Иудын хандалга 1

Амаршалга

1Эсэгэ Бурханай хайра дурада хүртэһэн, Иисүүс Христоосой харьяалда байһан Бурханай дуудаһан хүнүүд аа, таанадые Иисүүс Христоосой зараса, Яковай дүү Иуда амаршална. 2Үршөөл хайра, энхэ тайбан ба хайра дуран таанадай дунда оршожо байг лэ!

Хуурмаг һургагшадһаа һэргылнэ

3Хүндэтэ аха дүүнэрни, бидэ бүгэдын абарагдаха тухай би бэшэхэ һанаатай байгааб. Тиихэ зуураа Бурханай зондо нэгэтэ, гэхэдэ хэтын хэтэдэ үгтэһэн һүзэгэй түлөө таанад тэмсэхэ ёһотойт гэжэ уряалан бэшэхэ хэрэгтэй гэжэ тоолоноб. 4Өөһэдынгөө харата хэрэгүүдые сагааруулха зорилготойгоор Бурханаймнай буян хэшэг тухай һургаалые хазагайруулдаг, буруу болгодог, манай Захирагша болон Эзэн Иисүүс Христоосые буруушаадаг һүзэг шүтөөнгүй зарим хүнүүд бидэнэй дунда шургажа ороо. Тэдэ зон хэһээлтэдэ орохо гэжэ Нангин Бэшэг соо эртэ урдын сагһаа хойшо бэшээтэй байдаг.

5Эзэнэй Өөрынгөө арадые Египедһээ гаргажа абарһан тухайнь, тиигээд Тэрээндэ һүзэглэдэггүй зониие үгы хэһэн тухайнь һанагты. 6Эрхэ түрэеэ алдаад, байраяа орхиһон эльгээмэлнүүдые Бурхан харанхыда хэтын хэтэдэ гэнжээр хүлиһэн тухайнь һанагты. Тэдэ Эльгээмэлнүүд агууехэ үдэр зарга шүүбэридэ оротороо тэндэ байха. 7Тэдээндэл адли зальхай ябадалтай Содом, Гоморро хотынхидой, хажуудахи хотонуудайнь зоной залиршагүй хэтын галда шатан, аймшагтай саазада хүртэһэн тухай һанагты. Таанадай эдэ бүхэниие мэдэжэ байһаншье һаа, би һануулжа хэлээб.

8Тэдэнэй хэһээлтэ хүн бүхэндэ һэргылэмжэ болоно. Тэдэ зондол адли өөһэдынгөө үзэгдэлнүүдые баримталан, хуурмаг һургагшад бэеэ бузарлуулна, засаг буруушаана, огторгойн хүсэнүүдые муушална. 9Гэхэтэй сасуу Михаээл гэдэг ахалагша Эльгээмэлшье Моисейн бэе тухай шолмостой арсалдахадаа, хорото үгөөр тэрэниие зэмэлжэ шадаагүй, тэрэ гансал: «Эзэн шамайе хориг лэ!» – гэжэ хэлээ. 10Харин тэдэ хуурмаг һургагшад ойлгохогүй юумэнүүдээ хорото үгэнүүдээр хараажа, хэлэгүй малдал мэтэ зүнгөөрөө мэдэдэг юумэнүүдээрээ өөһэдыгөө хосорооно. 11Тэдэнэр Хаяанай замаар ябана, Балаһаамда адли алта мүнгэндэ шунан, зониие буруудхана, Коорахта адли зүрюу зан гаргаад, хосорно. Тэдэнэр гай зоболон амсахал. 12Тэдэ зон бузарта адли. Таанарай аха дүүнэрээрээ хамта хоол барихада, тэдэнэр өөһэд тухайгаал бодон, эшэхэ нюургүйгөөр гүзээгээ дүүргэн, таанадые бузарладаг. Тэдэнэр һалхинда туугдаһан бороогүй үүлэнүүд юм. Тэдэнэр үндэһэтэйгөө абтажа хаягдаһан, голоороо хаташаһан, намартаашье үрэжэлгүй модод юм. 13Тэдэнэй бузар хэрэгүүд дошхон далайн долгиной хөөһэн мэтэ эли. Тэдэ мүнхын харанхыда байха табилантай, төөриһэн одод мэтэ. 14Тэдэнэр тухай Адаамай долоодохи үеын үри һадаһан болохо Эноох иигэжэ уридшалан айладаа: «Тоогүй олон гэгээнүүдтэйгээ хамта Эзэн ерэнэ. 15Бүхы хүнүүдые шүүхэеэ, харата хэрэгүүдэйнь түлөө, Өөрыень буруушаажа хэлэһэн зүрюу үгэнүүдэйнь түлөө Бурханда һүзэглэдэггүй нүгэлтэниие шүүмжэлэн элирүүлхэеэ ерэнэ». 16Тэдэнэр бүхы юумэндэ дурагүйсэһэн гэмэрэлдэгшэд, тэдэнэр ташаяангы хүсэлэнгүүдээ дахажа ажамидардаг, ёһорхуу омог үгэнүүдээр өөһэдыгөө магтадаг, алта мүнгэндэ шуналтайгаар билдагуушалдаг.

Нүхэдөө һэргылнэ, захяа үгэнэ

17Хүндэтэ аха дүүнэрни, манай Эзэн Иисүүс Христоосой элшэнэрэй уридшалан хэлэһые һанажа ябагты. 18Һүүлэй үедэ харатай хүсэлэнгүүдээ хангадаг, таанадые наада баридаг хүнүүд бии болохо гэжэ тэдэнэр таанадта хэлэдэг һэн. 19Тиимэ зонһоо боложо хүнүүд эбээ таһалдаг, тэдэ зон бэеынгээ хүсэлэнгүүдтэ хүтэлүүлэн, Арюун Һүлдэгүй ажамидардаг. 20-21Харин таанад, хүндэтэ аха дүүнэрни, Эзэн Иисүүс Христоосой хизааргүй үршөөлөөрөө таанадта мүнхын амидарал үгэхыень хүлеэжэ байхадаа, өөһэдыгөө нангин һүзэг дээрэ һуурижуулан ургуулжа байгты. Арюун Һүлдын урмашуулгаар зальбаржа, Бурханда дуратай байгты. 22Хэлбэлзэһэн зониие үршөөхые хэшээгты. 23Хүнүүдые хэһээлтын галһаа аршалжа байгты. Бусад зониие үршөөжэ хайрлагты, тиибэшье тэдэнһээ болгоомжолжо, нүгэлөөр бузарлуулагдаһан хубсаһанһаань жэрхэжэ байгты.

Баяр хүргэжэ зальбарна

24Таанадые нүгэлдэ унахаһаатнай аршалжа, Өөрынгөө Алдарай урда тээ хирэгүй сэбэр, баяртай байлгажа шадаха, 25Эзэн Иисүүс Христоосоор дамжан бидэниие абарһан ори ганса Бурханда анханһаа эхилээд, мүнөө саг болотор хэтын хэтэдэ алдар соло, һүр жабхалан, хаан түрэ, эрхэ засаг байһай! Болтогой!

Currently Selected:

Иудын хандалга 1: BurBBL2024

Highlight

Copy