ಮಾರ್ಕ್ 12

ದ್ರಾಕ್ಷಿಚ್ಯಾ ಮ್ಹಳ್ಯಾಚ್ಯಾ ಗುತ್ಕ್ಯಾಚಿ ಕಾನಿ

ಮಾತೆವ್ 21:33-46; ಲುಕ್ 20:9-19

1ಮಾನಾ ಜೆಜು ತೆಂಚೆಕ್ಡೆ ಕಾನಿಯಾಂಚ್ಯಾ ವೈನಾ ಬೊಲುಕ್ಲಾಗ್ಲೊ. ಎಕ್ ಮಾನ್ಸಾನ್ ದ್ರಾಕ್ಷಿಚೊ ಮ್ಹಳೊ ಕರುನ್, ಭೊತ್ಯಾನಿ ಕುಪ್ ಘಾಟ್ಲ್ಯಾನ್, ದ್ರಾಕ್ಷಿಚೊ ರೊಸ್ ಕಾಡುಕ್ ಘಾನ್ಯಾಚೊ ಖಡ್ಡೊ ಖಂಡ್ಲ್ಯಾನ್, ಅನಿ ಶೆತ್ ರಾಕುಕ್ ಮನುನ್ ಶೆತಾತ್ ಎಕ್ ಬರೊ ಮಾಳೊ ಭಾಂದ್ಲ್ಯಾನ್, ಮಾನಾ ತೆ ಶೆತ್ ರೈತಾಕ್ನಿ ಗುತ್ಕ್ಯಾನಿ ದಿಲ್ಯಾನ್ ಅನಿ ತೊ ಧುರ್‍ಲ್ಯಾ ದೆಸಾಕ್ ಗೆಲೊ. 2ದರಾಕ್ಷಿ ಗೊಳಾ ಕರ್‍ತಲಿ ಸುಗ್ಗಿಚಿ ದಿಸಾ ಯೆಲ್ಲ್ಯಾ ತನ್ನಾ; ಅಪ್ನಾಚೊ ವಾಟೊ ಮಾಗುನ್ ಹಾನುಕ್ ಮನುನ್ ತ್ಯಾ ಮಳ್ಯಾಚ್ಯಾ ಸಾವ್ಕಾರಾನ್ ಅಪ್ನಾಚ್ಯಾ ಎಕ್ ಸೆವಕಾಕ್ ಧಾಡುನ್ ದಿಲ್ಲ್ಯಾನ್. 3ಖರೆ ತ್ಯಾ ರೈತಾನಿ ತ್ಯಾ ಸೆವಕಾಕ್ ದರುನ್ ಬರೆ ಮಾರ್ ಘಾಟ್ಲ್ಯಾನಿ ಅನಿ ಖಾಲಿ ಹಾತಿನಿ ಫಾಟಿ ಧಾಡ್ಲ್ಯಾನಿ. 4ಮಾನಾ ತ್ಯಾ ಸಾವ್ಕಾರಾನ್ ಅನಿ ಎಕ್ ಸೆವಕಾಕ್ ಧಾಡುನ್ ದಿಲ್ಲ್ಯಾನ್ ತೆನಿ ತೆಕಾ ಧರುನ್ ತೆಚೆ ಟಕ್ಲೆ-ಟಕ್ಲೆ ಧರುನ್ ಮಾರ್‍ಲ್ಯಾನಿ ಅನಿ ತೆಚಿ ಮರ್ಯ್ಯಾದ್ ಕಾಡಲ್ಲ್ಯಾನಿ. 5ತಸೆ ಮನುನ್ ಸಾವ್ಕಾರಾನ್ ಅನಿ ಎಕ್ ಸೆವಕಾಕ್ ಧಾಡುನ್ ದಿಲ್ಯಾನ್ ತ್ಯಾ ಸೆವಕಾಕ್ ಧರುನ್ ಜಿವಾನಿಚ್ ಮಾರುನ್ ಟಾಕ್ಲ್ಯಾನಿ. ಅಸೆಚ್ ತೆನಿ ಥೊಡ್ಯಾಕ್ನಿ ಮಾರ್ ಘಾಟ್ಲ್ಯಾನಿ, ಅನಿ ಥೊಡ್ಯಾಕ್ನಿ ಜಿವಾನಿಚ್ ಮಾರ್‍ಲ್ಯಾನಿ.

6ಅತ್ತಾ ತ್ಯಾ ರೈತಾಂಚಾಕ್ಡೆ ಧಾಡುಕ್ ತ್ಯಾ ಸಾವ್ಕಾರಾಚೊ ಅಪುರ್‍ಬಾಯೆಚೊ ಲೆಕ್ ಎಕ್ಲೊಚ್ ಹುರಲ್ಲೊ, ರೈತಾ ಅಪ್ನಾಚ್ಯಾ ಲೆಕಾಕ್ ತರ್ಬಿ ಮಾನ್ ದಿತಿಲ್ ಮನುನ್ ಅಪ್ನಾಚ್ಯಾ ಲೆಕಾಕ್ ತೆಂಚೆಕ್ಡೆ ಧಾಡುನ್ ದಿಲ್ಯಾನ್. 7ಖರೆ ತ್ಯಾ ಗುತ್ಕೆ ಘೆಟಲ್ಲ್ಯಾನಿ ತೆಕಾ ಬಗುನ್,“ಹ್ಯೊ ಸಾವ್ಕಾರಾಚೊ ಲೆಕ್, ಹ್ಯಾ ಅಸ್ತಿಚೊ ವಾರಿಸ್ದಾರ್, ಹೆಕಾ ಜಿವಾನಿ ಮಾರುನ್ ಟಾಕುವಾ, ತನ್ನಾ ಹಿ ಆಸ್ತಿ ಅಮ್ಕಾಚ್ ಹೊತಾ” ಮನುನ್ ಬೊಲುನ್ ಘೆವ್ನ್ 8ತ್ಯಾ ಸಾವ್ಕಾರಾಚ್ಯಾ ಲೆಕಾಕ್ ಧರುನ್ ಜಿವಾನಿ ಮಾರುನ್ ತೆಚೆ ಮಡೆ ಮಳ್ಯಾಚ್ಯಾ ಭಾಯ್ರ್ ಟಾಕ್ಲ್ಯಾನಿ.

9“ಅಸೆಹೊಲ್ಲ್ಯಾತನ್ನಾ, ತೊ ದರಾಕ್ಷಿಚ್ಯಾ ಮಳ್ಯಾಚೊ ಸಾವ್ಕಾರ್ ಯೆವ್ನ್ ಕಾಯ್ ಕರಿಲ್ ಮನುನ್ ತುಮಿ ಮನ್ತ್ಯಾಶಿ?” ಮನುನ್ ಇಚಾರ್‍ಲ್ಯಾನ್, ತೊ ಸಾವ್ಕಾರ್ ಯೆತಾ ಅನಿ ತ್ಯಾ ಮಾನ್ಸಾಕ್ನಿ ಜಿವಾನಿ ಮಾರುನ್ ತೊ ಮಳೊ ದುಸ್ರ್ಯಾಕ್ನಿ ಗುತ್ಕ್ಯಾಕ್ ದಿತಾ. 10ತುಮಿ ಪವಿತ್ರ್ ಪುಸ್ತಕಾತ್,

“ಘರ್ ಭಾಂದ್ತಲ್ಯಾನಿ ನಕ್ಕೊ ಮನುನ್

ಟಾಕಲ್ಲೊ ಗುಂಡೊಚ್ ಮಹತ್ವಾಚೊ ಗುಂಡೊ ಹೊಲೊ.

11ಹೆ ದೆವಾನ್ ಕರಲ್ಲೆ ಕಾಮ್, ಅಮ್ಕಾ ಹೆ

ಅಜಾಪ್ ಸರ್ಕೆ ದಿಸ್ತಾ.#12:11 ಕಿ 118.22-23

ಮನುನ್ ವಾಚ್ವುಕ್‍ನ್ಯಾಶಿ ಕಾಯ್?” ಮಟ್ಲ್ಯಾನ್.

12ಜೆಜು ಹಿ ಕಾನಿ ಸಾಂಗ್ತಾನಾ ಥೈ ಹೊತ್ತೆ ಜುದೆವಾಂಚ್ಯಾ ವಡಿಲಾನಿ ಹಿ ಕಾನಿ ತೊ ಅಪ್ನಾಚ್ಯಾಚ್ ವಿರೊದ್ ಸಾಂಗುಕ್ ಲಾಗ್ಲಾ ಮನುನ್ ಯವ್ಜುನ್ ತೆಕಾ ಧರುಕ್ ಕಸ್ರತ್ ಕರ್‍ಲ್ಯಾನಿ, ಖರೆ ಥೈ ಹೊತ್ತ್ಯಾ ಲೊಕಾಂಚ್ಯಾ ತಾಂಡ್ಯಾಕ್ ಭಿಂವ್ನ್, ತೆಕಾ ಧರಿನಸ್ತಾನಾ ತೆಕಾ ಸೊಡುನ್ ಗೆಲ್ಯಾನಿ.

ತೆರ್‍ಗಿ ಭರ್‍ತಲ್ಯಾ ವಿಶಯಾತ್ ಪ್ರಸ್ನೊ

ಮಾತೆವ್ 22:15-22; ಲುಕ್ 20:20-26

13ಜೆಜುಕ್ ತೆಚ್ಯಾಚ್ ಗೊಸ್ಟಿಯಾತ್ನಿ ಗೊಂದ್ಳುನ್ ಘಾಲುವಾ ಮನ್ತಲ್ಯಾ ಉದ್ದೆಶಾನ್ ಥೊಡಿ ಫಾರಿಜೆವಾ ಅನಿ ಥೊಡಿ ಹೆರೊದಾಚ್ಯಾ ಪಕ್ಷಾಚಿ ಲೊಕಾ ಜೆಜುಕ್ಡೆ ಯೆಲಿ. 14ಅನಿ “ಗುರುಜಿ, ತಿಯಾ ಲೊಕಾ ಕಾಯ್ ಯೌವಜ್ತ್ಯಾತ್ ಮನುನ್ ಪರ್ವಾ ಕರಿನಸ್ತಾನಾ ಖರೆ ಅಸಲ್ಲೆ ಸಾಂಗ್ತೆ, ಅನಿ ಕೊನಾಚೆ ತೊಂಡ್ ಬಗಿನಸ್ತಾನಾ ಬೊಲ್ತೆ, ತಿಯಾ ಮಾನ್ಸಾ ಸಾಟ್ನಿ ದೆವಾಚಿ ಯವ್ಜನ್ ಕಾಯ್ ಮನುನ್ ಅಮ್ಕಾ ಸಾಂಗ್, ಅಮಿ ರೊಮಾಚ್ಯಾ ಚಕ್ರವರ್ತಿಕ್ ತೆರ್‍ಗಿ ದಿತಲೆ ಅಮ್ಚ್ಯಾ ಧರ್ಮಾಚ್ಯಾ ಖಾಯ್ದ್ಯಾ ಪರ್ಕಾರ್ ಸಮಾ ಹಾಯ್ ಕಾಯ್, ನಾ?” ಮನುನ್ ತೆಕಾ ಇಚಾರ್‍ಲ್ಯಾನಿ.

15ಜೆಜುನ್ ತೆಂಚೊ ಘಾತ್ ಕಳ್ವುನ್ ಘೆಟ್ಲ್ಯಾನ್ ಅನಿ “ತುಮಿ ಮಾಕಾಚ್ ಗೊಂದ್ಳುನ್ ಘಾಲುವಾ ಮನುನ್ ಕಶ್ಯಾಕ್ ಯವ್ಜುಕ್ ಲಾಗ್ಲ್ಯಾಸಿ? ಎಕ್ ಚಾಂದಿಚಿ ಪೈಸ್ಯಾಚಿ ಗಾಲಿ ಮಾಜ್ಯಾಕ್ಡೆ ದಿವಾ ಬಗುವಾ?” ಮಟ್ಲ್ಯಾನ್.

16ತನ್ನಾ ತೆನಿ ಎಕ್ ಚಾಂದಿಚಿ ಪಯ್ಸ್ಯಾಚಿ ಗಾಲಿ ತೆಕಾ ದಿಲ್ಯಾನಿ, ತನ್ನಾ ಜೆಜುನ್ “ಹ್ಯಾ ಚಾಂದಿಚ್ಯಾ ಪಯ್ಸ್ಯಾಚ್ಯಾ ವರ್‍ತಿ ಕೊನಾಚೆ ತೊಂಡ್ ಹಾಯ್ ಅನಿ ಕೊನಾಚೆ ನಾವ್ ಲಿವಲ್ಲೆ ಹಾಯ್?” ಮನುನ್ ತೆಂಕಾ ಇಚಾರ್‍ಲ್ಯಾನ್. ತೆಕಾ ತೆನಿ ಚಕ್ರವರ್ತಿಚೆ ಮಟ್ಲ್ಯಾನಿ.

17ತನ್ನಾ ಜೆಜುನ್ ತೆಂಕಾ “ಚಕ್ರವರ್ತಿಚೆ ಚಕ್ರವರ್ತಿಕ್ ದಿವಾ ಅನಿ ದೆವಾಚೆ ದೆವಾಕ್ ದಿವಾ” ಮಟ್ಲ್ಯಾನ್. ತೆನಿ ಜೆಜುಚಿ ಗೊಸ್ಟ್ ಆಯ್ಕುನ್ ಅಜಾಪ್ ಹೊಲ್ಯಾನಿ.

ಮರುನ್ ಅನಿ ಝಿತ್ತೆ ಹೊತಲ್ಯಾ ವಿಶಯಾತ್ ಪ್ರಸ್ನೊ

ಮಾತೆವ್ 22:23-33; ಲುಕ್ 20:27-40

18ಮರಲ್ಲೆ ಅನಿ ಪರ್ತುನ್ ಝಿತ್ತೆ ಹೊತಲೆ ಸಾಧ್ಯ್ ನಾ ಮನುನ್ ಯವಜ್ತಲೆ ಸಾದುಸೆವ್#12:18 "ಸಾದುಸೆವ್" ಮಟ್ಲ್ಯಾರ್ ಜುದೆವ್ ಲೊಕಾಂಚೊ ಎಕ್ ರಾಜಕಿಚೊ ಪಕ್ಷ್, ಪವಿತ್ರ್ ಪುಸ್ತಕಾಚಿ ಪಯ್ಲಿಚಿ ಪಾಚ್ ಪುಸ್ತಕಾಕ್ನಿ ಎವ್ಡೆಚ್ ವಿಶ್ವಾಸ್ ಕರಿತ್, ಮರುನ್ ಪರ್ತುನ್ ಝಿತ್ತೊ ಹೊತಲ್ಯಾಕ್ ವಿಶ್ವಾಸ್ ಕರಿನಸಿತ್ ಜೆಜುಕ್ಡೆ ಯೆಲೆ ಅನಿ 19“ಗುರುಜಿ,ಎಕ್ಲೊ ಮಾನುಸ್ ಪೊರಾ ನಸ್ತಾನಾ ಮರ್ಲ್ಯಾರ್ ತೆಚ್ಯಾ ಧಾಕ್ಲ್ಯಾ ಭಾವಾನ್ ತ್ಯಾ ಬಾಯ್ಕೊಮನ್ಸಿಕ್ಡೆ ನಗಿನ್ ಕರುನ್ ಘೆವ್ಚೆ, ಅಸೆ ತೆಂಕಾ ಪೊರಾ ಹೊವ್ನ್ ತೆಚ್ಯಾ ಮೊಟ್ಯಾ ಭಾವಾಕ್ ಪಿಳ್ಗಿ ಕರುನ್ ದಿವ್ಚಿ ಮನುನ್ ಮೊಯ್ಜೆನ್ ಅಪ್ಲ್ಯಾ ಖಾಯ್ದ್ಯಾತ್ನಿ ಲಿವುನ್ ಥವ್ಲ್ಯಾನಾಯ್; 20ಎಗ್ದಾ ಸತ್‍ ಜಾನಾ ಭಾವಾ ಹೊತ್ತಿ ಅನಿ ಥೊರ್‍ಲೊ ಭಾವ್ ನಗಿನ್ ಹೊವ್ನ್, ಪೊರಾನಸ್ತಾನಾ ಮರ್ಲೊ. 21ತನ್ನಾ ದೊನ್ವೆಚೊ ತಿಚೆಕ್ಡೆ ನಗಿನ್ ಹೊಲೊ ಅನಿ ತೊಬಿ ಪೊರಾ ನಸ್ತಾನಾ ಮರ್ಲೊ ಅನಿ ತಿನ್ವೆಚ್ಯಾಕ್ ಬಿ ತಸೆಚ್ ಹೊಲೆ”. 22ಅಶೆ ಎಕ್ಲ್ಯಾಚ್ಯಾ ಫಾಟ್ನಾ ಅನಿ ಎಕ್ಲೊ ಸತ್ ಜಾನಾ ಭಾವಾಬಿ ಪೊರಾ ನಸ್ತಾನಾ ಮರ್ಲಿ, ಮಾನಾ ತೆಂಚ್ಯಾ ಫಾಟ್ನಾ ತಿ ಬಾಯ್ಕೊಮನುಸ್ಬಿ ಮರ್ಲಿ;

23ತಸೆ ಹೊಲ್ಯಾರ್ ಅತ್ತಾ ಪರ್ತುನ್ ಝಿತ್ತೆ ಹೊತಲ್ಯಾ ದಿಸಿ, ತಿ ಬಾಯ್ಕೊ ಮಾನುಸ್ ತ್ಯಾ ಸತ್ ಜಾನಾ ಭಾವಾತ್ನಿ ಕೊನಾಚಿ ಬಾಯ್ಕೊ ಹೊತಾ? ಮನುನ್ ಇಚಾರ್‍ಲ್ಯಾನಿ.

24ತನ್ನಾ ಜೆಜುನ್ ತೆಂಕಾ “ತುಮಿ ಕವ್ಡೆ ಚುಕುನ್ ಪಡ್ಲ್ಯಾಸಿ? ತುಮ್ಕಾ ಪವಿತ್ರ್ ಪುಸ್ತಕಾಚಿ ಉಲ್ಲಿಬಿ ಸಮ್ಜನ್‍ ನಾ, ಅನಿ ದೆವಾಚ್ಯಾ ತಾಕ್ತಿಚ್ಯಾ ವಿಶಯಾತ್ ತುಮ್ಕಾ ಗೊತ್ತುಚ್ ನಾ. 25ಮರ್‍ನಾತ್ನಾ ಝಿತ್ತೆ ಹೊಲ್ಲ್ಯಾ ತನ್ನಾ ಸಗ್ಳೆ ಜನಾ ಸರ್‍ಗಾತ್ ದೆವಾಚ್ಯಾದುತಾ ಬಾಸೆನ್ ರಾತ್ಯಾತ್, ನಗಿನ್ ಹೊಯ್ನಾತ್.”

26ಮರಲ್ಲೆ ಪರ್ತುನ್ ಝಿತ್ತೆ ಹೊತಲ್ಯಾ ವಿಶಯಾತ್ ಮೊಯ್ಜೆಚ್ಯಾ ಪುಸ್ತಕಾತ್ ತ್ಯಾ ಜಳ್ತಲ್ಯಾ ಝಿಳಿಚ್ಯಾ ವಿಶಯಾತ್ ಲಿವಲ್ಲೆ ತುಮಿ ವಾಚುಕ್ನ್ಯಾಸಿ ಕಾಯ್? ಥೈ ದೆವ್ ಮೊಯ್ಜೆಕ್ “ಮಿಯಾ ಅಬ್ರಾಹಾಮಾಚೊ ದೆವ್, ಇಸಾಕಾಚೊ ದೆವ್ ಅನಿ ಜಾಕೊಬಾಚೊ ದೆವ್” ಮನ್ತಾ. 27“ದೆವ್ ಮಿಯಾ ಅಬ್ರಾಹಾಮ್, ಇಸಾಕ್, ಜಾಕೊಬಾಚೊ ದೆವ್ ಮನುನ್ ಸಾಂಗ್ತಾ ಜಾಲ್ಯಾರ್, ತೆನಿ ಝಿತ್ತೆ ಹಾತ್ ಮನುನ್ ಅರ್ತ್‍, ತುಮಿ ಲೈ ಚುಕ್ ಯೌಜುನ್‍ಘೆವ್ನ್ ಹಾಸಿ” ಮಟ್ಲ್ಯಾನ್.

ಸಗ್ಳ್ಯಾನ್ ಮೊಟೊ ಉಪಾದೆಸ್

ಮಾತೆವ್ 22:34-40; ಲುಕ್ 10:25-28

28ಖಾಯ್ದೆ ಸಿಕ್ವುತಲ್ಯಾಂಚ್ಯಾ ಮದ್ಲ್ಯಾ ಎಕ್ ಮಾನ್ಸಾನ್ ಜೆಜು ಸಾದುಸೆವಾಕ್ನಿ ಸಮಾ ಜಬಾಬ್ ದಿತಲೆ ಅಯ್ಕ್ಲ್ಯಾನ್, ಅನಿ ಜೆಜುಕ್ಡೆ ಯೆವ್ನ್ “ಸಗ್ಳ್ಯಾ ಉಪಾದೆಸಾನ್ಕಿ ಮೊಟೊ ಉಪಾದೆಸ್ ಖಲೊ?” ಮನುನ್ ಇಚಾರ್‍ಲ್ಯಾನ್.

29ತೆಕಾ ಜೆಜುನ್ ಅಸೆ ಜಬಾಬ್ ದಿಲ್ಯಾನ್ “ಇಸ್ರಾಯೆಲಾಚ್ಯಾ ಲೊಕಾನು ಆಯ್ಕಾ, ಹೆ ಲೈ ಮಹತ್ವಾಚೆ ವಿಶಯ್” ಸಗ್ಳ್ಯಾ ವರ್‍ತಿ ಅದಿಕಾರ್ ಅಸಲ್ಲೊ ಅಮ್ಚೊ ದೆವ್, ತೊ ಎಕ್ಲೊಚ್ ಧನಿ. 30ತುಜ್ಯಾ ಪುರಾ ಕಾಳ್ಜಾನ್, ತುಜ್ಯಾ ಪುರಾ ಆತ್ಮ್ಯಾನ್, ತುಜ್ಯಾ ಪುರಾ ಮನಾನ್, ಅನಿ ತುಜ್ಯಾ ಪುರಾ ಬಳಾನ್. ಸರ್ವೆಸ್ವರಾ ತುಜ್ಯಾ ಎಕ್ಲ್ಯಾಚ್ ದೆವಾಚೊ ಪ್ರೆಮ್ ಕರ್. 31ಅನಿ ದೊನ್ವೆಚೊ ಮಹತ್ವಾಚೊ ಖಾಯ್ದೊ ಮಟ್ಲ್ಯಾರ್ “ತಿಯಾ ತುಜೊಚ್ ಕಸೊ ಪ್ರೆಮ್ ಕರ್‍ತೆ, ತಸೆಚ್ ದುಸ್ರ್ಯಾಂಚೊ ಪ್ರೆಮ್ ಕರುಚೊ. ಹ್ಯಾ ದೊನಿಚ್ಯಾನ್ಕಿ ಮೊಟೊ ಖಾಯ್ದೊ ಅನಿ ಖಲೊಬಿ ನಾ,” ಮನುನ್ ಉತ್ತರ್ ದಿಲ್ಯಾನ್.

32ತನ್ನಾ ತೊ ಖಾಯ್ದೆ ಸಿಕ್ವುತಲೊ ಜೆಜುಕ್ “ಗುರುಜಿ, ಬರಬ್ಬರ್ ಸಾಂಗ್ಲೆ ತಿಯಾ, ದೆವ್ ಎಕ್ಲೊಚ್, ತೆಚ್ಯಾ ಶಿವಾಯ್ ಅನಿ ದುಸ್ರೊ ದೆವ್ ನಾ. ಹೆ ಖರೆ ಹಾಯ್, 33ಅನಿ ಮಾನ್ಸಾನ್ ಅಪ್ನಾಚ್ಯಾ ಪುರಾ ಕಾಳ್ಜಾನ್, ಪುರಾ ಮನಾನ್, ಪುರಾ ತಾಕ್ತಿನ್ ದೆವಾಚೊ ಪ್ರೆಮ್ ಕರುಚೊ ಅನಿ ಅಪ್ನಾಚೊ ಕರಲ್ಲ್ಯಾ ಬಾಸೆನ್ ದುಸ್ರ್ಯಾಂಚೊಬಿ ಪ್ರೆಮ್ ಕರುಚೊ, ಹಿ ದೊನ್ ಉಪಾದೆಸಾ ಲೈ ಮಹತ್ವಾಚಿ, ಹೆ ಅಮಿ ದೆವಾಕ್ ದಿತಲ್ಯಾ ಕೌಡ್ಯಾಕಿ ಜನಾವರಾಂಚ್ಯಾ ಬಲಿಯಾಂಚ್ಯಾನ್ಕಿ ಅನಿ ದುಸ್ರ್ಯಾ ಕಾನಿಕಾಂಚ್ಯಾನ್ಕಿ ಮೊಟೆ.” ಮಟ್ಲ್ಯಾನ್.

34ತೆನಿ ಎವ್ಡ್ಯಾ ಬರ್‍ಯಾ ಬುದ್ವಂತ್ಕಿನ್ ಉತ್ತರ್ ದಿಲ್ಲೆ ಆಯ್ಕುನ್ ಜೆಜುನ್ ತೆಕಾ “ತಿಯಾ ದೆವಾಚ್ಯಾ ರಾಜಾಕ್ನಾ ಲೈ ಧುರ್ ನಾಸ್” ಮಟ್ಲ್ಯಾನ್. ಮಾನಾ ಕೊನಾಕ್ಬಿ ಜೆಜುಕ್ ಸವಾಲ್ ಕರುಕ್ ಧಯ್ರೊ ಹೊವ್ಕ್ ನಾ.

ಮೆಸ್ಸಿಯಾಚ್ಯಾ ವಿಶಯಾತ್ ಪ್ರಶ್ನೊ

ಮಾತೆವ್ 22:41-46; ಲುಕ್ 20:41-44

35ಜೆಜುನ್ ಗುಡಿತ್ ಶಿಕ್ವುನ್ಗೆತ್ ಹ್ಯೊ ಪ್ರಸ್ನೊ ಇಚಾರ್‍ಲ್ಯಾನ್ “ಖಾಯ್ದೆ ಸಿಕ್ವುತಲೆ ಕ್ರಿಸ್ತ್ ದಾವಿದಾಚೊ ಲೆಕ್ ಮನುನ್ ಸಾಂಗ್ತ್ಟ್ಯಾತ್. ತೆ ಕಶೆ ಹೊತಾ?” 36ಕಶ್ಯಾಕ್ ಮಟ್ಲ್ಯಾರ್ ಪವಿತ್ರ್ ಆತ್ಮೊ ದಾವಿದಾಚ್ಯಾ ಮುಕಾಂತ್ರ್ ಮಟ್ಲ್ಯಾನಾಯ್,

“ಸರ್ವೆಸ್ವರಾನ್ ಮಾಜ್ಯಾ ಧನಿಯಾಕ್,

ತುಜ್ಯಾ ದುಸ್ಮನಾಕ್ ತುಜ್ಯಾ

ಪಾಂಯಾಂಚ್ಯಾ ಮುಳಾತ್ ಪಡಿಸರ್ಕೆ ಕರಿ ಪತರ್,

ತಿಯಾ ಮಾಜ್ಯಾ ಉಜ್ವ್ಯಾಕ್ಡೆ ಬಸುನ್ ರ್‍ಹಾ” ಮನುನ್ ಸಾಂಗ್ಲ್ಯಾನ್.

37“ಅಶೆ ಸ್ವತಾ ದಾವಿದುಚ್ ಮೆಸ್ಸಿಯಾಕ್ ಧನಿ ಮನುನ್ ಬಲ್ವುತಾ ತರ್, ಮೆಸ್ಸಿಯಾ ದಾವಿದಾಚೊ ಲೆಕ್ ಕಸೊ ಹೊವ್ಕ್ ಹೊತಾ?” ಮಟ್ಲ್ಯಾನ್.

ಶಾಸ್ತ್ರ್ಯಾಂಚ್ಯಾ ಬದಲ್ ಉಸಾರ್ಕಿ

ಮಾತೆವ್ 23:1-36; ಲುಕ್ 20:45-47

ಥೈ ಲೈ ಲೊಕಾ ಹೊತ್ತಿ ತಿ ಲೊಕಾ ಜೆಜು ಸಾಂಗ್ತಲೆ ಕುಶಿನ್ ಅಯ್ಕುಲಾಗಲ್ಲಿ. 38ಲೊಕಾಕ್ನಿ ಶಿಕ್ವುತಾನಾ ಜೆಜುನ್ “ಖಾಯ್ದೆ ಸಿಕ್ವುತಲ್ಯಾಂಚ್ಯಾ ವಿಶಯಾತ್ ಉಶಾರ್ಕಿನ್ ರ್‍ಹಾವಾ,ಪಾಂಯಾಂಚ್ಯಾ ಸಗೊಳ್ ಲಾಂಬ್-ಲಾಂಬ್ ಅಂಗಿಯಾ ನೆಸುನ್ ಘೆವ್ನ್ ಬಾಜಾರಾತ್ ಫಿರ್ತಾನಾ ಸಗ್ಳ್ಯಾನಿಕ್ನಾ ಸಲಾಮ್ ಕರುನ್ ಘೆವ್ಕ್ ತೆಂಕಾ ಲೈ ಕುಶಿ. 39ತೆನಿ ಸಿನಾಗೊಗಾತ್ನಿ ಗೆಲ್ಲ್ಯಾ ತನ್ನಾ ಅನಿ ಸನಾಚ್ಯಾ ಪಂಗ್ತಿಯಾತ್ನಿ ಬಸುಕ್ ಬರೆ-ಬರೆ ಜಾಗೆ ಹುಡ್ಕುನ್ ಘೆತ್ಯಾತ್. 40ಘೊವ್ ಮರಲ್ಲ್ಯಾ ಬಾಯ್ಕಾಮನ್ಸಾಂಚೊ ಫಾಯ್ದೊ ಕಾಡುನ್ ಘೆವ್ನ್ ತೆಂಚಿ ಘರಾ ಲುಟ್ತ್ಯಾತ್ ಅನಿ ಲಾಂಬ್-ಲಾಂಬ್ ಮಾಗ್ನಿಯಾ ಕರ್‍ತಾತ್, ಹೆಂಕಾ ಫಿಡೆ ಕಟೊರ್ ಶಿಕ್ಷಾ ರಾಕುನ್ ಹಾಯ್” ಮಟ್ಲ್ಯಾನ್.

ಘೊವ್ ಮರಲ್ಲ್ಯಾ ಗರಿಬ್ ಬಾಯ್ಕೊಮನ್ಸಿಚಿ ಕಾನಿಕ್

ಲುಕ್ 2:1-4

41ಜೆಜು ಗುಡಿತ್ ಕಾನ್ಕಿಚ್ಯಾ ಡಬ್ಬ್ಯಾಚ್ಯಾ ಜಗ್ಗೊಳ್ ಬಸುನ್ ಬಗುನ್ಗೆತ್ ಹೊತ್ತ್ಯಾ ತನ್ನಾ, ತ್ಯಾ ಡಬ್ಬ್ಯಾತ್ ಲೊಕಾ ಪೈಸೆ ಘಾಲಿತ್, ಸುಮಾರ್ ಸಾವ್ಕಾರ್ ಲೊಕಾ ಲೈ-ಲೈ ಪೈಸೆ ಘಾಲಿತ್, 42ತವ್ಡ್ಯಾಕ್ ಮಟ್ಲ್ಯಾರ್ ಎಕ್ ಗರಿಬ್ ಘೊವ್ ಮರಲ್ಲಿ ಬಾಯ್ಕೊಮನುಸ್ ಯೆವ್ನ್ ತಾಂಬ್ಯಾಚ್ಯಾ ದೊನ್ ಬಾರಿಕ್ಲ್ಯಾ ಗಾಲಿಯಾ ತ್ಯಾ ಕಾನಿಕಾಚ್ಯಾ ಡಬ್ಬ್ಯಾತ್ ಘಾಟ್ಲಿನ್. ತೆಚಿ ಕಿಮ್ಮತ್ ಎಕ್ ಪೈಸೊ.

43ತನ್ನಾ ಜೆಜುನ್ ಅಪ್ನಾಚ್ಯಾ ಶಿಸಾಕ್ನಿ ಜಗ್ಗೊಳ್ ಬಲ್ವುನ್ “ಬಗಾ, ಹ್ಯಾ ಕಾನಿಕಾಚ್ಯಾ ಡಬ್ಬ್ಯಾತ್ ಕಾನಿಕ್ ಘಾಟಲ್ಲ್ಯಾ ಎವ್ಡ್ಯಾ ಸಗ್ಳ್ಯಾ ಲೊಕಾಂಚಾನ್ಕಿ ಜಾಸ್ತಿ ಹ್ಯಾ ಗರಿಬ್ ಬಾಯ್ಕೊಮನ್ಸಿನ್ ಘಾಟ್ಲಿನಾಯ್, 44ಕಶ್ಯಾಕ್ ಮಟ್ಲ್ಯಾರ್ ಸಗ್ಳ್ಯಾನಿ ಅಪ್ನಾಚ್ಯಾ ಸಾವ್ಕಾರ್ಕಿತ್ ಫಿರೆಹೊವ್ನ್ ಹುರಲ್ಲೆ ಉಲ್ಲೆಸೆ ಘಾಟ್ಲ್ಯಾನಿ, ಖರೆ ಹ್ಯಾ ಗರಿಬ್ ಬಾಯ್ಕೊಮನ್ಸಿನ್ ಅಪ್ನಾಕ್ಡೆ ಅಪ್ನಾಚ್ಯಾ ಜಿವನಾ ಸಾಟ್ನಿ ಮನುನ್ ಹೊತ್ತೆ ದೊನುಚ್ ದೊನ್ ಪೈಸೆಬಿ ಅಪ್ನಾಕ್ ಥವ್ನ್ ಘೆಯ್ನಸ್ತಾನಾ ಘಾಟ್ಲಿನ್.” ಮಟ್ಲ್ಯಾನ್.

Currently Selected:

ಮಾರ್ಕ್ 12: NTSii24

Highlight

Copy