مَرقُس 14

نشقَه کُشتِن عیسی

1دو روژ مَنوئیَ عِد پِسَخ ئو فطیر. رِئیسَل کاهنَل ئو مَلِمَل تورات، مِنِی رئیونی مَهَرد گه عیسی وَه فنی بیَنَ گیر ئو بِکُشِن، 2اَرِیَگه موئِتو: «اِ روژَل عِد ایی کارَ نَهَن، تاناخواد مردِم بِرِشِن‌ِ یَک.»

3وخدی عیسی اِنوم آبادی بِیت‌عَنْیا اِ مال شَمعونِ جِذامی نیشتوئی اَرسر سِفِرَه ، ژَنی وَه ظرف مَرمَرین اژ عطِر خیمتی‌ای، اژ گل سنبل خالص، هات اَرِه تک عیسی ئو ظرفِهَه اِشکونی، عطِرِهَه رِشون‌َ سراِرا. 4بِری اژ کسَلی گه اَر اورَه بین آگِرون اژ سر چی وِتونَ یَکتِری: «اَرِه چَه باس ایی عطِرَ هُنَ وَه تالون بِچو؟ 5اَرِیَگه موئیا ویشتِر اژ سیصد سکَه بِفروشِنی ئو پیل بیَنیَ ژارَل.» ئو فِرَه خِضو کِرد اَر ژِنَهَه. 6مِنتائای عیسی وِتیَ بینو: «کارتون اَژی ناآشدوئی. اَرّا کاری مِهِینو برَنجی؟ او کار خوئی اَر حخ مِه کِردیَسی. 7ژارَل هَر هانَ گَردتو ئو هر وخد بِتو مَتونینو یاریو دِینو، مِنتائای مِه هَر اَر تک هُمَه نیِم. 8ایی ژِنَ اَ چیئَه گه اژ دس اِرَماهاتی اَنجوم داتی. او وَه ایی کارَ، اژ وِرِکار لار مِه اَرِه کفنِ‌دفن، آمادَه کِردیَسی. 9حخیختاً، موشِمَ بینتو، اِ تموم دنیا، هر جا خَوَر خَوش پاتِشائی خدا اِلوم بو، اژ کار ایی ژَن‌یشَ وَه یائی تیَریفَ ماو.»

خیونت یهودا

10اَسَه یهودا اَسخَریوطی گه یَکی اژ اَ دوازَه شاگردَ بی، چی اَرِه تک رِئیسَل کاهنَل تا بیَ قاپ عیسی‌آ. 11اونَل وخدی قصَه‌ل یهودائو شنَفت، خَوشالا بین ئو وَدَه‌ئو داءَ بی گه پیلَ میَنیَ بی. اَسَه او هَراَ مِنِی مِجالیا بی تا بِئَه قاپ عیسی‌آ.

شُم عِد پِسَخ

12اِ اوّلین روژِ عِد فطیر گه وَرک پِسَخ قُرونیَ مَهَن، شاگردَل عیسی اَژینو پِرسی: «مِت بِچیم اَرِه ‎کو ئو اَرِنِت تیارِک بوئینیم تاگَه شُم پِسَخ بیری؟» 13او دو اژ شاگردَلی کِل‌کِردی ئو وِتیَ بینو: «بِچِن اِنوم شیَر؛ اَر اورَه پیای وَه‌گَرد کویزَه آوی ماءَ وَرپیریتو. بِچِنیَ دُما. 14هر جا گه چیِ نوم، وَه صائای اَ مالَ بوشِن، ”استادَ موشی، مِموخونَه مِه هار کو تاگَه شُم پِسَخ وَه‌گَرد شاگردَلِم بیرِم؟“ 15او مال کَلِنگ فرش‌کَریا ئو آماده‌ی اِ طَوَقَه‌سر، نشونتونَ مِ. اَر اورَه اَرِه ایمَه تیارِک بوئینِن.» 16اَسَه شاگردَل چِن اَرِه شیَر، کُل چی هَراَ جورَ بیَ گه عیسی وِتوئیتیَ بینو ئو تیارِک پِسَخو دی.

17وخدی بیَ شو، عیسی وَه‌گَرد دوازَه شاگردی چی اَرِه اورَه. 18وخدی نیشتِن اَر سر سِفِرَه، ئو خوراکونَ مَهُارد، عیسی وِتی: «حخیختاً، موشِمَ بینتو گه یَکی اژ هُمَلی گه وَه‌گَردِم خوراکَ میری، مِنَ مِئَه گیر دشمن.» 19اونَل پَژار بین ئو یَکی‌یَکی اَژینو پِرسی: «اَوَه مِنِم؟» 20عیسی وِتی: «یَکی اژ هُمَه دوازَه نفرَ، هَراَوَه گه نُو ووژ وَه‌گَرد مِنَ مَژَنی اِنوم دُوری. 21کُر اِنسو هَراَ جورَ گه اِبارَه او اِ نُسَخ مقدّس نُیسیاءَ، مَچو، مِنتائای هِرّو اَرِه کسی گه کُر اِنسونَ مِئَه گیر دشمنا. اَرِنی بیتِر بی گه هرگِس وَه دی نِهاتا.»

22هَنی سرگرم هُاردِن بین گه عیسی نونی گِرتی ئو دُما شگِر کِردِن، کُت کِردی ئو داءَ شاگردَل ئو وِتی: «بِگِرِن یَسَ لار مِه.» 23اَسَه جُمِهَه گِرتی ئو دُما شگِر کِردِن، داءَ اونَل ئو کُل اَژینی خُرّو دا. 24ئو وِتیَ بینو: «یَسَ خوین مِه اَرِه عَتی [تازَه] گه وَه خاطر فِرَه کَسِلَ مَرِشی. 25حخیختاً، موشِمَ بینتو گه اژ ثمر انگویر دیَر خُرّ نِمیَم تا روژی گه اِ پاتِشائی خدا، تازَه تازَه خُرّ دَمی.»

26اَسَه دُما سروء حیوَنِن، کَتِنِ رئی چِن ویرِ کوی زِتو.

پیشگوئی حاشا کِردِن پطرس

27عیسی وِتیَ بینو: «کُلتو مِه وِلَ مِهِینو. اَرِیَگه اِنوم کِتاو زکریا پِخَمَر نُیسیاءَ،

«”میَم اَر شوئونِهَه

ئو کاوِرَل اژ یَکَ مَچویچِن.“

28مِنتائای دُما یَگه زِنیا بوئم، وِر اژ هُمَه مَچِم اَرِه هیال جلیل.» 29پطرس وِتَ بی: «جُ‌جُ اَرّ کُل وِلِت کَن، مِه تو وِل نِمَهَم.» 30عیسی وِتَ بی: «حخیختاً، موشِمَ بینِت، هَر ایمشو، وِر اژ یَگه کِلَه‌شیر دو گِل باءِ بال، تو سه گِل مِه حاشاءَ مِهِین!» 31مِنتائای پطرس هوسیا اَر سر قصَه ووژ وِتی: «اَرّ لازم بو وَه‌گَردِت بِمِرِم، حاشات نِمَهَم.» باخی شاگردَل‌یش هَر یِئونَ وِت.

باخ جِتسیمانی

32اَسَه چِن اَرِه جای گه نُم جِتسیمانی بیتی. اَر اورَه عیسی وِتیَ شاگردَلی: «بِنیشِن اَر ایرَه، تاگَه مِه دوعا بِهَم.» 33اَسَه پطرس ئو یعقوب ئو یوحنا وَه‌گَرد ووژ بِردی ئو پریشو ئو هِراسو، وِتیَ بینو: 34«اژ زور خُصَه، کَتِمَس اَر مِردِن. بوسِن اَر ایرَه ئو بِمینِنَ خَوَر.» 35اَسَه تیکه‌ی چیِ نواتِر ئو کَت اَر رُی خاک ئو دوعا کِردی گه اَرّ ماو اَ ساتَ اَژی بِکُوئیتِ لا. 36عیسی هُنَ وِتی: «اَبّا، باوَه، کُل چی وَه دس تونَ ماو. ایی جُمَ اژ مِه باوژِ لا، مِنتائای نه اَ چیئَه گه خواس مِنَ، بلکِم اَ چیئَه گه خواس تونَ.» 37وخدی عیسی گِلاهُاردی، دیتی گه اونَل هانِ خاو. اَسَه وِتیَ پطرس: «شَمعون، حیوَتینَ؟ یانی نِمَتونستِت ساتی بِمینین‌َ خَوَر؟ 38بِمینِنَ خَوَر ئو دوعا کَن تاگَه نَکُوئینونِ اِنتحو. روح مِیتی مِنتائای لار قُوَّه نِری.» 39اَسَه اِدوارَه چی ئو هَراَ دوعاءَ کِردی. 40وخدی گِلاهُاردیِ دُما، اِدوارَه دیتی اونَل هانِ خاو، اَرِیَگه چیَمو فِرَه سنگینا بوئی. اونَل نِمَذِناسدو گه چَه بوشِنیَ بی. 41اَسَه عیسی گِل سِئِم هات اَرِه تک شاگردَل وِتیَ بینو: «یانی هَنی هاینونِ خاو ئو شَکَتی اِرَمِهِینو؟ دیَر بسَ! اَ ساتَ گه باس بای رَسیَ. هَراِسگَه کُر اِنسونَ میَنَ گیر گناکارِلا. 42هیزگِرِن، بِچیم. سِیل کَن اَوَه گه خیونت اَر مِنَ مِهِه اژ رئیَ مَرَسی.»

عیسی میَنَ گیر دشمنا

43عیسی داشدی قصَه مَهَردی گه یِگِلی یهودا، یَکی اژ، اَ دوازَه نفرَ، وَه‌گَرد بِری گُرزَ ئو شِمشیرَ دس، اژ جونِم رِئیسَل کاهنَل ئو مَلِمَل تورات ئو شیخَل هاتِن. 44کسی گه خیونتَ بی کِردوئی وَه کسَلی گه وَه‌گَرد بینی، نشونَه دائیتی ئو وِتوئیتی: «اَ کسَ گه ماچ کَم، هَر اَوَه‌‌سَ؛ اَوَه بِگِرِن ئو بیَرِن ئو حُواستون اَری بوتی.» 45اَسَه وخدی رَسین اَر اورَه هِرازِه نزیک بی اَر عیسی، وِتی: «استاد!» ئو، او ماچا کِردی. 46اَسَه اَ پیالَ رِشیان اَر سر عیسی‌اِرا، ئو گِرتو. 47مِنتائای یَکی اژ کسَلی گه اَر اورَه بیَ شِمشیر کیشیتی، ئو ضرپه‌ی دا اَر خِلمتکار کاهن اعظم ئو گوش بِری. 48عیسی وِتیَ بینو: «مَر مِه دُزِم گه اَرِه گِرتِن مِه وَه گُرز ئو شِمشیر هاتینونَ؟ 49هر روژ اَر وَر چیَم هُمَه اِ معبد تیَلیممَ ما ئو مِنتو نَگِرت. مِنتائای بِیلِن نُسَخ مقدّس اَنجوم بِگِری.» 50اَسَه کُل شاگردَل، عیسی‌ئو وِل کِرد ئو حِیواین.

51پیا جِهالی گه فَخَد پارچَه کتونی لو اِردائیتی اَر قِ ووژ وَه دُم عیسی کَتِ رئی. اوئیشو گِرت، 52مِنتائای او اَ چیئَه گه اِوَر بیتی هُیشتیَ جا ئو لُت حِوای.

عیسی اِ بِرُوَر شورا یهود

53اونَل عیسی‌ئو بِرد اَرِه تک کاهن اعظم. کُل رِئیسَل کاهنَل ئو شیخَل ئو مَلِمَل تورات جیَم بوئین اَر اورَه. 54پطرس‌یش اژ دویر چیَ دُم عیسی تاگَه رَسی اَر قِلا مال کاهن اعظم. اَسَه اَر اورَه، نزیک آگِر، وَه‌گَرد قِلااورَل نیشت تاگَه ووژ گرم‌اِرا کِ. 55رِئیسَل کاهنَل ئو تموم شورا وَه مِنِی شاتیَلی اَرضد عیسی بین تاگَه بِکُشِنی، مِنتائای هُیچونی نَهَردَ دی. 56اَرِیَگه، وَه ایی حالا گه فِرَه کسَل شاتیَل دِرو اَرضد عیسی‌ئو دا، مِنتائای شاتیَلو اِجور یَک نوئین. 57اَسَه بِری اژ مردِم هاتِنِ وَر ئو وَه دِرو اَرضد او شاتیو دا، وِتو: 58«ایمَه ووژمو شنَفتِمونَ گه موئِتی، ”ایی معبدَ گه اِنسو ساخدیَسی مَرِمِنِم ئو سه روژَ معبدی‌تِرَ مَسازِم گه وَه دَسِ اِنسو نسازیاءَ.“» 59مِنتائای شاتیَل اون‌یش اِجور یَک نوئین. 60اَسَه کاهن اعظم هیزگِرتی اِ بِرُوَر کُل اژ عیسی پِرسیتی: «هُیچ جوواوی نِمِین؟ ایی قصه‌لَ چیَ گه اَرضد تو شاتیَ میَن؟» 61مِنتائای عیسی هُیچ دَنگ نَهَردی ئو جوواوی ناتی. یِگِلی‌تِر کاهن اعظم اَژی پِرسی: «یانی تو اَ مسیحینَ گه باس بای، کُر خداءِ بِمارِکین؟» 62عیسی وِتَ بی: «هم، ئو کُر اِنسونَ موئینینو گه نیشتیَس اَر دس راس خداءِ قادر، ئو اَر رُی اُرَل آسمونَ مای.» 63اَسَه کاهن اعظم یَخَه ووژ دِریتی ئو وِتی: «دیَر چه شاتمونی مِ؟ 64کِفِرتو شنَفت. حُکِمتو چیَ؟» اونَل کُل فِتوائو دا گه سِزای مِردِنَ. 65اَسَه بِری اَژینو بِنیائو ناءَ تِف اَری آوشدِنی؛ اونَل چیَمَلو بَسد هُنَ گه ماون اَرینی، موئِتو: «نبوّت کَ!» قِلااورَل‌یش گِرتو ئو داون اَری.

حاشا کِردِن پطرس

66وخدی گه پطرس هَنی اِ هُار مالِهَه، نوم قِلا بی، یَکی اژ کلفتَل کاهن اعظم‌یش هات اَرِه اورَه 67ئو دیتی او نزیک آگِر ووژ گرم‌اِرا مَهَردی. اَ ژِنَ گِز کِرد اَری ئو وِتی: «تونیش وَه‌گَرد عیسیِ ناصری بین.» 68مِنتائای پطرس حاشا کِردی ئو وِتی: «نِمَذانِم ئو نِمَفیَمِم چَه موشین!» یَه وِتی ئو چی اِنوم دالو مالا. هَراَ وخدَ کِلَه‌شیر کَتِ بال. 69یِگِلی‌تِر، چیَم اَ کلفتَ کَت اَر پطرس وِتیَ کسَلی گه اَر اورَه هوسیائین: «ایی پیا یَکی اژ اونَسَ.» 70مِنتائای پطرس اِدوارَه حاشا کِردی. گِری‌تِر، کسَلی گه اَر اورَه هوسیائین اِدوارَه وِتونَ پطرس: «چِرچی نیَ تونیش یَکی اژ اونَلین، اَرِیَگه جلیلی‌ای کین.» 71مِنتائای پطرس بِنیا نا اَر نُئِر کِردِن ئو قسم هُاردی، وِتی: «ایی پیاءَ گه موشینو نِمَشتاسِم!» 72هَراَ وخدَ، کِلَه‌شیر گِل دوئِم کَتِ بال. اَسَه پطرس قصَه‌ل عیسی آوِردیَ ویر گه وِتوئیَ بی: «وِر اژ یَگه کِلَه‌شیر دو گِل اِ بال بای، تو سه گِل مِه حاشاءَ مِهِین». اَسَه دل اِشکیاتی ئو بیِ گیری.

Currently Selected:

مَرقُس 14: LBT

Highlight

Copy