Хэрэгүүд 1

1-2Хүндэтэ Теофил! Иисүүсэй хэрэгүүдээ бүтээжэ эхилһэн сагһаа тэнгэри өөдэ дэгдэхэ саг хүрэтэрөө юу хэжэ, юундэ хүнүүдые һургажа байһан тухайнь би түрүүшынгээ ном соо бэшээ һэнби. Тэнгэри өөдэ дэгдэхынгээ урда тээ Иисүүс Арюун Һүлдын хүсөөр шэлэжэ абаһан элшэнэртээ захяа үгөө. 3Хэрээһэндэ хадагдажа зоболон эдлэһэнэйнгээ удаа дүшэн хоногой туршада Тэрэ Өөрынгөө амиды байһые баталан, элшэнэртээ оло дахин ерээ. Элшэнэрынь Тэрэниие харадаг, тиихэдэ Иисүүс тэдэндээ Бурханай хаан орон тухай хөөрэдэг һэн. 4Нэгэтэ элшэнэрээрээ хамта байхадаа, Иисүүс захяа болгон хэлэбэ:

– Иерусалимда байгты. Минии түрүүн хэлэһэнээр Эсэгымни таанадта үгэхэб гэжэ найдуулһан юумые хүлеэжэ байгты. 5Иоанн уһаар арюудхаа, харин таанад һаядаа Арюун Һүлдөөр арюудхадаг болохот.

Иисүүсэй дэгдэлгэ

6Элшэнэр суглараад, Иисүүстэ хандан:

– Эзэн аа, Та тиихэдээ Израилиин хаан орониие сүлөөлжэ, захирха эрхыень бусаахатнай гү? – гэбэ.

7– Таанарта Эсэгын эрхэ мэдэлээр тогтоогдоһон саг болзорой ерэхые мэдэхэ хэрэггүй. 8Гэбэшье Арюун Һүлдын танай дээрэ буухада, таанад хүсэтэй боложо, Иерусалимай, бүхы Иудейн болон Самариин нютагуудһаа эхилээд, газарай заха хизаар хүрэтэр Минии гэршэнэр болохот, – гэжэ харюусаба.

9Тиигэһээр Иисүүс элшэнэрэйнгээ хаража байтар тэнгэри өөдэ дэгдэжэ захалба, тииһээр үүлэндэ халхалуулба.

10Дэгдэхыень хаража, тэнгэри өөдэ шэртэжэ байһан элшэнэрэй хажууда сагаан хубсаһатай хоёр хүн гэнтэ бии болобо.

11– Галилейнхид! Юугээ тэнгэри өөдэ шэртэн зогсоо хүмта? Таанадһаа үргэгдэжэ абтаһан Иисүүс хараһаар байтар тэнгэридэ дэгдэһэндээл тон адляар бусажа ерэхэ, – гэжэ тэдэ хоёр хэлэбэ.

Матвийе һунгаба

12Тиигээд элшэнэр хотоһоо нэгэ модоной газарта оршодог Элеон хадаһаа буужа, Иерусалимдаа бусаба. 13Гэртээ ерэжэ, өөһэдынгөө байрладаг дээдэ дабхарай таһалгада оробод. Элшэнэрэй нэрэнүүдынь гэбэл, Пётр, Иоанн, Яков, Андрей, Филипп, Фома, Варфоломей, Матвей, Алфейн хүбүүн Яков, Симон Зелот, Яковай хүбүүн Иуда болоно. 14Тэдэнэр Иисүүсэй эхэ Мариятай, аха дүүнэртэйнь болон бусад эхэнэрнүүдтэй хамта сугларжа, ходо һанал сэдьхэлээрээ нэгэдэн зальбардаг байгаа.

15Хэдэн хоногой удаа зуун хорёод һүзэглэгшэдэй суглараад байхада Пётр бодожо хэлэбэ:

16– Аха дүүнэрни, аа! Искариодой Иудын хуби заяан тухай Арюун Һүлдын Давидаар уридшалан хэлүүлһэн Нангин Бэшэгэй мүрнүүд үнэн дээрээ бэелхэ ёһотой һэн. Иисүүсые бэдэрһэн зондо Иуда байһан газарыень заажа үгөө. 17Иуда бидэнтэй хамта Бурханда алба хэхээр һунгагдаһан хадаа бидэнэй нэгэн байгаа.

18(Тэрэ хүн өөрын хара хэрэгээр олоһон мүнгөөрөө газар худалдажа абаа. Тиигээд тэндээ толгойгоо сохин унажа, ехээр гэмтээ: гүзээниинь хахаржа, бүхы гэдэһэ доторынь гарашаба. 19Энээн тухай бүхы Иерусалимай зон дуулажа, тэрэ газарые өөрынгөө хэлэн дээрэ «Акэл-Дамаа» гэжэ нэрлээ, тэрэнь «Шуһата газар» гэһэн удхатай.)

20Энээн тухай «Бурханай дуунуудай ном» соо:

«Тэрэнэй гэр байрань хооһорог,

тэндэнь хэншье ажаһуухаа болиг», – гэжэ бэшэгдэнхэй.

Үшөө ондоо газарта:

«Тэрэнэй һуури ондоо хүн эзэлэг лэ», – гэжэ бэшээтэй байдаг.

21-22Тиимэһээ Иудые ондоо хүн һэлгэхэ ёһотой. Тэрэ хүн Иоаннай уһаар арюудхахаһаа эхилээд, Иисүүсэй тэнгэри өөдэ дэгдэһэн саг хүрэтэр үргэлжэ маанадтай хамта Эзэн Иисүүсые дахажа ябаһан хүнүүдэй нэгэн, Тэрэнэй амидыралгын гэршэнэрэй нэгэн байха ёһотой.

23Юст гэжэ ара нэрэтэй Иосиф (тэрэниие баһа Баршаббаа гэжэ нэрлэдэг һэн) ба Матвий хоёрые һунгаха гэһэн дурадхал оробо.

24-25– Эзэн, аа! Та хүнүүдэй һанал бодолые мэдэнэт. Тиимэһээ байха ёһотой газартаа ошохын тула албаяа хэхэеэ болиһон Иудын орондо алба хэжэ, элшэн болохыень эдэ хоёрой хэниие шэлэжэ абаһанаа бидэндэ харуулыт, – гэжэ суглараашад зальбарба.

26Жээрэб татахадань, Матвийда тудаа. Тиин Матвий арбан нэгэн элшэнэрээр хамтаран, арбан хоёрдохи элшэн болобо.

Currently Selected:

Хэрэгүүд 1: BurBBL2024

Highlight

Copy