Эхин 16

Һагаар Ишмаһээл хоёр

1Абрамай һамган Сара хээлитэй болодоггүй хэбээрээ байба. Тэрэ Египет ороной Һагаар гэжэ нэрэтэй шэбэгшэтэй бэлэй. 2Тиигээд Сара Абрамда иигэжэ хэлэбэ:

– Эзэн намда үхибүү заяанагүй. Тиимэһээ ши минии зараса эхэнэртэй һуу. Магад, тэрэ минии түрөөгүй хүбүүе шамда түрэжэ болохо.

Абрам Сарын үгэ зүбшөөбэ. 3Тиихэдэнь Сара үбгэндөө дэрэ хубаалдахаар өөрынгөө шэбэгшэ, Египет орон нютагай эхэнэр Һагаарые үгэбэ. Тэрэ үедэ Ханаһаанда байрлаһаар Абрам арбан жэл болоод байгаа.

4Абрам Һагаартай унтажа, тэрэнь хээлитэй боложо, эзэн эхэнэртээ ехэ дээрэлхүүгээр хандадаг болобо.

5– Ши минии доромжолуулһанда гэмтэйш, – гэжэ Сара Абрамда хэлэбэ. – Би шамда өөрынгөө шэбэгшэ эхэнэрые үгөө һэм, харин тэрэш хээлитэй болоходоо, намда дээрэлхэнэ. Тиибэл, Эзэн маанадай дунда хэнэй зэмэтэй байһые шиидхэг лэ!

6– Шинии шэбэгшэ шинии мэдэлэй, – гэжэ Абрам харюусаба. – Юу хэхэеэ өөрөө мэдыш.

Тиихэдэнь Сара Һагаарые зоргоороо харшалжа, тэрэнь тэрьедэбэ.

7Шүүр хото руу Һагаар шэглэн ябаба. Хээрэ талада, булагай дэргэдэ тэрэнэй зогсожо байхада, Эзэнэй Эльгээмэл олоод, 8иигэжэ асууба:

– Сарын шэбэгшэ эхэнэр Һагаар, ши юундэ иигэжэ тэнэжэ ябанаш?

Тэрэ харюусаба:

– Би минии эзэн эхэнэр Сараһаа зугадажа ябанаб.

9Эзэнэй Эльгээмэл айладаба:

– Эзэн эхэнэртээ бусажа, мэдэлдэнь оро. 10Шинии үри һадаһад тоо томшогүй олон болохо. 11Ши хээлитэйш. Хүбүүтэй болохош. Тэрээндээ Ишмаһээл гэжэ нэрэ үгөөрэй, юундэб гэхэдэ, зоболондо ороод уйлахадаш, Эзэн шамайе дуулаа. («Ишмаһээл» гэдэгынь «Бурхан хүнэй үгэ анхаран дууладаг» гэһэн удхатай.) 12Харин хүбүүншни зэрлиг амитан мэтэ нүүдэл байдалтай, тэнэн түгэншэлэн ябаха. Үри һадаһадынь түрэл саданһаа амяарлан, сусалһаа – гал, сухалһаа – хэрүүл гэдэгтэл, тэдэнтэеэ адага шүбгэ мэтэ бололсон байха.

13Һагаар ехэтэ гайхаба, һүүлдэнь «нээрээ эндэ Бурханиие хараа гээшэ гүб?», – гэжэ өөрһөө асуун, өөртэйнь хөөрэлдэһэн Эзэндэ Бээр-Лахай-Роии#16:13 «Хүниие анхаран байдаг Бурхан» гэһэн удхатай. гэжэ нэрэ үгэбэ. 14Тэрээнһээ хойшо Кадээш болон Бээрэд хотонуудай хоорондо оршогшо тэрэ булаг «Намайе хододоо хаража байдаг Эзэн Бурханай булаг» гэжэ нэрэтэй болоо.

15Һагаар эзэндээ бусажа, Абрамай хүбүү түрэбэ. Тиихэдэнь Абрам хүбүүндээ Ишмаһээл гэжэ нэрэ үгэбэ. 16Абрам тэрэ үедэ наян зургаан наһатай байгаа.

Currently Selected:

Эхин 16: BurBBL2024

Highlight

Copy