Хэрэгүүд 21

Павел Иерусалим ошобо

1Бидэ Эфесэй бүлгэмэй хүтэлэгшэдтэй хахасаһаар Коос арал тамаржа ерээбди, тиигээд хойто үдэрынь Родос арал хүрэжэ, тэндэһээ Патара хото тамараабди. 2Патарада бидэ Финики ошохо корабль оложо һуубабди. 3Кипр аралые зүүн таладаа орхижо, Сири тээшэ тамарбабди, тиигээд корабльнай ашаагаа буулгахаяа Тииртэ зогсобо. 4Тииртэ бидэ шабинарые оложо, тэдэнтэй долоо хонообди. Тэдэ шабинар Павелые Иерусалим бү ошыт даа гэжэ гуйба, юундэб гэхэдэ, Арюун Һүлдэ тэдэндэ тиигэжэ захиһан байна. 5Долоон хоногой үнгэрхэдэ замдаа гарахадамнай, һүзэглэгшэд эхэнэр үхибүүдээрээ хамта бидэниие корабль хүрэтэрнай үдэшэбэ. Эрье дээрэ бидэ үбдэглэн һуужа зальбараад, 6хахасажа, корабльдаа һуубабди, һүзэглэгшэд гэртээ бусаба.

7Тиир хотоһоо бидэ Птолемаида хүрэтэр тамаржа ерээд, эрье дээрэнь буужа, һүзэглэгшэ аха дүүнэртээ айлшалан, тэдэнэйдээ нэгэ хоноо һэмди. 8Хойто үдэрынь бидэ Кесари хүрэжэ, Һайн Мэдээсэл номнодог долоон туһалагшадай нэгэн болохо Филиппэй гэртэ зогсобобди. 9Тэрэ хадамда гараагүй дүрбэн басагатай һэн. Басагадынь булта лүндэншэд байгаа. 10Тэрэнэйдэ хэдэн үдэр байһанаймнай һүүлээр Агааб гэжэ нэрэтэй лүндэншэн Иудейһээ ерээ. 11Агааб манай байһан газарта ерэжэ, Павелай бүһэ абажа, хүл гараа хүлеэд:

– «Энэ бүһын эзэниие еврейнүүд Иерусалимда иигэжэ хүлеэд, бусад арадуудта тушааха» гэжэ Арюун Һүлдэ соносхоно, – гэбэ.

12Энээниие дуулахадаа бидэшье, эндэхи һүзэглэгшэдшье бултадаа Павелые Иерусалим бү ошыт даа гэжэ гуйбабди. 13Тиихэдэмнай Павел:

– Үгы, яана гээшэбта? Юундэ уйлалдажа бархиралдажа, минии зүрхэ сэдьхэлые зобоонобта? Би Иерусалим ошоод, хүлюулхэһээ гадна, Эзэн Иисүүсэй нэрэ алдарай түлөө үхэхэеэшье бэлэнби, – гэжэ харюусаба.

14Павелые үгэдөө оруулха аргагүй байһанаа ойлгоходоо, бидэ аргадахаяа болижо:

– Эзэнэй эрхэ мэдэлээр лэ болог даа! – гэлсэбэбди.

15Хэдэн үдэрэй үнгэрхэдэ бидэ харгыдаа түхеэржэ, Иерусалим тээшэ ябаабди. 16Бидэнэрээр хамта Кесариһаа хэдэн шабинар ябалсаа һэн. Тэдэнэр бидэниие Кипрһээ уг гарбалтай, түрүүшын шабинарай нэгэн болохо Мнасон гэжэ хүнэйдэ абаашаха байгаа. Бидэ тэрэнэйдэ зогсохо түсэбтэй һэмди.

Павел Яковтай уулзана

17Иерусалим хүрэжэ ерэхэдэмнай, аха дүүнэрнай бидэниие ехэ халуун дотоноор угтажа абаа.

18Хойто үдэрынь Павел мантай суг Яковта ошобо. Ошоһон газартамнай бүлгэмэй хүтэлэгшэдшье булта суглараа ха. 19Тэдэниие мэндэшэлээд, бусад арадуудай дунда Бурханай тэрээгээр хүүлэһэн юумэнүүд тухай Павел тодорхойгоор хөөрэжэ үгэбэ. 20Шагнаһан хойноо сугларагшад Бурханиие магтан алдаршуулба, һүүлдэнь:

– Павел аха, олон мянган еврейнүүдэй этигэжэ, Хуули ханамжатай һайнаар сахижа байһые та харана гүт? 21Тэдэ зон тан тухай: «Тэрэ бусад арадуудай дунда ажаһуудаг еврейнүүдые Моисейн Хуулиһаа холодуулан, хүбүүдээ бү отолуулагты, ёһо гуримуудаа бү сахигты гэжэ һургана», – гээд хэлсэнэ. 22Яаха гээшэб? Хүн зон ерэһэн тухайтнай заатагүй дуулаха. 23Тиимэһээ манай хэ гэһэн юумые хыт даа. Бурханда тангариг үгэһэн дүрбэн хүн эндэ бии. 24Тэдэнэрээр хамта ошожо, заншалай ёһоор өөрыгөө арюудхагты, тиигээд үһөө абхуулха мүнгэ тэдэндэ үгөөрэйгты. Тиигэбэл таниие Хуули сахина, тан тухай дэмы юумэ шашалдана гэжэ булта ойлгохо. 25Бусад арадуудай дундаһаа Христоосто һүзэглэһэн зон тухай хэлэбэл, тэдэ бидэнэй урда бэшэһэн захиралтые дүүргэхэ ёһотой: онгонуудта үргэжэ бузарлагдаһан боожо алаһан амитадай шуһа, мяха амсангүй, забхайрангүй байгаарайгты.

26Хойто үдэрынь Павел тэдэ дүрбэн хүнүүдээр хамта өөрыгөө арюудхаха, арюудхалгын ёһололой дууһаха үдэрые дуулгаха гэжэ һүмэ руу оробо. Тэрэ үдэр тэдэ зон өөһэдынгөө түлөө үргэл хэхэ ёһотой байгаа.

Павелые Һүмэ соо бариба

27Үлэһэн долоон үдэрэй үнгэржэ байхада, Аси можын еврейнүүд Павелые һүмэ соо харахадаа, зониие үймүүлжэ, тэрэниие бариба.

28– Израильшууд! Туһалыт! – гэжэ һүхирэлдэбэ. – Энэл хүн манай улад зон, Хуули, газар доромжолһон һургаал хүн бүхэндэ хаа хаанагүй номноно. Мүнөө грегүүдые һүмэдэ асаржа, нангин газар бузарлаа!

29Юундэ тиигээб гэбэл, урдань тэдэ зон хотодо Павелые Эфесэй Трофимтай хараһан байгаа, тиимэһээ Павел тэрээниие дахуулаад, һүмэ руу асараа гэжэ бодобо.

30Хөөрсэгэнэһэн хотын зон булта гүйлдэжэ ерээд, Павелые барижа, һүмэ сооһоо шэрэн гаргаба. Тэрэнэй хойноһоо һүмын үүдэ хааба. 31Тэдэ зоной Павелые алахаяа забдажа байхада, бүхы Иерусалим үймэжэ байна гэжэ түмэнэй даргада дуулгаба. 32Тэрэ дарга удангүй зуунай дарганартай, сэрэгшэдтэйгээ хамта тиишээ ошобо. Түмэнэй даргые сэрэгшэдтэйнь харахадаа, улад зон Павелые наншахаяа болибо. 33Түмэнэй дарга тэдэндэ дүтэлжэ, Павелые дабхар гэнжээр хүлихыень захираад, һүүлдэ тэрэнэй хэн байһан, юу хэһэн тухай һураашалба. 34Зон элдэб юумэ хашхаржа байба, гэбэшье шууяатай байһан дээрэһээ тэрэ дарга юушье ойлгобогүй. Тиимэһээ тэрэ Павелые хэрэм руу туужа абаашаад, тэндэ хаахыень захирба. 35Павелай гэшхүүрэй дээдэ табсан дээрэ гараад байхадань, зон бүри ехээр гааралдан дошхорбо, сэрэгшэд тэрэниие гар дээрээ үргөөд ябаха баатай болобо. 36Олон зон хойноһоонь дахалдан:

– Энээниие алагты! – гэжэ хашхаралдаба.

Павел өөрыгөө үмэглэнэ

37Хэрэмдэ оруулхынь урда тээ Павел түмэнэй даргада хандажа:

– Танда юумэ хэлэжэ болохо гү? – гэжэ грек хэлэн дээрэ һураба.

– Та грек хэлэ мэдэхэ гүт? – гэжэ урдаһаань түмэнэй дарга һураба. – 38Тиихэдээ та һая үймөө татажа, өөрынгөө хойноһоо сүл губи руу дүрбэн мянган алууршадые дахуулжа ошоһон египет хүн гүт?

39– Би еврей хүнби, – гэжэ Павел буруушааба, – Килики ороной Тарс гэдэг түб хотын эрхэтэн хүнби. Эдэ зонтой хөөрэлдэхыемни зүбшөөгыт даа, – гэжэ тэрэ гуйба. 40Дарга зүбшөөбэ. Павел гэшхүүрэй дээдэ табсан дээрэ зогсоод, аалин бологты гэжэ гараараа зондо харуулба. Булта аниргүй боложо, Павел еврей хэлэн дээрэ үгэ хэлэбэ:

Currently Selected:

Хэрэгүүд 21: BurBBL2024

Highlight

Copy