YOANO 3

1KANINGA muntu akadiko a baFalixi, dina dienci ene, Nikodemo, muntu munene a bena Yuda ; 2yei akalwa kudiyi ku butuku, yi akamwambila ene, Labi, twalubukwa ene, Owe udi mweyexi amalwa kudi Ncembi, bwalo butasolubukwa muntu kukisa bilayixilu bebi biakisa Owe kutena Ncembi udi yinanci. 3Yisu akapingasa yi akamwambila ene, Sôsolwo, sosôlwo, nkwatôyela ene, Kutena muntu amalelebwa kabidi, kabiyi kumona bufumu bwa Ncembi. 4Nikodemo akamwambila ene. Muntu unalelebwa beci panakala udi kinunu ? Ubili kubwela diamubidi mu difu dia mamanci kulwa lelebwa ? 5Yisu akapingasa ene, Sôsôlwo, sôsôlwo, nkwatôyela ene, kutena muntu amalelebwa kudi mai, yi kudi Mwoxixi, kabiyi kubwela mu bufumu bwa Ncembi. 6Kintu kioso kiamalelebwa kudi munyu kidi munyu ; kioso pako kiamalelebwa kudi Mwoxixi kidi Mwoxixi. 7Kukamini munapukutôyela ene, Nudi yi dibambu dia kulelebwa kabidi. 8Mwoxixi ndo ăpupuya kwoso kwanangau, yi owe wombombwa diyi diau, kate kusolubukwa kulolwau yi kuyeyau ; kudi nako yi muntu mwoso amalelebwa kudi Mwoxixi. 9Nikodemo akapingasa yi akamwambila ene, Bintu bebi binakala beci ? 10Yisu akapingasa yi akamwambila ene, Owe ndo mweyexi a Isalele yi kusolembetela bintu bebi ? 11Sôsôlwo, sôsôlwo nkwatôyela ene, Coco twatôya malo atwalubukwa, yi twatôbôla ntôbô ya malo atwamamona, yi nonu kanusoangata ntôbô yecu. 12Ndo napunutôyela malo a paxi yi nonu kanusokwetabusa, nunakwetabusa beci ndo nakunutôyela malo a diulu ? 13Muntu kienako amaximuna ku diulu utena you akapweka mu diulu, Mwana a muntu utani mu diulu. 14Yi byaka biakakwombulula Mosese nyoka mu mbata a kisobe bidi Mwana a muntu yi dibambu dia kwombuludibwa, 15bitaxepya muntu mwoso umwetabuxila kate uxeakala yi môyo ă kô kô. 16Bwalo bwakananga Ncembi loboko nako biakapayi Mwananci a Ditôi, ene, muntu mwoso umwetabuxila kaxepya, kate uxeakala yi môyo ă kô kô. 17Bwalo butatumini Ncembi Mwananci ku loboko kulwa bela loboko, kate bixepandixibwa loboko kudiyi. 18You umwetabuxila kasobelebwa ; you pako utasokwetabusa amabelebwa nkyekyu, bwalo butakwetabuxilayi dina dia Mwana a Ncembi a Ditôi. 19Kunu kudi lopelo ene, obo amalwa ku loboko, yi bantu bamananga mwedima, kumbni obo ; bwalo bwakadi makisa abo mabi. 20Bwalo bwanyañana muntu mwoso obo encenca bubi, yi kasolwa ku obo ximbi makisa anci axetongolebwa. 21Mo you encenca sôsôlwo ulolwa ku obo bixekwebexebwa makisa anci ene, amakwencebwa mu Ncembi.

22Kunyuma kwa bintu bebi, kwakalwa Yisu yi beyi banci ku mbata a Yudiya ; yi akakala koku yi akanumeya bantu. 23Yoano kabidi akadi mu kunumeya numeya ku Enono, pepe yi Salimi, bwalo bwakadi mai mangi koku ; yi bakalwa, yi bakanumeyebwa ; 24bwalo bwakadi Yoano ukidi kasokwelebwa mu ncibo a lukanu. 25Mbwôsô bakakwelesañana mbata kudi beyi ba Yoano yi muna Yuda dia kukusudibwa. 26Yi bakalwa kudi Yoano yi bakamwambila ene, Labi, you akadi yinebe ku dixia dia Yôdana, akatôbôlela owe ntôbô, mona, yei ndo anumeya numeya, yi bantu boso balolwa kudiyi. 27Yoano akapingasa, ene, Muntu kabiyi kwangata kintu pô, kutena kwamamupebwa ku diulu. 28Nonu mikyenu nungwatôbôlela binakatôya ene, Meme kiena Kalistu, kate ene, namatumibwa ku buxi bwanci. 29You utani yi muna dibakwa udi mwangaci a dibakwa ; mo kimbila kia mwangaci, kiamakwemana yi kiamamwombwa, ndo kiaxekyelela kiango bwalo bwa diyi dia mwangaci a dibakwa ; mbwôso kiango kiamene kieki noku kiamafika. 30Yei udi yi dibambu dia kutumba, meme mpwekyeleli. 31You ulolwa kulu udi kulu kwa bantu boso. Muna paxi udi a loboko, yi dia loboko ndo diatôyayi ; you abatuka mu diulu udi kulu kwa bantu boso. 32Bwalo lolo bwamamonayi yi bwamakwombwayi ndo bwatôbôlayi ; yi kakuna muntu amangata ntôbô yenci. 33You amangata ntôbô yenci amanamacisa kilembetelu kienci ene, Ncembi udi sôsôlwo. 34You aputuma Ncembi ndo atôya meyi a Ncembi bwalo butasopayi Mwoxixi yi bunya. 35Tete amananga Mwana, yi amalongola bintu bioso ku kianca kienci. 36You etabuxila Mwana udi yi môyo ă kô kô ; you pako utasokwedeya Mwana kanamona môyô, kate bisusu bia Ncembi biamasala kulu kwanci.

Currently Selected:

YOANO 3: Luna_NT

Highlight

Copy