Хэрэгүүд 4

Пётр Иоанн хоёр Зүблэлэй гэшүүдэй урда

1Пётр Иоанн хоёрой иигэжэ зонтой хөөрэлдэжэ байтар, тэдээндэ санаартан, Һүмын харуулай дарга, үшөө саддукейнэр ерэбэд. 2Тэдэ элшэнэрэй хүнүүдые һургажа, Иисүүсэй жэшээ дээрэ үхэһэн хүнүүдэй амидырха тухай айладхажа байхада, ехэ дураа гутаба. 3Тэдэ Пётр Иоанн хоёрые баряад, үглөө болотор түрмэдэ хааба, юуб гэбэл, орой болошоод байгаа. 4Тиибэшье элшэнэрые шагнаһан хүнүүдэй олониинь тэдээндэ этигэжэ, һүзэглэгшэдэй тоо ниитэдээ табан мянга шахуу хүн болобо.

5Хойто үдэрынь иудейнүүдэй захирагшад, ахамадууд болон Хуули заадаг багшанар Иерусалимда сугларба. 6Тэндэ ахамад санаарта Анна, Кайафа, Иоанн, Александр мүн олон тоото түрүү санаартанай түрэлхид байлсаба. 7Тэдэнэр Пётр Иоанн хоёрые урдаа байлгажа:

– Ямар хүсэ шадалаар, хэнэй нэрэ алдараар энэ хэрэг үйлэдэбэт? – гэжэ һураба.

8Тиихэдэнь Пётр Арюун Һүлдөөр дүүрээд, тэдээндэ иигэжэ хэлэбэ:

– Захирагшад, ахамадууд, аа! 9Үбшэн хүндэ һайн юумэ хэһэнэймнай түлөө, тэрэниие яажа аргалһан тухаймнай мүнөөдэр эндэ мүшхэбэ гүт? 10Назаредэй Иисүүс Христоосой нэрэ алдараар энэ хүн мүнөө элүүр мэндэ болоод, урдатнай зогсоно гэжэ таанад булта, бүхы Израилиин зон мэдэжэ байгты. Таанар Иисүүс Христоосые хэрээһэндэ хадаат, харин Бурхан Тэрэниие амидыруулаа. 11Тэрэ болбол –

«таанадай, барилгашадай голожо хаяһан шулуун аад,

гэрэй гол шухала тулга шулуун болоо».

12Ондоо нэгэшье хүн таниие абархагүй, бидэниие абаржа шадаха ондоо хүниие энэ дэлхэйдэ Бурхан үгөөгүй.

13Зоригтой дорюун Пётр Иоанн хоёрые эрдэм номгүй юрын хүнүүд байна гэжэ ойлгоходоо, Зүблэлэй гэшүүд түрүүшээр ехээр гайхалсажа, һүүлээрнь Иисүүстэй ябаһан хүнүүд байна гэжэ ажаглан тэмдэглэбэд. 14Тэрэ хоёрой хажууда аргалһан хүнииень хараад, тэдэнэр хэлэхэ юумэеэ олобогүй. 15Зүблэлэй гэшүүд элшэнэрые эндэһээ гарагты гэжэ захиран, хоорондоо зүблөө зарлаба.

16– Эдэ хүнүүдые бидэ яаха гээшэбибди? Иимэ гайхамшагта хэрэг эдэнэр бүтээгөө гэжэ бүхы Иерусалимай зон ойлгоо, тиимэһээ бидэ бүтээһэн хэрэгыень үгысхэжэ яашье шадахагүйбди. 17Гэбэшье арад зоной дунда энэ бүхэн саашадаа тарахагүйн тула, Иисүүс тухай хүнүүдтэ дахин юумэ бү хэлэгты гэжэ тэдээндэ захирая, – гэлдэбэ.

18Пётр Иоанн хоёрые дахин дуудажа асараад, Иисүүсэй нэрэ алдараар юумэ бү хэлэгты, һургаал бү номногты гэжэ элшэнэртэ захирба. 19Гэбэшье Пётр Иоанн хоёр:

– Таанадай үгэ Бурханай үгэһөө үлүү һайнаар дуулажа байгаа һаа, бидэ Бурханай урда зүб юумэ хэхэ гүбди? Өөһэдөө бодоод үзэгты даа. 20Бидэ хараһан дуулаһан юумэн тухайгаа хөөрэнгүй байжа шадахагүйбди, – гэжэ харюусаба.

21Занаһан, зааһанайнгаа удаа зүблөө зарлагшад элшэнэрые табиба. Болоһон үйлэ хэрэгэй түлөө бүхы зоной Бурханиие алдаршуулжа байхадань, элшэнэрые хэһээжэ шадахагүй байһанаа Зүблэлэй гэшүүд ойлгоо. 22Гайхамшагта аргаар эдэгэһэн тэрэ хүн дүшэ гаран наһа наһалһан байгаа бшуу.

Һүзэглэгшэдэй зальбаралга

23Сүлөөдэ гараад, Пётр Иоанн хоёр өөһэдынхидтөө ерэжэ, түрүү санаартанай болон ахамадуудай хэлэһые хөөрэжэ үгэбэд. 24Хэлэһыень дуулахадаа, тэдэ булта шангаар Бурханда хандан зальбарба: «Дээдэ огторгой, газар, далай, досоонь байгааша бүхы юумэ Бүтээгшэ, Эзэмнай, 25Та, Арюун Һүлдын ашаар, зарасаараа, манай үбгэ эсэгэ Давидаар дамжуулан айладхаат:

Юундэ үндэһэ яһатан буһалгаалжа,

арад түмэнүүд дэмы юумэ һанаашалнаб?

26Газарай хаашуул, засаглагшад

хоорондоо үгэсэлдэн хэлсэжэ,

Эзэнэй болон Бурханай табисууртын

урдаһаа эсэргүүсэн бодобо.

27Нээрээшье Ирод ба Понтий Пилат хоёр Израилиин арад зонтой болон бусад арадуудтай энэ хотодо үгэсэлдэн, Танай табисуурта, нангин Зараса Иисүүсэй урдаһаа эбээ нэгэдхэбэ. 28Танай эрхэ засагаар, Танай хүсэлөөр урдань шиидэгдэһэн юумые тэдэнэр бэелүүлхэеэ хамтарба. 29Эзэн, эдэнэй заналта дуулаад, Үгыетнай айлтагүйгөөр номнохо арга мүнөө зарасанартаа олгыт даа. 30Танай гэгээн зараса Иисүүсэй нэрэ алдараар хүнүүдые аршалан эдэгээжэ, гайхамшаг хэрэгүүдые болон тэмдэгүүдые үзүүлхымнай тула һүр хүсөө харуулыт даа».

31Иигэжэ зальбарһанайнь һүүлдэ сугларһан байрадань газар хүдэлжэ, тэдэнэр булта Арюун Һүлдөөр дүүрээд, Бурханай Үгэ айлтагүйгөөр номножо оробо.

Һүзэглэгшэд зөөриеэ хубаалдана

32Һүзэглэгшэд булта нэгэ һанал бодолтой һэн. Тэдэнэй хэнииньшье хубита зөөри зөөшэеэ минии гэдэггүй, байһан бүхы юумээрээ бэе бэетэйгээ хубаалдадаг һэн. 33Эзэн Иисүүсэй амидырһан тухай элшэнэр улам эршэтэйгээр гэршэлбэ, тиихэдэнь Бурхан тэдэниие үршөөл хайрадаа элбэг дэлбэгээр хүртөөжэ байба. 34-35Тэдэнэй дунда юумээр дуталдаһан хүнүүд үгы һэн. Гэр байратай, газартай зон зөөри зөөшэеэ худалдажа, ороһон олзоёо элшэнэртэ асаржа үгэдэг һэн. Тиин элшэнэр тэрэ мүнгыень юумээр дуталдаһан хүнүүдтэ хубаажа үгэдэг бэлэй. 36Жэшээлхэдэ, элшэнэрэй дунда Барнааба гэһэн алдартай («һанаа амаруулагша» гэжэ оршуулагдана), Кипрһээ уг гарбалтай Иосиф гэдэг левит хүн, 37өөрынгөө таряалан газарые худалдаад, мүнгыень элшэнэртэ асаржа үгөө.

Currently Selected:

Хэрэгүүд 4: BurBBL2024

Highlight

Copy