Genèse 21

Nyi Isaac

1Aman Sara a nsu Ndo nzi pèc pècèk te va, a ngu ara man a pasla na rai, a ngaɗa na. 2Sara a nʼngots kra a hwaɗ, a nya na kra a Abraham, man a nhala ma, a pats man Bi Zhiklè a ngra na nshèlèkuraʼa. 3Abraham a mbaha na kra, man Sara a nya na, Isaac. 4A pats matsamakaɗaʼa, Abraham a nʼngela na ngwon a Isaac, ara man Bi Zhiklè a njè na. 5Mvi Abraham 100, ga a yi Isaac, kra na. 6Sara a ngaɗa: Bi Zhiklè a mvayè aman i ngwèshè. Ko wawa man a da tsenaʼa, a da ngwèshè a géɗ ga. 7A ngaɗa: Kra a da cèɗè wa Sara, – ndo a nʼngra na Abraham halaʼa arsa dè? Ko man nhala ma, i ya na kra nguraʼa.

Abraham a ndzama Agar a Ismael

8A kra a grè, a njèkeda wa. A Abraham a ngau skwi nʼndi ngolala mbiaʼa, a pats man Isaac a njèkeda wa. 9Aman Sara a nrka, kra man Agar, dem Egypte, a ya na Abraham, a ngwossaha Isaac, kra nengaʼa, 10a ngaɗa na Abraham: Dzama ngwoz ɓèlè sa, cèw a kra na! Kra ɓèl sa da mba a nʼndi gi a Isaac, kra ga, bai! 11Ma haha ambaha Abraham bai, a géɗ kra na. 12Aman Bi Zhiklè a ngaɗa na Abraham: Ka hur a géɗ kra ngaya a ɓèl ngaya bai! Ma tèlèba man Sara a gaɗa ka fu gèɗèʼa. Verzi ngaya a da gi sèi te Isaac. 13Aman kra ɓèl ngaya ba, i woy a i giaʼa a verzi ndohi mbiaʼa, te man nengaʼa tser ngaya. 14Te mangoslèmaʼa a prèk, Abraham a nco movar, a iyam te gozhèm bkwai, a mva na Agar. A ncko kra, a mva na a daʼai na, a ndzardaussa. A nengaʼa ndo na, a nsawala tʼhèshèkèɗ Beer-Shéba.

15Aman iyam te gozhèm a nʼndev na ma, a nkalda kra a verzi wof ntusntusaʼa, 16a ndo a nʼnzahi zuraʼa a nengaʼa, dra kètè ara man ka ɓèr sulom a ndikè a pa. A nhur a gaɗa: I da rka mʼmetsi kra ga ɓai. A nʼnza zuraʼa a kra, a hinè a nkudi a vata. 17Bi Zhiklè a ntsena kuɗ kra, a gol Bi Zhiklè a mbaha na Agar te zhiklè, a ngaɗa na: Agar, nʼnga ka mè? Ka gu zlau ɓai! Bi Zhiklè a ntsena kuɗ kra a sam man ka feda a pa. 18Slambaɗa, gso kra mbelembela! I woy a i giaʼa a verzi ndohi mbiaʼa. 19A Bi Zhiklè a mwina na dai, a Agar a nrka nlèlè iyam. A Agar a mdo, a nʼndha gozhèm bkwi a iyam, a mva na kra a nsiaʼa. 20A Bi Zhiklè a zhè a nda kra. A gre, a nʼnza tʼhèshèkèɗ, ndo lèkèɗ. 21A nʼnza tʼhèshèkèɗ Paran, a mam nengaʼa a ncka na ngwoz te kokwar Egypte.

Abraham a Abimélec ta derzla ma ta

22Te ndev nasa, bi Abimélec, a Picol, bi sojè nengaʼa, ta gaɗa na Abraham: Bi Zhiklè a zhè a nda ka te skwi tèlèba man ka giaʼa. 23Anai sèi ka mbaɗayè a sam di Bi Zhiklè, aman ka lèɓèslè a sam ga, a sam wudahi ga, a sam wud wudahi ga. Skwi man nga ga na mandala a gèɗ, a woy ka gu lèmèlèmè a kokwar ga ba man ka nza te pa ara mbrok. 24A Abraham a ngaɗa na: I mbèdè. 25Aman Abraham a nʼnga na ndzoan a Abimélec, a gèd nlèlè iyam man ɓèlèlihi Abimélec ta co a wuɗai. 26A Abimélec a ngaɗa: I sun ndo ngu ɓai. Ka gaɗayè di ɓai, i tsena ar haha di ɓai, sèi a patsna man i tsenaʼa. 27A Abraham a nhul tambakihi a zlèhi, a mpa na Abimélec, a ta derzla ma ta. 28Aman Abraham a mpeda wud tambakihi 7 a zlawa, 29Abimélec a ndzhodo: Ka da gi a wud tambakihi man ka peda a zlawa haha mè? 30A mʼmbeɗa na a ma: Wud tambakihi 7 sa, sèi hul te ri ga, ta ara skwi mai wuɗai, aman iyè, a nru thal sa. 31A géɗ nengaʼa ta baha na sam Beer-Shéba#Ara ngèɗè, Thal mbèdè. , a géɗ man ta mboɗ mʼmbèɗè. 32Aranta ta derzla ma ta te Beer-Shéba. Te deɓaʼa Abimélec a Picol, bi sojè nengaʼa, ta slambaɗa, a ta men ta a deɓa a kokwar ndohi Philistie. 33A Abraham a ngeda wof a pa te Beer-Shéba, a ntsi ri a nzlembaɗ Ndo nzi pèc pècèk a pa, bi Zhiklè man a nzi a mèdèp. 34A Abraham a nʼnza te kokwar ndohi Philistie ara mbrok, nʼnzi a vata ba.

Currently Selected:

Genèse 21: MOF89

Highlight

Copy