YOANO 18

1PAKADI Yisu amamana malo aa kutôya, akabatuka yi beyi banci dixia dia muxilu ă Kyedelono, kwakadi kibidi kiakabwelayi munda, mikyenci yi beyi banci. 2Yudaxi kabidi akamwenga akalubukwa kidi, bwalo bwakaya Yisu momu matuku mangi yi beyi banci.

3Mbwôso Yudaxi, pakadi amangata kibumbu kia masalai, yi tupalai kudi makanda manene yi kudi baFalixi, akalwa momu yi minda, yi makolobo, yi bipiko. 4Mbwôso Yisu, akalubukwa bintu bioso bixemuponena, akabatuka yi akabambila ene, Nwapalala ñani ? 5Bakamupingasa ene, Yisu a Nasalete. Yisu akabambila ene, Meme kayou. Yudaxi kabidi akamwenga akakwemana yinabo. 6Pakabambilayi lolo ene, Meme kayou, bakapokapoka kunyuma yi bakapona paxi. 7Mbwôso akabapangusa kabidi ene, Nwapalala ñani ? Yi bakatôya ene, Yisu a Nasalete. 8Yisu akapingasa ene, Napunwambila ene, Meme kayou. Ndo lolo nungwapalala, nulekyeli bantu baba, bancuki ; 9bixefikixibwa diyi diakatôyayi ene, Bwalo bwabo bwa bantu bamangupa Owe, kiancimisa muntu abo umoumwe. 10Mbwôso Ximono Pita, akadi yi mwele, akausomona, yi akakuma musadi a bokanda bunene, akamuxaka dicu dienci dia kidyo. Dina lolo dia musadi ndo Malakusu. 11Yi Yisu akatôyela Pita ene, Sokyeya mwele ěbe mu lupapa ; mpamba amangupa Tete, ki meme nxemunwa ?

12Mbwôso masalai yi kiliaka, yi tupalai twa bena Yuda, bakakwata Yisu yi bakamusuka ; 13yi bakamucwala kudi Anasa buxi, bwalo bwakadiyi bukwondi bwa Kayafa, bokanda bunene bwa ku mbula you. 14Kayafa lolo ndo you akakwamina bena Yuda mpanga ene, Kwamalelekyela ndo muntu umoumwe uxefwa ku mucwe ă bubila bobu.

15Ximono Pita lolo akalabela Yisu yi munga mweyi. Mo you mweyi akalubukibwa kudi bokanda bunene, yi akabwela yi Yisu munda mwa lumbu lwa bokanda bunene ; 16mo Pita akakwemana ku mbelo kunci. Mbwôso mweyi munga akalubukibwa kudi bokanda bunene akabatuka yi akatôya yi munami a babakaxi a mbelo, yi akabwesa Pita. 17Muxika lolo, akanama mbelo, akatôyela Pita ene, Owe kabidi udi muna kwabo a beyi ba muntu you ? Yei ene, Kañana. 18Mo basadi yi tupalai, pakadi bamanamika mudilu ă makala bwalo bwa maxika, bakakwemana yi bakakwota mudilu ; yi Pita akadi yinabo kabidi, amakwemana, udi mu kwota mudilu.

19Mbwôso bokanda bunene bwakakwapangusa Yisu dia beyi banci yi dia kweyesa kwanci. 20Yisu akamupingasa ene, Namakwambila loboko ku mpala ; namakweyesa matuku moso mu kixingidilu yi mu tempelo mwakokama bungi bwa bena Yuda ; yi ku busoko ndo kuntasotôya bwalo bumobumwe. 21Kukai ungwapanguxila meme ? Apangusa bantu bamakwombwa, binakabambila ; mona, bobo balubukwa malo anakatôya. 22Kaninga pakadi amatôya nako, kanga kabo ka tupalai twakakwemana papa, kakakuma Yisu lupi ene, Wapingasa bokanda bunene nako ? 23Yisu akamupingasa ene, Ndo naputôya bubi, tôbôlela bubi ntôbô ; kaninga ndo loko, kukai ungwakuma ? 24Mbwôso Anasa akamutuma musuka kudi Kayafa bokanda bunene.

25Mo Ximono Pita akakwemana, udi mu kwota mudilu. Mbwôso bakamwambila ene, Owe kabidi udi muntu a beyi banci. Yei akakwaba ene, Kumoni. 26Munga musadi a bokanda bunene, kilungu kia muntu you akaxaka Pita dicu dienci, akatôya ene, Ki napukumona mu kibidi yinanci ? 27Mbwôso Pita akakwaba mwabu kabidi, yi ntala akakwela diyi mangwoso.

28Bakacwala Yisu lolo kudi Kayafa kuya ku kisambolelu ; kwakadi butwatuku pexe. Yi bobo mikyeabo bakadi kabasobwela mu kisambolelu bitaxepindixibwabo, kate bixedyabo kitula kia Kidikixilu. 29Mbwôso Pilata akabatuka kudibo, yi akatôya ene, Kusanya kwa beci ndo kunwasanya muntu you ? 30Bakapingasa yi bakamwambila ene, Kutena muntu you apwakala mwoni, katuxemulongola kudi. 31Biakabambila Pilata ene, Numwangati mikyenu, numusamboli bea bialelekyela yi bwadi bwenu. Bena Yuda bakamwambila ene, Kakusolelekyela coco kuxipa muntu mwoso ; 32bixefikixibwa diyi dia Yisu diakatôyayi dia kwebesa butonga bwa lufu luxefwayi.

33Mbwôso Pilata akabwela kabidi mu kisambolelu, yi akabikila Yisu, yi akamwambila ene, Owe udi fumu a bena Yuda ? 34Yisu akapingasa ene, Owe wamaditôyela noku biebe, sungu ndo banga bamakwambila noku ku bwalo bwamene ? 35Pilata akapingasa ene, Meme ndi muna Yuda ? Bubila bwebe yi makanda manene bamakulongola kundi ; wapwenca kai ? 36Yisu akapingasa ene, Bufumu bwamene kabuna bwa loboko lolu ; ximbi bufumu bwamene bwapwakala bwa loboko lolu, basadi bamene baxetanda bintaxelongolebwa kudi bena Yuda ; kate nkyekyu bufumu bwamene kabuna bwa kunu. 37Biakamutôyela Pilata ene, Owe udi Fumu lolo ? Yisu akatôya ene, Owe waputôya ene, meme ndi fumu. Ku bwalo bobu ndo kunamalelebwa, yi ku bwalo bobu ndo kunamalwa ku loboko binxetôbôlela sôsôlwo ntôbô. Muntu mwoso udi muna sôsôlwo ndo ombombwa diyi diamene. 38Pilata akamwambila ene, Sôsôlwo udi kinani ? Yi pakadi amatôya noku akabatuka kabidi kudi bena Yuda yi akabatôyela ene, Meme kisosañana bwalo bubi yinanci pô. 39Kaninga nonu nudi yi mwosambu, meme nulekyeleli muntu umoumwe ku Kidikixilu ; nwakyeba lolo nulekyeleli fumu a bena Yuda ? 40Mbwôso bakakwamena bo-a-bwoso ene, Kumoni muntu you kate Balaba. Mo Balaba akadi musancanani.

Currently Selected:

YOANO 18: Luna_NT

Highlight

Copy