प्रेरितहोन 1

पहचान

1प्रिय थियुफिलुस, मेने पयली किताब वे सब बात का बारे मे लिखी जो यीशु सुरवात से करतो अरु सिखातो र्‍हियो. 2उ दिन तक जब तक उन प्रेरितहोन खे जेने उनके चुन्यो थो पवित्र आत्मा का वजेसे आज्ञा दि, उपर उठायो नी गयो. 3ओने दुख उठाना का बाद भोत सा पक्को प्रमाणहोन से अपना आप खे उनने जिन्दो दिखायो, अरु चालीस दिन तक उ उनने दिखायो देता र्‍हियो, अरु परमेश्वर का राज्य की बात करतो र्‍हियो. 4अरु उनसे मीलिखे उनने आज्ञा दी, “यरुशलेम का नी छोडनु, परम बाप की वा प्रतीज्ञा खे पूरो होन की रस्ता देखतो र्‍हियो, जेकी चर्चा तुम मरा से सुन चुक्या हइ. 5क्युकि यहून्ना ने ते पानी मे बपतिस्मा दियो हइ पन थोडा दिन का बाद तुम पवित्र आत्मा से बपतिस्मा पाये.”

यीशु को स्वर्ग रोहन

6आखरी उनने इखठ्ठा हुइखे ओकासे बोल्यो, “हे प्रभु का तू यो टेम इस्राएल को राज्य फेरी दिये?”

7ओने उनसे बोल्यो, उ टेमहोन या कालहोन खे जाननो, जेका बाप ने अपना ही अधिकार मे रख्यो हइ, तुम्हारो काम नी. 8पन जब पवित्र आत्मा तुम पर आये तब तुम सामर्थ्य पाये. अरु यरुशलेम अरु पुरा यहूदीया अरु सामरिया मे अरु पृथ्वी का आखरी तक मरा गवा हुये. 9यो बोलीखे उ उनका देखते उपर उठै लियो गयो, अरु वु बद्दल ने ओखे उनकी आखहोन से लुकै लियो.

10ओका जाते टेम जब उ बद्दल का तरफ ताकी र्‍हो थो, ते देखनु दो अदमी सफेद कपडा पेन्या हुया उनका पास अय खडो हुया. 11अरु उनसे बोल्यो, “हे गलीली इन्सानहोन, तुम क्यु खडा बद्दल का तरफ देखी रा हइ? योइ यीशु जो तुम्हारा पास से स्वर्ग पर उठै लियो गयो हइ, जो रीति से तुम ने ओखे स्वर्ग, जाता देख्यो हइ वैइ रीति से उ फिर आये.”

मत्तियाह खे यहूदा को पद मीलनो

12तब वे जैतुन नाम की टेकडी पर से जो यरुशलेम का पास एक अराम का दिन का दूरी पर हइ यरुशलेम खे लौट्या. 13जब वे वहा पहुच्या ते वा अटारी पर गया, जहा पतरस अरु यहून्ना अरु याकूब अरु अन्द्रियास अरु फिलिप्पुस अरु थोमा अरु बरतुल्मै अरु मत्ती अरु हलफइस को बेटो याकूब अरु शमौन जोलोतेस अरु याकूब को बेटो यहूदा र्‍हेतो थो. 14ये सब बयहोन अरु यीशु की माय मरियम अरु ओका भैइहोन का साथ एक चित हुइ खे प्रार्थना मे लग्या र्‍हिया.

15अरु एय दिनहोन मे पतरस भैइ भैइन का बिच मे जो एक सौ बीस इन्सान का नजिक पास था, खडा हुइ बोलन लग्यो. 16हे भैइहोन जरुरी थो कि पवित्रशास्त्र को उ लेख पूरो हुये जो पवित्र आत्मा मे दाउद का मुडा से यहूदा का बारे मे जो यीशु खे पकडन आलो को अगुवा था, पैयले से बोल्यो थो. #भजन संहिता 41:9 17क्युकि उ तो हम मे गिन्यो गयो, अरु या सेवा मे हिस्सेदार हुयो.

18ओने अधर्म की कमइ से एक खेत मोल लियो, अरु माथा का बल गिर्यो अरु ओको पेट फटी गयो अरु ओकी सब आतडीहोन नीकली पडी. 19अरु या बात खे यरुशलेम का सब र्‍हेनआला जानी गया, ह्या तक कि उ खेत को नाम उनकी भाषा मे हकलदमा मंनजे खुन को खेत पडी गयो.

20क्युकी भजन संहिता मे लिख्यो हइ,

ओको घर उजडी जाये अरु ओमे कोय नी बस्ये

अरु ओको पद कोय दूसरो लि ले. 21येकालिये जोत्ता दिन तक प्रभु यीशु हमारा साथ आता जाता र्‍हिये मंनजे यहून्ना को बपतिस्मा से लिखे ओका हमारा पास से उठायो जाना तक जो दुन्या बराबर हमारा साथ र्‍हिये. 22यहून्ना अच्छो हइ कि उनमे से एक इन्सान हमारा साथ यीशु खे जिन्दो उठन को गवा हुइ जाये.

23तब उनने दोय खे खडा कर्या, एक यूसुफ खे जो बरसब्बास बोलस हइ जोको उपनाम यूसतुस हइ, दूसरो मत्तियाह के. 24अरु या प्रार्थना करी “हे प्रभु, तु जो सब को मन जानस हइ, यो प्रकट कर कि ये दो मे से तोने को खे चुन्यो हइ. 25कि उ या सेवक अरु प्रेरिताइ को पद ले जेखे यहूदा छोडीखे अपना जगा खे चली गयो.” 26तब उनने उनका बारे मे चिट्ठिहोन डालीखे अरु चिट्ठी मत्तियाह का नाम पर नीकली. आखरी उ उन ग्यारा प्रेरितहोन का साथ गिन्यो गयो.

Currently Selected:

प्रेरितहोन 1: NTGnn24

Highlight

Copy