Лука 8

Исускӧд ветлӧдлысь аньяс

1Та бӧрын Исус ветлӧдліс карысь карӧ, сиктысь сиктӧ да висьтавліс Ен Юралӧм йылысь Бур Юӧр. Сыкӧд ветлӧдлісны дас кыкнан велӧдчысьыс 2да нӧшта аньяс, кодъясӧс Сійӧ бурдӧдіс висьӧмъясысь да мездіс пеж ловъясысь. Тайӧ вӧліны: Магдала Марья, код пытшкысь петіс сизим пеж лов, 3Йоанна – Ирӧд овмӧсӧн веськӧдлысь Кузлӧн гӧтырыс, Сусанна да мукӧд. Овмӧснаныс найӧ отсасисны Исуслы.

Кӧдзысь йылысь велӧданвисьт

(Мт. 13:1-9; Мк. 4:1-9)

4Уна карысь локтісны йӧзыс Исус дінӧ. Сійӧ шыӧдчис на дорӧ велӧданвисьтӧн: 5«Морт кӧдзны петас. Кӧдзигас кымынкӧ кӧйдыс усяс туй бокӧ. Сэні найӧс таляласны, да енэжвыв лэбачьяс кокаласны. 6Кымынкӧ кӧйдыс усяс изъяинӧ, но ва тырмытӧмла петалігмозыс найӧ косьмасны. 7Кымынкӧ кӧйдыс усяс лежнӧг пӧвстӧ. Быдмигас лежнӧгыс пӧдтас петассӧ. 8Мукӧд кӧйдысыс усяс бур муӧ, быдмас да ваяс тусьсӧ сё пӧвстӧн». Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ!»

Велӧданвисьтсӧ гӧгӧрвоӧдӧм

(Мт. 13:10-23; Мк. 4:10-20)

9Велӧдчысьяс юалісны Исуслысь, кыдзи гӧгӧрвоны тайӧ велӧданвисьтсӧ.

10Исус шуис: «Тіянлы сетӧма тӧдны Ен Юралӧмлысь гусяторъяссӧ, а мукӧдыс кылӧны та йылысь велӧданвисьтъясысь: найӧ видзӧдӧны да оз аддзыны, кывзӧны да оз гӧгӧрвоны. 11Тайӧ велӧданвисьтыс петкӧдлӧ: кӧйдысыс – Ен кыв. 12Туй бокӧ усьӧм кӧйдысыс петкӧдлӧ: мортыс кылӧ Енлысь кывсӧ, но сэсся локтӧ омӧльыс да гусялӧ сьӧлӧмсьыс кывсӧ, медым мортыс эз эскы да эз мездмы. 13Изъяинӧ усьӧм кӧйдысыс петкӧдлӧ: мортыс кылӧ Енлысь кывсӧ да долыдпырысь босьтӧ сійӧс сьӧлӧмас, но вужъясьтӧмысла оз дыр эскы, ыштӧдӧмъяс дырйи сійӧ кежӧ эскӧмсьыс. 14Лежнӧг пӧвстӧ усьӧм кӧйдысыс петкӧдлӧ: мортыс кылӧ Енлысь кывсӧ, но быдлунъя тӧждыс, озырлуныс да лышкыда олӧмыс пӧдтӧ кӧдзӧм кывсӧ, и сійӧ оз вай вотӧссӧ. 15Бур муӧ кӧдзӧм кӧйдысыс петкӧдлӧ: мортыс кылӧ Енлысь кывсӧ, видзӧ сійӧс бур-сӧстӧм сьӧлӧмас да сьӧкыдлунсӧ венӧмӧн вайӧ вотӧс».

Тайӧс висьталӧм бӧрын Исус горӧдӧмӧн шуис: «Кодлӧн эм пель, мед кылӧ!»

Югдӧдантор йылысь велӧданвисьт

(Мк. 4:21-25)

16«Ӧзтӧм битӧ оз вевттьывны дозйӧн, оз сувтӧдны лабич улӧ. Сійӧс пуктӧны бикок вылӧ, медым пырысьяс аддзисны югыдсӧ. 17Став гусяыс воссяс да став дзебӧмаыс йӧзасяс, петас ортсӧ. 18Видзӧдӧй, кыдзи кывзанныд. Кодлӧн эм, сылы сетасны. Кодлӧн абу, сылысь весиг чайтанасӧ босьтасны».

Коді Исуслы мам да вок?

(Мт. 12:46-50; Мк. 3:31-35)

19Исус дінӧ локтісны мамыс да вокъясыс, но уна йӧз вӧсна найӧ эз вермыны матыстчыны Сы дінӧ. 20Исуслы висьталісны: «Мамыд да вокъясыд ывлаасӧсь, Тэнӧ кӧсйӧны аддзӧдлыны». 21Исус воча шуис: «Енлысь кывсӧ кывзысьяс да сы серти олысьяс – Меным мам да вокъяс».

Тӧвныр лӧньӧдӧм

(Мт. 8:23-27; Мк. 4:35-41)

22Ӧтчыд Исус Аслас велӧдчысьясыскӧд пуксис пыжӧ да шуис налы: «Вуджамӧй ты мӧдлапӧлӧ». Найӧ мӧдӧдчисны. 23Вуджиганыс Исус унмовсис. Ты вылын кыптіс ыджыд тӧвныр, и пыжыс кутіс тырны ванас. Найӧ вӧліны вӧянвыйынӧсь. 24Велӧдчысьяс садьмӧдісны Исусӧс шуалӧмӧн: «Велӧдысь, Велӧдысь! Вӧям!» Исус чеччис, ӧлӧдіс тӧвсӧ да гызьӧм васӧ. Ставыс ланьтіс, пуксис чӧв-лӧнь. 25Исус шуис велӧдчысьясыслы: «Кӧні тіян эскӧмныд?» Найӧ полӧмӧн-шензьӧмӧн ӧта-мӧдныслысь пондісны юасьны: «Коді Сійӧ? Весиг тӧлыс да ваыс кывзысьӧны Сылысь».

Пеж ловъясӧс вӧтлӧм

(Мт. 8:28-34; Мк. 5:1-20)

26Найӧ вуджисны Галилеялы паныда Гадара муӧ 27да чеччисны пыжсьыс. Исуслы паныдасис карсьыс пеж ловъясӧн кутӧм морт. Сійӧ пыр ветліс пасьтӧг, керкаын пыдди оліс шойгу кыртаын. 28Исусӧс аддзӧм бӧрын мортыс горзӧмӧн уськӧдчис Сы водзӧ да горӧдіс: «Мый Тэныд месянь колӧ, Исус, Медвылысса Енлӧн Пи? Кора Тэнӧ, эн пес менӧ!» 29Тадзи шуаліс, ӧд Исус тшӧктіс пеж ловлы петны морт пытшкысь. Пеж лов унаысь песлӧдлывлӧма тайӧ мортсӧ. Сійӧс кӧртавлісны чепъясӧн да видзисны дорӧмӧн, но сійӧ орйӧдлывліс кӧртӧдъяссӧ. Сэки пеж лов нуӧдлывліс сійӧс овтӧминӧ. 30Исус юаліс сылысь: «Мый тэнад нимыд?» Сійӧ вочавидзис: «Легион», ӧд сы пытшкын вӧлі уна пеж лов. 31Пеж ловъяс корисны Исусӧс, мед эз ысты найӧс пыдӧстӧминӧ.

32Сэні керӧсын йирсис ыджыд порсь чукӧр. Пеж ловъяс корисны Исусӧс, мед лэдзас найӧс пырны порсьяс пытшкӧ. Исус лэдзис. 33Пеж ловъяс петісны морт пытшкысь да пырисны порсьяс пытшкӧ. А порсьяс кыр йывсянь уськӧдчисны тыӧ да пӧдісны.

34Порсь видзысьяс пышйисны сэтысь, котӧрӧн мунісны карӧ да орчча сиктъясӧ висьтавны аддзывлӧмтор йывсьыс. 35Йӧзыс петісны видзӧдлыны лоӧмторсӧ. Найӧ локтісны Исус дінӧ да аддзисны сійӧ мортсӧ, код пытшкысь петісны пеж ловъяс. Сійӧ вӧлі ас вежӧрас, пукаліс Исуслӧн кок дорын паськӧма. Йӧзыс ёна повзисны. 36Аддзылысьяс висьталісны локтӧмаяслы, кыдзи бурдіс пеж лолӧн кутӧм мортыс. 37Сэки Гадара муын олысьяс корисны Исусӧс мунны ас дінсьыныс, сэтшӧм ыджыд полӧм босьтіс найӧс. Исус пуксис пыжӧ да бӧр мӧдӧдчис. 38Пеж лолысь мездмӧм морт вӧзйысис мунны Исускӧд, но Исус шуис сылы: 39«Мун гортад да висьтав, мый вӧчис тэныд Енмыс». Сійӧ муніс да висьталіс став карыслы, мый сылы вӧчис Исус.

Нывкаӧс ловзьӧдӧм да аньӧс бурдӧдӧм

(Мт. 9:18-26; Мк. 5:21-43)

40Ты мӧдлапӧлын Исусӧс паныдаліс уна йӧз, найӧ виччысьӧмаӧсь Сійӧс. 41Сэтчӧ локтіс Яир нима морт, синагогаса юралысь. Исус водзӧ уськӧдчӧмӧн Яир корис Сійӧс волыны сы ордӧ. 42Сылӧн дас кык арӧса ӧтка нылыс вӧлі куланвыйын.

Исус муніс Яиркӧд. Муніганыс йӧзыс быдласянь топӧдісны Исусӧс. 43Йӧз чукӧрын вӧлі ань, коді дас кык во чӧж висьӧма вир мунӧмӧн. Ассьыс став эмбурсӧ сійӧ сеталӧма бурдӧдысьяслы, но найӧ абу вермӧмаӧсь отсавны сылы. 44Сійӧ матыстчис Исус дінӧ мышсяньыс да инмӧдчыліс паськӧм дорышас. Вир мунӧмыс пырысьтӧм-пыр дугдіс. 45Исус юаліс: «Коді инмӧдчыліс Ме дінӧ?» Ставӧн соссисны. Петыр да мукӧдыс шуисны: «Велӧдысь, йӧзыс быдласянь топӧдӧны Тэнӧ, а Тэ юасян, коді инмӧдчыліс Тэ дінӧ». 46«Кодкӧ инмӧдчыліс Ме дінӧ. Ме кылі, мый Ме пытшкысь петіс вын», – шуис Исус. 47Ань гӧгӧрвоис, мый сійӧс казялісны. Дзӧригтыр сійӧ матыстчис да уськӧдчис Исус водзӧ. Став йӧз водзас висьталіс Исуслы, мыйла инмӧдчыліс Сы дінӧ да кыдзи дзик пыр бурдіс. 48Исус шуис аньлы: «Нылӧй, эскӧмыд мездіс тэнӧ. Мун повтӧг».

49Исуслӧн сёрнитігӧн синагогаса юралысьлӧн гортсяньыс локтіс морт да шуис: «Нылыд куліс, эн мудзтӧд Велӧдысьсӧ». 50Исус кыліс тайӧс да шуис Яирлы: «Эн пов, сӧмын эскы, и нылыд ловъя лоас». 51Яир керка дорӧ воӧм бӧрын Исус босьтіс Аскӧдыс Петырӧс, Иоанӧс, Яковӧс да нывкалысь бать-мамсӧ, мукӧдсӧ эз лэдз пырнысӧ. 52Ставныс сыркъялӧмӧн бӧрдісны кулӧм нывка вӧсна. Исус шуис: «Энӧ бӧрдӧй, сійӧ эз кув, сійӧ узьӧ». 53Исус вылын пондісны серавны, ӧд тӧдісны, мый нывкаыс куліс. 54Ставнысӧ вӧтлӧм бӧрын Исус босьтіс нывкаӧс киӧдыс да гораа шуис: «Нылӧй, чеччы!» 55Сэки лолыс бӧр пырис нывка пытшкӧ, и сійӧ пырысь-пыр чеччис. Исус тшӧктіс вердны нывкаӧс. 56Бать-мамыс чуймисны, но Исус ӧлӧдіс найӧс, медым эз висьтавлыны лоӧмтор йывсьыс мукӧдыслы.

Currently Selected:

Лука 8: КБ

Highlight

Copy