मरकुस 10
10
तलाक क विषय ईशु की शिक्षा
(मत्ती 19:1-12; लूका 16:18)
1पछु ईशु वाँ छे उठीन यहूदिया कि सीमा मा आरू यरदन नदी क पार आश। गर्दी ओका साथे पछु एखटी होय गया, आरू वो आपसी रीति क लारे तीनुक पछु सिकाड़ने लाग्यो।
2तव फरीसि ने ओको साथे आवीन ओकी परीक्षा करने क ओको पुछ, “काय यो वारू छे कि मानुस आपसी बायर क छुड़ने?”
3त्यो ओको जवाब दिया, “मूसा ने हुकुम काय नियम दिदो छे?”
4 #
मत्ती 5:31
त्या कयो, “मूसा ने त्याग पत्री लिखने आरू त्यागने की हुकुम देदी छे”
5ईशु ने उनछे कयो, “तुमरे मन की वातड़ो हुयने क कारण उनछे तुमरे करता यो हुकुम लिखी। 6पर सूष्टि क शुरू छे यहोवा–भगवान ने नर आरू नारी करीन तीनुक बनाड़े छे। 7इनीये कारण मानुस आपसा माय बास छे अलग हुयने आपसी बायर क साथे रयछे, 8आरू वो दुयु डील एकुत होयछे; एरकरीन वो हिमी दुई निही पर एकुत छे। 9अतरानकरीन जिनाक यहोवा–भगवान ने जुड़ा छे उको मानुस अलग नी करने”
10घर मा चेला ने ओका विषय मा ओको पछु पुछा। 11#मत्ती 5:32; 1 कुरन्थियो 7:10,11त्यो उनछे कयो, “जो काही आपसी बायर क त्यागकर दीसरी छे वियाव करे तो वो उना पेहली क विरोध मा व्यभिचार करता छे; 12आरू यदि बायर आपने घरवाळा क छुड़ीन दिसरा छे वियाव करे तो वो व्यभिचार करती छे”
ईशु नानलो पोर्या क सय बरकत कर्यो
(मत्ती 19:13; लूका 18:15-17)
13पछु मानसे पोर्या क ईशु क साथे लावने लाग्या की वो उन पर हात राखने, पर चेला ने तीनुक लड़िया। 14ईशु ने यो देखीन रीस हईन उनछे कयो, “पोर्या क मारे साथे आवने दो आरू तीनुक मना नी करो, काहकि यहोवा–भगवान क राज्य ओसो ही क छे। 15#मत्ती 18:3हाव तुमू छे सच कयता छे की जो काही यहोवा–भगवान क राज्य क पोर्या क समान मान्य नी करे, वो उको कदी भरायने करने नी देख सके।” 16आरू त्यो तीनुक खुवाम मा लेदो, आरू ओको मुनका पर हात राखीन तीनुक सय बरकत देद।
धनवान मानुस आरू अमरकाय जीवन छे
(मत्ती 19:16-30; लूका 18:18-30)
17जव ईशु वाँ छे निकवीन मार्गा मा जा रया हुता, ती एक मानुस ओका साथे दोवड़ता हुया आश, आरू ओका ओगव घुटना टेकीन उको पुछा, “हे वारला गुरू, अमरकाय जीवन क हक हुयने क करता हाव काय करीस?”
18ईशु ने उनछे कयो, “तु मखे वारला काय कयता छे? काही खरो नी, केवल एक मतलब यहोवा–भगवान। 19तु हुकुम क ती जानता छे: ‘हत्या नी करने, व्यभिचार नी करने चुरी नी करने, झुठी गवा नी देने, छल नी करने, आपने बास आरू आपसी माय क विजुत करने’”
20त्यो उनछे कयो, “हे गुरू, इन सबको हाव लड़कपन छे मानता आयु छे”
21ईशु ने उना नजर करीन ओका सी मोंग कर्यो, आरू ओको कयो, “तुखे हाव एक वात कि घटी छे। जा, जो काय तारे छे उको वेचीन गरीब क दे, आरू तुखे सोरग मा धन हाववछे, आरू आवीन मारे पछव होय लेय” 22इन वात छे ओका जुवान क चेहरो उदास होय गयो आरू वो शोक करता हुया जात रयो, काहकि वो घोणा धनवान हुता।
23ईशु ने चार आरू देखीन आपसा चेला छे कयो, “धनवान क यहोवा–भगवान क राज्य मा भरायने करनो कोतरो वातड़ो छे!”
24चेला ओकी वात छे घबराय हुया। अतरा पर ईशु ने पछु उनछे कयो, “हे पोर्या, जो धन पर भरोसा राखते छे, ओको करता यहोवा–भगवान क राज्य मा भरायने करने कोसो वातड़ो छे! 25यहोवा–भगवान क राज्य मा धनवान भरायने करने छे उटड़ान क सुवी क गाळा मा छे निकाव जाने सहज छे”
26चेला घोणा ही चकित हईन आपस मा कयनो लाग्या, “ती पछु कायका उध्दार होय सकता छे?”
27ईशु उनकी आरू देखीन कयो, “यो मानुस क करता काटो सकता, पुन यहोवा–भगवान छे होय सकता छे; काहकि यहोवा–भगवान छे सब काही होय सकता छे”
28पतरस ईशु क कयनो लाग्या, “देख, हामु तो सब काही छुड़ीन तारे पछव होय करता छे”
29ईशु ने कयो, “हाव तुमू छे सच कयता छे कि ओसो काही नी, जो मारे कारण आरू खुश खबर क कारण करता घर आव भाई आव बहिनीस आव माय आव बास आव झोठा पोर्या खेत क छुड़ीन दीया होय, 30आरू हिमी इन टेहाव सौ गुणा नी जुड़े, घर आरू भाई आरू बहिनीस आरू माय आरू झोठा पोर्या आरू खेतमा क, पर सताव क साथे आरू आवने वावा जगमा अमरकाय जीवन देखछे। 31#मत्ती 20:16; लूका 13:30पर खुप छे जो पेहले छे, पछव होयछे; आरू जो पेहले होयछे”
आपसी मृत्यु क विषय ईशु की तीसरी भविष्यव्दाणी
(मत्ती 20:17-19; लूका 18:31-34)
32ईशु आरू ओका चेला यरूशलेम क जाते हुय मार्ग मा हुत, आरू ईशु उन क ओगव जाय रयो हुता: चेला घबराय हुते आरू जो ओका पछव चालता हुते वो घाबराय हुये हुते। तव वो पछु उन बारा क लीन उनछे वो वात कयनो लाग्यो, जो उना पर आवनेवावी हुती, 33देख, हामु यरूशलेम क जाते छे, आरू मानुस क पोर्या मतलब मखे डाहला पुजारा आरू शास्त्री क हात धराया जाछे, आरू वो ओको घात क योग्य ठरावछे, आरू गैरयहुदी क हात मा सौप देसे। 34“वो ओको ठठ्ठा मा उड़ावसे उना पर थुपछे, उना कोड़े मारछे आरू उको घात करसे, आरू तीन दाहाड़ा क बाद वो जीवीन उठसे”
याकूब आरू यहुन्ना क रावन्या
(मत्ती 20:20-28)
35तव जबदी क पोर्या याकूब आरू यहुन्ना ईशु क साथे आवीन कयो, “हे गुरू हामु जुवता छे की जो काही हामु तुखे मांगने, वो तु हामरे करता कर्यो”
36ईशु ओका सी कयो, “तुमू काय जुवता होय की हाव तुमरे करता करीस?”
37त्या ओको कयो, “हामु यो दे कि तारी महिमा मा हामु मा छे एक तारी जेवड़े आरू दिसरा तारे बाई बठ्या”
38 #
लूका 12:50
ईशु ने ओक कयो, “तुमू नी जानछे की काय मांगता होय? जो वाटका मा पानी पर छे, काय तुमू पीय सकता हुता? आरू जो बपतिस्मा मा लेने पर छे, काय तुमू लेय सकता होय?”
39त्या उनछे कयो, “हामु छे होय सकता छे”
ईशु ने उनछे कयो, “जो वाटको मा पानी पर छे तुमू पीनो छे; आरू जो बपतिस्मा मा लेने पर छे, उको मानछे। 40पर जिनके करता तीयार कर्या गया छे, तिनुक छुड़ीन आरू काही क आपने जेवड़े आरू आपने बाई बठाडने मारो काम नी”
41यो सोमवीन दस याकूब आरू यहुन्ना पर रिसियाने लाग्या। 42#लूका 22:25,26ती ईशु ने उनको साथे बुलावीन उनछे कयो, “तुमू जानछे होय की जो गैरयहुदी क सरदार समझे जाय छे, वो उन पर पोरबुता करता छे; आरू उनमा जो मोठ छे, ओका पर हक जताते छे। 43पर तुमू मा ओसो नी छे वरना जो काही तुमू मा मोठ हुयने जुवे वो तुमरा सेवक बनछे; 44आरू जो काही तुमू मा प्रधान हुयने चाहतु से चो सब क दास बनछे। 45काहकि मानुस क पोर्या मतलब मखे इनीये करता नी आश की ओकी सेवा टहल की जाय, पर अतरान करीन आश की सेवा टहल करे, आरू घोणा क छुटकारा क करता आपसो जीव आपे”
आंधवा बरतिमाई क द्रूष्टिदान
(मत्ती 20:29-34; लूका 18:35-43)
46ईशु यरीहो नगर मा आय, आरू जव वो आरू ओका चेला, आरू एक मोटी गर्दी यरीहो छे निकवती हुती, तव तिमाई क पोर्या बरतिमाई, दूय आंधवा भिखारी, सड़क क धोड़े बठ्या हुतो। 47वो यो सोमवीन की ईशु नासरत छे, आयड़ी कयनो लाग्या, “हे दाऊद की अवलियाद, ईशु हामरे पर दया कर”
48घोणा ने उको लड़िया की चुप रये, पर वो आरू भी आयड़ने लाग्यो, “हे दाऊद की अवलियाद हामरे पर दया कर”
49तव ईशु ने ठहरकर कयो, “उको बुलाया”
आरू मानसे ने उना आंधवा क बुलावीन ओको कयो, “ढाढ़स बांध! उठ वो तुखे बुलाता छे”
50वो आपसा छिंदरा नाखी शीघ्र उठ्यो, आरू ईशु क साथे आयो।
51इन पर ईशु ने ओको कयो, “तु काय जुवे छे की हाव तारे करता करीस?”
आंधवा ने ओको कयो, “हे रब्बी, यो की हाव देखने लीस”
52ईशु ने ओको कयो, “चालीन जा, तारे विश्वास ने तुखे वारू कर दिया छे”
वो तत्काल देखने लाग्यो, आरू मार्गा मा ओको पछव चाल देदो।
Currently Selected:
मरकुस 10: NTDii20
Highlight
Share
Copy
Want to have your highlights saved across all your devices? Sign up or sign in
The New Testament in Dhankavi Language © The Word for the World International and Dhankavi Mandli, Khargon, Raykhed, Nandurbar, Maharashtra 2020
