MARKUS 11

Tuhan Yesus tei ha' daléh Yerusalem

Mat 21:1-11; Lk 19:28-40; Yoh 12:12-19

1 # Mat 21:1-9; Lk 19:29-38; Yoh 12:12-16 Tegu daha' atih jeleng té' béh Yerusalem, jeleng dahin Betfage dahin Betania ha' ngalang Zaitun, Yesus nyihu dua' anak sekulah Na', 2ken Na' men dawa', “Tei nah kua' ha' uma aleng ha' unan kua'. Tana' kua' ateng hinan iha' nah kua' seng pesuk ji keledei tenak aleng uh daha' nyatoh aleng em payan kelunan pakei. En kua' uvan nah hatoh na', geri iha' hinih. 3#Mk 14:14 Tana' té' kelunan kuma' men kua', ‘Na' nun kua' na nunan nan?’ sayu kua' kuma' men iha', ‘Avin Tuhan ngenep iha', Iha' pah pelalau menei iha' uli,’ ken kua' si',” ken Yesus. 4Lun tei nah dawa anan dih, pesuk nah dawa' ji keledei tenak daha' nyatoh té' béh ketamen, bah hawang té' béh alan, pelalau dawa' muvan hatoh na'. 5Té' kelunan aleng nekring titih kuma' men dawa', “Na' nun kua' makau keledei tenak anan?” ken dalo'. 6Dawa' pah nyu'ei dalo', bara dahun Yesus dih, pelalau dalo' mun dawa' kelunan atih tei. 7En dawa' geri nah keledei tenak atih pala Yesus, pelalau mekah kanan dawa' hujung keledei atih, pelalau Iha' melo' té' hujung na'. 8Kahum daha' mekah kanan daha' té' alan, té' pah aleng ha' béh patah-patah da'an kayo' aleng en daha' ala men luma'. 9#NDI 118:25-26 Daha' aleng panau una' dahin daha' aleng baya pah, medéng-medéng nah daha', ken daha', “Hosana! Meju lelan nah Iha' aleng nei alem aran Tuhan. 10Meju lelan keligem sepun tam Daud aleng nei anih! Hosana alem ngavan aleng kelalau bau!” ken daha'.

11 # Mat 21:12-22; Lk 19:45-48 Tei nah Iha' ateng ha' Yerusalem, pelalau tei halem Uma Allah dahin ngeje'au nyineng ket lim-lim. Avin dau hu'uh seng lidem, leka' nah Iha' la'an tei ha' Betania, dalo' pulu-dua' pah té' dahin Na'.

Bua ara tulan té' dahun Tuhan Yesus. Iha' muga daha' aleng pebelé alem Uma Allah

Mat 21:12-22; Lk 19:45-48; Yoh 2:13-22

12Dau malah ji la'an, alem dalo' panau men Betania, la'o nah Iha'. 13#Lk 3:9; 13:6-9 En Na' nyineng men su té' ji iung bua ara aleng kapan lan ujung na'. Tei nah Iha' nyineng, jukdau té' nun-nun seng en Na' ala té' iha'. Tegu Iha' ateng tinan, ji-ji pah em té' bua pesuk Na', ito' tua, avin nusi' payan jaka' ha' ngebua'. 14#Mk 11:20 Ken Yesus men iha', “Meng nah ji kelunan kuman nun-nun men ika' ateng-ateng baya.” Kitan dalo' anak sekulah Na' nah Iha' na daho' atih.

15 # Yoh 2:14-16 Ateng nah dalo' ha' Yerusalem. Yesus pah tei alem Uma Allah, pelalau muga daha' aleng pebelé' alem Uma Allah atih, dahin mayah mija' daha' aleng ngalui ligit dahin ladung daha' aleng pebelé' manuk sepukun. 16Iha' en mun ji-ji kelunan pah geri ket nun-nun tei halem seng lebau Uma Allah. 17#Yes 56:7; Yer 7:11 Pelalau Iha' katuk, ken Na' men daha', “Nusi' ha' té' kalung iah, ‘Uma Kui seng en daha' kuma' uma ngavan sebayang men lim ha'ut na'an kelunan'? Bi ikam anih uh na na' luvang kelunan nakau,” ken Na'. 18Kelenghen daha' imam aya' dahin daha' aleng puboh surat Tuhan daho' atih, pelalau daha' ilau alan seng ngenep lematei Iha'. Daha' takut Iha', avin lim-lim kelunan ngeniheng té' katuk Na'. 19Levi nah dau tei nah Iha' musang men daléh atih.

20 # Mk 11:14 Dau malah alem dalo' panau, dalo' nyineng bua ara atih uh kelubei nah men pakat na'. 21Nei nah kenep Petrus, pelalau kuma' men Iha', “U Guru, nyineng Im, iung bua ara aleng tulah té' Dahum arei dih uh kelubei nah.” 22#Yoh 14:1 Nyu'ei nah nah Yesus, kuma' men dalo', “Nginah nah té' Allah. 23#Mat 17:20; Lk 17:6; 1 Kor 13:2 Dahuk lan men kelo', hi-hi aleng kuma' men ngalang anih, ‘Tei nah im, nesau halem banget,’ nusi' pah kenep na' nei duhei, bi iha' nginah dahun na' seng lan, adang iha' seng ala. 24#Mat 7:7; Yoh 14:14; 16:23 Avin ha' nunan, Akui kuma' men kelo', ket nun aleng en kelo' ilau lelan dahin akei, nginah nah kelo' uh ala na', adang kelo' ala.

25 # Mat 5:23 #Mat 6:14-15 “Tegu kelo' nekring sebayang, tana' té' nun-nun ji'ek kenep ka' té' ji-ji kelunan kah, sayu im masi iha' marung sala na' atih, ja Taman kelo' aleng ha' Surga pah masi kelo' marung sala kelo' lahuh. 26Iha' kelo' em masi, nusi' nah Taman kelo' ha' Surga masi kelo' marung sala kelo' lahuh.”

Pepteng marung tingan Tuhan Yesus

Mat 21:23-27; Lk 20:1-8

27 # Mat 21:23-27; Lk 20:1-8 Nei nah dalo' nekulah ha' Yerusalem. Alem Yesus panau-panau té' alem Uma Allah, nei nah daha' imam aya' dahin daha' aleng puboh surat Tuhan dahin daha' kelunan aya' pala Iha', 28ken daha' men Iha', “Kenan sihu ano' kah Ika' na lim hadui anih? Hi aleng nyihu Ika' na hadui anih?” 29Pelalau Yesus nyu'ei daha', “Akui pah seng meteng té' kelo'. En kelo' nyu'ei nah Akui, iha' nah Akui bara men kelo' té' sihu aleng Ngavak na hadui anih. 30Duh Yohanes atih, men ino' pa'un na', men Surga iah, men kelunan iah? Nyu'ei nah Akui,” ken Na'. 31Petengaran nah daha' atih pedeng daha' dep, ken daha', “Awi itam kuma', ‘Men Surga,’ adeng Iha' seng kuma', ‘Iha' nunan, na' nun ikam em nginah té' iha'?’ 32Awi itam pah kuma', ‘Men kelunan,’ ken tam ké', bi takut pah itam té' daha' kahum,” avin lim-lim daha' kuma' Yohanes atih ji nabi. 33Iha' nah daha' nyu'ei Yesus, ken daha', “Nusi' kamé' jam.” Ken Yesus men daha' la'an, “Nusi' pah Akui bara men ikam té' sihu aleng Ngavak na hadui anih” ken Na'.

Currently Selected:

MARKUS 11: TDK1990

Highlight

Copy