Mak 11
11
D’ambendine Yensa Jerusalem
1Angu Yensa ingi ñantaalibehinem ingi barumuno andék f’andék andas Jerusalem. Bampúti a Montaaño Olifo, anwonn na antéeja akooroŋo n'aretuhne Betafaj ingi Betani. Angu na Yensa afúnn ñantaalibehinem inak 2ayéjeeniŋ:
- Ninkinan inini, ii, dékereŋ ba a saariŋo noŋon n’injonnahoŋne. Úputoŋdir, ulahunkunaŋ na kofali kotiir k’anébaane ko wúur ŋafahadaŋ. Gulahunemeŋ na, ukeekiremeŋ k’udooromoŋ. 3Kanda m’amíihoonuŋ ayéjoonuŋ: «Ninkinan, beeraŋ gúdekukeŋne kofaliŋo?» Úyejemeŋ: «Umuyhintor ahaajahemne. Abolladir aŋoyindito.» Nim guñantaheŋne úteekinemeŋ. Uloboŋdir nim, alókihineh.
4K'angu Yensa, babúuñeeniŋ mees, ñantaalibeŋo inako andék f'andék aŋŋan a saariŋo. Maŋ ni aŋŋanne, anlahun na kofali kotiiri a bakaranku binaalo n'ahobaa a burukumbanku dígo, k'andék aŋŋay buhoobihinem. 5Ayikyik m’anfégeeniŋne anyéjeeniŋ:
- Huy! Ninkinan, horaŋ akanne k’uhoobuloŋ kofaliŋo?
6Banlóbi nim ñantaalibeŋo aŋoyindeeniŋ ni Yensa ayéjeeniŋne. Ñantaalibeŋo banlóbi nim mees, ambénneeniŋ k'andékur kofaliŋo. 7Bampút imbi Yensa, andooh kaalankánin anlefirem a kofaliŋo. Banlefi mees, Yensa aŋaf k’antuŋul hadéko ba Jerusalem. 8Ñanlabahi, banfégi Yensa n'adékirehne, andooh kaalankánin anlefur Yensa a binaalo k’ambendihem. Índukoŋo andooh jakeelayo j'anlekerne a kanaŋaŋo k’anlefirem na ba bubendihinem.
9Jamaŋo m’ankokayne ingi úmár nip ankomb bukengunku ñangíirhinin k’anyéjeh:
- Infuuhurinoŋ Díino! Ummu mu Umuyhintor abúuñurne, Díin akaan ayik barake. 10Maasayahu maamankintor Umaasaŋo Dawuda n'adék adékekinehne, Díin akaan ayik barake. Infuuhurinoŋ Díino n'afaŋumne n'ayik sembe!
Nim jamaŋo ampeejne dam f'aŋŋane bubendihu Yensa.
11Angu Yensa, bapúti Jerusalem, adék ba a Jaameŋo Adénno k’adóorla aning h'agune na nip. Babollay, ni bísibaŋo añunne, afúror adék ba a saariŋo n'aretuhne Betani, úmár ingi ñantaalibehinem haalaŋo ingi inako.
Da Yensa adankane sinoŋo s’aretuhne sifigo
12Afúrumi na, gucunkunom Yensa ingi ñantaalibehinem aŋŋay gúfuro Betani ankokoh bi Jerusalem, agida Yensa ni kúugo alaham. 13Angu f'aŋŋane hadéko, Yensa aŋanden sinoŋo s'aretuhne sifigo ni jalufo areebne alaba. Atéeja sinoŋo ba bufater difigo. Kanda batéejay, afég maro sinoŋo, jaluf bareŋ kanda dímireŋ. Agida waathu kadímhinem aroŋroŋ. 14Yensa bafégi maro sinoŋo dímireŋ, ayéj sinoŋo:
- Díin akaan dahu dímahar bandór!
Fo alóbne nim ñantaalibeŋo anyennehin.
Ho Yensa akanne a Jaameŋo Adénno
15Afúrumi na, Yensa ingi ñantaalibehinem andék f’andék ampút Jerusalem. Bampúti andék ba a Jaameŋo Adénno. Bampúti a buteerehu jaameŋo, anlahun na ñanjuliyaŋo ingi ñangilaŋo. Hómár súumuroŋ Yensa k'akomb gutibakánin. Afóoŋul taabálanku ñanfilihu bakodiŋo. Banoohunku ñanjuliyahu bakuyeereŋo adék acig. 16Ñanjuliyaŋo m'antáktákinahne a buteerehu Jaameŋo Adénno adíigumeeniŋ gutáktákina. 17Babollay akomb gukawandinkinin ayéj:
- Ayikyik k'aññaañ a Hañaañeno ka Díino ayéjne:
Díkum añantay aguy kantíg ka mi siy noŋon noŋon ansalihinehne. #11.17 Esay 56.7
Nim Díino alóbne a gubaarhu jaameŋo inno. Kanda ninkinan, fégeŋ baŋ h'okaaneŋne! Udooheŋdooh ukaanaŋ na kantíg ka ñanrifaŋo antógohne!
Nim Yensa alóbne.
18Afúrumi na, ñanlaameku alimaamaŋo ingi ñankeekihu Hañaañeno anyennehin imbi jamaŋo ho Yensa akanne. Anfak anfég ni jamaŋo ampokunne kawandhu Yensa k’andankah n’ajónne. Banfégi hómár, apaareeniŋ k’ambenuh. Angu anlah gukanku janf ba bubujhunom.
19Fo bísibaŋo aŋane buñuuno Yensa ingi ñantaalibehinem anfúr a bukooro.
Funaarehu sifigo s’alaafne
20Afúrumi na, gucunkunom, Yensa ingi ñantaalibehinem anfúra guŋoolino ba Jerusalem. F'aŋŋane hadéko, ñantaalibehinem anfég sifigo si Yensa adankane déegen. Banningi, anfég maro sinoŋo símár alaaflaaf nip baman ñanlíibhinem. 21Piyer bafégi n'alaafne, alentála ho Yensa akanne déegen k'ayéj Yensa:
- Arafaŋ, ningi baŋ sinoŋo s'udankane déegen n’alaafne!
22-23Piyer bayéjem nim, Yensa ayéj ñantaalibeŋo nip:
- Janteneŋ baŋ k'íteekinoonuŋ marigeno. Montaaño inno n'ófekeŋne, aji ininkaman wúur asíibay k’afúnnom nanka adék aworom a jakaamo, añantay afiyum Díino k’akiinaham k'akir ayéj montaaño: «Fút nanka úduk unen a jakaamo!» Aji alóbi nim ni kerkerireŋ, Díino anakánam hómár. Gúmár gíyejhoonuŋne fiyinteŋ Díino! 24Ningeŋ baŋ! Aji uŋay gukiinahánam honj, kiinaarem ingi gufiyum ininkaman ujahjah hómár mees. Aji ukiinahem nim, maŋ hómár gakandukunone. 25Guwonni ba saliŋo, aji ininkaman hafithen súumuroŋ ingi wúur, uñantay ubonkerem k'ukur usali. Aji ukaani nim, Bááhán m'agune arjanna abonkerhuno a jínubonkon. [26Kanda aji ufoyi kabonkero ingi údinhen uraagof, Bááhán m'agune arjanna mees dabonkero a jínubonkon.]#11.26 H'agoobaane ñañiira a biñaañen bíduk.
K’ammiihne Yensa a h’akaanahne
27Afúrumi na, Yensa ingi ñantaalibehinem ampút Jerusalem. Andék ba a Jaameŋo Adénno. Yensa f'aŋane na rándekinaŋo, ñanlaameku alimaamaŋo índukoŋ ingi ñankeekihu Hañaañeno ingi ñanlaamer índukoŋ andék anlahunam k'anyéjem:
28- H’okanne nanka déegen, a binaal beeraŋ gukanne? Hantaŋ abúuñenne gukanku hómár?
29Bammiihem nim, Yensa aŋoyindeeniŋ ayéjeeniŋ:
- Túyomuŋ k’imiihoonuŋ honj ínhonduk. Inini, aji ujaabiyemuŋ, me mees ijaabihunoonuŋ k'íteekinoonuŋ a binaalo b’akanne k’ikaan hómár: 30Inini, Yaya M' ayicumehne, karo Díino abúuñuremne karo ñanraagofoŋo? Jaabiyemuŋ!
31F'amiiheeniŋne nim, ankomb sinlayayo immereŋ immerahánin anyéjeh:
- Inini, neeraŋ gimpirenkunoŋne injaabiyoŋ? Aji ínyejoŋ: «Díino abúuñuremne,» ayéjhineh: «Inini horaŋ akanne lókiiroŋ k’údomoŋ?» 32Aji infak ínyejoŋ: «Uraagof abúuñuremne,» na dafak ajóon.
Nim ganwooñne. Agida immereŋ laháraŋaŋ maro Yaya anabiyoŋ no Díino abúuñor. Kanda ñanlabahi m’angune a barumuno, nim ganlahne. Gúmár akanne jamaŋo mi Yensa amiihne, bollendeŋeŋ búyejo: «Yaya, Díino búuñururom,» a sígihu barumuno. 33Banlayayiilayay anyéj Yensa:
- Na mint pájiirimiŋ!
Angu Yensa anik ayéjeeniŋ:
- Angu me mees dijaabihoonuŋ a nintiku binaalo b'iyikne bukaano h’ekanne déegen.
Nim Yensa aŋoyindeeniŋne.
Currently Selected:
Mak 11: GD
Highlight
Share
Copy
Want to have your highlights saved across all your devices? Sign up or sign in
Copyright Vision Intégrale, Senegal
