Хэрэгүүд 17

Павел Сила хоёр Фессалоники хотодо

1Павел Сила хоёр Амфиполь, Аполлони хотонуудые дамжан, Фессалоникидэ хүрэжэ ерэбэ. Тэндэ мүргэлэй гэр бии һэн. 2Павел урдынгаа заншалаар тиишэ орожо, гурбан субботын туршада Нангин Бэшэгһээ жэшээнүүдые дурдан, 3Бурханай табисууртын ехэ зоболон дабажа, һүүлдэнь амидырха ёһотой байһан тухай зондо айладхаба. «Энэ Иисүүс эгээл Бурханай заяаһан Абарагша мүн», – гэжэ тобшолол гаргаба. 4Мүргэлэй гэртэ байһан хүнүүдэй зариманиинь этигэжэ, Павел Сила хоёртой нэгэдэбэ. Тэдэнһээ гадна ори ганса Бурханиие хүндэлдэг олон тоото грегүүд, нэрэ хүндэтэй эхэнэрнүүд Эзэндэ һүзэглөө.

5Гэбэшье еврейнүүд атаархан, гудамжын үгытэй зоной дундаһаа хэдэн хара һанаатай хүнүүдые шэлэжэ, олон зониие суглуулаад, хотынхидой дунда үймөө татаба. Тэдэ зон Павел Сила хоёрые олоод, зоной урда шиидхэхын тула Ясооной гэртэ сүмэрэн оробо. 6Тэдэ хоёрые оложо ядахадаа, тэдэнэр Ясоониие, баһа хэдэн һүзэглэгшэдые хотын захирагшадта шэрэжэ абаашаад:

– Эдэ түби дэлхэйе үймүүлһэн зон, мүнөө манай хотодо ерээд байна, – гэжэ хашхаралдаба. 7– Ясоон тэдэниие гэртээ байрлуулаа. Ондоо хүниие, Иисүүсые хаан гэжэ нэрлэхэдээ, тэдэнэр римэй хаанай зарлигые буруушаана.

8Эдэ бүхэниие дуулахадаа, хотын захирагшадшье, юрын зоншье айн һүрдэбэ. 9Ясооной, бусад һүзэглэгшэдэй барюулга орхиходонь лэ тэдэниие табяа һэн.

Павел Сила хоёр Бээрэ хотодо

10Һүни болохотой сасуу һүзэглэгшэд Павел Сила хоёрые Бээрэ хото руу ябуулба. Тэндэ хүрэжэ ерээд, тэдэ хоёр мүргэлэй гэртэ ошобо. 11Энэ хотын зон Фессалоникиинхидтэ орходоо Бурханай үгэ үлүү ехээр шагнаха дуратай байжа, номнол анхаралтайгаар хүлеэн абаад, Павел Сила хоёрой хэлэһэниинь үнэн гү гэжэ мэдэхын тула Нангин Бэшэгые үдэр бүхэн шудалжа байба. 12Тиигэжэ тэдэ зоной олониинь этигэбэ. Тэдэнэй дунда олон нэрэ хүндэтэ грек эхэнэрнүүд, эрэшүүл байгаа. 13Гэбэшье Фессалоникидэ ажаһуудаг еврейнүүд Бурханай үгэ Бээрэдэшье Павел номноно гэжэ дуулахадаа, баһа тиишэ ошожо, зониие үймүүлэн хүлгөөбэ. 14Һүзэглэгшэд дары Павелые далай хүргэжэ ошобо, харин Сила Тимофей хоёрынь Бээрэдэ үлэбэ. 15Павелые үдэшэһэн хүнүүд тэрэниие Афины хүргөөд, Сила Тимофей хоёр аргатай байбал, түргөөр ерэг гэһэн Павелай захиралта абамсаараа, һөөргөө бусаба.

Павел Афины хотодо

16Павел тэрэ хоёроо Афиныдэ хүлеэжэ байхадаа, хотоор дүүрэн бодхоогдоһон онгонуудые хаража гашуудаба. 17Тэрэ мүргэлэй гэртэ еврейнүүдтэй болон бусад арадуудай дундаһаа Бурханда һүзэглэһэн зонтой, мүн талмай дээрэ уулзаһан хүн бүхэнтэй үдэр бүри хөөрэлдэдэг байгаа. 18Эпикур болон стоик#17:18 Эпикур болон стоик – грег гүн ухаанай һургаалнууд. һургаалай гүн ухаантанууд тэрээнтэй уулзажа:

– Энэ дэмы шашагша юу хэлэхэ һанаатайб? – гэжэ нэгэ зариманиинь хэлэжэ байба.

– Үгы, энэшни хариин бурхадууд тухай номноно ха, – гэжэ нүгөөдүүлынь хэлэбэ.

Юундэ тиигэжэ хэлсээб гэхэдэ, Павел Иисүүс тухай, Тэрэнэй амидыралга тухай номноо. 19Гүн ухаантанууд Павелые Ареопаг хүтэлжэ абаашаад:

– Танай номноһон шэнэ һургаал маанадта шагнажа болохо гү? – гэжэ һурабад. – 20Та нэгэл жэгтэй һонин юумэ һонорто дуулганат. Тиимэһээ энэ юун ааб гэжэ бидэ мэдэхэ һанаатайбди.

21Афины хотынхид, тэндэ ажаһуугша хариин зон шэнэ үзэлнүүдые шагнан, тэдэниие зүбшэн хэлсэһээр лэ сүлөө сагаа үнгэргэдэг байгаа.

22Павел Ареопагай дунда зогсожо:

– Афинынхин, таанарай аргагүй һүзэгтэй зон байхые би ажаглажа байнаб. 23Юундэб гэхэдэ, танай мүргэл шүтөөнүүдые хаража байхадаа, «мэдэгдээгүй Бурханда» гэжэ бэшээтэй үргэлэй шэрээ би оложо харааб. Танай мэдээгүй аад, шүтэжэ мүргэжэ байһан эгээл тэрэ Бурхан тухай би номножо байнаб. 24Юртэмсэ дэлхэйе, тэрээн дээрэ оршодог хамаг юумэ бүтээһэн Бурхан газар тэнгэриин Эзэн юм, гараар бодхоогдоһон һүмэдэ амидардаггүй юм. 25Хүнэй ямаршье туһаламжа Бурханда хэрэггүй. Тэрэ Өөрөө амитай бүхы юумэндэ ами наһа, амисхал, бүгэдые үгэнэ. 26Бүхы дэлхэйгээр нютагжахынь тула амидарха саг болзорыень болон байрлаха хилэ хизаарыень тогтоон, ори ганса хүнһөө бүхы хүн түрэлхитэниие Тэрэ бүтээгөө. 27Бурхан хүн бүхэнһөөмнай холо бэшэ гэжэ мэдэрэн, Тэрэниие бэдэржэ олохын тула эдэ бүгэдые зохёогоо юм. 28«Бидэнэр Бурханай ашаар амидаржа, хүдэлжэ, ажаһуужа байнабди». Танай шүлэгшэдэй зариманиинь баһал: «Бидэ Тэрэнэй угсаатан гээшэбди», – гэжэ хэлээ бэлэй.

29Хэрбээ бидэ Бурханай угсаатан һаа, Бурхан гээшэмнай хүнэй һанаашалгаар алтаар, али мүнгөөр, али шулуугаар дүрсэлһэн уран бүтээлэй урлалга гэжэ бодохо ёһогүйбди. 30Бурханиие мэдээгүй сагта Бурхан эдэ бүгэдые хүнүүдтэ хүлисэдэг байгаа. Харин мүнөө хаа хаанагүй ажаһуудаг зониие нүгэл үйлэдэхэеэ болихыень Бурхан захирна, 31юундэб гэхэдэ, Бурхан юртэмсэ дэлхэйе үнэн зүб зарга шиидхэбэреэр шүүхэ үдэрөө тогтоогоо, тиин Зарга шүүгшэеэ Тэрэ томилон табяа. Тэрэниие Бурхан амидыруулжа, бүхы хүнүүдтэ гэршэ баримта болгон үгөө.

32Үхэһэн хүнүүдые амидыруулһан тухай дуулахадаа, нэгэ зарим зон ташаганаса энеэлдэбэ, нүгөө зариманиинь:

– Бидэ таниие үшөө дахин шагнуужамди, – гэлдэбэ.

33Тиихэдэнь Павел тэдэниие орхижо ошоо. 34Гэбэшье хэдэн хүн Эзэндэ этигэжэ, Павелай шабинар болобо. Тэдэнэй дунда Ареопагай гэшүүн Дионисий, Дамариида гэжэ нэрэтэй эхэнэр болон бусадшье зон байгаа.

Currently Selected:

Хэрэгүүд 17: BurBBL2024

Highlight

Copy