Maak 15

Mo Dǝm Kǝ Jesu nToom Pailet

1Kaaɗe ɓit mang, ɓe pris ɗenan-nan mo, ashak kǝ nennan-nan mo, kǝ nenkám Wàar Mosis mo, kǝ nenɓeetpwoo nǝ mo jir, mo kuur ashak, ɓe mo lepwoo, ɓe mo ɓwot sar kǝ Jesu, mo dǝm shin wur mPailet.

2Pailet tal pǝ Jesu nǝnee, <<A gha a mishkom nen Yahudi mo aa? Jesu lap nǝnee, <<aa ten a sat.>> 3Pris ɗenan-nan nǝ mo jì kǝ langtǝng mǝ ɗung mo ɗes nkaa Jesu. 4Pailet, wur waa baa tal pǝ Jesu nǝnee, <<Baa gha kǝ mee pwoo ɗe ghan nlap kas aa? A naa pwoo mo ɗes ɗe mo jì kǝ mo nkaa gha>> 5Amma baa Jesu lap mee pwoo nwur koo mǝndong kas, har nǝ fes aapwoo mPailet zam.

Mo Canɗyeel Muut nJesu

6Gyet ɓe koo a parpuus mǝ retnyit mǝ Canɗel ɗeɗangyii, ɓe Pailet wur kǝ loot ɓwet mee gurum ɗe ɓuɓwoot mǝndong mmo, ɗe gurum nǝ moo rǝɓet. 7Mee gwar ɗe moo pet sǝm nwur a Barabbas, wur ɗe a ɓuɓwoot nlushoot ashak kǝ nenbwetɓeer mo, ɗe mo kǝ tukáa nɗǝǝn ɓwetɓeer fur nǝ. 8Ɗuu gurum nǝ mo jì kus, ɓe mo yaa ɗang nǝ pǝ Pailet, kǝ wur ɓwet mee gurum ɗe mmo, kaaɗi wur loot kǝ cìn nǝ sǝ. 9Pailet tal pǝ mo nǝnee, <<Wuu rǝɓet kǝ nghan ɓwet a mishkoom mǝ nen Yahudi mo nwun aa?>> 10Pailet man nǝ, pris ɗenan nǝ mo jì kǝ Jesu ntoom fin a mbǝ zuur. 11Ɗangɓe pris ɗenan mo kar ɗuu gurum nǝ mo, mbǝkǝ mo ɗang pǝ Pailet kǝ wu ɓwet Barabbas ɗe mmo. 12Pailet waa baa sat mmo nǝnee, <<Wuu rǝɓet kǝ nghan cìn a me kǝ gwar ɗe wuu pet wu a mishkoom nen Yahudi mo yi?>> 13Ɗangɓe mo waa sǝǝt le or shiɓal nǝnee, <<A le kǝ mo pwas wur nkaa shiyeep.>> 14Pailet sat mmo nǝnee, <<A mɓe meye? Wur cin a mbii ɗebish ɗeɗang yi?>> Be mo waa sǝǝt le or shi ɗoo ɗeɗes hakyeng, <<A le kǝ mo pwas wur nkaa shiyeep! A le kǝ mo pwas wur nkaa shiyeep!>> 15Mɓeɗi Pailet rǝɓet kǝ nǝ ret ɗe nɗuu kǝ gurum nǝ mon nyit, ɓe wu ɓwet Barabbas mmo. Amma aɓwoon ɗewur fwo nbwat Jesu, ɓe wur shin Jesu mmo, mbǝkǝ mo dǝm pwas wur ɗe nkaa shiyeep.

Shiitoon Mo Toklong nJesu

16Ɗangɓe shiitoon mo ɗel kǝ Jesu nɗǝǝn lu mǝ gofna nǝ, ɗe moo pet nǝ a Praitoriyum, ɓe mo pǝrep shiitoon ɗe mpee mǝnǝ mo jir, mo jì kuur ashak pee Jesu ɗi. 17Mo lep mee nlǝr ɗe nǝ naat pan a tup nJesu, kǝ mo ráa mee mbiikáa ghǝr, mo lep nwur nkáa. 18Ɗangɓe mo tok kǝ nwur nǝnee, <<Muu tok kǝ gha da mishkoom nen Yahudi mo.>> 19Ɓe mo cut wur nkáa shi raas, ɓǝ mo tus lii nkaa wur. Ɓe mo kurum nfurum, kǝ mo seyil nwur. 20Aɓwoon ɗe mo kǝ shwar, kǝ ɓák wur, ɓe mo shang nlǝr ɗenaat pan a tup nǝ nkaa wur, ɗangɓe mo lep nlǝr nwur mo nwur. Ɓe mo put dǝm kǝ wur atǝleng, mbǝkǝ mo pwas wur ɗe.

Mo Pwas Jesu nKaa Shiyeepyoom

21Kaaɗe mo a ar dǝm nǝ, ɓe mo taa kaat kǝ mee gwar, ɗe moo pet sim nwur a Simon, wu a ngu Sairin, puun Alekzanda kǝ Rufus, wur tong mmee laayil jì ɗe, ɓe shiitoon nǝ mo le wur mang shiyeepmúut Jesu nǝ ating. 22Mo jì wul kǝ Jesu mmee peeɗi moo pet nǝ a Golgofa (shii kǝ Golgofa nǝ a ɗyeskáa.) 23Mo shin am anab ɗe mo kǝ riyeep nǝ kǝ mee yen ɗe moo pet naa myrrh nwur, amma wur cii shwaa nǝ. 24Kaaɗe mo pwas Jesu nkaa shiyeep, ɓe mo koospaa mɓe ɓàk nlǝr wur. Ɓe Mo ɓàk nlǝr nwur mo nnaar mu. Ɓe mo bǝlǝp mbǝkǝ mo naa be ɗe koo a gwar ɗeɗangyi nwur nkat ɗi. 25Mo pwas Jesu nkaa shiyeepyoom nǝ a kaa karfe pwoofeer ɗe mǝ bit sǝ. 26Mo ran pwoo nkaa mbii ɗe nǝ le ɗang mo tu Jesu, mo lang nkaa shiyeepyoom nǝ nɗeel nkáa nJesu, ɗǝ nǝ sat nǝnee, << a mishkoom mə nen yahudi mo nɗesə. 27Mo pwas mee kus wat mo vǝl ashak kǝ Jesu zak. Mo pwas memee nkwang sarse nwur, ɓǝ memee nkwang sarkul nwur zak. 28Mo cìn mbii ɗesǝ mo jir a mbǝkǝ pwoo ɗe mo kǝ ten ran nɗǝǝn ɓǝǝt haal Naan nǝ gam ɗe nǝnee, <<Mon tang wur mɓut nenɗebish mo. 29Nen ɗe mo ɗel ar peeɗi mo pwas Jesu ɗe, mo zǝkkáa fur mo, kǝ mo nwangpwoo nwur nǝnee, <<Kaigwa! Waa ɗe di a sat nǝ, waa nshirip Lu Naan ɗǝɗes, ɗangɓe nghan mbaa ɗyik nǝ ɗe nɗǝǝn teer mo kun zak. 30A ɓam sak kǝse! A sham nkaa shiyeep nǝ shiko.>> 31Pris ɗenan-nan mo, kǝ nenkám Wàar Mosis mo, mo shwar, ɓǝ mo toklong nJesu zak, mo sat nǝnee, <<Waa ɓam nen ɗeci mo, ɗangɓǝ baa waa mak ɓam sak kas. 32Katɗang gha a Kristi azeen-nzeen, mishkoom nen Isreil mo. Ɓe a sham nyil nkaa shiyeepmúut nǝ yaksǝ, mbǝkǝ mu naa, kǝ mun shinzeen ɗe.>> Wat ɗe mo pwas mo ashak kǝ Jesu, mo satpwoo ɗebuu nwur zak.

Muut Jesu

33Kaaɗe karfe kaapaat baavǝl mǝ puus a naar ting-tǝng nǝ wul, ɓe pee nǝ rii nɗǝǝn yil nǝ jir, ɗel dǝm wul karfe kun mǝ puus. 34Kaaɗe karfe kun nǝ cìn, ɓe Jesu wu petpee shi ɗoo ɗǝɗes, nǝnee, <<Eloi, Eloi, lama sabaktani?>> Manshii nǝ a nǝnee, <<Naan fen, Naan fen. A mbeeme ɗang a yit an yi?>> 35Kaaɗe pak gurum mo mɓut nen ɗe moo ɗar ɗe mpee nǝ, mo kǝlǝng petpee mǝni, ɓe mo sat nǝnee, <<Gwar ɗesǝ wur kǝ pet a Ilaija>> 36Ɓe memee nɗǝǝn mo, wur su dǝm mang tuvuk lep nɗǝǝn am anab ɗeɗwang, wur lep nkaa rep mee kam. Wur lep kàa nJesu mbǝkǝ wur ɗyas ɗe. Pak gurum nǝ mo sat nǝnee, <<Wu ɗar aku mun naa mbii ɗe nǝn ncìn ɗi ɗe, kyet Ilaija wun njì ɓam wur wo?>> 37Jesu waa baa bwet or shi ɗoo ɗǝɗes, ɓe wur shang nookmuut. 38Ɓe fuwaat ɗe nǝ nɗǝǝn Lu Naan ɗeɗes ɗe nii paapee Ɗeɓang met jir, nǝ tee sham a naar ɓe nǝ ɓàk vǝl. 39Kaaɗe gwar ɗǝǝɗes nkaa shiitoon mo kambil mǝndong ɗewur ɗar kus kǝ shiyeepmúut nǝ, wur naa kaaɗi Jesu shang nookmuut, ɓe wu sat nǝ, <<Azeen-nzeen, gwar ɗesǝ wur a Làa Naan.>>

40Pak mat moo ɗar ɗe pan jong, mon nkaa naa mbii ɗe nii cìn jir. nƊǝǝn mat nǝ mo, ɓe Meeri Makdalin waa ɗe, kǝ Salome kǝ Meeri nǝǝn Jemis ɗelee kǝ Josep. 41A mo a mat ɗe di mo dǝm nɗang Jesu, kǝ moo cìn ɗak nwur kaaɗi di wur kuɗi nɗǝǝn yil nGalili, kǝ pak mat mo ɗes ɗe mo yool nGalili jì ashak kǝ wur nJerusalem.

Mo Wum Jesu

42Nciit kǝ mǝni, ɓe kansǝǝn cìn, a parpuus ɗe gurum moo ɗak sut ɗe, mbǝɗe ɗaar nǝ a puus nookɗi. 43Ɓe Josep ngu Arimafiya, mee gwar ɗǝɗes, ɗewur nɗǝǝn nenɓeetpwoo mo, wur shikáa fin wur nkaa gong jì kǝ mulki Naan. Wur yaa pǝtuup, ɓe wur dǝm ɗang kúm Jesu pǝ Pailet, mbǝkǝ wur dǝm wum ɗe. 44Nǝ aapwoo mPailet zam, mbǝɗe wur kǝlǝng nǝ, Jesu kǝ ten muut. Ɗangɓe Pailet pet shiitoon ɗeɗes nǝ, ɓe wur tal pǝ shiitoon nǝnee, <<Kyet Jesu kǝ ten muut a yam wo?>> 45Kaaɗe Pailet kǝlǝng mbii ɗe shiitoon nǝ sat, ɓe Pailet sat mmo kǝ mo dǝm shin kúm Jesu nǝn nJosep. 46Ɗangɓe Josep seet kǝ mee fuwaat ɗepiyaa. Ɓe wur sham kǝ kúm Jesu nǝ, wur ɓwot kúm nǝ shi fuwaat nǝ. Ɓe wur dǝm le kúm Jesu nǝ nɗǝǝn kǝcir ɗe mo am nǝ nɗǝǝn jwak. Ɓe wur tup mee nghǝk ɗǝɗes, wur paa pwoo kǝcir nǝ ɗi. 47Meeri Makdalin, kǝ Meeri nǝǝn kǝ Josep, mo naapee ɗe mo le kum Jesu nǝ ɗi.

Currently Selected:

Maak 15: SUR-x-MUPUN

Highlight

Copy