UBWANDILO 38

Yuda na Tamara

1Pa kabalilo kala, Yuda alinkusokako ku bamyabo alinkwikilila kwitongo alinkwakuyenga pabunipi nu mundu yumo ugwa kikolo kya Aaulamu, uyu ali yo Hira ingamu. 2Kulakula ko Yuda alinkumbona undindwana umwana gwa Shuwa ugwakikolo kya baKanani, yo alinkumwega alinkuya nkasi gwake. 3Umwene unkikulu yula alinkuya nikifuba, popapo alinkupapa umwana undumyana, alinkumpa ingamu ya Eri. 4Unkikulu yula alinkuya nikifuba kangi, alinkupapa umwana undumyana, alinkumpa ingamu ya Onani. 5Alinkupapa kangi umwana undumyana bo bali pa buyo bwa Kezibi, alinkumpa ingamu ya Shela.

6Popapo Yuda alinkumwegela yunkikulu umwanake ugwakipanda Eri; unkikulu uyu ingamu yake ali yo Tamara. 7Loli Eri ali nniongafu nkyeni mu Ntwa, popapo Untwa alinkwenda nukungoga. 8Yuda alinkumbula umwanake Onani alinkuti, “Ega unkasi gwa nkulugo ukufwana nulwiho lwitu ulu lukuti ugwamyabo yo amwegege, ko kuti ulwendelesye uluyungu lwa nkulugo.” 9Loli Onani asimenye itolo ukuti abana batisa kuya bake; bunobuno bo aganile nu nkikulu, alinkonela pasi imbapo, ko kuti aleke ukulwendelesya uluyungu lwa nkulu gwake. 10Isi asibombile Onani silinkusita nukunkyela Untwa, popapo Untwa alinkungoga. 11Bunobuno Yuda alinkumbula Tamara unkamwana gwake alinkuti, “Uyege mfwilwe bunobuno, ubukege ukitugalege pa nyumba ya guso abuye umwanangu Shela akule,” ayobaga bunobuno papo atilaga ukuti yope isakufwa bo ba bakulu bake. Popapo Tamara alinkugomokela ku nyumba ya gwise ko alinkwakwitugala.

12Lelo bo gakindilepo amasiku gamo, popapo unkasi gwa Yuda umwana gwa Shuwa alinkwenda nukufwa. Panyuma bo kamalike akabalilo kakundilila unkasi, popapo Yuda nu mmanyani gwake Hira ugwakikolo kya Adulama, balinkufyuka ukubuka nkaya ka Timuna, kuko ababombi bake basisenyaga ing'osi syake ulusyoya. 13Lelo bo Tamara abuligwe ukuti, “Unko gwako unyambala ikufyuka ikubuka nkaya ka Timuna pakusisenya ing'osi syake ulusyoya;” 14popapo alinkufula amakiba gake aga bufwilwe, alinkwikinga umwenda ku maso, go alinkwiniembetelela nago. Alinkwitugala pa kipata kya kaya ka Enayimi, pa nsebo ugu gukulabila nkaya ka Timuna. Namanga Tamara asimenye ukuti Shela akulile, loli bakalimbikile Tamara kumyake ukuti ayege nkasi gwake. 15Umwene Yuda bo ambwene Tamara alinkwinogona ukuti nkikulu yumo undogwe, papo alikingile umwenda kumaso. 16Popapo Yuda alinkufyuka apa Tamara alitugele pa mbali pa nsebo, alinkuyoba nagwe alinkuti, “Isaga kuno tubombe, isya bulogwe,” namanga akalimmenye ukuti yo nkasi gwa mwanake. Umwene unkikulu alinkumwamula alinkuti, “Kumbaga fiki linga mbombile nanuswe isya bulogwe?” 17Umwene Yuda alinkwamula, alinkuti, “Ngwakukutumila imbene.” Popapo unkikulu alinkuti, “Po ngimba umbepo ikya kupingikila ubuye ukatume imbene?” 18Umwene Yuda alinkundalusya unkikulu alinkuti, “Fyo findu fiki ifi kufilonda?” Unkikulu alinkwamula alinkuti, “Umbepo ulutandati lwako ulu luli nikimanyilo kya ngamu yako, nu mpango gwako, kangi ni ngili iyi yili nkiboko kyako.” Popapo Yuda alinkwenda nukumpa ifindu fififi, umwene unkikulu alinkumwitika Yuda alinkulogwa nagwe, alinkuya nikifuba, 19popapo unkikulu yula alinkusumuka ukubuka, alinkwakufula umwenda ugu alikingile ku maso alinkufwala kangi amakiba gake aga bufwilwe.

20Yuda alinkutuma imbene indubwa nu mmanyani gwake, ugwa kikolo kya Adulami ukuti akamwegeleko ifi apingikile ku nkikulu yula, loli alinkusita nukwakumwagako unkikulu yula. 21Alinkubalalusya abandu ba nkaya kala alinkuti, “Ngimba abukile kugu unkikulu undogwe yula, uyu alitugele nkaya ka Enayimi pa mbali pa nsebo?” Abene balinkumwamula balinkuti, “Akayamo unkikulu Undogwe myitu muno.” 22Bunobuno umundu yula alinkugomokela kwa Yuda, alinkwakumbula alinkuti, “Ngamwagako unkikulu yula, bope nabandu ba nkaya kalakala bambulile batile, ‘Akayamo unkikulu undogwe mmyitu muno.’” 23Popapo Yuda alinkwamula alinkuti, “Ndeke aye nafyo, lumo twisakukosigwa itolo isoni, nukusekigwa nabandu, keta une nalintumile imbene indubwa, lelo utoligwe ukamwaga.”

24Bo gikindilepo pamo imyesi mitatu, abandu balinkumbula Yuda balinkuti, “Tamara unkasi gwa mwanako alogilwe, lilino ali nikifuba.” 25Yuda alinkuti, “Amunsosye panja ukuti bakamokye mmoto,” lelo bo bikusoka nagwe panja, umwana unkikulu alinkutuma amasyu ku nko gwake unnyambala alinkuti, “Ndi nikifuba kya mundu uyu yo mwene nafyo ifindu ifi. Ufikete kangi ummanye uyu yo mwenenafyo, ulutandati ulu luli nikimanyilo nu mpango kangi ni ngili iyi.” 26Yuda alinkufimanya, alinkuyoba alinkuti, “Angindile ubugolofu une, Youne nasobile namanga nabagile ukumpa umwanangu Shela ukuti yo egane nagwe.” Popapo Yuda alinkusita nukumwega kangi Tamara.

27Lelo bo kisile akabalilo kakupapila umwana balinkwaga ukuti balimo abana abambasa babili. 28Bo ali pakupapa, umwana yumo yo alinkutala ukusosya ikiboko kyake; popapo unnyago alinkukola ikiboko kila alinkukipinya nubusi ubukesefu, alinkuyoba alinkuti, “Uyu yo mbasa.” 29Loli bo mbasa agomwile ikiboko kyake, balinkumbona sindi ikusoka, po lelo unnyago yula alinkuti, “Gwiyigulile gwimwene injila. Bunobuno balinkumpa ingamu ya Perezi.”#38.29 Perezi: ko kuti ukwigula. 30Popapo ugwamyabo alinkwenda nukusoka bo ali nubusi ubukesefu pa kiboko, yo balinkumpa ingamu ya Zera.

Currently Selected:

UBWANDILO 38: NNBII

Highlight

Copy