Lukas 22
22
Kawan pomimpin dulun Yahudi ngewak jere ngompatoi Yesus
22:1-2
(Mat. 26:1-5; Mrk. 14:1-2; Yoh. 11:45-53)
1Dulun Yahudi moraya ondo raya rute co aroko bodagi co tonisi ka ondo raya Paskah. Ondo raya cioh ocop dokin. 2Kawan imam kopala hintang kawan guru agama Yahudi dahat nganyap cara ika ngompatoi Yesus hapocara co tonih-tonih. Iroh takut songola tojadi aang co orong macam eh kotika iroh nawan Are nyan tohimo dulun orong.
Rasul Yudas mohianat Yesus
22:3-6
(Mat. 26:14-16; Mrk. 14:10-11)
3Opaiyoh Lacan Setan morasuk songan Yudas co tonisi ka Iskariot, iyohonon ico beti ingkan duo balas rasul Yesus. 4Tului iyoh, Yudas tulak paluh borunding ma kawan imam kopala hintang kawan kopala pongawal Lopo Mohotara tintun maindeoi are lian nyarah Yesus hia iroh. 5Iroh jorih lau paluh bojanji ika mihi duit indaieh. 6Yudas mahi sotuju. Are molai nganyap kosempatan ika nyarah Yesus ma iroh nyan kotika co aroko dalo orong dulun eh.
Rasul Petrus hintang Rasul Yohanes nyodia Porayaan Paskah
22:7-13
(Mat. 26:17-25; Mrk. 14:12-21; Yoh. 13:21-30)
7Ocop dapot waktueh ika molai moraya Ondo Raya Rute Aroko Bodagi. Ondo cioh, sika koluarga sobulih nyarak anak domba ika moraya Paskah. 8Jadi, Yesus nyuhu Petrus doruo Yohanes. Hie-Eh, “Tulak bat momposiap porayaan Paskah ika to samah-samah kuman.”
9Doruo ngisok, “Nyamoh kojere Mu kaih nyiap eh?”
10Hien Yesus, “Muntam hia kota Yerusalem. Nyan intin, ikan angar sopopak ico bakah co mehen buong sangan ma danum. Ngonulu are hia lopo co tomuntam eh. 11Mantun eh ma dulun co tempun lopo yoh: ‘Kaih cuhun Pa Guru ngisok, nyan omoh bukung co lian hapai-Eh ika kuman Paskah homboh-homboh ma kawan murid-Eh?’ 12Paluh, dulun co tempun lopo yoh angar mara ikan duo ma ico bukung co bolauh nyan loteng. Kokon aang co tomorulu to ika moraya Paskah yoh oko nyan intin. Nyiap kokoieh bat nyan intin.” 13Maka, Petrus doruo Yohanes tulak. Kokon aang co tojadi pas isan co tomantun Yesus ma doruo. Paluh, doruo nyiap ika moraya Paskah.
Pojamuan kuman ika mingkat Yesus
22:14-23
(Mat. 26:26-30; Mrk. 14:22-26; 1Kor. 11:23-25)
14Kotika ocop bat waktueh kuman mamalom ika moraya Paskah cioh, Yesus samah-samah tuot ma kawan rasul-Eh nyan koliling meja ika kuman. 15Paluh Are mantun ma iroh, “Akuh jere lau kuman ika moraya Paskah cotuh homboh-homboh ma ikan sorinai Akuh soranta. 16Ngoneh eh bat! Sobujur eh, Akuh aroko angar kuman kawan kanon Paskah cotuh bat dapot Korojaan Mohotara monguasa kokon aranaang. Waktu cioh, arti ingkan moraya Paskah cotuh angar jarin ganap.”#22:16 Arti ingkan porayaan Paskah iyohonon tolu tahap: 1) Nyan jaman sinan, dulun Israel moraya Paskah ika mingkat cara Mohotara nyolamat iroh ingkan hukuman matoi nyan Mesir. 2) Ponah ayat 17-20, Yesus nambah arti hia porayaan Paskah. Dulun co porocaya ma Are mingkat cara-Eh nyolamat ito ingkan hukuman matoi tului dosa. 3) Waktu Yesus hopuli, arti porayaan Paskah cioh angar jarin ponu. Kokon kuasa jahat angar tongalah paluh tomohukum. Tapi, dulun co porocaya ma Yesus angar tonyolamat ingkan hukuman matoi co kototahi.
17Opah iyoh Yesus monu ico cangkir angur, paluh bodoa bosukur ma Mohotara. Opaiyoh Are mantun, “Monubat otuh, paluh hotolindah bat ikan ngorih eh. 18Porhatibat otuh: Akuh aroko angar ngorih angur kole dapot Korojaan Mohotara monguasa kokon aranaang.”
19Opah iyoh Yesus monu rute. Opah nisi doa bosukur, Are nyila-nyila rute cioh ma silui-Eh paluh mihieh ma iroh. Hie-Eh, “Tuh boh beting-Kuh co angar tonyarah-Kuh indam me. Nompi bat aang cotuh hopompaluh ika me tenden mingkat Akuh.”
20Opah iroh umbot kuman bolum, paluh, ma cara co samah ma rute nin, Yesus mihi ico cangkir angur kole hia iroh samir mantun, “Ico cangkir angur cotuh mowakili daha-Kuh co angar tonumbak indam me kotika Akuh matoi.#22:20 Mohotara umpi janji ma kolunon ina sika dulun ihin kosempatan ika jarin anggota umat-Eh. Hiyah jaman sinan, dulu Israel tomalak sobagai ciri iroh umat Mohotara. Iroh mahi momporsembah komolum ina dosa tomampun. Tapi Yesus nahur dosan to hiyah waktu Are matoi nyan kaju somolaki. Jadi, makitu ome bewe co porocaya ma Yesus, bolum sosuai kojere-Eh, dulun cioh tomampun paluh jarin umat-Eh. Daha cotuh monsah Pojanjian Baa co tonompi Mohotara ma kolunon ika jarin kawan dulun Tioh. 21Tapi, noto boh! Dulun co angar nyarah Akuh hia musuh-Kuh, are dahat tuot nyan meja cotuh samah-samah ma Akuh. 22Jadi, Anak Kolunon mula angar matoi sosuai ma cara co tonantu Mohotara. Tapi Mohotara angar mohukum dulun co nyarah Are!”
23Ngoneh iyoh, kawan rasul-Eh hodaler ome oluh eh nyan halo iroh yoh co angar nompi alo cioh.
Yesus majar kawan rasul-Eh ika sobulih molayani ma kopion atoi
22:24-30
24Paluh, kawan rasul-Eh hosual samah arop doh. Hien doh ome nyan halo iroh yoh co poko penting. 25Pokotului iyoh, Yesus nopoh iroh. Hie-Eh, “Kawan Laca bangsa co aroko nyono Mohotara tonisi ‘Polindung Rayat’. Podahar, iroh herak maksa rayat ika tunduk ma kuasan doh. 26Tapi, ikan aroko boraoi isanioh! Malah, dulun co poko penting nyan halo ikan sobulih mangap arop eh aroko penting, tapi mangap dulun bokon meleh penting hangki arop eh. Dulun co momimpin sobulih nompi kuan gawi isan polayan. 27Suwah momikir ome co poko penting; dulun co tuot kuman, atawa co molayan eh. Mositi dulun co tuot kuman yoh co poko penting eh. Tapi kotahin Akuh halo ikan, Akuh mahi molayan ikan. 28Ikan tenden sotia ma-Akuh ponah kokon kosusah co nampuh Akuh. 29Maka, Akuh angar mihi kuasa indam me ika momorintah ponah Korojaan Mohotara, samah ma Tamang-Kuh mihi kuasa ma-Akuh ika jarin Laca co momorintah ngolauh Korojaan-Eh. 30Jadi, ponah Korojaan-Kuh yoh daai, ikan angar nongkomo jorih-jerah hintang tohormat awi boraoi kuman ngorih hico meja ma Akuh. Ikan hopomasing mahi angar tuot nyan korusi ponguasa ika momorintah duo balas suku Israel.”
Yesus mantun bahawa Rasul Simon Petrus angar aroko mongaku nyono Are
22:31-34
(Mat. 26:31-35; Mrk. 14:27-31; Yoh. 13:36-38)
31 Opaiyoh Yesus mantun ma Simon Petrus, “Simon, Simon! Ngoneh eh yoh! Lacan Setan ocop bohimat nuntut hia Mohotara ika homboh kawan tingkoh are boraoi misah rasul co sotia ingkan co aroko sotia, somporengu potani misah gandum ingkan hampang. 32Tapi Akuh ocop bodoa indam mu, Simon ika mu tenden porocaya ma-Akuh. Kotika iko hopuli sotia ma-Akuh, iko sobulih ngondohon iman kawan konduang mu, iyohonon kawan murid-Kuh.”
33Petrus museh, “Tuhan, akuh ocop siap muntam seper homboh-Iko! Oluco dapot matoi homboh ma Iko, akuh ocop siap!”
34Tapi Yesus mantun, “Ngonehbat, Petrus! Nyan momi cotuh ka iko angar mantun bahawa iko aroko nyono Akuh dapot hontolu kali sorinai manuk nondu.”
Kawan rasul Yesus sobulih siap nohimo tontangan
22:35-38
35Paluh Yesus mantun ma kokon rasul-Eh, “Mingat ehbat tumun aang batuh Akuh nyoruhan ikan ika momborita tintun Korojaan Mohotara. Ikan aroko boraoi mehen epok, bohati, sandal co hapam me. Nyan waktu iyoh, mainboh ikan oko kotopah me, pai?”#22:35 Lukas 9:1-6 hintang 10:1-12.
Iroh museh, “Aroko!”
36“Tapi makitu ocop bobeda,” Hie-Eh. “Dulun co empun epok, empun bohati, sobulih mehen eh. Dulun co arelu oko padang eh, sobulih bojuar jubah ika molieh. 37Awi ome co tonulih ponah Surat borasih tintun Akuh sobulih tojadi: ‘Are angar tomangap samah ma ponjahat.’ Aang cioh dahat bolansung makitu tuh!”
38Iroh mantun, “Tuhan, nyantoi oko duo usok padang.”
Yesus museh, “Ocop bat”
Yesus bodoa nyan Lungkuh Jaitun
22:39-46
(Mat. 26:36-46; Mrk. 14:32-42)
39 Opah acara kuman momi Paskah, Yesus tulak hia luar kota isan biasaeh hia Lungkuh Jaitun. Kawan murid-Eh ngonulu Are. 40Kotika iroh dombut hia ika cioh, Yesus mantun ma iroh, “Bodoabat ina ikan aroko buah tingkoh.”
41Opaiyoh Are tulak ngocu Arop-Eh isut ingkan iroh, kira-kira koocu amun manting batu. Are bolutut paluh bodoa. 42Hie-Eh, “Apa, amun boraoi, ngocu leh boh ingkan-Akuh kosoranta co sobulih tonongkomo Kuh tuh. Tapi aroh nontumun kojere-Kuh, molengkan nontumun kojere Tiko leh.” 43Ico molekat dombut hia Are, ngonohon-Are. 44Yesus korinah jorung. Jadi, Are sasar bohimat bodoa. Dohorah-Eh isan daha moce hia tana.
45Opah bodoa, Yesus tonjok paluh hopuli kole hia kawan murid-Eh. Kitai-Eh iroh rahat potontirui tului kojorung doh ngolokoh iroh. 46Are pokonyun paluh nyompo iroh, “Sobujur eh, ikan aroh tirui! Bodoabat ina ikan aroko buah tingkoh.”
Yesus tonawan
22:47-53
(Mat. 26:47-56; Mrk. 14:43-50; Yoh. 18:3-11)
47Pondehan Yesus incah mantun, pumpun dulun dombut. Iroh tomimpin pian Yudas, ico beti ingkan duo balas murid Yesus. Yudas ngoroni Yesus ika nontoke Are ma parok. 48Tapi Yesus mantun, “Eh, Yudas, iko nyarah Anak Kolunon ma parok mu?”
49Kotika kawan murid-Eh ocop sadar ome co angar tojadi, iroh ngisok Yesus, “Tuhan, sobulih pai kaih ngolawan iroh hapo padang?”
50Sorinai Yesus museh, songola ico beti songkolang ingkan murid-Eh nyopet padang, lansung nyarang ico beti polayan imam kopala co poko bokuasa. Are nelas tolingan kontoun polayan imam kopala cioh dapot telas.
51Tapi Yesus mantun, “Ocop leh!” Paluh Are nampek eh hopuli tolingan dulun cioh, tongohalit eh.
52Opaiyoh Yesus mantun ma kawan imam kopala hintang kawan porwira pongawal Lopo Mohotara, kawun kawan pomimpin Yahudi co dombut hia intin ika nawan Are. Hie-Eh, “Mainboh Akuh tuh jahat lau pai, dapot ikan sobulih dombut mehen padang hintang polang ika me nawan Akuh? 53Sika ondo Akuh oko halo ikan nyan polontaran Lopo Mohotara, kura hiah iyoh ikan aroko nawan Akuh. Tapi tuhboh kotikaeh ikan botindak, kotika Lacan Setan nompi gawieh co jahat.”
Rasul Petrus nisi arop eh aroko nyono Yesus
22:54-62
(Mat. 26:57-58,69-75; Mrk. 14:53-54,66-72; Yoh. 18:12-18,25-27)
54Iroh nawan Yesus paluh mehen-Eh hia lopo kopala imam co poko bokuasa. Petrus ngonulu ingkan ocu. 55Tapi hayak dapot nyan lopo cioh, Petrus tuot nyan halo iroh co rahat noliut apui co ngori nyan polontaran lopo cioh. 56Tului Petrus tuot dokin apui co ngori yoh, oko ico beti polayan bawe kito tampaeh. Bawe cioh nyorolieh paluh mantun, “Ndoh! Dulun cotuh mahi oko hontong-hontong ma Dulun co tonawan cioh.”
57Tapi Petrus naleh. Hieeh, “Aroh! Aroko tonyono kuh, dulun cioh.”
58Aroko tahi opaiyoh, oko dulun bokon kito Petrus paluh mantun maeh, “Iko tuh mahi songkolang ico ingkan kawan murid-Eh!”
Tapi Petrus mantun, “Aroh! Akuh bokon murid-Eh!”
59Sokitar ico jam opaiyoh, ico dulun bokon kole mantun ma kotegas, “Tuu are tuh oko homboh-homboh Dulun co tonawan cioh, awi are dulun ingkan derah Galilea ka!”
60Tapi Petrus mantun kole, “Aroh! Aang co hiem mu non sala!” Kotika Petrus mantun nain iyoh, kotika iyoh ka manuk nondu. 61Paluh TuhanYesus molingo noto Petrus. Ingkat Petrus bat antun-Eh niin: ‘Nyan momi cotuh ka iko angar maraeh bahawa iko aroko nyono Akuh dapot hontolu kali sorinai manuk nondu.’ 62Maka Petrus pusit ingkan polontaran lopo cioh, holuh nangih tului korinah komoneser eh.
Yesus tomolea-lea hintang tomolantu
22:63-65
(Mat. 26:67-68; Mrk. 14:65)
63Kawan dulun co dahat monjaga Yesus, polea-lea Are, molantu-Eh. 64Iroh nutup matai-Eh paluh mantun ma Are, “Amun Iko bujur-bujur ico nabi, mombuktieh bat! Mantun eh bat, ome co molantu Iko?” 65Iroh hopompaluh mohina-Eh ma orong nain antun.
Koputusan ika Yesus tomohukum matoi
22:66–23:25
Yesus tomongadili pian kolompok pomimpin dulun Yahudi
(Mat. 26:59-66; Mrk. 14:55-64; Yoh. 18:19-24)
66Nyan manyuap ondo, oko sidang kolompok pomimpin dulun Yahudi co poko penting, oko ka kawan imam kopala hintang kawan guru agama Yahudi nyan intin. Paluh Yesus tomehen hia tohimo iroh.
67Hien doh ma-Are, “Maraeh ma kaih, mainboh Iko tuh pai Laca Co Tomonjanji Mohotara?”
Yesus museh, “Amun Akuh maraeh ma ikan, ikan tuh aroko angar porocaya. 68Hintang amun Akuh ngisok ma ikan, ikan tuh aroko angar museh. 69Molai ingkan makitu, Anak Kolunon angar tuot nyan ika co tohormat topit kontoun Mohotara Co Bokuasa.”
70Kokon doh mantun, “Amun isanioh, Iko tuh pai co Anak Mohotara?”
Yesus museh, “Sanioh hiem me.”
71Maka iroh mantun, “Aroko usah nganyap saksi ika mantun kosolaai-Eh! Ito ocop ngoneh ingkan baui-Eh leh.”#22:71 Kawan pomimpin dulun Yahudi aroko porocaya Yesus iyohco Laca Co Tomonjanji Mohotara. Maka, iroh bopikir Yesus mohina Mohotara ma nyamah arop-Eh ma Mohotara. Monurut agama Yahudi, dulun co nompi kosolaa yoh sobulih tomohukum matoi (Imamat 24:16). Tapi, awi dulun Israel tonguasai pomorintah Romawi, baya pomimpin Romawi co boraoi nompi koputusan ika dulun tomohukum matoi. Maka, Yesus tomehen hia Gubernur Pilatus.
Currently Selected:
Lukas 22: TBSS
Highlight
Share
Copy
Want to have your highlights saved across all your devices? Sign up or sign in
