मत्ती 24
24
मंदीर उदार नाखसे करीन ईसु पेहलुत बताड़े
(मरकुस 13:1,2; लुका 21:5,6)
1जत्यार ईसु मंदीरेन्चां सी नीकळीन जाणे बाजी रवलु, ती तेरा चेला तीना काजे मंदीर देखाड़ने करीन तेरे धड़े आया, की मंदीर कसों छे। 2ईसु तीनुक कह्यु, “तुहुं आखो ज देख रया नी। बाकुन मे तुहुंक छाचलीन कहो, जां दगड़ा पर दगड़ु बी नी रवे एक-एक दगड़ु उदारी नाखसे।”
गरा आवणे टेम
(मरकुस 13:3-13; लुका 21:7-19)
3जत्यार हयु जेतुनेन बयड़ा पर बसी रवलु, ती चेला एखलात ईसु धड़े आवीन कह्या, “हामुक बताड़ की जी वात कत्यार हवसे? तारो आवणेन ने कळीन खत्तम हवणेन काय सहलाणी#24:3 चिन्ह रवसे।”
4ईसु तीनुक जपाप आप्यु, चेतीन रवु! तुहुंक कुय बी भटकाड़नु नी चाहजे। 5काहाकी बेसका माणसे असा रवसे चे मार नाव सी आवीन कह्वसे, मे मसी छे! ने बेसका काजे भटकाड़ी देसे। 6तुहुं लड़ाय पर लड़ायन वात सामळसु, ती घाबरायु घुण, काहाकी असो ते हवण्यत छे, बाकुन तीनी टेमे कळजुग सरनु नी हय। 7काहाकी जाती पर जाती, ने राजे पर राजेन माणसे भेळा हयन लड़ाय करसे, ने जागे-जागे काळ पड़से, ने धरती धदड़ीन फाट जासे। 8जी आखी वात हीड़ा-पीड़ान सुरुवात हवसे।
9तत्यार चे एला पाड़ने करीन तुहुं काजे धराय देसे, ने तुहुंक मार नाखसे, ने तुहुं मारी वात सामळसु ने मार नावेन वजे सी आखी जातीन माणसे तुंद्रा वेरी रवसे। 10तत्यार बेसका माणसे मारे पर सी भुरसु करनु छुड़ देसे, ने एक दीसरा काजे धराड़से, ने एक दीसरा सी वेरी रवसे। 11बेसका लुच्चा भगवानेन अघी सी आवणे वाळी वात देखाड़न्या उठीन हुबा हवसे, ने बेसका माणसे काजे भटकाड़से। 12पाप अदणे सी बेसका माणसेन परम छे चु सेळाय जासे, 13बाकुन जु मरता लग गम खासे, तेरुत छुटकारु हवसे। 14भगवानेन राजेन ज्य खुस-खबर आखी कळी मां माणसे परचार करसे, ने सामळावसे, काहाकी चे आखी जाती मां गवा बण जाय, तत्यार कळजुग सरनेन टेम आय जासे।
मट्ली गरान सुरुवात
(मरकुस 13:14-23; लुका 21:20-24)
15तेरेमां जत्यार तुहुं तीनु उजाड़ने वाळी वात ने भुंडीत चीज काजे तेरी वात दानीयल भगवानेन अघी सी आवणे वाळी वात देखाड़न्यान साहरे हवली, चु चुखली जागा मां उबु हय रवलु देख्यु, जे भणे, चे समजे। 16तत्यार चे यहुदीया जीला मां रवे चे बयड़ा मां ढास जाय। 17जे घरेन बमड़ा पर रवे, चे आपणा घर मां समान लेणे घुण उतरु; 18ने जे कदी खेत मां हय, चे आपणा पुथल्या लेणे पछा घुण आवु।
19तीनु दाहड़ा मां जी भारीस ने दुत धावाड़ती हसे, तींद्रे वाटे बेसकी, दुखेन वात छे। 20दुवा करता रहु काहाकी सीयाळान दाहड़ा मां, ने आरामेन दाहड़े ढासणु नी पड़े। 21काहाकी तीनी टेमे मां असी भारी एला हवसे, जसों हीनी कळीन सुरु सी हय लग नी हयो ने कदी तसों हवसे। 22कदी दाहड़ा नी कम करता ती, काहनु बी जीव नी बचे, बाकुन नेवाड़ला माणसेन वजे सी चे दाहड़ा कम हय जासे।
23तीनी टेमे मां कदी कुय बी तुंद्रे सी कह्वे, की देखु, मसी जां छे! नीते वां छे! ती भुरसु#24:23 विश्वास घुण करु।
24काहाकी लुच्चा मसी ने लुच्चा भगवानेन अघी सी आवणे वाळी वात देखाड़न्या उठीन उबा हय जासे, ने मट्ली सहलाणी, ने बेसका मटा-मटा काम देखाड़से कदी हय सके ते नेवाड़ला काजे बी भटकाड़ देसे। 25देखु, मे पेहलुत तुंद्रे सी जी आखी वात कय देदु।
26तेरेमां कदी चे तुंद्रे सी कह्वे, देखु, हयु ते बयड़ा मां छे! ती बाहार घुण नीकळी जावु, नीते देखु, हयु ते खुणा कपरा मां छे, ती तुहुं भुरसु घुण करु। 27काहाकी जसी वीजळी उगवणी#24:27 पुर्व सी नीकळे ने बुडवणी लग वीजळे, तसोत माणसेन पुर्यान बी आवणु हवसे।
28जां लास रवे, चांहान मटला घुवड़ा बी भेळा हवसे।
माणसेन पुर्यान पछु आवणेन बारामां
(मरकुस 13:24-27; लुका 21:25-28)
29तीनु दाहड़ा मां गरा आवणेन तत्यारुत पछेन दाहड़ु उलवाय जासे ने चांदेन वीजाळो खत्तम हय जासे, ने तारा छे चे सरग सी भुयमां हीट पड़से ने सरगेन आखो ताकुतेन काम सी हाल जासे। 30तत्यार माणसेन पुर्यान सहलाणी सरग मां देखाय जासे ने तत्यार कळीन आखी जातीन माणसे छाती ठुकीन रड़से; ने माणसेन पुर्या काजे मट्ली ताकत ने सेक-सींगार साते वादळा मां आवतेलु देखसे। 31चु फेप्यान मट्ली आवाज भेळु आपणा सरग वाळा काहवाळ्या काजे मकलसे, ने चे कळीन उपर एक खुणा सी दीसरा खुणा लग, चारे-मेर सी तेरा नेवाड़ला काजे भेळा करसे।
अंजीरेन झाड़कान दाखलु
(मरकुस 13:28-31; लुका 21:29-33)
32“अंजीरेन झाड़का सी गुयु दाखलु सीकु। जत्यार तीनी डाळ मां कवळा डीरा फुटणे लग जाय ने नवला पान्टा नीकळने बाजी जाय, ती तुहुं जाण जावु की हय उंडाळु आवणे वाळु छे।” 33एरेत तसोत जत्यार तुहुं हीनु आखी वाते काजे देखु, ती जाण लेजु की तेरो आवणेन टेम धड़ेत छे, बाकुन बारना मां आय गुया। 34ने तुहुंक छाचलीन कहो की जी आखी वात ईनी पीड़ीन माणसेन मरनेन पेहलुत हवसे। 35सरग ने धरती टळ जासे, बाकुन मारी वाते कदी नी टळे।
ईसु कत्यार पछु आवसे चो नी मालुम तेरेमां जागता रवु
(मरकुस 13:32-37; लुका 17:26-30,34-36)
36हयु दाहड़ु ने तीनी टेमेन बारामां कुय बी नी जाणे, नी ते सरग वाळु काहवाळ्यु, नी ने पुर्यु नी, बाकुन बास अतरुत जाणे। 37जसों नुहुन दाहड़ा मां हवलो, असोत माणसेन पुर्यान आवणु बी हवसे। 38काहाकी जसों पाणी मां डुबणे सी पेहला दाहड़ा मां, जां लग की नुह ढंड्या पर नी चहड़्यु, तीनु दाहड़ा लग माणसे खात्ला ने पीदला, ने तींद्रे मां ईयाव हवतेला। 39ने जत्यार लग मुसळ धार्यु पाणी आय्न तीनु आखा काजे उह्वाड़ीन नी ली गुयो, तत्यार लग तीनुक काय बी पतु नी चाल्यु, तसोत माणसेन पुर्यान आवणु बी हवसे। 40तीनी टेमे दुय जणा खेत मां हसे, ने एक काजे लीन जाती रवसे ने दीसरा काजे चांहान रहणी देसे। 41दुय बायर घट्टी दळती रवसे ने एक काजे लीन जाती रवसे ने दीसरी काजे चांहान रहणी देसे। 42तेरेमां जागला रवु, काहाकी तुहुं नी जाणु की तुंद्रु मालीक काहने दाहड़े आवसे। 43बाकुन ज्य वारु रीती सी जाण लेवु, की कदी घरेन मालीक#24:43 स्वामी जाणतु की चुट्टु कतरी टेमे आवसे ती चु जागतु रवतु ने आपणा घर मां सी काय बी चुरी नी हवणी देतु। 44तेरेमां तुहुं बी तीयार रवु, काहाकी तीनी टेमे तुहुं वीच्यार बी नी करसु ने, तीनी टेमे मां माणसेन पुर्यु आय जासे।
भुरसावाळु ने नी भुरसावाळु पावर्यु
(लुका 12:41-48)
45तेरेमां भुरसु करन्यु ने अक्कल वाळु पावर्यु कुण छे? तीनाक मालीक आपणा नकर्या-चाकर्या काजे सामाळन्यु राख्यु काहाकी चु टेमे-टेमे पर तीनुक खाणो आप सके? 46वारु छे, हयु पावर्यु, तीनाक तेरु मालीक चोन काम करतु देखे। 47मे तुंद्रे सी छाचलीन कह्व, मालीक तीना पावर्या काजे आपसान आखा माल-धन पर हकदार्यु बणावसे। 48बाकुन कदी हयु बयमान पावर्यु वीच्यारने लागे की मारा मालीकेन आवणे मां वार छे, 49ने हयु असु वीच्यारीन दीसरा साती गुलाम पावर्या काजे ठुकणे, बाजी गुयु ने दारुड़्या भेळु खाय ने दारुड़्यु बण जाय। 50ती तीना पावर्यान मालीक असला दाहड़ा आवसे, जत्यार हयु तेरी वाट बी नी देखे, ने असी टेम मां तीना काजे पतु नी रवे। 51तत्यार चु मालीक तीना काजे भारी मटु डंड आपसे, ने ढंगड़ा करन्या साते भेसकी देसे। ने चां रड़से ने दात ककड़ावता रवसे।
Currently Selected:
मत्ती 24: NTBSP23
Highlight
Share
Copy
Want to have your highlights saved across all your devices? Sign up or sign in
The New Testament in Bhilali Language ©The Word for the World International and Bhilali Bhasha Samiti, Warvani, (M.P.) 2023.
