MAKISA 9

1KANINGA Saulu, ukiaputa lomo lwa kwana yi kwonda bwalo bwa beyi ba Fumu, akaya kudi bokanda bunene, 2yi akamulomba mikanda ya kuya yinayo ku Damasako ku bixingidilu ; ene, ndo asañana bantu ba bena ncila you, ndo babalumi ndo babakaxi, abacwali basuka ku. Yelusaleme. 3Pakakwendayi lolo, akafika pepe yi Damasako ; yi obo akalumuka mangwoso padiyi a munda mwa diulu ; 4yi akapona paxi, yi akakwombwa diyi diakamutôyela ene, Saulu, Saulu, kukai ungwakolomona ? 5Akatôya ene, Owe ndo ñani, Fumu ? Yei ene, Meme ndi Yisu, akolomona owe. 6Kate emana, bwela munda mwa bula, munakwambidibwa muxekwenca. 7Mo bantu bakakwenda yinanci bakakwemana nya, bamakwombwa diyi, mo kabamoneni muntu. 8Yi Saulu akakwombuluka paxi, yi pakadipudibwa meso anci akadi kasomona kintu : mo bakamuxiya xiya ku kianca, yi bakamucwala ku Damasako. 9Yi akadi matuku asatu kutena kumona, akadi kasodya, kasonwa. 10Ku Damasako lolo kwakadi mweyi, dina dienci ene, Anania. Fumu akamutôyela mu dilu ene, Anania. Yei ene, Mona, meme kayou, Fumu. 11Yi Fumu akamwambila, ene, Emana, enda ku mwolongo ăbikidibwa ene, Swi, palala muntu mu ncibo a Yudaxi, abikidibwa ene, Saulu, muna Taso ; mona, udi mu kulomba, 12amamona muntu abikidibwa ene, Anania amabwela, amabaka kianca kienci kulu kwanci, amoni. 13Mo Anania akapingasa ene, Fumu namakwombwa kudi bantu bangi dia muntu you, mwakakixilayi bena babala bebe bubi bungi ku Yelusaleme ; 14kunu lolo kudiyi yi bumanya bwa makanda manene, bwa kusuka bantu boso badi mu kwabila dina diebe. 15Mo Fumu akamwambila ene, Enda, bwalo budiyi mpamba musungudibu amene, ndo kucwala dina diamene ku mpala ya mabila, yi ya bafumu, yi ya bana ba Isalele ; 16bwalo bunamwebesa munatacilayi dina diamene kutata kungi. 17Yi Anania akaya yi akabwela munda mwa ncibo ; akabaka bianca bienci kulu kwanci yi akatôya ene, Muna kwami Saulu, Fumu apungutuma, Yisu, akamoneka kudi mu ncila akalwa owe, bixemona owe, yi bixekwolubixibwa Mwoxixi a babala. 18Yi ku meso anci kwakapona mangwoso bea mamba, yi akamona ; akakwemana lolo yi akanumeyebwa ; 19akangata bidya yi akadiombwa ngulu. Yi akakala amo matuku yi beyi bakadi mu Damasako. 20Mu bixingidilu lolo mwakakwambilayi mangwoso dia Yisu, ene, Udi Mwana a Ncembi. 21Yi bungi bwabo bakakwombwa bakakama, bakatôya ene, Ki you akaxipa bantu mu Yelusaleme bamakwabila dina dedi, akalwa kunu kulwa bacwala basuka kudi makanda manene ? 22Kaninga Saulu akalekola yi ngulu mingi, akabulamisa bena Yuda bakakala ku Damasako, akakwebesa ene, You udi Kalistu.

23Pakadi matuku mangi amadika lolo, bena Yuda bakaya nkuku bwalo bwa kumuxipa. 24Kaninga kipola kiabo kiakalubukibwa kudi Saulu. Bakadingila bibwelelu kabidi munyinya yi butuku bixemuxipabo ; 25kaninga beyi bakamwangata ku butuku, yi bakamufundusa pa kididi kia bula, bakamupwesa mu kisakwa.

26Pakafikayi ku Yelusaleme akapalala kunamata yi beyi, yi bakamucina bungi bwabo, bakadi kabasokwetabusa ene, udi mweyi. 27Kaninga Banabasa akamwangata, akamucwala kudi batumibwi, yi akabambila mwakamonayi Fumu mu ncila, akatôya yinanci ; mwakakwambilayi lolo yi mucima ku Damasako mu dina dia Yisu. 28Yi akadi yinabo yi kubwela yi kubatuka ku Yelusaleme, 29akakwambila yi mucima mu dina dia Fumu. Akatôya lolo yi akakwelesa mbata yi bena Yuda ba ku Ngiliki ; kaninga bobo bakapalala kumuxipa. 30Pakalubukwa bakunyi noku, bakamucwala ku Kyesalia yi bakamutuma kuya ku Taso. 31Nako kikokye kiakadi yi polo, ku bungi bwa Yudiya yi Ngalili yi Samalia, yi kiakakwabakibwa ; kiakakwenda lolo mu bowa bwa Fumu, yi mu kibondelu kia Mwoxixi a babala, kiakalundixibwa.

32Yi pakadi Pita udi mu kutanga bungi bwa mbata, akapweka kabidi kudi bena babala bakakala ku Lida. 33Yi akasañana muntu koku, dina dienci Ainea, akamalala ku ntangi mbula yenana, akadi muna mbôyaponde. 34Yi Pita akamwambila ene, Ainea, Yisu Kalistu ukwapandisa ; ombuluka, adisa ntangi ebe. Yi akakwombuluka mangwoso. 35Yi bungi bwabo bakakala ku Lida yi ku Salono bakamumona, yi bakakulumuka kudi Fumu.

36Ku Yopa lolo kwakadi mweyi a babakaxi, dina dienci ene, Tabita, ndo ene, Dôkasa (sakolo ene, Nkulupa) ; you akalekola yi makisa anengela yi makisa a mwengo akakisa kisayi. 37Yi akatata kusama ku matuku yia, yi akafwa ; yi pakadi bamamukusula bakamuladika mu ngumbu a kulu. 38Yi bwalo bwakadi Lida yi Yopa pepe, beyi, pakakwombwabo ene, Pita udi koku, bakatuma babalumi babidi kudiyi kuya mulomba ene, Kwopixi kulwa kutudi. 39Yi Pita akakwombuluka yi akaya yinabo ; pakadi amafika, bakamubandisa mu ngumbu a kulu ; yi bungi bwa bakaxi ba bafu bakakwemana padiyi, badi mu kudila masonci, yi bakamwebesa binkutu yi bilamba biakakwenca Dôkasa pakadiyi yinabo. 40Mo Pita akabapaula bungi bwabo, akakuma binu paxi, yi akalomba ; akakulumuka lolo kwakadi mufu, yi akatôya ene, Tabita, bika. Yi akadipula meso anci, yi pakamonayi Pita, akaxikama. 41Yi akamulonga kianca kienci, yi akamwombulula ; yi pakadi amabikila bena babala yi bakaxi ba bafu, akamwebesa udi yi môyo. 42Yi losangu lwakakwombwebwa mu bungi bwa Yopa, yi bantu bangi bakakwetabuxila Fumu. 43Yi akasala matuku mangi mu Yopa, kwa Ximono, mweni a makoba.

Currently Selected:

MAKISA 9: Luna_NT

Highlight

Copy