Medhetethi 17
17
Qaxaroy Qaala Caaquwas Malla
1Abrames laythi uddufun tammanne uddufuna gidiya wode, Goday iyaw qoncidi, “Taani Ubbaa Danda7iya Xoossa, taw kiiteta, ta sinthan polo gida. 2Ta giddoninne ne giddon de7iya caaquwa ta minthana; ne zeretha ta taybanaw danda7etonada oothana” yaagis. 3Abramey ba som7uwara sa7an duge gufannin Xoossay iyako, 4“Heko ta new caaqiya caaqoy haysa; ne daro kawotethatas aawa gidana. 5Ta nena daro kawotethatas aawa oothana gisho hizape ne sunthay Abrame#17:5 Abrame: Ibraawetho doonan Abrame guussay bonchetida aawa guussu. gidi xeegetenna, shin ne sunthay Abrahaame#17:5 Abrahaame: Ibraawetho doonan Abrahaame guussay daro deriyas woyko kawotethatas aawa guussu. gidi xeegetana. 6Taani ne yeletetha darsana, ta nena daro dere kessana, kawoti neepe keyana. 7Taani newunne neepe guyen ne sheeshas Xoosse gidana mela merina caaquwa ta giddoninne ne giddon, neepe guyera yaa ne sheesha giddon, yeletethafe yeletetha gakanaw ta caaqas. 8Neeni ha77i bete gidada de7iya Kanaane biitta ubba newunne neepe guyera yaa ne sheeshas merina laata gidana mela new immana; qassi taani enta Xoossa gidana” yaagis.
9Qassika Xoossay Abrahaame, “Nena gidiko ta caaquwa naaga; neka neepe guyera yaa ne sheeshati, yeletethafe yeletetha gakanaw naagite. 10Ta gidduwaninne ne gidduwan, neepe guyera yaa ne sheesha giddon hinte naagana caaqoy haysa; hinte gidduwan de7iya adde ubbay qaxareto. 11Hinte addetetha koohuwa dookalite; hessi ta giddoninne hinte giddon de7iya caaquwas malla gidana. 12Hizape yaana yeletethan adde nayti ubbay yeletida hospuntho gallasan qaxareto. Ne son yeletidaysata gidin, woyko allagape miishen shametida aylleta gidin, ne zerethafe gidonayisata dookala. 13Ne son yeletidaysata gidin woyko miishen shametidaysati qaxaretanaw bessees. Haysan hinte ashuwan de7iya ta caaqoy merina caaqo gidana. 14Oonika qaxaretona de7iya adde asi ubbay ta caaquwa menthida gisho ba asaape duuxo” yaagis.
15Xoossay Abrahaameko, “Hizape ne mache sunthay Soora gidi xeegetofo; hachife doomidi I sunthay Saara geeteto. 16Taani iyo anjana; taani iipe new adde na7a immana. Taani iyo anjana gisho iya kawotethatas aayo gidana; deriya kawoti iipe keyana” yaagis.
17Abrahaamey ba som7uwara sa7an gufannidi, “Hay asaw, xeetu laytha asi na7a yelanee? Uddufun tammu laythi gidida Saarika na7a yelanee?” yaagidi ba wozanan miicis. 18Abrahaamey Xoossako, “Isma7eeli tana laattana mela ne iya anjarki” yaagis.
19Shin Xoossay, “Akay, ne machiya Saara new adde na7a yelana, neeni iya Yisaaqa#17:19 Yisaaqa: Ha suntha birshethay “I miicees” guussu gada sunthana. Taani iyape guyera yaa iya zerethas merina caaqo gidana mela iyara ta caaquwa caaqana. 20Isma7eelaba ne tana oychida oysha si7as. Taani iyaka anjana. Ta iya ayfisana, iya yeletetha loytha darsana. I tammanne nam7u haareysatas aawa gidana. Taani iya gita kawotethi kessana. 21Shin ta caaquwa wonto laythi hanoode Saara new yeliya na7a Yisaaqara caaqana” yaagis. 22Xoossay Abrahaamera odetidi ongidaape guye iyape shaaketidi pude bis.
23He gallas Abrahaamey ba na7a Isma7eela, ba son yeletidaysatanne ba miishen shammidaysata, ba son de7iya adde asa ubba Xoossay iya kiitidaysada qaxaris 24Abrahaamey qaxaretiya wode iyaw laythi uddufun tammanne uddufuna. 25Iya na7ay Isma7eeli qaxaretiya wode tammanne heedzu laytha na7a. 26Abrahaameynne iya na7a Isma7eeli nam7atika he gallas qaxaretidosona. 27Abrahaame son de7iya adde ubbay, iya son yeletidaysatinne miishen shammetidaysati ubbay iyara qaxaretidosona.
Currently Selected:
Medhetethi 17: GFBLVF
Highlight
Share
Copy
Want to have your highlights saved across all your devices? Sign up or sign in
The Word for the World International and The Word for the World Ethiopia
