Matoosa 21

Yesuusa kabaja taɂatiiyi Iyyerusaalemi tos tabano

(Mar. 11:1-11; Luk'. 19:28-40; Yan. 12:12-19)

1Iyyerusaalemi tos gabbalamaa zayitii kabeyaara gaa takkoɂalataro wodami gutii kagiro maaman kafaage taɂamamatto banɂe goggogeeyi Yesuusa usukko oɂagaalssatareenkko lama fare. 2Haanna ame, «Isin hore kagiro maaman tos seeyeen, goggogeeteeni demeertiti too darmmeenne wota tashaanttetto isin helnnattaan, furaddeene in tos aata koyeen. 3Maayyona isinne haa muun yelattaan goɂame, ‹Gootta dootatara› ama. Goorsewa gafarranwa.»

4Hikki kakkoonlleera kahegerooyi haa amame kasegaamera goggogudaroonya.

5«S'iyooni taɂamamatto taɂiyyerusaalemi katamaawun haa ami,

‹hikkima wonokka fayyankka leegure,

demeertitinna darmmeeti gutii hamas's'eegure ku tos emeetara› amaddeen eseen segaa.»#Zak. 9:9.

6Usukko oɂagaalssatareenna seetengureen Yesuusa ajaja isoon goggosiserokki malee yeleen. 7Demeertitinna darmmeeti keenenguren sarssikisoo kademeeree bagadi gutii kayeen; Yesuusana esee gutii hamas's'ee. 8Gosakkona gamisa sarssikkisoo raadii yayeen; kakkaleenna ade ballaal tattarsheen aateen raadii lullugudeen. 9Horehaye kasessetarena haarre usuu debee sesseetaa kagire gosana,

«Hoosaɂina ere kadaawute!»

«Mege kawaayi kaɂemeetara usu kasommaasameya,»

«Hoosaɂina ele daruurii haa amaa iyyaaren.»#21:9 Hoosaɂina amano taɂibrayist'i hiɂii fayyinna, Waaye no fayyisina amanoyya. #Mez. 118:25-26.

10Iyyerusaalemi tonssa kakkotabare goorata kakkatamaa ibaaddo dubba, «Hikki ayyoyya?» amaa shalagaame. 11Gosana, «Hikki Galiilaayi tagitto tanazireet katamaakko kaɂemeetero kahegeroo Yesuusaya» ameen.

Yesuusa k'ulluukki min kawaayi orroo odadalatareen deegure horoore

(Mar. 11:15-19; Luk'. 19:45-48; Yan. 2:13-22)

12Esekko Yesuusa k'ulluukki min kawaa tabegure k'ulluukki min kawaayi orroo iminataanna daddalataa ogireen beese horoore, maragade oɂiggilssatarenkkokki t'arap'eezzalnna arabe odaddalataren kakkohamas's'eeran borbboono mina mina abbaabe lugudere.

13«Min kakki kaɂebi min amamara amame mas'aafa k'ulluukkii s'aafamera, isin addeen kakkosamaraan laga kashittaa yelttettaan» ame.#Isa. 56:7; Erm. 7:11. 14K'ulluukki min kawaayi orroo Iilɂo odiyaannonna naafaleessaal usu tos emeeten, usuna fayyiise. 15Ayesuun goɂameen tuuk'aamolkokki woyichchaalnna seera oɂagaalssisaran Yesuusaa kafelamero baasanna, «Hoosaɂina ere kadaawuteen» amaa k'ulluukki min kawaa orroo kaɂiyyaare yiis kakkodeyaaren goorata aaloo amaraateen.

16Isona Yesuusane «Hikki yiis taɂamaro maalatta?» ameen. Yesuusana:

«Iɂii» maalara ame,

« ‹Yiiskona naasi kaɂiilataro yiiskotti hiɂikko

galata ekkaase kaɂamaro suure lakkonabbabtteettanya›?» ame.#Mez. 8:2.

17Katamaakko iise beegure Bitaanya kaɂamaraan maamanii seete esee baree.

Il kallayikki gaa kabalasi

(Mar. 11:12-14,20-24)

18Yesuusa bari bullane katamaa tos abbaabate setaa giraan uuɂee; 19Raadii giridii kagire gaa kabalasi koo deegure kakkoseero goorata baalallo kuwaarre il toonna helayiin waategure; «Goortta jiroomman kuun il aroogginno!» ame. Gaa kabalasina goorsewa angage.

20Usukko oɂagaalssatareenna kalleero deeguren saadeen, «Gaa kabalasi misii kooyikkii angagin daanddee?» ameen.

21Yesuusana, «Ani rumminaa amara; ammano isinuun girewa lakkohedatatteen; gaa kabalasi gutii kalleero aani felano kaalaal anlleennon giraan hitta wodami hittakko, ‹Tagamigudde beke orroddee tabi› goɂantteen isinuun laarewa.#Mat. 17:20; 1 K'or. 13:2. 22Ammanatteeddeen ebii kaɂebaattan dubba atayinattaan.»

Odonnati kayesuusa gutii taɂemettetto hoosiin

(Mar. 11:27-33; Luk'. 20:1-8)

23Yesuusa k'ulluukki min kaɂebi tos tabegure agaalssisaa giraan tuuk'aamolkokki woyichchaalnna kagosa jaarsolee emetengureen, «Hikka ayees dubba kakkofelatta eeki odonnatiya? Odonnatina kuyeen kasisera ayyoyya?» ameen hoosaten.

24Yesuusana, «Aninna hoosiin too isin hoosayinnara, abbaabi iin gosegiiteen aninna hikka ayees eeki odonnati ani felaro isinuun seginnara. 25Kayaannisa t'ink'ata haggekko emeetera? Daruurkkoyya muu ibaaddokkoya?» ame hoosate.

Isona isi isi orro ayeesaa, «Noo ‹Daruurkkoyya› goɂaminne hayya ‹Muun ammanana waattettaan?› aminara. 26‹Ibaaddokkoyya› goɂaminne ade gosana Yaannisa kahegeroo ame mankkoɂammanaro maraan noo gosa abssatanna» ameen.

27Haanssun «Noo lakkokansso» ameen Yesuusaan abbaabeen.

Usuna, aninna hikka ayees eeki odonnati ani felaro lakkoseginaro ame.

Yiis lamakokki masuussa

28Yesuusana, «Me aani laara? Babbaar lama kaɂaba ibaaddoti koo gire; kahoree ere tos seetegure, ‹Unnukkee! Hittaari tawoyinii taɂakaakiltte banɂe tos seegudde felo felina ame.›

29« ‹Unnuna, lakkodaginaro› ame. Baaskkeessa malabatere abbaabate seete.

30«Ade kallamikki ere tos seetegure hikkamaleewa ame, unnukkeessana, ‹Ii Aabbokki! Seerowa› ame. Ayesuun goɂameen haseennooni hese.

31«Iso lama orrokko taɂodoo feɂi kaɂammagera eekiya?»

Isona «Kahoree unnuya» ameen. Yesuusana, «Ani rumminaa amara k'arat'a okukkuyisaraanna osharmut'araan wononnati kawaa tos tabin isinkko t'ayinaraan. 32Kat'ammak'aara Yaannisa k'ulluukki raa tusin isin tos emeetera. Isin addeen lakkoɂammantteettaan, k'arat'a okukkuyisareenna osharmut'araan goɂameen ammaneraan. Isin hikka deeten giraan duuddo c'ubbokko gula galtteen lakkoɂammantteettaan ame.

Kawoyinii ira otateen obaraarankotti masuussa

(Mat. 21:33-46; Mar. 12:1-12; Luk'. 20:9-19)

33«Kakkalee masuussa maala; kawoyinii irakkokki odo koo gire, iraa maraamurise ooti kaate, woyinnii kakkomiic'iraan gumbbina oshate, woyinnii oɂoorarawuun deeri madaare, esekko irakkeessa otateen obaraarawun kirayii sisegure ul kakkalee iise seete.#Isa. 5:1-2. 34Kaami takkokukkuyisataraan diginni kakkogiyaatte goorata tadubanttetto ilkko k'oobakkeessa atayin usuun ohandaareen otateen obaraaran tos fare.

35«Otateen obaraaranna usuun ohandaaran abeenguren koo boc'een, koo lagadeen, koo adeen eɂemooyi eeggeen. 36Usuna ohoreekko tootooyi orooraraan okkalee ohandaaran fare, otateen obaraaranna giddana usumaleewwa yeleen. 37Goorttanu ‹Iso adi unnukkee lakabajiiranna,› amere danbbenne unnukkeessa fare.

38«Ayesuun goɂameen otateen obaraaranna usu unnukkeessa kakkodiyaaren goorata hikki kaɂeelnaroya, koyeen lagadigunne rittiitteessa eelinna» ameen isiɂorroo ayeeseen. 39Abeenguren kawoyinii irakko sar beesengureen usu lagadeen.

40«Hayya kawoyinii irakkokki odo kakkoɂemeete goorata hanɂu otateen obaraaran usu misi kayelnnaro aani isinuun laara?»

41Isona «Hanɂu omeellan akamalee lagadigure kawoyinii irakko tadootisatto ilkko k'ooba goorataayi oɂabbaabarawuun okkalee otateen obaraarawun kirayii sisinnara» ameen.

42Yesuusana,

«Oginbbaraan kattuffateen eɂemo,

minuun mina afarruun kadootisaro lee,

Hikkana kayelera Waayya,

ilɂoɂoottaanuun baasaya;

amame k'ulluukki mas'aafaali kas'aafamero lakkonabbabteettanya?» ame.#Mez. 118:22-23.

43«Haanssun ani haa amara; wononnati kawaa isinkko atamigure il kayelataro gosaan sisaminara. 44Hikka eɂemoo gutii kaɂiyaara eɂebara; eɂemona iso gutii kakkoɂiyaara ibaaddo ade bututinnara.»#21:44 Toottoo tagalbbaa s'uufil tooto 44 adaraan; usu haafurana Luk'. 20:18 kagiro aani laara.

45Tuuk'aamolkokki woyichchaalnna Farasaawiil, hikka masuussajjool kakkomaalaren goorata Yesuusa kaɂayeesara garakkisoo laano addeesen. 46Ayesuun goɂameen abi shiin godooteenna gosa ade Yesuusa kahegeroo aani mankkodiyaare maraan abssateen.

Currently Selected:

Matoosa 21: BayNT

Highlight

Copy