Хэрэгүүд 14

Икоони хотодо

1Павел Барнааба хоёрой Икоонидо мүргэлэй гэртэ орожо, этигэл түрүүлмээр хөөрэхэдэнь, еврейнүүд болон бусад арадууд олоороо этигэбэ. 2Харин этигээгүй еврейнүүд еврей-бэшэнүүдэй һанаа бодолыень һамааруулжа, тэдэниие һүзэглэһэн аха дүүнэртээ эсрэг һанаатай болгобо. 3Гэбэшье Павел Барнааба хоёр нилээд удаан саг соо тэндэ байжа, Эзэн тухай зоригтойгоор номнобо. Харин Эзэн Өөрынгөө талаһаа Бурханай үршөөл хайра тухай номнолыень баталан, тэдэндэ гайхамшагта хэрэгүүдые болон дүлгэ тэмдэгүүдые үзүүлхэ арга олгожо байба. 4Хотынхидой һанаа бодолынь хубааржа, зарим нэгэниинь еврейнүүдые, нүгөө зариманиинь элшэнэрые дэмжэдэг болобо.

5Бусад арадууд, еврейнүүд хотын захирагшадтай хэлсэжэ, тэдэниие шулуудаха һанаатай байна гэжэ элшэнэр дуулахадаа, 6Ликаони руу тэрьедэжэ, Листра ба Дээрбэ хотонуудта, мүн оршон тойронхи нютагуудта 7Һайн Мэдээсэлые тунхаглаба.

Павел Барнааба хоёр Листра ба Дээрбэ хотонуудта

8Листрада түрэхынгөө хүл муутай, хэзээдэшье хүлөөрөө гэшхэжэ ябаагүй, һуумгай хүн ажаһуугаа. 9Нэгэтэ тэрэнэй Павелай номнол шагнажа һуухадань, Павел тэрэниие анхаралтайгаар шэртэжэ, эдэгэхээр ехэ этигэлтэй байхыень хараад:

10– Хүл дээрээ бодо! – гэжэ шангаар ооглобо.

Үнөөхинь хүл дээрээ һүрэн бодоод ябашаба. 11Павелай юу бүтээһые харахадаа, улад зон өөһэдынгөө ликаон хэлэн дээрэ:

– Хүнэй бэе бэелжэ маанадта бурхад бууба, – гэжэ һүхирэлдэбэд.

12Тэдэ зон Барнаабые Зевс гэжэ, Павелые ехээр юумэ хэлэдэг байһанайнь түлөө Һэрмээс гэжэ нэрлэбэд. 13Хотоһоо холо бэшэ Зевсын һүмэ оршодог байгаа. Зевсын тахилшан зоноор хамта бухануудые, баглаа сэсэгүүдые тэдэндэ үргэл болгон бариха һанаатай байгаа.

14Барнааба Павел хоёр энээн тухай дуулахадаа, хубсаһа хунараа шуу татажа, зондо гүйжэ ошоод, тэдэниие хорин хашхаралдабад:

15– Хүнүүд, юу хэжэ байнабта? Бидэ таанадтал адли юрын хүнүүд гээшэбди! Таанадай онгонуудһаа зайсажа, дээдэ огторгой, газар, далай, досоонь байгааша бүхы юумэ бүтээһэн Амиды Бурханда һүгэдэн хандахынтнай тула бидэ таанадта Һайн Мэдээсэл асараабди. 16Үндэһэ яһатануудта өөһэдынгөө замаар ябахыень Бурхан урдань буруушаадаггүй һэн. 17Тэрэ үедэ Бурхан дэмбэрэлтэ хэрэгүүдые бүтээн, Өөр тухайгаа гэршэлжэ, тэнгэриһээ хура бороо, үрэжэлтэ сагай уларил хайрлажа, эдеэ хоолоор хангажа, зүрхэ сэдьхэлыетнай баяр баясхалангаар дүүргэдэг байгаа.

18Павел Барнааба хоёр иимэ хүүрээрээ тахил тахиха һанаатай зониие арай гэжэ зогсообо.

19Һүүлдэ Антиох, Икоониһоо еврейнүүд ерэжэ, хотынхидые элшэнэрэй урдаһаа эсэргүүсүүлбэ. Тиигээд Павелые шулуудажа, тэрэниие үхөө гэжэ һанаад, хотоһоо шэрэжэ гаргаад хаяба. 20Павелые тойрон шабинарайнь зогсоходо, тэрэ бодожо, хото руу оробо. Хойто үдэрынь тэрэ Барнаабатай хамта Дээрбэ ошобо.

Сириин Антиох бусажа ерэлгэ

21Тэдэ Дээрбэдэ Һайн Мэдээсэл номножо, олон хүниие Эзэндэ хандуулба. Һүүлдэнь Листра, Икоони, Писидиин Антиох хотонуудые эрьежэ, 22ябаһан газартаа шабинараа урмашуулан, зоригжуулан, этигэлээ алдангүй, харин бэхижүүлжэ байхыень уряалба. Бурханай хаан орондо орохынгоо урда тээ таанад аргагүй ехэ зоболон дабахат гэжэ тэдэ хэлэбэ. 23Павел Барнааба хоёр һүзэглэгшэдэй бүлгэм бүхэндэ хүтэлэгшэдые томилжо, масаглаад, зальбараад, этигэһэн Эзэндэнь тэдэ һүзэглэгшэдые даалгаба.

24Тэдэнэр Писидиин можоор ябажа, Памфилиин можо хүрэжэ ерэбэд. 25Тиигээд Бурханай Үгэ Пээргэдэ номноод, удаань Аттали хото зорибо. 26Мүнөө тэдэ Атталиһаа Антиох руу бусажа тамарба. Түрүүн Антиохдо байхадань, ажалаа ябуулхадань Бурханай үршөөл хайра оршохо болтогой гэжэ зальбаран, Павел Барнааба хоёрые ябуулаа бэлэй. Мүнөө тэдэнэр үнөөхи ажалаа бүтээгөөд, бусажа ерэбэд.

27Антиохдо ерээд, бүхы һүзэглэгшэдые суглуулжа, Бурханай юу бүтээлгэһыень болон Тэрэнэй бусад арадуудта этигэлэй үүдэ нээжэ үгэһыень тэдэнэр хөөрэжэ үгэбэ. 28Тиигээд шабинартай хамта нилээд удаан байлсаба.

Currently Selected:

Хэрэгүүд 14: BurBBL2024

Highlight

Copy