YouVersion Logo
Search Icon

MARKUS 13

13
Marung Yerusalem seng tasa', dahin tada' ka'uh usun tana
Mat 24:1-51; Lk 21:5-36
1Tegu Yesus musang men alem Uma Allah, ji men dalo' anak sekulah Na' kuma' men Iha', “U Guru, nyineng Im, kelalau lalé' nah tageng bato' uma anih dahin kelalau maren nah jam na' lahuh.” 2Ken Yesus men iha', “Té' kelo' nyineng ia uma dekaya' anih? Nusi' té' aleng seng melek tinih, ji-ji bato' pah seng em té' petudun té' ji la'an, adang lim na' seng burah tua.”
3Té' pah alem Iha' melo' té' ujung ngalang Zaitun, jeleng Uma Allah, Petrus dalo' Yakobus dahin Yohanes dahin Andreas meteng Iha' selem, ken dalo', 4“Im bara nah men kalo', hiran tuk anih seng la'ung? Nuno' tuk tada' ket anan seng nei jadi'?” ken dalo'.
5Kuma' nah Yesus men dalo', “Mengan nah kelo' sayu-sayu, bahi daha' geri kelo' lingo'. 6Kahum kelunan seng nei té' aran Kui, kuma', ‘Akui anih nah Iha',’ kahum pah kelunan aleng seng lingo' kenan daha'.
7“Tegu kelo' kelenghi marung perang, dahin dengah perang, meng kelo' kawah. Adang-adang ket anan seng jadi', bi nusi' payan ka'uh na'. 8#2 Tuk 15:6; Yes 19:2 Avin ji na'an kelunan seng nei peju melawan dahin ji na'an kelunan, ji keligem pelawan dahin ji keligem. Kuri-kuri ngavan tana seng ngetiwet, dahin kuri-kuri lien pah seng ateng. Atih nah aring-aring katé' atih.
9 # Mat 10:17-22; Lk 12:11-12; 21:12-17 “Bi mengan nah kelo' marung batung kelo' dep, avin daha' seng mapuh kelo', seng ma'uk kelo' men daha' kemiti. Alem uma sebayang pah daha' seng nyaman kelo', té' pah ha' unan daha' gabnur dahin ha' unan laja' pah lahuh kelo' seng nekring avin Akui, ja kelo' pedengah Akui men daha'. 10#Mk 16:15 Té' pah dengah sayu Kui adang-adang seng en ha'ut na'an kelunan kelenghi una'. 11Tegu daha' geri kelo' besara', daha' ma'uk kelo' men kelunan, meng kelo' kawah kenep pelemana' una' marung dahun kelo'. Ket aleng Ek uk kelo' tegu anan pah, anan pah kelo' bara, avin nusi' ha' kelo' aleng duan, bi Belua' Ma'ang aleng duan. 12#Mik 7:6 Ji la'ung harin seng nebau ma'uk harin na' dep ja daha' lematei iha', taman daha' pah seng nebau ma'uk anak daha' pah lahuh, anak pah seng peju lawan hinan taman daha' pah lahuh, dahin na daha' lematei daha'. 13#Yoh 15:21 Kelo' anih, lim-lim daha' seng perah kenep té' kelo' avin aran Kui. Kelunan aleng nengayet ateng-ateng ha' uh, iha' anan nah aleng seng murip.
14 # Dan 9:27; 11:31; 12:4,10-11 “Bi tegu kelo' nyineng ket aleng kelalau lalé' masep aleng menei tasa' tua atih nekring té' ngavan aleng em tekep, (hi aleng basa' na', teneng nah im té' alem na' atih), tegu dau anan sayu kelunan aleng ha' Yudea lap pala ngalang. 15#Lk 17:31 Kelunan aleng té' hujung uma, meng ha' nei ngiléh tei halem uma, meng ha' ala nun-nun men alem uma na'. 16Kelunan aleng ha' luma', meng ha' uli ala basung na'. 17Asi nah daha' doh aleng mali dahin daha' aleng mo' anak na' tegu anan. 18Sayu kelo' sebayang ja ha' em jadi' tegu ha' nyingem, 19#Dan 12:1; Yoel 2:2; K Tula 7:14 avin tegu anan seng katé' lelan, nusi' payan té' katé' aleng nunan men aring-aring Allah ngelengunan usun tana anih ateng-ateng kerei inih, baya men'uh anan pah nusi' seng té' katé' aleng awi nutih la'an. 20Awi Tuhan em na tusah anan ba'ik, ji la'ung pah em té' aleng murip la'an, bi avin tavit kelunan aleng uh en Na' mili, iha' nah Iha' na tusah anan ba'ik.
21“Tegu anan, iha' té' ji kelunan kuma' men kelo', ‘Nyineng kelo', anih nah Kristus,’ daha' kuma', ‘Nyineng atih nah Kristus,’ ken daha', meng kelo' nginah té' daho' anan, 22#Kel d M 13:1 avin kuri-kuri Kristus amoh adang seng nei, dahin nabi amoh lahuh, daha' pah seng bara tada' dahin ket ngavan daha' ngeniheng. Awi iha' seng deng, daha' aleng en Tuhan mili pah tei lingo' lahuh kenan daha'. 23Mengan nah kelo', Akui uh bara pekuna' ket lim-lim men kelo'.
24 # Yes 13:10; Yehez 32:7; Yoel 2:10,31; 3:15; K Tula 6:12 “Bi tegu anan, ngebaya katé' aya' anan, matan dau seng tei lidem, bulan pah seng em midang lahuh, 25#Yes 34:4; Yoel 2:10; K Tula 6:13 kelawing pah seng legak men langit, lim ket aleng dekaya' ha' langit pah seng ngetiwet. 26Tegu anan Iha' nah daha' seng nyineng Anak-kelunan nei alem avun, ningan lelan Ha', kelalau maren pah Iha' lahuh. 27#Kel d M 30:4; Zak 2:6; Mat 13:41 Iha' nah Iha' seng nyihu daha' meliket Na' tei mepeng kelunan aleng uh en Na' mili atih men pat na'an pa'un dih, iha' tih men lirin-lirin usun tana ateng-ateng lirin langit.
28“Sayu kelo' pekalei té' ivun bua ara. Tegu da'an na' mengun dahin ubung na' aring muah, kitan kelo' nah jaka' lasu uh jeleng. 29Nurei pah kelo' lahuh, tegu kelo' nyineng tuk-tuk anih nei la'ung, jam nah kelo' Iha' uh jeleng, ateng ha' béh ketamen pah lahuh. 30Dahuk lan men kelo', tebin kelunan anih seng em tei padé' ateng lim daho' anih uh nei la'ung. 31Langit dahin tana pah seng padé', bi Dahuk nusi' ha' seng padé'.
32 # Mat 24:36 “Bi dau anan dahin jaka' anan, ji kelunan pah em té' aleng jam na', meliket ha' Surga pah nusi', Anak atih pah nusi', bi Tamei tua aleng jam.
33“Mengan nah sayu-sayu, jaga nah kelo', sebayang nah kelo', avin nusi' kelo' jam hiran kah tegu na' atih. 34#Kel d M 30:4; Zak 2:6; Mat 13:41 Té' pah anan awi jam tuk ji kelunan aleng tei piwei ha' ji daléh. Hu'uh iha' melek uma na', dahin nyihu dalo' panyin na' puboh ketanun na', dahin petneng daha' ha'ut-ha'ut la'ung té' hadui daha', en na' bara nah laké' aleng jaga ketamen lahuh, ja iha' mengan. 35#Lk 12:38 Avin ha' nutih, mengan nah keo', avin kelo' em jam seng hiran kah kelunan aleng hipun uma anan nei, mina levi dau kah, mina belua malem, mina hiap ngeturut, mina jihima kah, 36bahi tekjet Iha' nei, beka' kelo' tudu. 37Ket aleng Ek bara men kelo', iha' nah Ek bara men kelunan lim, iha' atih, mengan nah.”

Currently Selected:

MARKUS 13: TDK1990

Highlight

Share

Copy

None

Want to have your highlights saved across all your devices? Sign up or sign in