Exode 1
1
Ndohi Israel ta si matakwan
1Na haha nzlembaɗ wudahi Israel, man ta shkè a kokwar Egypte – ta shke a nda Jacob, staɗ staɗ a nda ndohi gi ta: 2Ruben, Siméon, Lévi, Juda, 3Issacar, Zabulon, a Benjamin, 4Dan a Nephthali, Gad a Aser. 5Ta tèlèba man ta shkè te verzi Jacob, a gi ndohi 70. Joseph, nengaʼa nte kokwar Egypte ma.
6A Joseph a mʼmets na; a kramamhi nengaʼa tèlèba, a slalhi ta tèlèba. 7A ndohi Israel ta yu wuda, ta zlèzlèmè a ta mana a vata, a ta gu kumba holholaʼa, a ta ndha kokwar.
8Te kokwar Egypte ta fu bi mɓuaʼa. Nengaʼa a sun Joseph bai. 9Nengaʼa a ngaɗa ta ndohi na: Na haha ndohi Israel ta kumba holholaʼa, ta fena wuɗi nga. 10Anai, sèi nga gi maya, a ta grè a ma asaɓai. A pats man var a da gai, ta da humdè va a nda mayamhi nga, ta da kala nga va, ta gi var a nga, a ta dè ta auda te kokwar nga. 11A ta pe ta ndohi ndzara ndohi mizlinè, a ta ga ta matakwan, a mizline man ta giaʼa ambalai. Ta pe ta a mizlinè, ta rama na kokwar Pithom a Ramses a Pharaon, aman a da pi skwi a pa. 12Ko man ta ga ta matakwan a ndohi Israel, a nasa ba a ta mana a vata, a ta zlèzlèmè a ma ma, a ndohi Egypte ta gi zlau ndohi Israel a vata. 13A ndohi Egypte ta ga ta ndohi Israel a ɓèlè holholaʼa. 14Ta gudèma ta gèɗ kotèkotè a mizlinè mwuɗitpa. Ta gèc wujèɗ a ta rèm wujèɗ ara kwa. Ta gi mizlinè te dak, mizlinè tèlèba man ta ngazl ta a pa.
15Bi Egypte a nfa ta ma a gèɗ a ngwozi nyi kra ndohi Hebreu, staɗ Siphra, ngidè Pua, a ngaɗa ta: 16Aman kin da yi kra ngwozi Hébreu, va-war kra a ma husloɓ; man kra nguraʼa, va-keɗaʼa; man da demaʼa, va-jèka na nshèffè na. 17A ngwozi nyi kra ta gi zlau Zhiklè, ta ga ara man bi Egypte a gada ta bai, a ta jèka ta nshèffè a wud ngurhiaʼa. 18A bi Egypte a mbaha ta ngwozi nyi kra, a ngaɗa ta: Kin gu ar haha, a kin jèka ta nshèffè a wud ngurhiaʼa èhèmè? 19A ngwozi nyi kra ta mbeɗa na a ma Pharaon: Ngwozi Hébreu ta ara ngwozi Egypte ka bai. Ta shèshèy dai, ga ngwoz nyi kra a shkè, ta ya ma. 20A Zhiklè a ntakaha ta ngwozi nyi kra, a ndohi ta mana a vata, ta zhè kumba. 21Zhiklè a mva ta wudahi kumba a ngwozi nyi kra, te man ta gi zlau Zhiklè. 22A Pharaon a ngaɗa ta ndohi nengaʼa tèlèba: Wud ngurhi tèlèba, man ndohi Hébreu ta yiaʼa, va-wushede ta a woyam Nil! Dalahai, va-jèka ta nshèffè ta!
Currently Selected:
Exode 1: MOF89
Highlight
Share
Copy
Want to have your highlights saved across all your devices? Sign up or sign in
Alliance Biblique du Cameroun 1989
