Хэрэгүүд 15

Иерусалимда болоһон суглаан

1Иудейһээ Антиохдо хэдэн хүн ерээд, «Моисейн захиһан ёһоор бэлгээ отолуулаагүй һаа, таанад абарагдахагүйт», – гэжэ һүзэглэгшэдые һургаба. 2Энэ асуудалай талаар Павел Барнааба хоёр тэдэнтэй нилээд заргалдаба, арсалдаба. Тиимэһээ энэ асуудалые элшэнэртэй ба бүлгэмэй хүтэлэгшэдтэй зүбшөөд ерэхыень Павел Барнааба хоёрые хэдэн һүзэглэгшэдтэй хамта Иерусалим эльгээхэ гэжэ шиидэбэ. 3Антиохой һүзэглэгшэдэй бүлгэмэй эльгээһэн зон Финикиин ба Самариин нютагуудаар ябахадаа, бусад арадуудай Бурханда яажа хандаһан тухай хөөрэжэ байба, тиихэдэнь бүхы һүзэглэгшэд угаа ехээр баярлажа байба. 4Иерусалимда ерэхэдэнь, тэдэниие һүзэглэгшэдэй бүлгэм, элшэнэр, бүлгэмэй хүтэлэгшэд уриба. Хүрэжэ ерэһэн зон Бурханай тэдэнээр бүтээлгэһэн бүгэдые хөөрэжэ үгөө. 5Иисүүстэ этигэһэн фарисейнүүдэй дундаһаа хэдэн хүн үгэ хэлэхэдээ:

– Еврей-бэшэнүүд бэлгээ баһа отолуулха ёһотой, Моисейн Хуули сахихыень тэдэниие уялгаха хэрэгтэй, – гэжэ баадхабад.

6Элшэнэр, бүлгэмэй хүтэлэгшэд энэ асуудалаар зүбшэн хэлсэхэ гэжэ сугларба. 7Арсалдаан гараһаар нилээд удаан сагай үнгэрһэн хойно Пётр бодожо:

– Аха дүүнэрни! – гэбэ. – Бусад арадуудай дунда Һайн Мэдээсэл номнон этигэл түрүүлхымни тула Бурхан үни гэһээр намайе таанадай дундаһаа шэлэжэ абаа һэн гэжэ һайн мэдэнэт. 8Хүнүүдэй һанал бодол мэдэдэг Бурхан бидэндэ үгэһэндөөл адляар тэдэндэ Арюун Һүлдэ үгэхэдөө, Өөрынгөө үршөөл хайра баһа бусад арадуудта хайрлаба гээшэ. 9Бурхан маанадай болон бусад арадуудай хоорондо ямаршье илгаа гарганагүй, юундэб гэхэдэ, тэдэнэй зүрхэ сэдьхэл этигэлээр арюудхагдаа. 10Тиигээд үбгэ эсэгэнэртэмнайшье, маанадташье даагдахагүй хүндэ ашаае шабинарай хүзүүндэ тээхэеэ оролдон, Бурханиие мүнөө юундэ туршаа юмта. 11Бидэ гансал Эзэн Иисүүсэй үршөөл хайраар абарагдаабди гэжэ этигэнэбди, тиин тэдэшье баһа Иисүүсэй үршөөл хайраар абарагдаа.

12Сугларһан зон абяагүй болоод, ямар гайхамшагта дүлгэ тэмдэгүүдые, үйлэ хэрэгүүдые Бурхан Павел Барнааба хоёрой гараар бусад арадуудай дунда бүтээгөө юм гэжэ тэдэ хоёрой хөөрэһые шагнаба. 13Тэдэнэй хөөрэжэ дүүргэхэдэ, Яков хэлэжэ эхилбэ:

– Аха дүүнэрни, намайе шагныт! 14Бурханай Өөрын нэрэ алдараар анха түрүүшынхиеэ бусад арадуудай дундаһаа хүнүүдые шэлэжэ абаһан тухай Симон бидэндэ хөөрэжэ үгөө. 15Лүндэншэдэйшье үгэнүүд эдэ бүхэниие тобшолно:

16«Тэрэнэй һүүлдэ Би бусажа ерээд,

Давидай унаһан майханиие дахин бодхоохоб.

Һандаран һалаад байһан тэрэниие бодхоожо,

дахин шэнээр һэргээхэб.

17-18Тиихэдэ Минии хүнүүд болохоор

дуудуулһан бусад яһатан

болон ондоошье улад зон

Эзэниие бэдэрхэ.

Эртэ урда сагһаа энээн тухай дуулгаһан

Эзэн иигэжэ хэлэнэ».

19Тиимэһээ Бурханда хандажа байһан еврей-бэшэ хүниие бидэ хорихо, зобоохо ёһогүйбди гэжэ тоолоноб. 20Харин онгонуудта үргэжэ бузарлагдаһан хоол барихыень, забхайрхыень, боожо алаһан амитадай мяха, шуһа амсахыень хориһон бэшэг бэшэжэ, тэдээндэ эльгээхэ ёһотойбди. 21Юундэб гэхэдэ, Моисейн Хуули эртэ урда сагһаа хото бүхэндэ номногдожо, мүргэлэй гэрнүүдтэ суббото бүхэндэ уншагдана ха юм.

Бусад арадуудай дундаһаа һүзэглэһэн зондо эльгээгдэһэн бэшэг

22Тиигээд элшэнэр, бүлгэмэй хүтэлэгшэд һүзэглэгшэдтэйгөө хамта хэдэн хүниие өөһэдынгөө дундаһаа шэлэжэ абаад, Павел Барнааба хоёртой Антиох руу эльгээхэ гэжэ шиидэбэ. Тэдэ һүзэглэгшэдэй дундаһаа нэрэ хүндэтэй Баршаббаа гэжэ ара нэрэтэй Иудые, мүн Силые шэлэжэ абаад, 23тэдэнэй дамжуулха ёһотой иимэ бэшэг бэшэбэд: «Элшэнэр, Иерусалимай бүлгэмэй хүтэлэгшэд болон бүхы һүзэглэгшэд Антиох, Сири, Киликидэ ажаһуудаг бусад арадуудай дундаһаа Христоосто һүзэглэһэн зониие амаршална. 24Зарим һүзэглэгшэднай манһаа абаагүй захиралтаар һанал бодолыетнай һамааруулна, таанадые зобооно гэжэ бидэ дуулаабди. 25-26Тиимэһээ манай Эзэн Иисүүс Христоосто алба хэжэ өөрынгөө ами наһые хайрладаггүй, манда ехэ зохистой Барнааба Павел хоёртой хэдэн хүнүүдые шэлэжэ эльгээхэ гэжэ бидэ зүбшэбэбди. 27Иуда Сила хоёрые, эдэ бүгэдые таанадта тайлбарилжа үгэхыень эльгээнэбди. 28-29Онгонуудта үргэжэ бузарлагдаһан хоол, боожо алаһан амитадай шуһа, мяха амсангүй, забхайрангүй байгаарайгты. Энээнһээ гадна ондоо захиралта таанадта үгэхэгүй гэжэ Арюун Һүлдэ болон бидэнэр шиидэбэбди. Дээрэ дурдагдаһан юумэнүүдые сахижа байбал, бүхы юумэн һайн байха. Баяртай!»

30Антиох хүрэжэ ерээд, эльгээгдэһэн хүнүүдынь һүзэглэгшэдэй бүлгэм суглуулаад, үнөөхи бэшэгээ дамжуулжа үгэбэ. 31Энэ урмашуулһан бэшэг уншаад, зон угаа ехээр баярлаа. 32Иуда Сила хоёр лүндэншэд байһан туладаа үгэ хэлэжэ, һүзэглэгшэдые зоригжуулан урмашуулба. 33Тиигээд тэдэ хоёр хэдэн сагай туршада Антиохдо байба, һүүлдэнь һүзэглэгшэ аха дүүнэрынь тэдэниие үреэгөөд, элшэнэртэ һөөргэнь ябуулба#15:33 Зарим эхэ бэшэгүүдтэ иимэ хэһэгээр үргэлжэлэгдэдэг: 34 Сила тэдээнтэй үлэхэ гэжэ шиидэбэ, тиимэһээ гансал Иуда ябаа..

35Павел Барнааба хоёр Антиохдо үлэбэ. Тэдэ бусад олон һүзэглэгшэдөөр хамта улад зониие һургажа, Эзэнэй Һайн Мэдээсэл номножо байбад.

Павел Барнааба хоёр хахасабад

36Нэгэ хэды сагай үнгэрхэдэ Павел Барнаабада:

– Эзэнэй Үгэ ямар хотонуудта номноо һэмди, тэдэ хотонуудаар ябаад, тэндэ ажаһууһан аха дүүнэрээ эрьеэд, хэрэгүүдынь ямархан бэ гэжэ харая, – гэһэн дурадхал оруулба.

37Барнааба болбол Марк гэжэ нэрэтэй Иоанные абажа ябалсаха һанаатай байгаа. 38Гэбэшье Памфилида тэдэниие хаяжа, хэрэгыень бүтээлсэхэеэ арсаһан Маркые Павел абажа ябаха дурагүй байгаа. 39Энээн дээрэһээ Павел Барнааба хоёр зүрилдөөд хахасабад. Барнааба Маркые дахуулаад, Кипр арал руу тамаран ошобо. 40Харин Павел Силые замай нүхэр болгон абаба. Аха дүүнэрынь тэдэниие Эзэнэй үршөөл хайрада даалгажа табяа һэн. 41Тэдэ Сириин, Киликиин хотонуудаар аха дүүнэрээ батадхан ябабад.

Currently Selected:

Хэрэгүүд 15: BurBBL2024

Highlight

Copy