Yohanes 1

Yesus iyohco Antun Mohotara hintang Kopandau Dunia

1:1-18

1Hiah kosulak eh, sorinai kokon aranaang tomoncipta, oko Are co tonisi ‘Antun Mohotara’.#1:1 Ponah bohasa Yunani asli, hapo antun iyohonon ‘Logos’. Antun cotuh oko arti co jalom indan dulun Yahudi hintang dulun Yunani. Artieh, antun hintang pikiran Mohotara co jarin bolum, caraeh Mohotara porahan arop-Eh ma kolunon. Iyoh ka pokingat dulun tintun cara Mohotara moncipta somesta alam, iyohonon ma antun-Eh leh.

Are yoh homboh-homboh ma Mohotara.

Are yoh ka iyohco Mohotara.

2Ingkan kosulak eh, Are homboh-homboh Mohotara.

3Mohotara moncipta kokon aranaang molalui Are.#1:3 Yesus isan alat atawa porontara co hapan Mohotara ika moncipta somesta alam. Noto buku 1 Korintus 8:6 hintang Kolose 1:15-16.

Amun arelu oko Are, maka arelu oko ico mahi aang co tomoncipta.

4Are iyohco sumer kobolum.

Kobolum co ihi-Eh yoh iyohco Kopandau indan kolunon.

5Kopandau cioh bocohaya nyan ponah kopindong.#1:4-5 Kopandau nyan intoi gamaran cara bolum co ngonyorih Mohotara. Yesus dombut ika ngompandau cara bolum co tuu-tuu yoh.

Kopindong aroko hegah ngalah eh.

6 Nyan kotika co ocop tonatap Mohotara, Are nyoruhan ico beti co araieh Yohanes.#1:6 Buku cotuh tonulih Rasul Yohanes, beda hangki Yohanes co tomaksut nyan intoi, iyohonon Yohanes Pombaptis. 7Yohanes dombut ika bosaksi tintun Kopandau cioh. Dapot kokon dulun lian porocaya ma Kopandau cioh. 8Yohanes non leh bokon Kopandau cioh, tapi are baya bosaksi tintun Kopandau cioh. 9Iyohonon, Kopandau co tuu-tuu, Kopandau co dahat dombut hia dunia, hintang ngompandau kokon dulun.

10Are oko nyan dunia. Dunia tomoncipta molalui Are. Tapi, kawan dulun nyan dunia aroko nyono ome Are sobujur eh. 11Are dombut hia bangsa-Eh leh. Tapi iroh aroko norima-Eh. 12Tapi ma kokon dulun co norima-Eh, iyohonon kokon dulun co porocaya ma-Eh, Are mihi hak indan doh ika jarin kawan anak Mohotara. 13Iyoh aroko tojadi socara kolunon, isan dulun co tonganak tului kojere atawa roncana kolunon. Iroh jarin kawan anak Mohotara tului Mohotara umpi iyoh tojadi.

14‘Antun Mohotara’ ocop jarin ico kolunon. Are nukui nyan halo ito. Hintang ito ocop kito bahawa Are korinah tohormat. Are korinah tohormat tului Are iyohco Anak tungkan ingkan Mohotara Tama. Are porahan ma ito kokon kopion Mohotara hintang uras co bujur tintun Mohotara. 15Yohanes bosaksi tintun Are. Yohanes mantun ma jara muhat, “Cotuhboh Are co tomaksut kuh kotika akuh mantun, ‘Oko Dulun co cagar dombut opah akuh. Are meleh penting hangki akuh awi Are ocop oko ingkan kosulak eh, ocu sorinai akuh tonganak.’ ”

16Awi Are pomasi, maka ito horoholuh norima aang co pio hinut ingkan Are, arelu oko kongumbot eh. 17Mohotara mihi porintah hintang poraturan-Eh nyan buku Hukum Torat molalui Musa. Tapi Mohotara mihi kopio-Eh hintang kobujur-Eh molalui Yesus Kristus indan to. 18Arelu oko ico dulun mahi co piji noto Mohotara, kocuali Yesus, Anak Tungkan-Eh. Are co oko hubungan pokohaet ma Mohotara Tama. Are co posono Mohotara ma ito.

Yohanes Pombaptis mara tintun arop eh leh

1:19-28

(Mat. 3:1-12; Mrk. 1:1-8; Luk. 3:3-6,15-17)

19 Nyan ico kotika, kawan pomimpin agama Yahudi nyan Yerusalem nyuhu pira-pira imam hintang kawan dulun ingkan suku Lewi co mombantu kawan imam. Iroh tonyuhu tulak hia Yohanes ika ngisok, “Omeboh iko?” Nyan waktu cioh, santuhboh kosaksian Yohanes ma iroh.

20Ma koterus terang, Yohanes mongaku, “Akuh bokon Laca co Tomonjanji Mohotara co ito nisi Kristus!”

21“Amun sanioh,” iroh ngisok maeh, “Omeboh iko? Main iko Nabi Elia jaman sinan co dombut kole?”#1:21 Buku 2 Raja-raja 2 ngesah Nabi Elia aroko piji matoi. Mohotara mehen are hia sorga ma koreta kuda boapui. Jadi dulun Yahudi porocaya oko ondo kotika are angar dombut kole hia dunia. Are museh, “Bokon ka!”

“Mainboh iko Nabi cioh#1:21 Nyan buku Ulangan 18:15-19, Musa porapot tungon ingkan Mohotara bahawa nyan pongaan ondo Mohotara angar mangkat ico Nabi co samah isan Musa. Jadi, uras dulun Israel nganto Nabi cioh. Sobujur eh, Nabi cioh iyohco Yesus, oluco orong dulun Yahudi aroko kolu porocaya iyoh. Noto cotatan nyan buku Kesah 3:22. co tonganto kaih?” Are museh, “Bokon!”

22Jadi, iroh mantun maeh, “Mara ma kaih omebat iko tuh ina kaih boraoi mihi useh indan iroh co nyuhu kaih. Ome hiem tintun aropmu tarop?”

23Hieeh, “Hiah jaman sinan nabi Yesaya mantun tintun ico dulun co mantun muhat nyan padang gurun, ‘Nongkorongbat calan indan Tuhan!’ ” Akuh iyohco dulun cioh.#1:23 Ingkan buku Yesaya 40:3.

24(Nyan songkolang kawan dulun co tonyoruhan yoh oko pira-pira pomimpin agama Yahudi ingkan kolompok Parisi.) 25Iroh ngisok maeh, “Iko mantun bahawa iko bokon Laca Co Tomonjanji Mohotara, bokon nabi Elia, bokon Nabi cioh co tonganto kaih. Amun sanioh, kura iko mombaptis dulun?”

26Yohanes museh iroh, “Akuh baya mombaptis dulun ma danum. Tapi oko Dulun nyan tohun-tohun ikan co aroko me nyono ome Are sobujur eh. 27Iyohonon, Are co dombut opah akuh. Akuh leh aroko layak ika mukoi talin torumpah-Eh.”

28(Kohopander Yohanes ma iroh tuh tojadi nyan Betania nyan pohoi sungoi Yordan, ika Yohanes mombaptiskawan dulun.)

Yohanes Pombaptis mara tintun Yesus

1:29-34

29Ondo nyuap eh, Yohanes noto Yesus dombut hia are. Yohanes mantun, “Noto! Tuhboh Are, Anak Domba co tonyoruhan Mohotara ina dosan dunia lian tomampun. 30Cotuhboh Are co tomaksut kuh kotika kuh mantun, ‘Oko Dulun co cagar dombut opah akuh. Are meleh penting hangki akuh awi Are ocop oko ingkan kosulak eh, ocu sorinai akuh tonganak.’ 31Sorinaieh, akuh aroko monau ome Are non.#1:31 Yohanes bomaksut bahawa sorinai Mohotara mihi ciri hia are aroko monau ome Dulun Co Tomili Mohotara yoh. Noto ayat 32-34 berikut. Podahar akuh dombut mombaptis ma danum ina posono Are ma bangsa Israel.”

32Yohanes mahi bosaksi, hieeh, “Akuh ocop kito Roh Mohotara toka ingkan langit isan beleu merpati. Roh Mohotara cioh nangkoi nyan tungkui Yesus. 33Sorinai iyoh, akuh aroko monau ome Are yoh. Tapi Mohotara nyoruhan akuh ika mombaptis ma danum. Mohotara ocop mantun ma akuh, ‘Amun iko kito Roh-Kuh toka hia tungkui ico dulun, paluh nangkoi nyan tungkui-Eh, maka dulun cioh iyohco Dulun co angar mombaptis ma Roh Mohotara.’ 34Jadi, makitu, akuh ocop noto iyoh tojadi. Akuh bosaksi, Dulun cotuh iyohco Anak Mohotara!”

Kawan murid Yesus co portama

1:35-51

35Hiah ondo nyuap eh kole, Yohanes tonjok kole nyan ika cioh. Umba are oko duo beti ingkan kawan murid eh. 36Kotika are noto Yesus nyihin, are mantun, “noto! Nonboh Are, Anak Domba Mohotara.” 37Duo murid taiyoh ngoneh antun Yohanes yoh. Paluh, iroh tulak ngonulu Yesus.

38Yesus ngolet hia uwoilikut, noto iroh ngonulu Are. Are ngisok ma iroh, “Ikan nganyap ome?”

Hien doh ma-Eh, “Rabi, Iko nukui nyan omoh?” (Antun co ‘Rabi’ artieh ‘Guru’.)

39Hie-Eh ma iroh, “Umba akuh, paluh angar kitam me!” Jadi, iroh tulak, paluh noto ika Are nukui. Iyoh tojadi kira-kira jam opat macohit. Ondo cioh, iroh nukui umba Are.

40Andreas iyohco ico beti ingkan duo murid taiyoh co ngoneh antun Yohanes holuh umba Yesus. Andreas iyohonon konduang kuhung Simon Petrus. 41Jadi, hiah waktu iyoh, Andreas gasak-gasak nyopopak Simon. Hieeh ma konduang eh yoh, “Kaih ocop popak Mesias!” (Antun co ‘Mesias’ artieh ‘Kristus’, iyohonon Laca Co Tomonjaji Mohotara.)

42Andreas mehen Simon hia Yesus. Yesus nontonong Simon. Hie-Eh, “Iko iyohco Simon, anak Yohanes.#1:42 Yohanes cotuh beda hangki Rasul Yohanes hintang mahi beda hangki Yohanes Pombaptis. Tapi iko angar tonaah Kepas!” (‘Kepas’ ara co samah leh ma ara co ‘Petrus’. Artieh, ‘batu karang’.)

43Nyan ondo opah iyoh kole, Yesus mutus ika tulak hia Galilea. Are nyopopak Pilipus. Hie-Eh ma Pilipus, “Haas jarin murid Kuh!” 44Pilipus yoh borasar ingkan Betsaida, kota ika Andreas doruo Petrus.

45Pilipus nyopopak Natanael. Hieeh ma are, “Kaih ocop sopopak Are co nyan jaman sinan Musa ocop nisieh ponah Hukum Torat, Are co kawan nabi ocop nisi eh ponah kawan buku doh ka. Iyohonon, Yesus anak Yusup. Are ingkan lowu Nosaret.”

46Hien Natanael ma eh, “Aah! Nasaret! Mu bodai pai aranaang co pio dombut ingkan Nasaret?”

47Hien Pilipus maeh, “Haas! Notobat tarop!”

Hiah waktu Yesus kito Natanael dombut, Are mantun otuh tintun Natanael. Hie-Eh, “Noto! Dulun cotuh empun ciri dulun Israel co sobujur eh! Are arelu oko kopura-puraeh samah sindo!”

48Hien Natanael ngisok Are, “Maindeoi Iko nyono akuh?” Useh Yesus, “Sorinai Pilipus naah iko, Akuh ocop noto iko nyan pinda puun ara codi.”

49Hien Natanael ma-Eh, “Pak Guru! Mositi, Iko iyohco Anak Mohotara! Iko iyohonon Laca dulun Israel!”

50Yesus mantun, “Iko ngoneh Akuh mantun bahawa Akuh noto iko nyan pinda puun ara codi. Mainboh tului onon leh iko jarin porocaya ma Akuh? Iko angar noto kawan poristiwa co meleh bohimat lau hangki onon!”

51Paluh Yesus mantun, “Ngoneh ehyoh pio-pio! Ikan angar noto langit topukap, paluh kawan molekat Mohotara nukat ngeleh hia Anak Kolunon.”#1:51 Gamaran cotuh ingkan buku Kojadian 28:12. Maksut eh, Yesus iyohco Ponghubung antara Mohotara hintang kolunon. Gamaran cotuh mahi borati Yesus oko kuasai ingkan Mohotara. Are ‘toka’ hia dunia tuh waktu Are jarin kolunon. Are ‘nukat’ kole opah Are bolum hopuli. Are angar ‘toka’ kale waktu Are hopuli indan kohonduo kalieh.

Currently Selected:

Yohanes 1: TBSS

Highlight

Copy