باریم.» اَ دوئِیشَ گه وَه‌گَرد او کیشیائین اَر صلیب دُشمینونَ بینَ ما.

مِردِن عیسی

33اژ سات دوازَه تاگَه سات سه دُما نیمَرو تیَریکی کُل اَ وِلات‌اِرا گِرتی. 34سات سه دُما نیمَرو، عیسی وَه دَنگ کَلِنگ دای داتی: «ایلویی، ایلویی، لَمّا سَبَقْتَنی؟» یانی «خداءِ مِه خداءِ مِه اَرِه‌چَه مِنِت وِل کِردیَ؟» 35بِری اَژینو گه اَر اورَه بینَ وخدی یِئونَ شنَفت، وِتو: «گوش بِگِرِن، هِنا مِهِه اَر ایلیا پِخَمَر.» 36اَسَه یَکی اَژینو گه اَر اورَه بیَ هَراَ دو هاتِ وَر ئو اَبری‌ای اژ شِراو تُرشیا پِر کِردی ئو کِردَ تُک چوآ، ئو بِردیِ وَر دَم عیسی تاگَه بیری، ئو وِتی: «هَرهُنَ وِل کَنی تاگَه بوئینیم ایلیا پِخَمَرَ مای اژ صلیب بارتیَ هُار؟» 37اَسَه عیسی وَه دَنگ کَلِنگ دای داتی ئو هِناسی آخِر کیشیتی. 38اَسَه پردَه معبد اژ بِلِنگ تاگَه هُار بیَ دو کُت. 39وخدی فرموندَه سَروازَل گه اِ رویِرُی عیسی هوسیائی دیتی چطور گیو ناتی، وِتی: «اِراسی ایی پیا کُر خدا بی.»

40بِری اژ ژِنَل‌یش اژ دویرا سِیلونَ مَهَرد. اِنوم اونَل مریم مَجدَلیَّه، مریم دا یعقوب گُجِرَ ئو یوشا ئو سالومَه بین. 41ایی ژِنِلَ وخدی گه عیسی اِ جلیل بی مِرید بینی ئو خذمَتون اَژینَ مَهَرد. ویشتِرِ ژِنَلی‌تِریش گه وَ‌ه‌گَردی هاتوئین اَرِه اورشلیم، اَر اورَه بینَ.

کفنِ‌دفن عیسی

42اَ روژَ، روژِ ’تیارِک دائِن اَرِه عِد پِسَخ‘ بی، یانی روژ وِر اژ شَمَه مقدّس بی. اَسَه باایوارَه 43پیای وَه نُم یوسف اژ مردِم شیَر رامَه، گه آمی شریف ئو اژ شورا یهود بی ئو چیَمَ‌رئی پاتِشائی خدا بی، جورَت‌ داءَ ووژ چی اَرِه تک پیلاتُس ئو جنازَه عیسی هِستی. 44پیلاتُس گه باوار نِمَهَردی گه عیسی وَه ایی زویَ گیو نائیتی، هِنا کِردی اَر فرموندَه سَروازَل تاگَه بوئینی عیسی گیو ناسی یا نه. 45وخدی اژ فرموندَه سَروازَل فیَمی گه عیسی گیو ناسی، جنازَه عیسی داءَ یوسف. 46یوسف‌یش پارچَه کتونی خِریتی ئو جنازَه عیسی اژ صلیب آوِردیَ هُار، ئو لو اِردا اِ پارچَه کتونِهَه ئو نا اِنوم لَحَکی اِ کمر کوی‌ای گه تِراشو دائی. اَسَه بَرد کَلِنگی پِل داتیِ دِراخِل لَحَک. 47مریم مَجدَلیَّه ئو مریم، دا یوشا، دییو گه جنازَه عیسی‌ئو نا اَر کو.

Currently Selected:

مَرقُس 15: LBT

Highlight

Copy