Хэрэгүүд 13

Барнааба Саул хоёрые Һайн Мэдээсэл номнохыень эльгээбэ

1Антиохой һүзэглэгшэдэй бүлгэмдэ зарим лүндэншэд, багшанар: Барнааба, Нигер гэһэн ара нэрэтэй Симеон, Хэрээн хотын Лукий, Саул, бага байхадаа хаанай хүбүүн Иродтэй хүмүүжүүлэгдэһэн Мэнааһэм гэгшэд бии һэн.

2Нэгэтэ тэдэнэй Эзэндэ алба хэжэ, масаглажа байхада Арюун Һүлдэ тэдээндэ:

– Ямар үүргэ даалган Барнааба Саул хоёрые дуудаа һэнби, тэрэ хэрэгыемни бүтээхыень тэдэ хоёрые Намда табигты, – гэжэ хэлэбэ.

3Масаглажа, мүргэл зальбаралаа дүүргэһэн хойноо тэдэ зон үнөөхи хоёрые гараараа адислан табиба.

Кипр аралда

4Арюун Һүлдын нүлөөгөөр харгы замда гараһан Барнааба Саул хоёр Селевки хүрэжэ ерээд, тэндэһээ Кипр аралда тамаран ошобо. 5Саламин хүрэжэ ерээд, тэдэнэр мүргэлэй гэрнүүдтэ Бурханай Үгэ номнобо. Тиихэдэ тэдэнтэй Иоанн ябалсажа, туһалжа байгаа.

6Бүхы Кипр аралые гаталан, тэдэ Пафос хото хүрэжэ ерэбэд. Тэндэ Бар-Иисус гэжэ нэрэтэй эльбэшэ, хуурмаг лүндэншэ еврей хүнтэй уулзаба. 7Бар-Иисус аралые захирагша Сергий Павел гэдэг эрдэм ухаа ехэтэй хүнэй нүхэрынь һэн. Сергий Павел гээшэнь Бурханай үгэ дуулаха дуратай байжа, Барнааба Саул хоёрые өөртөө дуудаба. 8Теэд Элиим гэжэ (энэнь тэрэнэй грек нэрэ) эльбэшэн захирагшын этигэхэдэ һаалта хэжэ, шабинарта эсэргүүсэбэ. 9Саул (ондоогоор Павел) Арюун Һүлдөөр дүүрэн, Элиим тээшэ анхаралтайгаар шэртэн хараад:

10– Ши, худал хуурмагай бэелэл, шолмосой хүбүүн, али бүхы үнэн юумэнэй дайсан! Эзэнэй арюун сэхэ замые саашадаашье хазагайруулжа ябахаб гэжэ һанана гүш? 11Мүнөө Эзэнэй гар шам дээрэ зогсоо. Ши һохор боложо, хэдэн сагай туршада наранай гэрэл үзэхэгүйш, – гэжэ хэлэбэ.

Тэрэ дороо Элиимые боро хараан бүрхөөн хушажа, хүтэлжэ ябаха хүниие бэдэрэн, тэрэ иишэ тиишээ тэмтэрбэ. 12Ушарһан бүхэниие хараһан захирагша ехээр гайхан, Эзэн тухай һургаалда этигээ һэн.

Писидиин Антиохдо

13Павел замайнгаа нүхэдтэй Пафосһаа тамаржа гараад, Памфилиин нютагай Пээргэ хото хүрэжэ ерэбэ. Тэндэ Иоанн тэдэниие орхёод, Иерусалимаа бусажа ошоо һэн. 14Харин үлэһэн нүхэдынь Пээргэһээ Писидиин Антиох зорижо ерээд, субботын үдэр мүргэлэй гэртэ орожо һуубад. 15Хуулиин, лүндэншэдэй номһоо хэһэгүүдые уншаһанай хойно мүргэлэй гэрэй ахамадууд:

– Аха дүүнэр, хүн зониие урмашуулхаар юумэн танда байгаа һаа, хэлыт даа, – гэжэ айлшадта хандаба.

16Павел өөдөө бодожо, шэмээгүй бологты гэжэ гараараа харуулаад:

– Израильшууд, Бурханиие хүндэлэгшэд, шагныт даа! 17Израилиин арад зоной Бурхан манай үбгэ эсэгэнэрые шэлэжэ абаад, хариин газарта, Египедтэ ажаһуухадань, тэдэниие агууехэ үндэһэн болгоо. Тиигээд хүсэн түгэлдэр гараараа Бурхан тэдэниие Египедһээ гаргажа, 18дүшэн жэлэй туршада сүл губида тэдэнтэй тэсэбэритэй байгаа. 19Ханаһаанай газар нютагта долоон үндэһэтэниие тэрэ һүнөөгөөд, газарыень манай үбгэ эсэгэнэртэ эзэлжэ байхаарнь үгөө һэн. 20Иигэжэ дүрбэн зуун табин жэл үнгэрөө.

Тэрэнэй удаа Бурхан заргашадые үгөө. Заргашад лүндэншэ Самуилай үе саг хүрэтэр захираа. 21Һүүлдэ хааниие манда үгыт гэжэ израильшуудай гуйхадань, Бурхан тэдэндэ Бэньямиинэй угсаатанай Киишэй Саул хүбүүе үгэбэ, тиин тэрэнь дүшэн жэлэй туршада хаан шэрээдэ һууба. 22Тэрэниие тушаалһаань халажа, Бурхан Давидые израильшуудай хаан болгожо табяа. Тиин тэрээн тухай Бурхан: «Би Ишайн хүбүүн Давидые оложо абааб, тэрэ минии һанаа сэдьхэлдэ таарама байна, тэрэ захиралтануудыемни бултыень дүүргэхэ», – гэжэ хэлээ юм. 23Бурхан найдуулһан ёһоороо Давидай үри һадаһан болохо Абарагша Иисүүсые Израильда эльгээгээ. 24Тэрэнэй заларан ерэхые Иоанн уридшалан айладхажа, нүгэл үйлэдэхэеэ болёод, уһаар арюудхахыень бүхы Израилиин зониие уряалаа. 25Ажалаа түгэсхэхэ хирэдээ Иоанн: «Намайе хэн гэжэ һананабта? Би таанадай хүлеэһэн хүн бэшэлби. Таанадай хүлеэһэн Нэгэн минии хойноһоо заларжа ябана, тиин би Тэрэнэй гуталайнь ооһорыешье тайлаха эрхэгүйб!» – гэжэ хэлээ һэн.

26Аха дүүнэрни! Абраһаамай үри һадаһад, Бурханиие хүндэлэгшэд, абаралга тухай энэ мэдээсэл бидэндэ эльгээгдэһэн байна. 27Иерусалимда ажаһуугшад ба захирагшад Бурханай табисууртые таняагүй, Тэрэниие гэмнээд, суббото бүхэндэ уншадаг лүндэншэдэй ном соо бэшэгдэһые бүтээгээ. 28Тэрэниие саазалха нэгэшье баримта олонгүй, тэдэ зон Иисүүсые саазала гэжэ Пиладые баалаа. 29Тиигэжэ тэдэнэр Иисүүс тухай Нангин Бэшэг соо бэшээтэй зүйл бүхэниие бэелүүлбэ. Тэдэнэр Иисүүсые хэрээһэнһээ буулгажа, агы нүхэндэ хүдөөлүүлээ һэн. 30Гэбэшье Бурхан Тэрэниие амидыруулаа. 31Галилейһээ Иерусалим хүрэтэр Тэрээнтэй хамта ерэлсэһэн хүнүүдтэ олон үдэрэй туршада Тэрэ үзэгдөө, тиимэһээ тэдэнь мүнөө хүнүүдтэ Иисүүс тухай баталан гэршэлнэ. 32Харин бидэ манай үбгэ эсэгэнэртэ үгтэһэн үгэ бүтэбэл даа гэжэ Һайн Мэдээсэлые айладхажа байнабди. 33Бурхан Иисүүсые амидыруулхадаа, бидэндэ, тэдэнэй үри хүүгэдтэ найдуулһанаа бүтээгөө. Энээн тухай «Бурханай дуунай номой» хоёрдохи дуун соо иигэжэ бэшэгдэнхэй:

«Ши Минии хүбүүнши,

мүнөөдэр Би эсэгэшни болооб».

34Бурханай Тэрэниие амидыруулһан, гутаан үмхирүүлээгүй тухай:

«Давидта найдуулһан үреэлнүүдээ

Би таанадай дунда бэелүүлхэб», – гэжэ бэшээтэй байдаг.

35Тиимэһээ Нангин Бэшэгэй ондоо газарта:

«Та Өөрын шударгы Зарасые

шалзараажа үмхирүүлхэгүйт», – гэжэ хэлэгдэнэ.

36Давид бүхы наһаараа Бурханай уг зорилгые бүтээжэ, һүүлдэ наһа барахадаа үбгэ эсэгэнэртэйгээ суг хүдөөлүүлэгдөө, бэень эсэстээ шалзаран үмхирөө. 37Харин Бурханай амидыруулһан Нэгэн шалзаран үмхирхэгүй. 38-39Тиимэһээ, аха дүүнэрни, Иисүүсээр дамжуулан, Бурхан таанадта нүгэл хүлисэхэ тухай айладхаа гэжэ мэдэгты. Моисейн Хуули сахяадшье хүлисүүлхэ аргагүй нүгэлнүүдые Иисүүстэ этигэдэг хүн бүхэндэ Иисүүсэй хүсөөр тэрэ нүгэлнүүдынь хүлисэгдэбэ. 40Лүндэншэдэй иигэжэ хэлэһэн үгэнүүд таанадтай тохёолдохогүйн тула таанад һэргэг байгты:

41«Харагты даа, шоглон гасаалагшад,

гайхалдагты, хосорогты!

Таанадта дуулгаашье һаа,

танай үнэншэхөөр бэшэ

Агууехэ үйлэ хэрэг

эдэ үдэрнүүдтэ

Би бүтээхэмни».

42Павел Барнааба хоёрой мүргэлэй гэрһээ гаража байхада, һая хөөрэһэн юумэеэ ерэхэ субботодо үргэлжэлүүлэн хэлэхыень хүнүүд гуйба. 43Сугларһан зоной таража эхилхэдэ, еврейнүүд болон еврейнүүдэй шажанда этигэһэн олон хүнүүд Павел Барнааба хоёрые дахаба, харин тэдэ хоёрынь саашадаашье Бурханай үршөөл хайрада амидархыень тэдэ зониие идхан һургаба.

44Нүгөө субботодо бүхы хотын зон тооной Эзэнэй Мэдээсэл шагнахаяа сугларба. 45Еврейнүүд иимэ олон зониие харахадаа, ехээр атаархажа, Павелые муудхан, тэрээнтэй арсалдаба. 46Павел Барнааба хоёр зоригтойгоор иигэжэ хэлэбэ:

– Бидэ Бурханай үгэ анха түрүүн таанадта соносхохо ёһотой байгаабди. Харин энэ үгые таанадай буруушаажа, мүнхын амидаралда хүртэхөөр бэшэбди гэжэ өөһэд тухайгаа һанаа юм һаатнай, бидэ мүнөө бусад арадуудта ошохомнай. 47Эзэн бидэндэ:

«Газар түбиин заха хизаар хүрэтэр

абаралга асархыншни тула

Би шамайе бусад арадуудай

гэрэл туяа болгон табяаб», – гэжэ захяа һэн.

48Хэлэһыень дуулахадаа, бусад арадууд ехээр баярлажа, Эзэнэй үгые алдаршуулба, тиигээд мүнхэ ажамидархаар шэлэгдэһэн хүнүүд булта һүзэглэбэ ха.

49Бурханай үгэ энэ орон нютагаар хаа хаанагүй дэлгэрэн тараа. 50Гэбэшье еврейнүүд хотын түрүү хүнүүдые болон Бурханда һүзэглэһэн хүндэтэ эхэнэрнүүдые Павел Барнааба хоёрто эсэргүү һанаатай болгобо. Тэдэ хоёрые хашан мүрдэжэ, нютагһаан намнаба. 51Тиихэдэнь Павел Барнааба хоёр хүлдөө халдаһан тооһо гүбижэ, Икоони руу ошобо. 52Тэрэ үедэ Антиохдо байһан шабинар баяр баясхалангаар, Арюун Һүлдөөр дүүрээд байба.

Currently Selected:

Хэрэгүүд 13: BurBBL2024

Highlight

Copy