Genèse 18

1A Ndo nzi pèc pècèk a ngudoko na va a dai a sam gètèl wof te Mamré, aman a nza a ntamagi na, a géɗ pats. 2A ncede gèɗ a zhiklè, a ngél dai, a nrka ndohi makar ta zlatsa a sam na. Mrke ta, a nha ta ma, a nkalahi a deɓ sak tengaʼa, 3a ngaɗa: Bi ga, aman i ngots pombai a sam ngaya, ka bez aussa a sam ɓèl ngaya ɓai! 4Da ɓedzka iyam kètè, a kin pana sak kinè a vna. Te deɓaʼa vo-sok va te verzi wof! 5I da woy a kinè skwi nʼndi dai, a mva kinè wuɗai, a kin dè a ma ma. Kin shkèda sam ɓèl kinè. A ta gaɗa na: Gu ara man ka goɗa. 6A Abraham a mhu a gai a sam Sara, a ngaɗa: Hul gufa a gi ndèlèk makar, ka bsomaʼa, a ka ta a mɓelaslasla. 7A mhu a va zlèhi ba, a ncko kra zlè nhudɓassaʼa, a mva na ɓèl nengaʼa, da zlaha tsam tsam. 8A nco mbar wa a wa mɓutsoʼa, a kra zlè nzlahaʼa, a mva ta. A nengaʼa a zhèr ta te verzi wof. A tengaʼa ta ndau. 9A ta gada na: Sara, ngwoz ngaya, tema? A ngaɗa ta: Nte gai. 10Staɗ te vaʼa a ngaɗa: A tèra aranta, i da shkè a deɓa, a Sara, ngwoz ngaya, a nʼngots kra nguraʼa. A Sara a ntsena ma te gai, nte deɓ ndo sa. 11Abraham a Sara cèw ba ta hala, hurnjüfnjüfa ma, Sara a pèn hwaɗ asaɓai. 12A Sara a ngwoshè tʼhwadaʼa, a mhuro: Antanta i hala ma, mi baki a keɗyè za dè? Ko babgi ga nhala ma! 13A Ndo nzi pèc pècèk a ngaɗa na Abraham: Sara a ngwoshè èhèmè, a ngaɗa: I hala ma, i ngècè kra genè dè? 14Skwi man Ndo nzi pèc pècèk a slaha ɓai, a zhi dè? A tèra aranta i da shkè a deɓa a sam ngaya, a Sara a nʼngots kra nguraʼa. 15A Sara a ntsokol ma, a ngaɗa: I ngwossa ɓai. A gi zlau. Aman nengaʼa a ngaɗa: Aʼai, ka ngwosso!

Abraham a tsi rai a géɗ Sodome

16A ndohi sa ta slambaɗa, a to do ta. A ta dè a civèɗ Sodome. Abraham a mfeda ta ma a civèɗ. 17A Ndo nzi pèc pècèk a mhuro: I ngheda skwi man i woy a i giaʼa a sam Abraham dè? 18Abraham a da gi a verzi ndohi herkeda mbiaʼa, man wuɗi na a zhè, a ndohi herkeda tèlèba ta ngècè mpshè ma te nengaʼa. 19I ngotskoɗauda te va ndohai, aman a nfa ta ma a gèɗ a wudahi nengaʼa, a gi nengaʼa, aman ta jè-jèr civèɗ Ndo nzi pèc pècèk, a ta gi zuraʼa, a ta til kita, a Ndo nzi pèc pècèk a nʼnga na Abraham, ara man a pasla na rai. 20Ndo nzi pèc pècèk a gada: Labar ma Sodome a Gomorrhe mbiaʼa, mali tengaʼa mbiaʼa holholaʼa. 21Sèi i dè hai, a i rka, a vava a zhè man ta hèzlèwè a géɗèʼa dè? I woy a i da suna.

22A ndohi to do ta, aman ta dè Sodome. Aman Abraham a nzlatsa a sam Ndo nzi pèc pècèk. 23A Abraham a nherda na va, a ngaɗa: Ka woy a ka zeda ndohi nzuraʼa a nda ndohi malihi dè? 24Gar ndohi nzuraʼa 50 ta zhè te kokwar mbiaʼa. Ka woy a ka zede ta dè? Dara ka pra ta mali a ndohi Sodome a gèɗ ndohi nzuraʼa 50 ka ɓi ɗè? 25Ka da gu arsa ɓai; aman ka keɗa ndo nzuraʼa a nda ndo mali bai, a ndikè-ma ndo nzuraʼa a ndikè-ma ndo malai da gu lèmèlèmè ɓai; ka gu arsa ɓai! Nengaʼa man a ga na kita a herkeda tèlèba, a ga na kita nzuraʼa azɓi dè? 26A Ndo nzi pèc pècèk a ngaɗa na: Aman i ngots ndohi nzuraʼa 50 te Sodome, kokwar mbiaʼa, i woy a i pra ta mali tengaʼa, a gèɗ ndohi nzuraʼa 50 sa.

27A Abraham a mʼmbeɗa na a ma: Na haha i gèɗè a va zaʼa, a i gaɗa na Ndo nzi pèc pècèk; ko i mberfenèk a mèrwèc. 28Gar ndohi nzuraʼa ta gi 50 azɓai, ta gi 45 genè. Ka woy a ka gedassa kokwar tèlèba a gèɗ ndohi man njèkè 5 sa ɗè? A ngaɗa: Aman i ngots 45 te pa, i gédèshè azɓai. 29A ngaɗa na a va zaʼa: Gar ta 40 te pa genè! A ngaɗa: A gèɗ 40, i woy a i gédèshè azɓai.

30A ngaɗa: Ndo nzi pèc pècèk ga, ndav da dza ka bai, i woy a i gèdè zaʼa: Gar ta 30 te pa genè! A ngaɗa: Aman i ngots 30, i gi skwi azbai. 31A ngaɗa: I tokossa di ga, a i gèdè a Ndo nzi pèc pècèk: Gar ta 20 te pa genè! A ngaɗa: A gèd 20, i gédèshè azbai. 32A ngaɗa: Ndo nzi pèc pècèk, ndav da dza ka bai! Anai i gèdè a va staɗ dai; gar ta 10 te pa genè! A ngaɗa: A gèɗ 10, i gédèshè azbai. 33Te deɓaʼa Ndo nzi pèc pècèk a ndo na, aman ta goɗ ngèɗè a Abraham klèng ma. A Abraham a mʼmenkaɗ na a deɓa a ngwai.

Currently Selected:

Genèse 18: MOF89

Highlight

Copy