Gen 4

UKayini loAbela

1UAdamu wangena lomkakhe uEva engutsheni; wathatha isisu, wabeletha uKayini wathi: Ngibelethe indoda ngosizo lweNkosi. 2Wabuya wathatha isisu, wabeletha uAbela umfowabo. UAbela waba ngumalusi wezimvu, uKayini waba ngumlimi. 3Kwathi emva kwesikhathi esithile uKayini waletha eNkosini umnikelo wezithelo zomhlabathi. 4Laye uAbela waletha umnikelo wamazibulo ezimvu kanye lamahwahwa awo. INkosi yathokoza ngoAbela langomnikelo wakhe.#Heb 11:4 5Kodwa kayithokozanga ngoKayini langomnikelo wakhe. UKayini wasethukuthela, wenyela ngakho. 6INkosi yathi kuKayini: Uthukuthelelani, wenyele ngani na? 7Angithi uba usenza kuhle, uzakwamukeleka na? Kodwa uba ungenzi kuhle, isono siyakucathamela ngasemnyango sikunxwanele, kodwa umele ukusibusa.

8UKayini wathi kumfowabo uAbela: Asiye egangeni. Kwathi besegangeni, uKayini wasukela umfowabo uAbela, wambulala.#Mat 23:35; Luka 11:51; 1 Joha 3:12 9INkosi yasisithi kuKayini: Ungaphi umfowenu uAbela? Yena wathi: Angazi. Ngingumlondolozi womfowethu na? 10Yathi: Wenzeni na? Ilizwi legazi lomfowenu liyakhala kimi livela emhlabathini.#Heb 12:24 11Usuqalekisiwe emhlabathini okhamise umlomo wawo ukwamukela igazi lomfowenu esandleni sakho. 12Nxa ulima umhlabathi, kawusayikukunika isithelo sawo; uzakuba luzulane lomhambuma emhlabeni. 13UKayini wasesithi eNkosini: Isono sami sikhulu, siyangahlula. 14Khangela, uyangixotsha lamhla endaweni yakithi lasebusweni bakho; ngizakuba luzulane lomhambuma emhlabeni; ongifumanayo uzakungibulala. 15INkosi yathi kuye: Impela lowo obulala uKayini uzakuphindiselwa kasikhombisa. INkosi yabeka uphawu kuKayini funa omfumanayo ambulale. 16UKayini wasesuka ebusweni beNkosi, wahlala elizweni laseNodi ngasempumalanga kwaseEdeni.

Inzalo kaKayini

17UKayini wangena lomkakhe engutsheni; umkakhe wathatha isisu, wabeletha uEnoki. Wakha umuzi, wawutha ibizo lokuthi yiEnoki, ibizo lendodana yakhe. 18UEnoki wazala uIradi; uIradi wazala uMehujayeli; uMehujayeli wazala uMethushayeli; uMethushayeli wazala uLameki. 19ULameki wathatha abafazi ababili, ibizo lomunye lalinguAda lebizo lomunye lalinguZila. 20UAda wazala uJabali owaba ngukhokho walabo abahlala emathenteni, befuya inkomo. 21Ibizo lomfowabo lalinguJubali owaba ngukhokho wabo bonke abatshaya ichacho lomhlanga. 22UZila wazala uTubali‐Kayini owaba ngukhokho wabo bonke abakhanda izinto zethusi lezensimbi ezisikayo. Udadewabo kaTubali‐Kayini wayenguNahama.

23ULameki wathi kubafazi bakhe:

Ada loZila zwanini ilizwi lami,

lina bafazi bakaLameki lalelani ukukhuluma kwami;

ngoba ngizabulala indoda engilimazayo lensizwa engihluzulayo.

24Uba uKayini ezakuphindiselwa kasikhombisa,

impela uLameki uzakuphindiselwa kamatshumi ayisikhombisa ephindwe kasikhombisa.

Inzalo kaSeti

25UAdamu waphinda wangena lomkakhe engutsheni; wazala indodana wayitha ibizo wathi nguSeti; ngoba wathi: UNkulunkulu usenginikile enye inzalo esikhundleni sikaAbela, ngoba uKayini wambulala. 26Laye uSeti wazala indodana, wayitha ibizo wathi nguEnosi. Ngalesosikhathi abantu basebeqala ukukhuleka ebizweni leNkosi.

Currently Selected:

Gen 4: BE1978

Highlight

Copy