यूहन्ना 18
18
ईसु कै गिरफ्तार करो जानो
(मत्ती 26:47-56; मरकुस 14:43-50; लूका 22:47-53)
1ईसु जे बात कहकै अपने चेलन के संग किद्रोन घाटी के पाँजर गौ। हूँना एक बारी रहै, जोमैं बौ और बाके चेला गै। 2बाकै पकड़वान बारो यहूदौ बौ जघा जानत रहै, काहैकि ईसु अपने चेलन के संग हुँआँ जाए करत रहै। 3तौ यहूदा, सिपईय्यन की एक टोली कै और मुखिया पुजारी और फरीसियन की तरफ से उनके काम करन बारेन कै लैकै, दिया और मसाल और हथियार लैकै हुँआँ आओ। 4तौ ईसु, बे सब बातन कै जो बाके ऊपर आनबारी रहैं उनकै जानकै, निकरो और उनसे कही, “कौनकै ढूँड़ रै हौ?”
5बे बाकै जबाब दईं, “ईसु नासरी कै ढूँड़ रै हैं।” ईसु उनसे कही, “महीं हौं।” बाकै पकड़वान बारो यहूदौ हूँनै उनके संग ठाड़ो रहै। 6ईसु के कहेत खिना कि, “कि महीं हौं,” बे पच्छू हुईकै धरती मैं गिर पड़े। 7तौ बौ फिर से उनसे पूँछी, “तुम कौनकै ढूँड़ रै हौ।” बे बोलीं, “ईसु नासरी कै।”
8ईसु उनकै जबाब दई, “मैं तौ तुमसे कह चुको हौं कि महीं हौं, अगर तुम मोकै ढूँड़ रै हौ तौ इनकै जान देऔ।” 9जौ इसलै भौ कि बौ बचन पूरो होबै जो बौ कही रहै, “जिनकै तैं मोकै दौ उनमैं से मैं एकौ कै नाय हरबाओ।”
10तौ सिमौन पतरस तलवार कै, जो बाके झोने रहै, बाकै खींचकै और बड़ो पुजारी के कमईंयाँ के ऊपर चलाय कै बाको सीधे हाथ घाँईं को कान काट दई। बौ सेवक को नाओं मलखुस रहै। 11तौ ईसु पतरस से कही, “अपनी तलवार कै म्यान मैं रख। जो कटोरा परम दऊवा मोकै दई है। का मैं बाकै पीमौं?#मत्ती 26:39; मरकुस 14:36; लूका 22:42”
हन्ना के अग्गु ईसु
12तौ रोमी सिपईय्या और उनके सूबेदार और यहूदियन के रखबरेया ईसु कै पकड़कै भाँद लईं, 13और अग्गु बाकै हन्ना के झोने लैगै, काहैकि बौ बहे साल के बड़ो पुजारी कैफा को सुसर रहै। 14जौ बहे कैफा रहै, जो यहूदि नेतन कै सलाह दई रहै कि आपन के लोगन के ताहीं एक आदमी को मरनो अच्छो है।#यूहन्ना 11:49,50
पतरस को मना करनो
(मत्ती 26:69,70; मरकुस 14:66-68; लूका 22:55-57)
15सिमौन पतरस और बाके संग एक चेला ईसु के पच्छू चल दईं। जौ चेला बड़ो पुजारी को जानो-पहचानो रहै, तभईये बौ ईसु के संग बड़ो पुजारी के घर के आँगन मैं गौ, 16लेकिन पतरस दुआरे फाटक मैं ठाड़ो रहो। तौ बौ दुसरो चेला जो बड़ो पुजारी को जानो-पहचानो रहै, बौ बाहर आओ और फाटक की रखबारी करन बारी से कहकै पतरस कै भीतर लैगौ। 17बौ फाटक की रखबारी करन बारी सेविका, पतरस से कही, “कहूँ तहूँ जौ आदमी के चेलन मैं से तौ नाय है?” बौ कही, “मैं नाय हौं।”
18सिपईय्या और सेवक जाड़े कि बजह से ठाड़कै आगी सेंकत रहैं, और पतरसौ उनके संग ठाड़कै आगी सेंकत रहै।
बड़ो पुजारी के जरिये ईसु से पूँछताछ
(मत्ती 26:59-66; मरकुस 14:55-64; लूका 22:66-71)
19तौ बड़ो पुजारी ईसु से बाके चेलन के बारे मैं और बाके उपदेस के बारे मैं पूँछताछ करी। 20ईसु उनकै जबाब दई, “मैं जौ दुनिया से खुलकै बात करो हौं; मैं सभाघरन मैं और मंदिर मैं, जहाँ पर सब यहूदि जुराए करत रहैं, हमेसा उपदेस दौ और लुके छुपे मैं कछु नाय कहो। 21तैं मोसे काहेकै पूछरौ है? सुनन बारेन से पूँछ कि मैं उनसे का कहो हौं। देख, बे जानथैं कि मैं का-का कहो हौं।”
22जब उनसे ऐसे कही, तौ रखबरेयन मैं से एक जो झोने ठाड़ो पड़ो रहै, ईसु कै झापड़ मारकै कही, “का तैं बड़ो पुजारी कै ऐसे करकै जबाब देथै?”
23ईसु बाकै जबाब दई, “अगर मैं बुरो कहो, तौ बौ बुराई की गभाई दे; लेकिन अगर भलो कहो, तौ मोकै काहेकै मारथै?”
24हन्ना बाकै भँदे भै कैफा बड़ो पुजारी के झोने पुगाए दई।
पतरस को दुबारा मना करनो
(मत्ती 26:71-75; मरकुस 14:69-72; लूका 22:58-62)
25सिमौन पतरस ठाड़कै आगी सेंकत रहै। तौ बे बासे कहीं, “कहूँ तहूँ बाके चेलन मैं से तौ नाय है?” बौ मना करकै कही, “मैं नाय हौं।”
26बड़े पुजारी के सेवकन मैं से एक, जो बाके परिवार को रहै जोको कान पतरस काट दई रहै, बौ बोलो, “का मैं तोकै बाके संग बारेन मैं नाय देखो रहों?”
27पतरस फिर से मना कर दई, और तुरंतै मुर्गा बास दई।
पिलातुस के अग्गु ईसु
(मत्ती 27:1,2,11-14; मरकुस 15:1-5; लूका 23:1-5)
28तौ बे फिर ईसु कै कैफा के झोने से रोमी हाकीम के महल मैं लैगै, और भुगभुको होन को समय रहै, लेकिन यहूदि नेता खुद महल के भीतर नाय गै कि कहूँ बे फसह खान से अग्गु अपवित्र नाय हुई जामैं, ताकी बे बाद मैं फसह खाए सकैं। 29तौ फिर पिलातुस निकरकै उनके झोने आओ और कही, “तुम जौ आदमी के ऊपर कौन-सी बात को इल्जाम लगाथौ?”
30बे बाकै जबाब दईं, “अगर बौ कसूरवार नाय होतो तौ हम बाकै तेरे हाथ मैं काहेकै देते।”
31पिलातुस उनसे कही, “तुम्हईं जाकै लैजाय कै अपनेई नियम के हिसाब से जाको न्याय करौ।” यहूदि बासे कहीं, “हमकै अधिकार नाय है कि कोई की जान लेमैं।” 32जौ इसलै भौ कि ईसु को बचन पूरो होबै, जोके जरिये बौ इसारा करी रहै कि बाकी मौत कैसे करकै होबैगी।
33तौ फिर पिलातुस फिर महल के भीतर गौ, और ईसु कै बुलाएकै ईसु से पूँछीं, “का तैं यहूदियन को राजा है?”
34ईसु जबाब दई, “का तैं जौ बात अपनी तरफ से कहरौ है या फिर कोई दुसरो मेरे बारे मैं तोसे जौ कही है?”
35पिलातुस जबाब दई, “का मैं यहूदि हौं? तेरे अपने लोग और मुखिया पुजारी तोकै मेरे हाथ मैं सौंपीं हैं। तैं का करो है?”
36ईसु जबाब दई, “मेरो राज्य जौ दुनिया मैं नाय है; अगर मेरो राज्य जौ दुनिया को होतो, तौ मेरे पछ लगुवा लड़ते और मोकै यहूदि नेतन के संग जान नाय देते; लेकिन मेरो राज्य हींना नाय है।”
37फिर पिलातुस कही, “तौ का तैं राजा है?” ईसु जबाब दई, “तैं कहथै कि मैं राजा हौं। मैं जौ ताहीं पैदा भौ हौं, और जौ ताहीं जौ दुनिया मैं आओ हौं कि सच्चाई की गभाई देयौं जो कोई सच्चो है, बौ मेरी सुनथै।”
38पिलातुस बासे कही, “सच्चाई का है?” ऐसे कहकै बौ फिर यहूदियन के झोने निकर गौ और उनसे कही, “मोकै तौ बामै कोई दोस नाय मिलो।
ईसु कै मार डारन को हुकम
(मत्ती 27:15-31; मरकुस 15:6-20; लूका 23:13-25)
39लेकिन तुमरी एक परम्परा है कि फसह के त्योहार मैं तुमरे ताहीं एक आदमी कै छोड़ दियौं। इसलै का तुम चाहथौ कि मैं तुमरे ताहीं यहूदियन के राजा कै छोड़ दियौं?”
40तौ बे फिर चिल्लाए कै कहीं, “जाकै नाय! लेकिन तैं हमरे ताहीं बरअब्बा कै छोड़ दे!” और बरअब्बा डाँकू रहै।
Currently Selected:
यूहन्ना 18: NTRTu2023
Highlight
Share
Copy
Want to have your highlights saved across all your devices? Sign up or sign in
The New Testament in Rana Tharu Language ©The Word for the World International and Rana Tharu Translation Samithi, Khatima, UttraKhanda, India. 2024
