Хэрэгүүд 18

Павел Коринф хотодо

1Эдэ бүхэнэй һүүлдэ Павел Афины хотоһоо Коринф хүрэжэ ерэбэ. 2Тэндэ Павел Понтһоо уг гарбалтай Ааквила гэдэг еврейтэй, тэрэнэй Прискиилла һамгатай уулзаба. Клавдий хаанай бүхы еврейнүүдтэ Римые орхижо ошохыень захирһан хада, тэдэ һая Италиһаа ерэһэн байба. Павел тэдэнэйдэ айлшалба. 3Нэгэ ажал урлалгатай дээрэһээ хамта хүдэлбэ. Тэдэнэр майхануудые хэдэг байгаа. 4Павел еврейнүүдыешье, грегүүдыешье этигүүлхэеэ оролдон, суббото бүхэн мүргэлэй гэртэ номнодог һэн.

5Сила Тимофей хоёрой Македониһоо ерэхэдэнь, Павел Һайн Мэдээсэл номнолгодо өөрыгөө бүрин зорюулжа, Иисүүс гээшэмнай Бурханай табисуурта гэжэ еврейнүүдтэ баталан гэршэлжэ байгаа. 6Теэд тэдэ зоной арсалдажа, хэрүүл татахадань, Павел өөрынгөө хубсаһа гүбеэд:

– Бурханай абаралгаһаа арсажа байһандаа таанад өөһэдөө зэмэтэйт. Би зэмэгүйб, тиин мүнөө бусад арадуудта ошохомни, – гэжэ хэлэбэ.

7Тэдэ зониие орхижо, Павел Бурханда һүзэглэдэг Титий Юст гэдэг хүнэй гэртэ ошобо. Энэ хүнэй гэрынь мүргэлэй гэрэй хажууда һэн. 8Криисп гэжэ нэрэтэй мүргэлэй гэрэй дарга бүхы гэр бүлөөрөө Эзэндэ баһа этигээд байгаа. Номнол дуулаһан олон коринфууд этигэжэ, уһаар арюудхуулба.

9Нэгэтэ һүни Эзэн Павелай үзэгдэлдэ орожо, хэлэбэ:

– Бү ай, саг үргэлжэ номножо бай. 10Би шамтай байнаб, хэншье шамда хоро хүргэхэгүй, энэ хотодо Минии хүнүүд олон бшуу.

11Тиимэһээ Павел тэндэ жэл хахад соо Бурханай үгэ номнобо.

12Ахайя можын захирагшаар Галлиониие табихада, еврейнүүд хоорондоо үгэсэлдөөд, Павелай урдаһаа бодожо, тэрэниие сүүдлэхэеэ шэрэжэ асарба.

13– Энэ хүн манай Хуулида хэлэгдээгүй ёһоор Бурханда мүргэгты гэжэ хүнүүдые үгэдөө оруулжа байна, – гэлдэбэ тэдэ.

14Павелай амаа нээжэ үрдеэгүй байтар, Галлион еврейнүүдтэ хандажа:

– Ай, еврейнүүд, хэрбээ ямар нэгэн гэмтэ ябадал гү, али муу үйлэ тухай хэлэбэлтнай, би таанадые шагнаха байгааб. 15Харин үгэнүүдһээ, нэрэ алдарһаа боложо, өөһэдынгөө Хуулиин асуудалнуудаар арсалдаа юм бол, өөһэдөө шиидхэгты. Энэ асуудалаар танай заргаша байха аргамгүй, – гэбэ.

16Тиигэжэ хэлээд, Галлион заргын газарһаа тэдэ еврейнүүдые намнажархиба. 17Харин тэдэнь мүргэлэй гэрэй дарга Сосфендэ добтолон орожо, зарга шиидхэдэг газарай урда тээ тэрэниие зада наншаба. Гэбэшье Галлион эдэ бүгэдые ойндоо абаагүй.

Павел Антиох бусажа ерэбэ

18Павел үшөө олон үдэр тэндэ байгаад, удаань аха дүүнэртэйгөө хахасан, Прискиилла Ааквила хоёрые абаад, Сириин орон тамаржа ошобо. Хэзээ нэгэтэ үгэһэн дашаа тангаригайнь болзор дүүрэжэ, Павел Кенхрейдэ үһэеэ абхуулаа. 19Эфестэ тамаржа ерэхэдээ, Павел нүхэдөө орхёод, мүргэлэй гэртэ ошожо, еврейнүүдтэй хөөрэлдэбэ. 20Тэрэниие үлыт даа гэжэ еврейнүүдэй гуйхадань, тэрэ зүбшөөбэгүй.

21– Ойртожо байгаа һайндэрые би заатагүй Иерусалимда үнгэргэхэ ёһотойб. Хэрбээ Бурханай хүсэбэл, би таанадта дахин бусажа ерэхэб, – гэжэ хэлээд, тэдэнтэй хахасан, Эфесһээ тамаран ошобо.

22Тэрэ Кесари хүрэжэ ерээд, саашаа Иерусалим зорибо. Тэндэ һүзэглэгшэ зонтой уулзаад, Антиох ошобо. 23Хэдэн сагай туршада Антиохдо байгаад, Павел замаа саашань үргэлжэлүүлэн, бүхы Галаадай болон Фригиин нютагуудаар ябажа, шабинарай этигэлые батадхан бэхижүүлбэ.

Аполлос гэдэг хүн Эфес ба Коринф хотонуудта

24Александриһаа уг гарбалтай Аполлос гэдэг еврей хүн Эфестэ бии болобо. Тэрэ ехэ уран хэлэтэй, Нангин Бэшэг һайн мэдэдэг һэн. 25Аполлос Эзэн тухай һургаалые дуулаһан байгаа. Гансал Иоаннай уһан арюудхалга мэдэжэ байһаншье мүртөө ехэ оролдосотойгоор, үнэн зүбөөр Иисүүс тухай хөөрэдэг һэн. 26Тэрэ хүн мүргэлэй гэртэ зоригтойгоор номножо эхилбэ. Прискиилла Ааквила хоёр тэрэниие шагнаад, гэртээ урижа, Бурханай зам тухай тэрээндэ бүри тодорхойгоор хөөрэжэ үгэбэ. 27Тэрэнэй Ахайя ошохо гэжэ шиидэхэдэ, угтажа абахыень гуйһан бэшэг һүзэглэгшэд тэндэхи шабинарта бэшэбэ. Ахайя ерээд, Бурханай үршөөлөөр һүзэглэһэн зондо Аполлос ехэ туһалба. 28Юуб гэхэдэ, тэрэ олон зоной дунда еврейнүүдтэй заргалдан, тэдэниие буруушаажа, Нангин Бэшэгһээ хэһэгүүдые хэрэглэн, Иисүүс гээшэмнай Бурханай табисуурта мүн гэжэ баталба.

Currently Selected:

Хэрэгүүд 18: BurBBL2024

Highlight

Copy