Хэрэгүүд 7
7
Стефанай Зүблэлэй гэшүүдтэ хэлэһэн үгэ
1– Энэ үнэхөөрөө тиимэ гү? – гэжэ ахамад санаарта Стефанһаа һураба.
2– Аха дүүнэрни, үбгэ эсэгэнэрни, намайе шагнагты! Манай үбгэн эсэгэ Абраһаамай Харраан хото нүүхын урда тээ, Месопотамида байхадань, алдарта Бурхан тэрээндэ ерэжэ, 3«Энэ орон нютагаа, түрэлхидөө орхижо, Минии зааһан газарта ошо» гэжэ хэлээ һэн. 4Тиихэдэнь тэрэ Халдейн орон нютагһаа гаража, Харраанда нютагжаа. Эсэгынь наһа бараһан хойно Бурхан тэрэниие таанадай мүнөө ажаһуудаг газарта нүүлгэһэн байна. 5Гэбэшье тэрэ нютагые, тэрэ нютагай хэһэгыешье эзэмдэжэ байхаарнь Бурхан Абраһаамда үгөөгүй. Гэхэтэй сасуу тэрэ газарые үгэхэб, удаань үри һадаһадайнь эзэмшэжэ байхыень үгэхэб гэжэ Бурхан найдуулаа. Абраһаамай үхибүүдгүй байха үедэ Бурхан тэрэниие тиигэжэ найдуулаа. 6«Шинии үри һадаһад хариин газарта нүүхэ, дүрбэн зуугаад жэлэй туршада богоол болон дарлуулха. 7Гэбэшье Би тэрэ дарлагша үндэһэ яһатаниие ехэ шэрүүнээр шиидхэхэб», – гэжэ Бурхан хэлээ. «Һүүлдэ тэрэ һууриһаа нүүгээд, энэ һууринда ерээд, Намда мүргэжэ байха», – гэжэ Бурхан баһа хэлээ. 8Абраһаамтай хэлсэһэнээ баталан, Бурхан бэлгээ отолуулха заншал тогтообо. Абраһаам Исаак хүбүүтэй болоходоо, наймадахи үдэртэнь тэрэнэйнгээ бэлгэ отолуулаа, Исаак Яковай бэлгэ отолуулаа, тиин Яков манай арбан хоёр үбгэ эсэгэнэрэй бэлгэ отолуулһан түүхэтэй.
9Үбгэ эсэгэнэрнай Иосифто атаархажа, тэрэниие барлаг болгон Египедтэ худалдаа. Гэбэшье Бурхан тэрэниие орхёогүй, 10ямаршье гай аюулһаа абаржа байгаа. Тиигээд тэрээндэ сэсэн ухаа үршөөжэ, Египедэй хаан фараондо һайшаалгаа. Тиимэһээ хаан Иосифые Египедэй болон бүхы хаанай ордоной эрхилэгшээр табяа һэн. 11Тэрэ үедэ Египет, Ханаһаан оронуудта ехэ гай зоболон асарһан үлэн хооһон байдал тохёолдобо. Манай үбгэ эсэгэнэртэшье эдихэ юумэ олдохоёо болёод байгаа. 12Египедтэ талха таряа байна гэжэ дуулахадаа, Яков манай үбгэ эсэгэнэрые тиишэнь түрүүшынхиеэ эльгээгээ һэн. 13Хоёрдохиёо ерэхэдэнь, Иосиф аха дүүнэртээ өөр тухайгаа сэхыень хэлээ, фараоншье тэрэнэй гэр бүлэ тухай мэдээ. 14Тиигээд Иосиф Яков эсэгэеэ, далан табан хүнһөө бүридэһэн гэр бүлэеэ уриһан захяа эльгээгээ. 15Урилга абаһан Яков Египет руу нүүгээ һэн. Тэндэ тэрэ өөрөөшье, манай үбгэ эсэгэнэршье наһа бараа. 16Тэдэнэй шарилые Абраһаамай мүнгөөр Хамоорой хүбүүдһээ Шэхээмдэ худалдажа абаһан агы нүхэн соо хүдөөлүүлээ бэлэй.
17Бурханай Абраһаамда найдуулһан үгын хүсэлдэхэ сагай ойртожо байхада, манай яһатан Египедтэ тэнжэжэ, хүн зонойнь тоо олошоржо байгаа. 18Тиимэ байдал Иосифые мэдэхэгүй шэнэ фараоной Египедэй хаан шэрээдэ һуутар үргэлжэлөө. 19Тэрэ хаан манай арад зониие мэхэлдэг, шэрүүнээр дарладаг, үбгэ эсэгэнэрыемнай нарай үхибүүдээ гэрһээн гаргажа хаяхыень бааладаг, тиин хаягдаһан үхибүүд үхэжэ хосордог һэн.
20Тэрэ үедэ сэбэр һайхан Моисей хүбүүн түрэһэн түүхэтэй. Гурбан һара хүрэтэрнь тэрэниие эсэгынь гэртэ тэнжүүлээ. 21Моисейе гэрһээн гаргажа орхиходонь, тэрэниие фараоной басаган үргэжэ абаад, өөрынгөө хүбүүндэл хүмүүжүүлээ. 22Моисей Египедэй эрдэм ухааниие бүгэдыень шудалжа, уран һайханаар үгэ хэлэдэг, шадамар бэрхэ ажалша хүн болоо һэн.
23Моисей дүшэн наһатайдаа аха дүүнэрээ, Израилиин хүбүүдые харахаяа һанаба. 24Нэгэтэ египет хүнэй еврей хүниие доромжолон сохихые хараад, тэрэ оролсожо, египет хүниие хэһээн алаба. 25Бурхан тэрэнэй ашаар еврейнүүдтэ абарал үгэнэ гэжэ аха дүүнэрынь ойлгохо бэзэ гээд Моисей найдаа. Зүгөөр тэдэнь ойлгобогүй. 26Хойто үдэрынь хоёр еврейнүүдэй өөһэд хоорондоо хэрэлдэжэ байхые тэрэ хараад, тэдэниие эбтэй болгохо һанаатайгаар: «Үгы, шагныт, таанад аха дүүнэр ха юмта! Юундэ бэе бэеэ гомодхоонобта?», – гэбэ. 27Гэбэшье нэгэ шуһанайнгаа хүниие сохижо байһан нүгөөдэн хэрүүлхэн, Моисейе түлхеэд: «Хэн таниие манай дээрэ ноён болгооб, зарга шиидхэгшээр табяаб? 28Үсэгэлдэр египет хүниие алаһандаал адли намайе алахаяа һанаа гүт?» – гэжэ хэлэбэ. 29Моисей хэлэһыень дуулахадаа орон нютагһаа зугадажа, Мидианда нютагжаба. Тэндээ хоёр хүбүүтэй болоо һэн.
30Дүшэн жэлэй үнгэрһэн хойно Синай хадын хаяада оршодог губида гал дүлөөр соробхилжо байһан үүргэнын һөөг сооһоо Бурханай Эльгээмэл Моисейдэ үзэгдэбэ. 31Иимэ юумэ хараад, Моисей ехээр гайхан, лаб харахаяа тэрээндэ дүтэлхэдэнь, Эзэнэй дуу соностобо: 32«Би шинии үбгэ эсэгэнэрэй, Абраһаамай, Исаагай, Яковай Бурханби». Моисей айн шэшэржэ, Тэрээн тээшэ харахаяашье зүрхэлбэгүй. 33Эзэн тэрээндэ: «Гуталаа тайла, юуб гэхэдэ, зогсоһон һууриш нангин газар гээшэ. 34Би Минии арадай Египедтэ зобожо байхыень харааб, гэнэн ёолохые дуулааб, тиимэһээ тэдэниие аршалан сүлөөлхын тула газар дэлхэйдэ буужа ерээб. Ши яба, Би шамайе Египет эльгээнэб», – гэжэ хэлэбэ.
35«Хэн таниие манай дээрэ ноён болгооб, зарга шиидхэгшээр табяаб?» гэжэ еврейнүүдтэ буруушаалгаһан эгээл тэрэ Моисейе Бурхан ударидагша болон абарагшаар томилон эльгээгээ юм. Шатажа байһан үүргэнын галда бии болоһон Эльгээмэлэй гараар Бурхан тиимэ юумэ хээ. 36Египедэй нютагаар, Улаан далайн шадар, мүн сүл губяар дүшэн жэлэй туршада ябахадаа, тэрэ гайхамшагта хэрэгүүдые бүтээн, юрэ бусын дүлгэ тэмдэгүүдые харуулан, арад зоноо Египедһээ гаргаа һэн.
37Моисей израильшуудта: «Таанадай дундаһаа намдал адли лүндэншые Эзэн Бурхантнай элирүүлэн гаргаха», – гэжэ хэлээ бэлэй. 38Моисей израилиин арадтай сүл губида хамта ябахадаа, өөртэйнь болон манай үбгэ эсэгэнэртэй Синай хада дээрэ хөөрэлдэһэн Эльгээмэлтэй уулзажа, амиды үгэнүүдые хүлеэн абаад, бидэндэ дамжуулан үгөө.
39Гэбэшье манай үбгэ эсэгэнэр тэрэнэй үгэ дуулаха дурагүй байгаа. Тэдэнэр Моисейе буруушаажа, Египет руугаа бусахые хүсөө. 40«Бидэниие хүтэлжэ ябаха бурхадые бүтээжэ үгыт. Бидэниие Египедһээ гаргаһан Моисейтэй юунэй тохёолдоһые бидэ мэдэнэгүйбди», – гэжэ тэдэнэр Аарондо хэлэбэд. 41Тиигээд тэдэнэр бухын дүрсэтэй онгон хээд, тэрээндээ үргэл үргэжэ, гараараа бүтээһэн юумэндээ һүгэдэн, найр хэбэ. 42Тиихэдэнь Бурхан тэдэниие буруу хаража, лүндэншэдэй номууд соо бэшэгдэһэн ёһоор огторгойн одо мүшэдтэ мүргэхэдэнь һаалта хээгүй:
«Израилиин арад зон!
Таанар дүшэн жэлэй туршада сүл губяар нүүжэ ябахадаа,
амитадые гаргаад,
Намда үргэл үргэдэг байгаа аалта?
43Моолохой Майханиие,
Рефан-одон бурханай дүрсые, шүтөөнүүдые
мүргэжэ байхаар абажа ябаа бэшэ гүт?
Тиимэһээ Би таанадые Вавилоонһоо сааша баряанда туун абаашахаб».
44Сүл губида ябаһан манай үбгэ эсэгэнэр Гэршэлгын майхантай байгаа. Тэрэ майханиие Бурханай хэ гэхэдэ, Моисей харуулһан маягаарнь бүтээгээ. 45Нүүнэй хүбүүн Иисүүсэй хүтэлбэри доро манай үбгэ эсэгэнэр энэ майханиие Бурханай намнажа гаргаһан ондоо үндэһэ яһатанай газарта асараа бэлэй. Энэ майхан Давид хаанай үдэрнүүд хүрэтэр тэрэл газартаа байгаа. 46Бурхан Давидта дуратай һэн. Давид Яковай Бурханда мүргэлэй гэр бариха зүбшөөл Бурханһаа һураба. 47Гэбэшье тэрэ Бурханай гэр Соломоон баряа юм.
48Теэд хүнүүдэй бариһан гэртэ Дээдэ Бурхан ажаһуудаггүй. Лүндэншэ энээн тухай иигэжэ хэлэнэ:
49«Огторгой – Минии сэнтии,
газар – хүлэймни гэшхүүр.
Тиигээд хаана таанад Намда үргөө барижа шадахабта даа.
Минии амарха таарамжатай газар хаана байнаб? – гэжэ Эзэн һураба.
50Эдэ бүгэдые Би Өөрөө бүтээгээ бэшэ гүб?»
51Бурханай һургаал дуулаха дурагүй, мэдэлдэнь байдаггүй зүрюу зон! Таанад өөһэдынгөө үбгэ эсэгэнэртэл адли Арюун Һүлдэдэ ходо эсэргүүсэнэт. 52Танай үбгэ эсэгэнэртнай лүндэншэдэй хэниие хашан мүрдөөгүйб? Үнэн сэдьхэлтэнэй ерэхэ тухай урда айладхаһан хүнүүдые тэдэ алаа, харин таанад мүнөө тэрэ Үнэн сэдьхэлтэндэ урбажа, тэрэниие алабат. 53Бурханай Эльгээмэлнүүдээр дамжуулан таанадта үгтэһэн Хуули абаһан аад, тэрэнииень сахибагүйт.
Стефаниие шулуудана
54Эдэ бүхэниие дуулахадаа Зүблэлэй гэшүүд хоро шараяа бусалжа, шүдөө хабиралдабад. 55Харин Арюун Һүлдөөр дүүрэһэн Стефан огторгой өөдэ шэртэхэдээ, Бурханай алдарые, Бурханай баруун талада Иисүүсэй байхыень хараба.
56– Харагты! Огторгой нээгдэбэ. Бурханай баруун талада Хүн түрэлхитэнэй Хүбүүнэй зогсожо байхые би мүнөө харанаб! – гэжэ Стефан хэлэбэ.
57Оог хашхараа табин, шэхэеэ бүтүүлжэ, тэдэ булта Стефанда добтолбо, 58тэрэниие хотоһоо гаргаад, шулуудаба. Гэршэнэр өөһэдынгөө субые тайлаад, Саул гэжэ нэрэтэй хүбүүнэй хүлдэнь орхибо. 59Стефаниие шулуугаар шэдэжэ байхадань:
– Эзэн Иисүүс, һүлдыемни абыт даа! – гэжэ тэрэ гуйба.
60Тэрэ үбдэг дээрээ һэхэрэн һуугаад:
– Эзэн аа, эдэнэй энэ нүгэлыень хүлисыт даа, – гэжэ шангаар хашхарба. Иигэжэ хэлээд, Стефан амяа табяа.
Currently Selected:
Хэрэгүүд 7: BurBBL2024
Highlight
Share
Copy
Want to have your highlights saved across all your devices? Sign up or sign in
© Институт перевода Библии, перевод, комментарии, 2024
© Российское Библейское Общество, перевод, комментарии, 2024
© Оформление. Институт перевода Библии, 2024
