MARKUS 14

Ji doh musut kenyu té' Tuhan Yesus

Mat 26:1-13; Yoh 12:1-18

1 # Us 12:1-27 #Mat 26:1-5; Lk 22:1-2 Té' dua' dau la'an em payan dau kuman aya' Paskah dahin dau aya' Kuman Luti Aleng em Té' Tavah, daha' imam aya' dahin daha' aleng puboh surat Tuhan ilau alan ngavan daha' seng peluvat mapuh Yesus dahin seng lematei Iha'. 2Avin ken daha', “Meng nah na na' tegu dau aya', bahi daha' jevang nei segiwan.”

3 # Lk 7:36-38 Alem Iha' té' ha' Betania alem uma Simon aleng perah malin, alem Iha' melo' kuman, nei nah ji doh geri ji gutun kenyu narwastu, aleng bau legah na', en na' mi'ang nah, pelalau muak na' té' ujung kahung Yesus. 4Té' pah daha' aleng heléh, ken dalo', “Nun tuman kenyu aleng sayu anih tei java' nunan? 5Iha' itam belé' kenyu atih, adang legah na' huwi telo' atuh li'ap pirek, deng en uk men daha' aleng humé'.” Nunan dahun daha' ngelebeng iha'. 6Bi ken Yesus, “Bei ha'. Na' nun kam pekawah kenep na'? Iha' uh na ji hadui aleng sayu té' Akui. 7#Kel d M 15:11 Avin kelunan humé' té' pa'en kah daha' dahin kam, hiran-hiran kam kaséh deng kah ikam na sayu men daha'. Akui anih, nusi' Kui té' pa'en dahin kam. 8Doh anih uh na aleng deng kenep na', iha' uh musut ket anih té' batung Kui em payan daha' nepiha' Akui. 9Lan Akui kuma' men ikam, hino'-hino' ha' usun tana anih dengah sayu anih seng en daha' pedengah, hadui doh anih pah seng en daha' nira lahuh, avan hituk té' iha'.”

Hadui Yudas

Mat 26:14-16; Lk 22:3-6

10Yudas Iskariot, iha' tih ji men hang daha' pulu-dua', tei pala daha' imam aya', seng nebau ma'uk Yesus. 11Kelalau sayu nah kenep daha' tegu daha' kelenghi daho' atih, pelalau daha' na jaji ma'uk ligit men iha'. Men'uh anan iha' ilau ji jaka' aleng sayu ja iha' ma'uk Yesus men daha'.

Kuman aya' Paskah dahin pahlung malem

Mat 26:17-25; Lk 22:7-14,21-23; Yoh 13:21-30

12Dau aleng aring daha' kuman luti aleng em té' tavah, iha' nah tegu daha' nevek Paskah#14:12 Paskah Aran dau aya' atih Paskah, nurei pah duba aleng en daha' tevek té' dau atih pah aran na' Paskah lahuh. Nyineng 1 Kor 5:7., dalo' anak sekulah pah kuma' men Yesus, “Hino' kenep Ka' kalo' nemei Ngavam kuman Paskah?” 13En Na' nyihu nah dua' la'ung anak sekulah Na', ken Na' men dawa' atih, “Tei nah kua' alem daléh, hinan ji laké' aleng geri tajau penu ata' seng pepsuk dahin kua', en kua' ngioh nah iha'. 14#Mk 11:3 Uma ano' aleng ngavan na' tei, sayu kua' bara men laké' aya' uma atih, ‘Ken Guru, Hino' amin Ngavak seng kuman Paskah dahin dalo' anak sekulah Kui?’ ken kua'. 15Iha' pah seng bara men kua' ji amin aya' aleng hujung, aleng té' uvung na' uh temei. Hinan nah kua' nemei men telo'.” 16Tei nah dawa' anak sekulah anan, tei alem daléh, pesuk nah dawa' piah awi aleng uh Yesus bara men dawa', dawa' pah nemei Paskah anan.

17 # Mat 26:20-29; Lk 22:14-23; Yoh 13:21-26 Tegu dau uh lidem, nei nah Yesus dahin dalo' pulu-dua' anak sekulah Na'. 18#NDI 41:10 Alem dalo' melo' kuman, Yesus kuma', “Dahuk lan men kelo', ji men hang kelo' seng nebau ma'uk Akui, iha' tih ji aleng melo' kuman Dahik.” 19Ji'ek lelan nah kenep dalo', dalo' kuma' ha'ut la'ung men Iha', “Akui iah?” ken dalo'. 20Ken Na' men dalo' atih, “Iha' ji men hang kelo' pulu-dua', iha' nah iha' aleng petugung medet Dahik. 21Anak-kelunan adang seng tei, piah aleng uh kalung, bi em té' loh nah bang na' men kelunan aleng nebau Anak-kelunan atih. Pulang sayu hinan na' em nganak iha',” ken Na'.

Pahlung dahin Tuhan

Lk 22:15-20; 1 Kor 11:23-25

22Alem dalo' kuman, en Yesus ala nah luti, uh nah Iha' sebayang, en Na' mi'ang-mi'ang nah, en Na' uk nah men dalo', ken Na', “Ala nah, anih nah batung Kui.” 23En Na' ala pah ji tebuk, uh nah Iha' bara sayu kenep en Na' uk nah men dalo', dalo' lim pah du'i té' tebuk atih. 24#Us 24:8; Yer 31:31-34; Zak 9:11 Ken Na' nah men dalo', “Anih nah daha Kui, daha aleng bara jaji Kui, aleng Ek uak men kelunan ngahum. 25Dahuk lan men kelo', nusi' nah Akui du'i ata' bua agun anih la'an ateng dau Akui du'i ata' bua agun aleng maring té' alem keligem Allah.”

Tuhan bara pekuna Petrus seng pamoh Iha'

Mat 26:31-35; Lk 22:31-34; Yoh 13:36-38

26 # NDI 113—118 Uh nah dalo' nyanyi, musang nah dalo' tei ha' ngalang Zaitun. 27#Zak 13:7 Ken Yesus men dalo', “Kelo' lim seng duhei kenep té' Akui, avin té' uh kalung, ‘Akui seng jeliket laké' aleng puboh duba atih, ateng daha' duba tei petat-purat tua.’ 28#Mk 16:7 Bi hu'uh Kui nei peju, Akui seng panau una' té' kelo' ha' Galilea.” 29Ken Petrus men Iha', “Pulu hangun pah kelunan lim duhei kenep té' Ika', batung kui nusi' kui duhei.” 30#Yoh 13:38 Ken Yesus men iha', “Dahuk lan men ika', men malem anih nusi' payan hiap ngeturut dua' hangun, ika' uh pamoh Akui telo' hangun.” 31#Yoh 11:16 Sa' petajen Petrus kuma', “Pulu hangun pah akui matei dahin Tuhan, peletu-letu akui em pamoh Ika'.” Nunan pah dahun dalo' lim.

Yesus sebayang alem lida Getsemani

Mat 26:36-46; Lk 22:39-46

32 # Yoh 18:1 Nei nah dalo' té' ji ngavan aleng aran na' Getsemani. Ken Na' men dalo' anak sekulah Na', “Melo' nah kelo' tinih alem Akui sebayang.” 33En Na' geri nah Petrus dahin Yakobus dahin Yohanes dahin Na'. Iha' pah nei ngeniheng lelan dahin kawah lélan kenep Na', 34#NDI 43:5; Yoh 12:27 ken Na' men dalo', “Kenep Kui kelalau lalé' bahat, awi seng matei dih henoh Kui anih. Melo' nah kelo' tinih mengan nah kelo'.” 35Men'uh anan tei nah Iha' su uk, pelalau Ha' nga'um ha' tana dahin sebayang, awi ha' deng, jukdau Iha' pebet men tusah anan. 36#Mk 10:38 Ken Na', “U Amei, Ika' aleng gem ket lim-lim, Im ukéh nah tebuk anih men Akui, bi alem ha' nutih pah meng ngioh kenep Kui, bi sayu nah ngioh kenep Ka' tua.”

37Nei nah Iha', kitan Na' dalo' anan tudu, ken Na' men Petrus, “U Simon, tudu ka' ia? Nusi' ka' deng mengan alem ji jam tua iah? 38Mengan nah kelo' dahin sebayang, ja kelo' em ga' pesek. Lan kenep kelo' ngenep, bi batung kelo' lema.” 39Lun tei nah Yesus ngelua' sebayang, nunan loh kah dahun Na'. 40Nei nah Iha' nekulah, beka' tudu loh kah dalo' avin maké' lan-lan henoh matan dalo', nusi' pah dalo' jam nyu'ei Iha'.

41Men'uh anan tei nah Iha' ketlo' hangun na', ken Na' men dalo', ‘Tudu nah kelo' kerei inih, ja ngelarah pek'uh la'ei kelo'. Deng nah anih, jam na' uh ateng; nyineng, Anak-kelunan uh en daha' uk alem usu daha' aleng sala'. 42#Yoh 14:31 Ma'un nah kelo', tei nah telo'. Nyineng, kelunan aleng ma'uk Akui uh jeleng.”

Yudas nebau Tuhan Yesus

Mat 26:47-56; Lk 22:47-53; Yoh 18:3-12

43Pelalau alem Iha' duan, nei nah Yudas, ji men hang dalo' pulu-dua' atih, kelalau kahum pah kelunan dahin na' aleng paget malat dahin tukun, aleng hu'en daha' aleng imam aya' dahin daha' aleng puboh surat Tuhan dahin daha' aleng dekaya'. 44Kelunan aleng uh ma'uk Yesus atih uh bara tada' men daha' atih, ken na', “Ano' aleng ek marek na'a, iha' nah aleng Iha'. Apuh nah Iha', geri nah Iha' sayu-sayu.” 45Tegu iha' uh ateng, pelalau iha' tei ha' Yesus, dahin kuma' men Iha', “U Guru,” ken na', pelalau ha' marek Iha'. 46Daha' pah pelalau metei usu daha' té' Iha', pelalau mapuh Iha'.

47Ji kelunan men hang dalo' aleng nekring tinan mejat malat na', en na' miteng panyin imam aya', mebet iling na'. 48Ken Yesus men kelunan atih, “Ikam anih uh musang piah awi ala ji kelunan nakau, dahin geri malat dahin tukun seng ngenep mapuh Akui iah? 49#Lk 19:47; 21:37 Bi ha'ut-ha'ut dau kah Akui té' dahin kam alem Uma Allah dahin pekatuk ikam di, beka' nusi' pah ikam mapuh Akui. Bi lim anih uh nei la'ung nunih piah aleng uh kalung alem surat Tuhan,” ken Na'. 50Lim dalo' anak sekulah pah lap nah, melek Iha'.

51Té' ji nyemaké' ngioh Yesus, besahan na' tua en na' té'. Daha' atih gem iha', 52iha' pah melek besahan na' atih, pelalau lap utoh.

53En daha' atih geri nah Yesus pala imam aya'. Lim daha' imam aya' dahin daha' aleng dekaya' dahin daha' aleng puboh surat Tuhan pah pepeng dahin na'. 54Petrus pah ngioh Iha' men su, uh nei halem, ateng ha' latan imam aya', tinan nah iha' melo' dahin daha' pulis, nyido' béh apui.

Tuhan Yesus ha' unan Kayafas

Mat 26:57-68; Lk 22:54-55,63-71; Yoh 18:13-14,19-24

55Daha' imam aya' dahin lim daha' kemiti ilau teksi' aleng pesala Yesus, ja daha' deng lematei Iha', bi em té' loh teksi'. 56Kahum kelunan nei teksi' pamoh na Iha', bi lim teksi' atih nusi' té' ha' piah. 57Té' kuri-kuri kelunan nekring, dahin na teksi' pamoh marung Iha', ken daha', 58#NDI 110:1; Dan 7:13 “Kamé' uh kelenghi dahun Na' anih, ‘Akui seng mayah Uma Allah anih, aleng kenan usu daha' kelunan, alem telo' dau Akui seng meju Uma Allah ha' béh, aleng em kenan usu kelunan.’ ” 59Iha' pah nutih teksi' daha' atih, nusi' loh kah iha' piah.

60Nekring nah imam aya' té' hang daha' atih, pelalau meteng Yesus, ken na', “Ji-ji Ika' seng em nyu'ei iah? Nun aleng teksi' kelunan anih té' Ika'?” 61Bi Yesus pah tepaka' tua', nusi' té' Iha' nyu'ei nun-nun.

Meteng pah imam aya' Iha' la'an, ken na', “Lan kah Ika' Kristus iah, Anak Allah aleng en daha' ju lelan atih?” 62Nyu'ei nah Yesus, “Akui nah Iha'. Ikam pah seng nyineng Anak-kelunan melo' pedah ta'o Allah aleng Ningan, dahin nei alem avun men langit.” 63Pelalau nah imam aya' atih mirak kanan na', ken na', “Nun bang na' teksi' la'an? 64#Yoh 19:7 Ikam uh kelenghi dahun Na' peji'ek Allah. Nuno' kurin kelo'?” Pelalau daha' atih lim mutet daho' kuma' Iha' tekep matei.

65Té' balei daha' lemura Iha' dahin ngetutuk hineng Na', dahin napeng Iha', dahin kuma' men Iha', “Bara nan Im!” Daha' pulis pah ala Iha' dahin mukut Iha' lahuh.

Petrus pamoh Tuhan Yesus; iha' pekuli kenep

Mat 26:69-75; Lk 22:56-62; Yoh 18:15-18,25-27

66Té' pah alem Petrus té' hida ha' latan, nei nah ji nyemdoh panyin imam aya' anan, 67en na' nyineng Petrus nyido', pelalau iha' nyineng iha' dahin kuma', “Ika' pah té' dahin Yesus, kelunan Nazaret atih.” 68Nyu'ei nah Petrus, ken na', “Nusi' kui jam ket aleng kurim anan.” Pelalau musang nah iha' tei ha' ladang ba ketamen, hiap pah ngeturut lahuh. 69En nyemdoh anan nyineng pah iha', kuma' nah iha' la'an men daha' aleng nekring hinan, “Iha' anih pah ji men dalo' atih dih.” 70Pamoh pah iha' nekulah.

Men'uh anan, daha' aleng nekring hinan kuma' men Petrus, “Lan kah ika' ji men dalo' atih, avin ika' kelunan Galilea.” 71Bi iha' nunu dahin tevah, “Nusi' té' kui jam kelunan aleng kurin kam anan,” ken na'. 72#Mk 14:30 Tegu anan pah hiap ngeturut kedua' hangun. Pelalau hituk nah Petrus té' dahun Yesus men iha', iha' atih, “Nusi' payan hiap ngeturut dua' hangun, ika' uh pamoh Akui telo' hangun.” Tegu iha' hituk anan, pelalau nangih nah iha'.

Currently Selected:

MARKUS 14: TDK1990

Highlight

Copy